Бафснай йӕ
Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн
Ацы уӕлӕмхасӕн сыфы ис, «Нӕ хъусын кӕныны хъуыддаг»-ы цы статьятӕ уыдис, «Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн», зӕгъгӕ, уырдыгӕй сӕйраг хъуыдытӕ. Хорз уаид, алчидӕр нӕ ацы сыф куы бафснаид, ӕмӕ искӕимӕ Библи куы ахуыр кӕна, уӕд-иу ӕм куы ӕркӕсид. Уымӕй уӕлдай ма дзы спайда кӕнӕн уыдзӕн уацамындон фембӕлдты ӕмӕ уацамындӕн дзуапдӕттӕг цӕстдарӕг чиныгахуыры къордтӕ куы бӕрӕг кӕна, уӕд.
1 хай: Библийы ахуырыл цы нымайӕм?
Кӕд Библийы руаджы ӕмӕ ахуыргӕнӕн ӕрмӕджытӕй искӕцыйы руаджы искӕимӕ иудадзыг Библийӕ цавӕрдӕр фарстытыл фӕныхас кӕныс (цалдӕр минуты дӕргъы дӕр), уӕд уый у Библийы ахуыр. Хыгъды йӕ фыссӕн ис, кӕд адӕймаджы фӕнды дарддӕр ахуыр кӕнын, ӕмӕ кӕд, ахуыр куыд фӕцӕуы, уый равдисыны фӕстӕ дыууӕ ахуыры ауагътай, уӕд (km 7/04 1 ф.).
Цавӕр литературӕйы ӕххуысӕй ис Библи ахуыр кӕнӕн
◼ «Хуыцау нӕ цы домы?»
◼ «Ӕнусон цардмӕ кӕнӕг базонынад»
◼ «Кувут Иунӕг Ӕцӕг Хуыцауӕн»
◼ «Дӕ бон у, ӕмӕ Хуыцауы хӕлар уай!» (фаг ахуырад кӕмӕ нӕй кӕнӕ кӕсын хорз чи нӕ зоны, уыдонимӕ ахуыр кӕнынӕн).
2 хай: Библийы ахуырмӕ цӕттӕ кӕнын
Ӕрмӕг афтӕ хъуамӕ бацамонӕм, цӕмӕй ахуыргӕнинаджы зӕрдӕ бацагайӕм. Уый тыххӕй та хъӕуы хорз цӕттӕ кӕнын ӕмӕ алы ахуыргӕнинагыл дӕр хъуыды кӕнын (km 8/04 1 ф.).
Куыд хъӕуы цӕттӕ кӕнын
◼ Ахъуыды кӕн сӕр кӕнӕ урочы номыл, сӕргӕндтӕ ӕмӕ нывтыл.
◼ Мыхуыр фарстытӕн дзуаппытӕ ссар ӕмӕ ӕрмӕстдӕр сӕйраг дзырдтӕ ӕмӕ дзырдбӕстытӕ бахахх кӕн.
◼ Амынд стихтӕй ахуыры рӕстӕджы кӕцытӕ хъӕудзӕн бакӕсын, уыдон банысан кӕн. Чиныджы кӕнӕ брошюрӕйы фӕрстыл уыцы стихты фӕдыл цыбыртӕй истытӕ афысс.
◼ Бацӕттӕ кӕн, цы рацыдыстут, уый ахуыры кӕрон цыбыртӕй куыд сфӕлхат кӕндзыстут, уый.
Ахуыргӕнинагыл хъуыды кӕн
◼ Кӕимӕ ахуыр кӕныс, уыцы адӕймаджы тыххӕй Иегъовӕмӕ скув.
◼ Ахъуыды кӕн, цы фарстытӕ дӕм раттид ӕмӕ йын цавӕр хъуыдытӕ уаиккой зын бамбарӕн кӕнӕ зынтӕй цӕуыл сразы уаид.
◼ Ахъуыды кӕн: цы йӕ хъӕуы бамбарын кӕнӕ йӕ цӕуыл хъӕуы бакусын, цӕмӕй йӕ уырнындзинад рӕза? Куыд ын ис йӕ зӕрдӕ бацагайӕн?
◼ Куы хъӕуа, уӕд бацӕттӕ кӕн цӕстуынгӕ цӕвиттон, ӕмбарынгӕнӕн ӕрмӕг кӕнӕ та цалдӕр фарсты, цӕмӕй ахуыргӕнинаг цавӕрдӕр хъуыды кӕнӕ стих хуыздӕр бамбара.
3 хай: Фыстад арӕхстджынӕй амон
Адӕмимӕ Библи уымӕн ахуыр кӕнӕм, цӕмӕй суой Чырыстийы ахуыргӕнинӕгтӕ. Хуыцауы Ныхасы цы ахуырӕдтӕ ис, уыдон сын ӕмбарын кӕнӕм ӕмӕ сын ӕххуыс кӕнӕм, цӕмӕй сӕ сӕ зӕрдӕмӕ исой ӕмӕ сӕ цард уыдонмӕ гӕсгӕ аразой (Матф. 28:19, 20; 1 Фес. 2:13). Уымӕ гӕсгӕ нӕ ахуыры астӕуцӕджындз хъуамӕ уа Фыстад (km 11/04 4 ф.).
Амон Хуыцауы Ныхасӕй
◼ Ахуыргӕнинагӕн бацамон, стихтӕ Библийы куыд агургӕ сты, уый.
◼ Дӕтт фарстытӕ. Ахуыргӕнинагӕн стихтӕ дӕхӕдӕг ма ӕмбарын кӕн, фӕлӕ сӕ уый ӕмбарын кӕнӕд.
◼ Дӕ ныхас хуымӕтӕг уӕд. Алы стих дӕр лӕмбынӕг ӕвзарын нӕ хъӕуы. Бамбарын дзы кӕн ӕрмӕстдӕр хъӕугӕ ныхӕстӕ.
◼ Ахуыргӕнинагӕн баххуыс кӕн, цӕмӕй фена, стих уымӕн йӕхимӕ куыд хауы.
4 хай: Ахуыргӕнинагӕн амон, ахуырмӕ куыд цӕттӕ кӕнын хъӕуы
Ахуыргӕнинаг йӕ урок рагацау куы кӕса, дзуаппытӕ-иу куы бахахх кӕна ӕмӕ сӕ йӕхи ныхӕстӕй куыд зӕгъдзӕн, ууыл куы хъуыды кӕна, уӕд уырнындзинады тагъд рӕздзӕн. Искӕимӕ иудадзыг Библи ахуыр кӕнын куы райдайай, уӕд иу хатт урок йемӕ бацӕттӕ кӕн, цӕмӕй фена, куыд цӕттӕ кӕнын хъӕуы, уый. Фылдӕр хатт хуыздӕр вӕййы иумӕ ӕнӕхъӕн сӕр кӕнӕ урок бацӕттӕ кӕнын (km 12/04 1 ф.).
Дзуаппы бын хахх кӕнын ӕмӕ хъуыдытӕ цыбыртӕй фыссын
◼ Ахуыргӕнинагӕн бацамон, мыхуыр фарстӕн тексты комкоммӕ дзуапп ссарӕн куыд ис, уый.
◼ Равдис ын, цы чиныг кӕнӕ брошюрӕйӕ ахуыр кӕнут, уым дӕхӕдӕг ӕрмӕст сӕйраг дзырдтӕ ӕмӕ дзырдбӕстытӕ куыд бахахх кодтай.
◼ Баххуыс ын кӕн бамбарын, уыцы стихтӕй алкӕцыдӕр абзацы цавӕрдӕр хъуыдымӕ куыд хауы. Равдис ын, йӕ бон куыд у хъуыдытӕ цыбыртӕй йӕ чиныг кӕнӕ брошюрӕйы фӕрсты кӕрӕттыл фыссын.
Ӕрмӕгыл раздӕр цӕст ахӕссын ӕмӕ йӕ кӕроны сфӕлхат кӕнын
◼ Ахуыргӕнинагӕн бацамон, куыд у йӕ бон ӕрмӕг лӕмбынӕг цӕттӕ кӕныны размӕ урокыл йӕ цӕст ахӕссын: ӕрмӕгӕн йӕ сӕргондмӕ, дӕлсӕргӕндтӕм ӕмӕ нывтӕм ӕркӕсын.
◼ Зӕгъ ын, цӕмӕй урок куы бацӕттӕ кӕна, уӕд ын йӕ сӕйраг хъуыдытыл иу гыццыл ахъуыды кӕна.
5 хай: Куыд сбӕрӕг кӕнӕм, иу хаттӕн цас ӕрмӕг ис рацӕуӕн
Цас сахуыр кӕнӕн ис, уый баст у, куыд ахуыргӕнӕджы, афтӕ ахуыргӕнинаджы курдиат ӕмӕ уавӕртыл дӕр (km 1/05 1 ф.).
Йӕ уырнындзинад ын фидар кӕн
◼ Сӕйрагдӕр у, цы ахуыр кӕнӕм, уый тагъд рацӕуын нӕ, фӕлӕ цӕмӕй ахуыргӕнинаг Хуыцауы Ныхас хорз бамбара.
◼ Ахуырӕн уыйбӕрц рӕстӕг хицӕн кӕн, цӕмӕй, цы базона, уый бамбара ӕмӕ йӕ йӕ зӕрдӕмӕ айса.
◼ Библийы ахуырӕдтӕ цы стихтӕ бӕлвырд кӕнынц, уыдоныл ӕрдзурынӕн фаг рӕстӕг ар.
Хъуыддагыл дзур, ныхӕстыл ма фӕу
◼ Кӕимӕ ахуыр кӕныс, уый йӕ зӕрдӕйы сагъӕстыл дзураг куы уа, уӕд хуыздӕр у ахуыры фӕстӕ аныхӕстӕ кӕнын.
◼ Нӕ ныхасы сӕр цы у, уый нӕ ма рох кӕнӕд. Уӕлӕмхасӕн хъуыдытӕ ӕмӕ цаутыл бирӕ рӕстӕг хардз кӕнӕн нӕй, уӕд ахуыргӕнинаг, гӕнӕн ис, Библийы сӕйраг ахуырӕдтӕ хорз ма бамбара.
6 хай: Ахуыргӕнинагмӕ фарст куы сӕвзӕра
Адӕймагимӕ Библи ӕдзух куы ахуыр кӕнӕм, уӕд хорз уаид, Библийы сӕйраг ахуырӕдтӕ фӕд-фӕдыл ӕвзарын, иу темӕйӕ иннӕмӕ рагӕпп-багӕпп кӕныны бӕсты. Уый руаджы ахуыргӕнинаг бӕлвырд зонындзинӕдтӕ исдзӕн ӕмӕ уырнындзинады рӕздзӕн (km 2/05 6 ф.).
Арфуынӕг у
◼ Ахуыры ӕрмӕджы фӕдыл цы фарстытӕ сӕвзӕры, уыдонӕн фылдӕр хатт дзуапп раттӕн вӕййы уайтӕккӕ.
◼ Фарст ахуыргӕнӕн ӕрмӕгмӕ куы нӕ хауа кӕнӕ раст дзуапп раттынӕн ӕрмӕг бацагурын куы хъӕуа, уӕд хуыздӕр уаид, ууыл ӕндӕр хатт аныхас кӕнын. Хорз уаид ахӕм фарст ныффыссын, цӕмӕй дӕ ма ферох уа.
◼ Ахуыргӕнинаг цавӕрдӕр ахуырадыл куы нӕ разы кӕна, уӕд ӕркӕс, лӕмбынӕг ӕвзӕрст кӕм цӕуы, ахӕм уӕлӕмхасӕн ӕрмӕгмӕ.
◼ Адӕймаг йӕ хъуыды куы нӕ ива, уӕд уыцы фарст рӕстӕгмӕ ныууадзут, ӕмӕ уӕ ахуыр адарддӕр кӕнут.
Бонзонгӕ у
◼ Кӕд цавӕрдӕр фарстӕн бӕлвырд дзуапп нӕ зоныс, уӕд дӕхи хъуыдытӕ ма дзур.
◼ Ахуыргӕнинагӕн амон, цавӕрдӕр фарст иртасын куыд хъӕуы, уый.
7 хай: Ахуыры рӕстӕджы кувын
Библи кӕимӕ ахуыр кӕнӕм, уымӕн цӕмӕй йӕ уырнындзинад фидар кӕна, уый тыххӕй ӕнӕмӕнг хъӕуы Иегъовӕйы арфӕдзинад. Уымӕ гӕсгӕ хорз у ахуыр куывдӕй райдайын ӕмӕ фӕуын (km 3/05 4 ф.).
Кӕд ӕмӕ куыд райдайӕн ис кувын
◼ Адӕймаг уырнӕг куы уа, уӕд нӕ бон у фыццаг ахуыр дӕр куывдӕй райдайын.
◼ Ӕндӕр ахуыргӕнинӕгтимӕ та, чи зоны, хъӕуа ахъуыды кӕнын, хуыздӕр кӕд у ахуыр куывдӕй райдайын.
◼ Псалом 24:4, 5 ӕмӕ 1 Иоанны 5:14 стихты руаджы дӕ бон у ахуыргӕнинагӕн равдисын, цӕмӕн хъӕуы кувын.
◼ Иоанны 15:16 руаджы ис бамбарын кӕнӕн, Иегъовӕмӕ Йесо Чырыстийы уылты кувын цӕмӕн хъӕуы, уый.
Цӕй тыххӕй ис кувӕн
◼ Иегъовӕйы, ӕппӕты хуыздӕр Зондамонӕджы, кадджын кӕнын.
◼ Нӕ ахуыргӕнинагыл зӕрдиагӕй кӕй тыхсӕм.
◼ Иегъовӕйы организацийӕ бузныг кӕй стӕм.
◼ Цӕмӕй ахуыргӕнинаг, цы базоны, уымӕ гӕсгӕ цӕра.
8 хай: Библи кӕимӕ ахуыр кӕныс, уый ӕмбырдтӕм цӕуынмӕ разӕнгард кӕн
Искӕимӕ Библи куы ахуыр кӕнӕм, уӕд нӕ нысан ӕрмӕст уый нӕу, ӕмӕ йын сӕйраг ахуырӕдтӕ бацамонӕм, фӕлӕ ма йын баххуыс кӕнӕм, цӕмӕй чырыстон ӕмбырдмӕ ӕрбаиу уа. Алы къуыри дӕр хицӕн кӕн цалдӕр минуты Иегъовӕйы организацийы тыххӕй йын исты радзурынӕн (km 4/05 8 ф.).
Ӕмбырды фембӕлдтӕ
◼ Радзур ын алы фембӕлды тыххӕй дӕр. Фыццаг ахуыры рӕстӕджы дӕр ӕй фӕхон фембӕлдтӕм.
◼ Радзур-иу ын, фембӕлдты цы цымыдисаг хъуыдытӕ фехъуыстай, уыдон.
◼ Ӕрымысӕн изӕр кӕнӕ конгрессы размӕ, йе та уӕм районон цӕстдарӕг ӕрцӕуинаг куы уа, уӕд зӕрдиагӕй ӕрдзур уыцы хабӕрттыл.
◼ Нӕ литературӕйы цы нывтӕ вӕййы, уыдон-иу ын равдис, цӕмӕй фена, нӕ фембӕлдтӕ куыд уадзӕм.
◼ Зӕгъ ын, цӕмӕй бакӕса брошюрӕ «Иегъовӕйы Ӕвдисӕнтӕ чи сты? Цӕуыл ӕууӕндынц?».
Пайда кӕн кинонывтӕй
◼ «Иегъовӕйы Ӕвдисӕнтӕ – йӕ номмӕ гӕсгӕ архайӕг организаци».
9 хай: Ахуыргӕнинаджы цӕттӕ кӕн, фадат куы фӕзына, уӕд хъусын кӕнынмӕ
Библи кӕимӕ ахуыр кӕнӕм, уыцы адӕймаджы, цы базоны, уый куы бауырны, уӕд ӕй бафӕнды уый тыххӕй иннӕтӕн дзурын (km 5/05 1 ф.).
Разӕнгард ӕй кӕн ӕцӕгады тыххӕй дзурынмӕ
◼ Йӕ бон у йӕ хӕлӕрттӕ ӕмӕ йӕ бинонтӕй искӕй Библийы ахуырмӕ фӕхонын?
◼ Йе ’мкусджытӕй, йе ’мкъласонтӕй кӕнӕ йӕ зонгӕтӕй искӕй Библийӕ исты базонын фӕнды?
Ахуыр ӕй кӕн иннӕтӕн йӕ уырнындзинады тыххӕй дзурын
◼ Ахуыры рӕстӕджы цавӕрдӕр бӕлвырд фарсты фӕдыл ахуыргӕнинаджы бафӕрс: «Ацы ахуырад дӕ бинонтӕн куыд бамбарын кӕнис?».
◼ Бамбарын ын кӕн, иннӕтимӕ Иегъовӕ Хуыцау ӕмӕ йӕ фӕндты тыххӕй дзургӕйӕ, уӕздан ӕмӕ хӕларзӕрдӕ кӕй хъуамӕ уа.
◼ Брошюрӕ «Иегъовӕйы Ӕвдисӕнтӕ чи сты? Цӕуыл ӕууӕндынц?»-ы ӕххуысӕй ахуыргӕнинагӕн йӕ бон у йӕ хӕлӕрттӕ ӕмӕ йӕ бинонтӕн бамбарын кӕнын, Библимӕ гӕсгӕ цӕуыл ӕууӕндӕм ӕмӕ цы куыст кӕнӕм, уый.
10 хай: Ахуыр ӕй кӕн хъусын кӕнын хӕдзарӕй-хӕдзармӕ
Библи кӕимӕ ахуыр кӕныс, уымӕй хистӕр нӕлгоймӕгтӕ куы зӕгъой, цӕттӕ кӕй у, цӕмӕй ӕнӕаргъуыд хъусынгӕнӕг суа, уӕд йӕ бон у, ӕмӕ ӕмбырдимӕ райдайа хъусын кӕнын (km 6/05 1 ф.).
Иумӕ цӕттӕ кӕнут
◼ Ног хъусынгӕнӕгӕн равдис, ныхас райдайынӕн цӕвиттонтӕ куыд ис ссарӕн.
◼ Фӕкӕс ӕм, хуымӕтӕгдӕр ӕмӕ дзы уӕ уавӕрты хуыздӕр кӕцы у, уый равзарынмӕ.
◼ Амон ын, цӕмӕй уацамынды ӕдзухдӕр пайда кӕна Библийӕ.
◼ Куыд ныхас кӕндзӕн, уый уал раздӕр иумӕ афӕлварут. Равдис ын, адӕм арӕхдӕр цы фӕзӕгъынц, уымӕн дзуапп куыд ис раттӕн.
Иумӕ хъусын кӕнут
◼ Цы бацӕттӕ кодтат, уымӕй ныхас дӕхӕдӕг райдай.
◼ Зӕрдыл дарын хъӕуы, цавӕр адӕймаг у ӕмӕ йӕ бон цас у, уый. Хатт ног хъусынгӕнӕгӕн ӕнцондӕр вӕййы, алцыдӕр йӕхи дзурын куы нӕ фӕхъӕуы.
◼ Ног хъусынгӕнӕгӕн баххуыс кӕн, цӕмӕй уацамындӕн фӕтк скӕна ӕмӕ ӕрвылкъуыри дӕр уацамынды цӕуа.
11 хай: Ахуыргӕнинагӕн ӕххуыс кӕн адӕммӕ ногӕй цӕуынӕн
Адӕймагмӕ ногӕй бацӕуынмӕ куы цӕттӕ кӕнат, уӕд уӕ зӕрдыл дарут уӕ фыццаг фембӕлд. Ахуыргӕнинаджы разӕнгард кӕн, кӕимӕ ныхас кодта, уыдоныл зӕрдӕйӕ мӕт кӕнын. Ахуыр ӕй кӕн, цӕмӕй адӕмы сӕ хъуыдытӕ дзурынмӕ разӕнгард кӕна, лӕмбынӕг сӕм хъуса ӕмӕ сӕ цы тыхсын кӕны, уымӕ йӕ хъус дара (km 7/05 1 ф.).
Цӕттӕ кӕнут адӕймагмӕ ногӕй бацӕуынмӕ
◼ Ахуыргӕнинагимӕ уӕ зӕрдыл ӕрлӕууын кӕнут, адӕймагимӕ фыццаг хатт цӕуыл ныхас кодтат ӕмӕ йын баххуыс кӕн ахъуыды кӕнын, уыцы адӕймаг ӕхсызгондӕрӕй цӕмӕ байхъусдзӕн.
◼ Бацӕттӕ кӕнут, цыбыртӕй цы зӕгъӕн ис, уый: Библи ӕмбарынгӕнӕн ӕрмӕгӕй иу абзац ӕмӕ иу стих Фыстадӕй.
◼ Бацӕттӕ кӕнут, ныхасы кӕрон йӕ бон кӕй у раттын, ахӕм фарст.
Ӕнӕмӕнгӕй сӕм цӕуӕм
◼ Ахуыргӕнинаджы разӕнгард кӕн, чи бацымыдис кодта, уыдонӕй алкӕйдӕр ӕвӕстиатӕй бӕрӕг кӕнынмӕ.
◼ Баххуыс ын кӕн бамбарын, хӕдзары кӕй нӕ баййафы, уыцы адӕммӕ ногӕй ӕмӕ ногӕй цӕуын кӕй хъӕуы.
◼ Бацамон ын, йӕ бон куыд у адӕймагимӕ баныхас кӕнын, ногӕй йӕм кӕй бацӕудзӕн, ууыл. Ӕмӕ йын бамбарын кӕн, ӕнӕмӕнг ӕй кӕй хъӕуы йӕ дзырд ӕххӕст кӕнын.
12 хай: Ахуыргӕнинагӕн ӕххуыс кӕн Библийы ахуыр райдайын ӕмӕ йӕ адарддӕр кӕнынӕн
Тынг ахсджиаг у, цӕмӕй ды дӕр, Йесойы фӕзмгӕйӕ, хорз цӕвиттон уай. Дӕумӕ кӕсгӕйӕ дӕ ахуыргӕнинаг дӕр бамбардзӕн, адӕммӕ ногӕй уый тыххӕй кӕй цӕуӕм, цӕмӕй семӕ Библи ахуыр кӕнын райдайӕм (km 8/05 1 ф.).
Куыд ис зӕгъӕн Библийы ахуыры тыххӕй
◼ Ахуыргӕнинагӕн бамбарын кӕн, адӕймагӕн Библийы ахуыры тыххӕй куы фӕдзурӕм, уӕд, ахуыр куыд цӕудзӕн, ууыл лыстӕггай дзурын ӕнӕмӕнг кӕй нӕу.
◼ Куыд фӕахуыр кӕнӕм, уый равдисынӕн арӕх хуыздӕр вӕййы ахуыргӕнӕн чиныг кӕнӕ брошюрӕйӕ иу-дыууӕ абзацы равзарын.
◼ Библийы ахуыр куыд райдайӕн ис, уымӕн равзарут ӕмӕ афӕлварут иу цӕвиттон (km 8/05 8 ф.; km 1/02 6 ф.).
Ӕххуыс ын кӕн, цӕмӕй хорз ахуыргӕнӕг уа
◼ Ахуыргӕнинаджы разӕнгард кӕн, цӕмӕй йӕхи Хъусынгӕнджыты скъолайы ныффысса.
◼ Бацархай, цӕмӕй ног хъусынгӕнӕг демӕ ӕндӕр Библийы ахуыртӕм цӕуа ӕмӕ дзы хайад иса.