Фарстаты асыкк

◼ Кӕмӕн ис телефонӕй ӕмбырды программӕмӕ хъусыны фадат?

Бирӕ ӕмбырдты ахӕм хъуыддаг спълан кодтой, цӕмӕй, исчи рынчын куы уа кӕнӕ ӕндӕр исты аххосӕй йӕ бон ӕмбырдмӕ ’рбацӕуын куы нӕ уа, уӕд ын фадат уа программӕмӕ телефонӕй байхъусынӕн. Уыцы бар кӕмӕн раттӕн ис, уый сбӕрӕг кӕнынӕн хъӕуы уӕззау зондӕй архайын ӕмӕ алцыдӕр лӕмбынӕг пълан кӕнын. Уымӕ гӕсгӕ хистӕр нӕлгоймӕгтӕ хъуамӕ уыцы хъуыддагмӕ сӕ хъус дарой, цӕмӕй алцыдӕр «уаг ӕмӕ ӕгъдауыл» уа (1 Кор. 14:40).

Хистӕр нӕлгоймӕгтӕ хъуамӕ уыцы бар раттой, уӕззау низы аххосӕй кӕнӕ ӕндӕр цӕйдӕр тыххӕй ӕмбырдмӕ цӕуын йӕ бон кӕмӕн нӕу, ахӕм хъусынгӕнджытӕн. Рӕстӕгмӕ рынчын чи у, уыдонӕн, стӕй Библи зӕрдиагӕй чи ахуыр кӕны, уыдонӕй хуысгӕ рынчын чи у, уымӕн дӕр ахӕм бар лӕвӕрд уыдзӕн. Фӕлӕ сын программӕмӕ телефонӕй байхъусыны фадат куы нӕ уа, уӕд та сын ӕй ис кассетӕйыл кӕнӕ дискыл ныффыссӕн.

Кӕй зӕгъын ӕй хъӕуы, адӕймаг ӕмбырды йӕхӕдӕг куы уа, уый ницӕимӕ ис абарӕн. Паддзахады залмӕ куы ’рбацӕуӕм, уӕд нӕ «кӕрӕдзийы уырнындзинадӕй бафидар вӕййӕм» ӕмӕ ногтӕн ӕххуыс кӕнӕм, цӕмӕй ӕмбырдӕн аргъ кӕной ӕмӕ ӕмбарой фембӕлдтӕм цӕуын куыд ахсджиаг у, уый. Ӕмбырды куы вӕййӕм, уӕд нын стыр пайда ’рхӕссынц равдыстытӕ. Хистӕр нӕлгоймӕгтӕн та фадат вӕййы, цӕмӕй нын баххуыс кӕной. Сӕйраджыдӕр та ӕмбырды уынӕм, нӕ хотӕ ӕмӕ нӕ не ’фсымӕртӕ куыд уарзынц, уый. Иу ацӕргӕ хойы Паддзахады залы чидӕр куы ахъӕбыс кодта, уӕд загъта: «Ацы циндзинад банкъарӕн ис ӕрмӕстдӕр ӕмбырды» (Ром. 1:11, 12).

Аннӕ «ӕдзух уыд кувӕндоны». Аннӕйау абон бирӕ ацӕргӕ хотӕ ӕмӕ ’фсымӕртӕ ӕдзух вӕййынц фембӕлдты, сӕ уавӕртӕ ӕмӕ сын се ’нӕниздзинад куы фӕамонынц, уӕд (Лук. 2:36, 37). Кӕд сын фадат ис фембӕлдты программӕмӕ телефонӕй байхъусынӕн, уӕд дӕр ӕй ӕмбарынц ӕмбырдтӕм цӕуын ахсджиаг кӕй у, уый. Цӕй уӕдӕ мах дӕр, уыцы хоты ӕмӕ ’фсымӕрты фӕзмӕм ӕмӕ ӕппӕт тыхтӕй архайӕм, цӕмӕй, не стыр Хуыцау Йегъовӕйӕн кӕм кувӕм, уыцы ӕмбырдтӕм цӕуӕм (Пс. 95:1–3, 6; 122:1).