Библийы ахуыры рӕстӕг нӕхи цӕмӕй хъуамӕ хизӕм

Ӕгӕр бирӕ ма дзур. Афтӕ дӕм ма кӕсӕд, ӕмӕ хъуамӕ ахуыргӕнинагӕн алцыдӕр дӕхӕдӕг бамбарын кӕнай. Чырысти-иу адӕммӕ фарстатӕ лӕвӕрдта, цӕмӕй хъуыды кодтаиккой ӕмӕ-иу раст хатдзӕгмӕ ӕрцыдаиккой (Мф 17:24–27). Фарстаты фӕрцы адӕймагӕн йӕ хъуыдытӕ дзурын ӕнцондӕр вӕййы. Уыдоны фӕрцы ма дӕ бон у базонын, ӕрмӕг бамбӕрста ӕви нӕ ӕмӕ, цӕуыл ӕууӕнды ӕмӕ цӕуыл не ’ууӕнды, уый. Фарста куы раттай, уӕд-иу адӕймаджы ахъуыды кӕнын бауадз. Раст дзуапп куы нӕ ратта, уӕд-иу ӕй ма бараст кӕн, фӕлӕ-иу ӕм ахӕм фарстатӕ ратт, цӕмӕй йӕхӕдӕг раст хатдзӕгмӕ ӕрцӕуа. Цӕмӕй ног хъуыдытӕ хуыздӕр бамбара, уый тыххӕй-иу сындӕгдӕр дзур.

Дӕ ныхас зынӕмбарӕн ма уӕд. Цы фарстайыл ныхас кӕнут, уый фӕдыл цыдӕриддӕр зоныс, уыдӕттӕ иууылдӕр дзурын нӕ хъӕуы (Ин 16:12). Ныхас-иу кӕн абзацы сӕйраг хъуыдыйыл. Лыстӕг хабӕрттӕ цыфӕнды цымыдисаг куы уой, уӕддӕр сыл бирӕ куы дзурай, уӕд ахуыргӕнинаджы ӕргом сӕйраг хъуыдытӕй ӕндӕр цӕмӕдӕр аздахдзынӕ. Ахуыргӕнинаг сӕйраг хъуыды куы бамбара, уӕд-иу иннӕ абзацмӕ ахизут.

Ӕрмӕст ӕрмӕг рацӕуыныл ма архай. Махӕн нӕ нысан ӕрмӕг рацӕуын нӕу, фӕлӕ адӕймаджы зӕрдӕмӕ фӕндаг ссарын (Лк 24:32). Пайда кӕн, Хуыцауы Ныхасӕн цы тых ис, уымӕй – йе ’ргом ын фылдӕр здах, урочы цы сӕйраг стихтӕ ис, уыдонмӕ (2Кр 10:4; Дзт 4:12). Хуымӕтӕг цӕвиттонтӕ-иу хӕсс. Ахуыргӕнинаг цы зындзинӕдтыл ӕмбӕлы ӕмӕ цӕуыл ӕууӕнды, уыдӕттыл-иу ахъуыды кӕн, ӕмӕ-иу урок афтӕ равзар, цӕмӕй йын фылдӕр пайда ӕрхӕсса. Ахӕм фарстатӕ-иу ӕм ратт: «Ацы урочы цы базыдтай, уый тыххӕй цы хъуыды кӕныс? Йегъовӕйы тыххӕй дзы цы базыдтам? Цы уынаффӕ дзы ис, уымӕ гӕсгӕ куы архайай, уӕд дын цы пайда фӕуыдзӕн?»