Хорз цӕттӕ кӕн адӕмы ахуыр кӕнынмӕ
1. Ӕппӕт хъарутӕй цӕмӕн хъуамӕ архайӕм, цӕмӕй адӕймаг аргъ кӕна, цы базоны, уымӕн?
1 Кӕд нӕ фӕнды, цӕмӕй, Библи кӕимӕ ахуыр кӕнӕм, уыцы адӕймаг Йегъовӕйӕн лӕггад кӕна, уӕд хъуамӕ нӕхи хорз цӕттӕ кӕнӕм ахуырмӕ. Ӕппӕт хъарутӕй архайӕм, цӕмӕй аргъ кӕна, Библийӕ цы базоны, уымӕн. Уӕд адӕймаджы бафӕнддзӕн Хуыцауӕн лӕггад кӕнын (Дык. з. 6:5; Ӕмб. 4:23; 1 Кор. 9:26). Уый нӕ къухы куыд бафтдзӕн?
2. Цӕмӕй Библийы ахуырмӕ хорз бацӕттӕ кӕнӕм, уый тыххӕй Хуыцаумӕ кувын цӕмӕн хъӕуы?
2 Ахуыры размӕ-иу скув. Адӕймаджы зӕрдӕйы мыггаг Йегъовӕ кӕй сзайын кӕны, уымӕ гӕсгӕ хорз уаид ахуырмӕ цӕттӕ кӕнгӕйӕ скувын, уыцы адӕймагӕн бӕлвырдӕй баххуыс кӕнын кӕм хъӕуы, уый тыххӕй (1 Кор. 3:6; Иак. 1:5). Уый фӕрцы ма нӕ бон уыдзӕн бамбарын, адӕймагӕн ма куыд ис баххуыс кӕнӕн, цӕмӕй Йегъовӕйы фӕндон «бӕлвырдӕй базона» (Кол. 1:9, 10).
3. Библийы ахуырмӕ цӕттӕ кӕнгӕйӕ нӕ бон куыд у адӕймагыл хъуыды кӕнын?
3 Адӕймагыл хъуыды кӕн. Чырысти зыдта: цӕмӕй адӕмы зӕрдӕтӕм фӕндаг ссардтаид, уый тыххӕй хъуамӕ хъуыды кодтаид, чи йӕм хъуыста, уыцы адӕмыл. Чырыстимӕ ӕппынкъаддӕр дыууӕ хатты радтой уыцы иу фарста: «Цы кӕнын мӕ хъӕуы, цӕмӕй мын ӕнусон цард уа?» Фӕлӕ Йесо дыууӕ хатты уыцы иу дзуапп нӕ радта (Лук. 10:25–28; 18:18–20). Уӕдӕ мах дӕр цӕттӕ кӕнгӕйӕ хъуамӕ хъуыды кӕнӕм нӕ ахуыргӕнинагыл. Цавӕр стихтӕ бакӕсдзыстӕм иумӕ? Цас ӕрмӕг рацӕудзыстӕм йемӕ? Цавӕр хъуыды йын у зын бамбарын кӕнӕ цӕуыл нӕ разы кӕны? Адӕймаг нӕм цавӕр фарстатӕ ратдзӕн, ууыл рагацау куы хъуыды кӕнӕм, уӕд дзуапп раттынмӕ хуыздӕр цӕттӕ уыдзыстӕм.
4. Хорз цӕттӕ кӕнынмӕ цы хауы?
4 Ӕрмӕгмӕ-иу рагацау ӕркӕс. Ӕрмӕг куыдфӕнды хорз ма зонӕм, уӕддӕр ыл алы адӕймагимӕ дӕр фыццаг хатт фӕныхас кӕнӕм. Кӕд нӕ фӕнды адӕймаджы зӕрдӕмӕ фӕндаг ссарын, уӕд хъуамӕ алы ахуырмӕ дӕр нӕхи хорз цӕттӕ кӕнӕм. Уый та ууыл дзурӕг у, цӕмӕй нӕхӕдӕг дӕр кӕнӕм, нӕ ахуыргӕнинаджы цӕмӕ разӕнгард кӕнӕм, уый. Ӕрмӕг рагацау цӕттӕ кӕнгӕйӕ стихтӕ дӕр кӕсӕм ӕмӕ-иу ахъуыды кӕнӕм, адӕймагӕн куыд баххуыс кӕндзысты, ууыл, стӕй ма ис сӕйраг хъуыдытӕ дӕр бахахх кӕнӕн (Ром. 2:21, 22).
5. Нӕ бон куыд у Йегъовӕйы фӕзмын?
5 Йегъовӕйы тынг фӕнды, цӕмӕй, Библи чи ахуыр кӕны, уыцы адӕймаджы уырнындзинад фидар кӕна (2 Пет. 3:9). Алы Библийы ахуырмӕ цӕттӕ кӕнынӕн рӕстӕг куы хицӕн кӕнӕм, уӕд фӕзмдзыстӕм Йегъовӕйы.