Иегъовӕйыл дӕхи бӕтт
1. Иу хо ӕцӕгады фӕндагыл куыд цыд, уый тыххӕй цы бамбӕрста?
1 «А-фӕстаг 20 азы ӕцӕгады фӕндагыл дзой-дзойгӕнгӕ цыдтӕн: цыдтӕн ӕрмӕст фембӕлдтӕм ӕмӕ уацамындмӕ»,— ӕргом загъта иу чырыстон хо. Фӕлӕ дарддӕр афтӕ зӕгъы: «Ахӕм хатдзӕгмӕ ӕрцыдтӕн: фӕмбӕлдтӕм цӕуын ӕмӕ хъусын кӕнын кӕд ахсджиаг хъуыддаг у, уӕддӕр мын зын сахат ӕрмӕст уыдон ме уӕнгты тых нӕ бауадздзысты. [...] Ныр ӕй ӕмбарын, кӕй мӕ хъӕуы мӕ зонд аивын ӕмӕ райдайын лӕмбынӕг ахуыр кӕнын Библи, цӕмӕй Иегъовӕйы хуыздӕр базонон, бауарзон ӕй ӕмӕ йӕ Фырт адӕмӕн цы хӕрзты бацыд, уымӕй бузныг уон».
2. Иегъовӕимӕ ӕнгомдӕр уӕм, уый ахсджиаг цӕмӕн у?
2 Иу ран ӕнцад бадгӕйӕ адӕймаг Иегъовӕйы ӕввахс хӕлар никуы суыдзӕн. Стӕй ӕрмӕст фембӕлдтӕм цӕуын ӕмӕ хъусын кӕныны фӕрцы дӕр адӕймаг Хуыцаумӕ тынг нӕ баввахс уыдзӕн. Иегъовӕимӕ ӕрвылбон дӕр куы нӕ ныхас кӕнӕм, уӕд нын, кӕддӕр нӕ зӕрдӕйӕн адджын чи уыд, фӕлӕ рагӕй кӕй нал федтам, ахӕм хӕлары хуызӕн суыдзӕн (Рарг. 2:4). Ӕркӕсӕм, Библи куы ахуыр кӕнӕм ӕмӕ куы кувӕм, уӕд Иегъовӕимӕ куыд бангомдӕр уыдзыстӕм, уымӕ (Пс. 25:14, НД [24:14]).
3. Цӕмӕй Иегъовӕмӕ ноджы тынгдӕр баввахс уӕм, уый тыххӕй нӕ Библи куыд ахуыр кӕнын хъӕуы?
3 Хъӕуы кувын ӕмӕ арф хъуыды кӕнын. Библи ахуыргӕнгӕйӕ цы ӕрмӕг ӕвзарӕм, уый нын цӕмӕй нӕ зӕрдӕ фидар кӕна, уымӕн ӕгъгъӕд нӕу ӕрмӕджы ӕрмӕстдӕр сӕйраг хъуыдытӕ хахх кӕнын ӕмӕ дзы цы стихтӕ ис, уыдон Фыстады бакӕсын. Цы бакӕсӕм, ууыл хъӕуы арф хъуыды кӕнын: цы дзуры ацы ӕрмӕг Иегъовӕйы хъуыддӕгтӕ, уагӕвӕрдтӕ ӕмӕ йӕ удыхъӕды тыххӕй? (Рац. 33:13). Хуыцауы хъуыддӕгтӕ куы ӕмбарӕм, уӕд нын не ’нкъарӕнтыл ӕндавдзысты ӕмӕ нӕ цардыл хъуыды кӕндзыстӕм (Пс. 118:35, 111). Библи ахуыргӕнгӕйӕ хъуамӕ нӕ размӕ ӕвӕрӕм нысан: ахуыры руаджы Иегъовӕмӕ ноджы тынгдӕр баввахс уон (Иак. 4:8). Нӕ Библийы ахуыр цӕмӕй ахуыры хуызӕн уа, уый тыххӕй хъӕуы рӕстӕг, хорз бынат, стӕй уый искуы-иухатт хъуамӕ ма уа, фӕлӕ нӕхи ахуыр кӕнӕм уый иудадзыг кӕныныл (Дан. 6:10). Кӕд тынг ӕнӕвдӕлон адӕймаг дӕ, уӕддӕр Иегъовӕйы диссаджы миниуджытыл хъуыды кӕнынӕн алы бон рӕстӕг ссарыс? (Пс. 118:147, 148; 142:5).
4. Библи ахуыр кӕныны размӕ-иу куы скувӕм, уӕд нӕ уый Иегъовӕмӕ куыд баввахсдӕр кӕндзӕн?
4 Кувгӕйӕ ма нӕ ӕнӕмӕнг зӕрдиагӕй курын хъӕуы цы ахуыр кӕнӕм, уый нын цӕмӕй ахъаз уа. Цӕмӕй нын Библийы ӕцӕгад нӕ зӕрдӕтӕ агайа ӕмӕ нӕ «Хуыцауӕн нымд кӕнгӕйӕ ӕмӕ тасимӕ» лӕггад кӕнынмӕ разӕнгард кӕна, уый тыххӕй нӕ хъӕуы Хуыцауы сыгъдӕг уд (Дзут. 12:28). Уымӕ гӕсгӕ нӕ ахуыры размӕ алкӕддӕр хъӕуы Иегъовӕйӕ йӕ сыгъдӕг уд курын (Матф. 5:3). Библийы стихтыл куы фӕхъуыды кӕнӕм, стӕй Иегъовӕйы организаци цы ӕххуысчингуытӕ уадзы, уыдон куы фӕиртасӕм, уӕд Иегъовӕйӕн нӕ зӕрдӕйы дуӕрттӕ байгом кӕнӕм (Пс. 61:9). Нӕ ахуыр ахӕм уагыл куы фӕцӕуы, уӕд уымӕй дӕр Хуыцауӕн лӕггад кӕнӕм: ӕвдисӕм, ӕнувыд ыл кӕй стӕм, уый ӕмӕ нын ноджы ӕввахсдӕр хӕлар свӕййы (Иудӕ. 20, 21).
5. Алы бон дӕр нӕ Хуыцауы Ныхасыл арф хъуыды кӕнын цӕмӕн хъӕуы?
5 Иннӕтимӕ нӕ хӕлардзинад фидар кӕнын куыд хъӕуы, афтӕ Иегъовӕимӕ дӕр нӕ хӕлардзинад хъӕуы иудадзыг фидар кӕнын, цалынмӕ цӕрӕм, уӕдмӕ. Уымӕ гӕсгӕ алы бон дӕр «ӕлхӕнӕм рӕстӕг» Иегъовӕмӕ ӕввахсӕй-ӕввахсдӕр кӕнынӕн, ӕмӕ нӕм уӕд уый дӕр баввахс уыдзӕн (Пс. 1:2, 3; Еф. 5:15, 16, НД).