2 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн
Библийы ахуырмӕ цӕттӕ кӕнын
1 Адӕймагимӕ Библи ахуыр кӕнын ӕрмӕст уый нӕу, ӕмӕ ӕрмӕгыл ӕрдзурӕм ӕмӕ амынд стихтӕ бакӕсӕм. Ӕрмӕг афтӕ хъуамӕ бацамонӕм, цӕмӕй ахуыргӕнинаджы зӕрдӕ бацагайӕм. Уымӕн та хъӕуы хорз цӕттӕ кӕнын ӕмӕ алы ахуыргӕнинагыл дӕр хъуыды кӕнын (Ӕмб. 15:28).
2 Куыд хъӕуы цӕттӕ кӕнын. Фыццаг уал уыцы адӕймаджы тыххӕй Иегъовӕмӕ скув. Радзур ын, цы йӕ къуылымпы кӕны ӕмӕ йын йӕ зӕрдӕйы дуар байгом кӕнынӕн ӕххуыс ракур (Кол. 1:9, 10). Цӕмӕй сӕр кӕнӕ урочы мидис хорз бамбарай, уый тыххӕй ахъуыды кӕн йӕ номыл, сӕргӕндтӕ ӕмӕ нывтыл. Дӕхимӕ ратт ахӕм фарст: «Ацы ӕрмӕджы нысан цы у?». Уый дын ахуыры рӕстӕджы баххуыс кӕндзӕн сӕйраг хъуыдытӕм хъус ӕрдарынӕн.
3 Абзацтӕм фӕд-фӕдыл лӕмбынӕг ӕркӕс. Мыхуыр фарстытӕн дзуаппытӕ ссар ӕмӕ ӕрмӕстдӕр сӕйраг дзырдтӕ ӕмӕ дзырдбӕстытӕ бахахх кӕн. Ахъуыды кӕн, амынд стихтӕ абзацы сӕйраг хъуыдыимӕ куыд баст сты, ӕмӕ дзы ахуыры рӕстӕджы кӕцытӕ хъӕудзӕн бакӕсын, уыдон банысан кӕн. Чи зоны дӕ бафӕнда чиныджы кӕнӕ брошюрӕйы фӕрстыл уыцы стихты фӕдыл цыбыртӕй истытӕ афыссын. Ахуыргӕнинаг хъуамӕ ӕмбара, цы ахуыр кӕны, уый Хуыцауы Ныхасыл кӕй ӕнцайы (1 Фес. 2:13).
4 Ахуыргӕнинагыл хъуыды кӕн. Ныр та ӕрмӕгмӕ ӕркӕс, кӕимӕ ахуыр кӕныс, уыцы адӕймаджы цӕстӕй. Ахъуыды кӕн, цы фарстытӕ дӕм раттид ӕмӕ йын цавӕр хъуыдытӕ уаиккой зын бамбарӕн кӕнӕ зынтӕй цӕуыл сразы уаид. Дӕхи бафӕрс: «Цы йӕ хъӕуы бамбарын кӕнӕ йӕ цӕуыл хъӕуы бакусын, цӕмӕй йӕ уырнындзинад рӕза? Куыд ын ис йӕ зӕрдӕ бацагайӕн?». Цы хатдзӕгтӕм ӕрцӕуай, уыдонмӕ гӕсгӕ архай. Цӕмӕй ахуыргӕнинаг цавӕрдӕр хъуыды кӕнӕ стих бамбара, уый тыххӕй дӕ хатт, чи зоны, бахъӕуа цӕстуынгӕ цӕвиттон, ӕмбарынгӕнӕн ӕрмӕг ссарын кӕнӕ та цалдӕр фарсты бацӕттӕ кӕнын (Неем. 8:8). Фӕлӕ темӕмӕ чи нӕ хауы ӕмӕ йӕ чи нӕ халы, ахӕм хъуыддӕгтыл ма дзур. Ахуыры кӕрон, цы рацыдыстут, уый цыбыртӕй куы сфӕлхат кӕнат, уӕд ахуыргӕнинаг сӕйраг хъуыдытӕ хуыздӕр бахъуыды кӕндзӕн.
5 Цӕй стыр цин банкъарӕм, ног ахуыргӕнинӕгтӕ Иегъовӕйы кадӕн рӕстдзинады дыргъ куы фӕхӕссынц! (Фил. 1:11). Цӕмӕй уыцы нысан сӕ къухы бафта, уый тыххӕй алы хатт дӕр семӕ Библи ахуыр кӕнынмӕ дӕхи дзӕбӕх цӕттӕ кӕн.