Уӕ бинонтӕ цӕттӕ сты ирвӕзындзинадмӕ?
1 Библийы пехуымпарӕдтӕ кӕй ӕххӕст кӕнынц, уый фидар бӕлвырдгӕнӕн у, тынг тагъд ацы фыддунейӕн йӕ кӕрон кӕй ӕрцӕудзӕн. Абон мах цы уӕззау рӕстӕг цӕрӕм, уый у, Доны хъаймӕты размӕ куыддӕриддӕр уыд, афтӕ (Матф. 24:37–39). Ной бӕллӕхы рӕстӕг аирвӕзт, уымӕн ӕмӕ «цыди ӕцӕг Хуыцауимӕ» (Райд. 6:9). Ной йӕ бинонты дӕр Йегъовӕйы закъӕттыл кӕй ахуыр кодта, уый бӕрӕг у, уымӕн ӕмӕ уыдон дӕр аирвӕзтысты. Мах та Нойы цӕмӕй бафӕзмӕм ӕмӕ нӕ бинонты куыд цӕттӕ кӕнӕм, цӕмӕй, ацы фыддуне куы фесӕфа, уӕд удӕгасӕй баззайой?
2 Рӕстдзинад хъусынгӕнӕг. Ной 40–50 азы бӕрц уыд «рӕстдзинад хъусынгӕнӕг» (2 Пет. 2:5). Хуыцауы ныхмӕ цы зӕдтӕ рацыд, уыдоны зондӕй уыдаид ӕви нӕ, уӕддӕр ыл йӕ сыхӕгтӕ худтысты. Мах дӕр арӕх сӕмбӕлӕм, чи нӕм нӕ хъусы ӕмӕ ныл чи худы, ахӕм адӕмыл, ӕмӕ уымӕй бӕрӕг у, тагъд ацы дунейы кӕрон кӕй ӕрцӕудзӕн (2 Пет. 3:3, 4). Фӕлӕ Нойы рӕстӕджы чи цард, уыдонӕй уӕлдай нӕм абон бирӕ адӕм байхъусы ӕмӕ Йегъовӕйӕн лӕггад кӕнын райдайы (Ис. 2:2). Дарддӕр дӕр куы хъусын кӕнӕм, ӕрмӕстдӕр уӕд фервӕзын кӕндзыстӕм нӕхи дӕр ӕмӕ нӕм чи хъусы, уыдоны дӕр (1 Тим. 4:16). Ныййарджытӕ хъуамӕ сӕ сывӕллӕтты ахуыр кӕной ныхасӕй дӕр ӕмӕ хъуыддагӕй дӕр, хъусын кӕнын ӕнӕмӕнг кӕй хъӕуы, ууыл (2 Тим. 4:2).
3 «Растдӕр афтӕ» бакодта. Ной ӕмӕ йӕ бинонты ирвӕзындзинад баст уыд, Йегъовӕйы амындтӕм куыд лӕмбынӕг байхъуыстаиккой, уымӕй (Райд. 6:22). Мах дӕр хъуамӕ «коммӕгӕс» уӕм Библи ӕмӕ ӕууӕнкджын цагъары разамындӕн (Иак. 3:17). Иу бинонты хистӕр Йегъовӕйы организацийы амындтӕм зӕрдиагӕй хъуыста. Зӕгъӕм, алы къуыри дӕр-иу сӕм уыд бинонты ахуыр ӕмӕ алы улӕфгӕ бонты дӕр иумӕ цыдысты уацамынды. Архайдта-иу, цӕмӕй алы къуыри дӕр сывӕллӕттӕй искӕимӕ хъусын кӕнынмӕ ацыдаид. «Растдӕр афтӕ» кӕй кодта, уый сывӕллӕттыл тынг фӕзынд – ӕхсӕзӕй дӕр иузӕрдионӕй лӕггад кӕнынц Йегъовӕйӕн.
4 Ацы дунейӕн йӕ кӕрон ӕнӕнхъӕлӕджы ӕрцӕудзӕн (Лук. 12:40). Нойы куы фӕзмӕм ӕмӕ, фервӕзынӕн цы уырнындзинад хъӕуы, уый нӕм куы уа, уӕд зӕгъӕн уыдзӕн, мах дӕр ӕмӕ нӕ бинонтӕ дӕр цӕттӕ кӕй стӕм! (Дзут. 11:7).