Библи афтӕ кӕс, цӕмӕй дын фылдӕр пайда хӕсса

1. Йесо Сыгъдӕг Фыстадӕн тынг кӕй аргъ кодта, уый цӕмӕй у бӕрӕг?

ТӔХУДЫ ӕмӕ, Йесо адӕмы куыд ахуыр кодта, уымӕ байхъус! Арӕх-иу сын Сыгъдӕг Фыстадӕй ӕрхаста кӕцыдӕр ныхӕстӕ. Цыма сӕ ахуыр скодта, афтӕ сӕ хъуыды кодта. Зӕгъӕм, йӕ донаргъуыды фӕстӕ йӕ ныхӕстӕй ӕппӕты фыццаг фыст чи ’рцыд, уыдон, стӕй йӕ мӕлӕты размӕ йӕ фӕстаг ныхӕстӕ уыдысты Фыстадӕй (Дык. з. 8:3; Пс. 31:5; Лук. 4:4; 23:46)b. Йесо зӕххыл лӕггад кодта ӕртӕ азы ӕмӕ ’рдӕг, ӕмӕ-иу арӕх адӕмы раз хъӕрӕй каст Фыстад, ӕрхаста-иу дзы кӕцыдӕр скъуыддзӕгтӕ ӕмӕ-иу Хуыцауы Ныхас ӕмбарын кодта (Матф. 5:17, 18, 21, 22, 27, 28; Лук. 4:16–20).

2. Йесойӕн цы ӕххуыс кодта, Хуыцауы Ныхасы цы фыст ис, уый хорз базонынӕн? (Кӕс нывмӕ ӕддаг цъарыл.)

² Йесо цалынмӕ лӕггад кӕнын райдыдта, уӕдмӕ дӕр-иу Хуыцауы Ныхас касти ӕмӕ-иу иннӕтӕй арӕх фехъуыста, цы дзы ис фыст, уый. Сӕ бинонтӕ-иу алы бон дӕр истӕуыл куы ныхас кодтой, уӕд-иу Марийӕ ӕмӕ Иосиф, ӕвӕццӕгӕн, Фыстадӕй ӕрхастой кӕцыдӕр скъуыддзӕгтӕ (Дык. з. 6:6, 7)c. Дзырд дӕр ыл нӕй, алы сабаты дӕр йӕ бинонтимӕ цыд ӕмбырдгӕнӕнмӕ (Лук. 4:16). Ӕмӕ-иу уым, ӕвӕццӕгӕн, лӕмбынӕг хъуыста, Фыстад-иу куы кастысты, уӕд. Кӕсын куы сахуыр, уӕд та йӕхӕдӕг каст Хуыцауы Ныхас. Гъемӕ Йесо тынг хорз базыдта Сыгъдӕг Фыстад. Стӕй Хуыцауы Ныхас уарзта ӕмӕ дзы цы фыст ис, уый ӕххӕст кодта. Хъуыды йӕ кӕнӕм, 12-аздзыдӕй йыл кувӕндоны цы хабар ӕрцыд. Моисейы закъон хорз чи зыдта, уыцы ахуыргӕнджыты «дисӕн кӕрон нал уыд, куыд ӕмбаргӕ у ӕмӕ цы дзуаппытӕ дӕтты, зӕгъгӕ» (Лук. 2:46, 47, 52).

3. Ацы статьяйы цӕуыл аныхас кӕндзыстӕм?

³ Мах дӕр Хуыцауы Ныхас ӕдзух куы кӕсӕм, уӕд ӕй хорз базондзыстӕм ӕмӕ йӕ бауарздзыстӕм. Фӕлӕ нӕ цы хъӕуы аразын, цӕмӕй, цы кӕсӕм, уый нын фылдӕр пайда хӕсса? Аныхас кӕнӕм, Закъон хорз чи зыдта, уыдонӕн – уыимӕ чиныджыдӕснытӕн, фарисейтӕн ӕмӕ саддукейтӕн – Йесо цы загъта, ууыл. Уыцы дины разамонджытӕ Фыстад арӕх кастысты, фӕлӕ дзы цы кастысты, уый сын ницы пайда хаста. Йесо сын бацамыдта, цы ӕртӕ хъуыддаджы хъуамӕ арӕзтаиккой, уыдонмӕ. Ӕмӕ йӕ ныхӕстӕ махӕн дӕр баххуыс кӕндзысты, цӕмӕй: 1) Хуыцауы Ныхас афтӕ кӕсӕм, цӕмӕй йӕ ӕмбарӕм; 2) Хуыцауы Ныхасы цы хӕзнатӕ ис, уыдон-иу ссарӕм ӕмӕ 3) Хуыцауы Ныхасӕн бар дӕттӕм, цӕмӕй нӕ ива.

ХУЫЦАУЫ НЫХАСЫ ЦЫ КӔСЫС, УЫЙ-ИУ БАМБАР

4. Лукайы 10:25–29 стихтӕм гӕсгӕ, Хуыцауы Ныхас куыд хъуамӕ кӕсӕм?

⁴ Хуыцауы Ныхасы цы фӕкӕсӕм, уый-иу хъуамӕ бамбарӕм, кӕннод нын ницы пайда хӕсдзӕн. Иухатт Йесо ныхас кодта, «Закъон хорз чи зыдта, иу ахӕм лӕгимӕ». (Бакӕс Лукайы 10:25–29.) Уыцы адӕймаг ӕй бафарста, цы, дам, мӕ хъӕуы саразын, цӕмӕй ӕнусон цардӕй схайджын уон. Уӕд ын Йесо йе ’ргом аздӕхта Хуыцауы Ныхасмӕ. Бафарста йӕ: «Закъоны цы фыст ис? Цы дзы бакастӕ?» Уый йын Фыстадӕй дзуапп радта, зӕгъгӕ, хъӕуы Хуыцауы уарзын ӕмӕ иннӕты уарзын (Лев. 19:18; Дык. з. 6:5). Фӕлӕ-ма кӕс, уый фӕстӕ цы загъта: «Ӕмӕ, кӕй хъуамӕ уарзон, уыцы иннӕтӕ чи сты?» Куыд рабӕрӕг, афтӕмӕй дзӕбӕх не ’мбӕрста, Закъоны цы каст, уый. Ӕмӕ уый тыххӕй нӕ зыдта, уыцы ныхӕстӕм гӕсгӕ куыд хъуамӕ архайа.

5. Библи бакӕсыны размӕ ӕмӕ-иу уый фӕстӕ Йегъовӕмӕ куы скувай, стӕй кӕсгӕйӕ тагъд куы нӕ кӕнай, уӕд дын уый куыд баххуыс кӕндзӕн, цӕмӕй Библи хуыздӕр ӕмбарай?

⁵ Цы нын баххуыс кӕндзӕн, цӕмӕй-иу хуыздӕр бамбарӕм, Библийы цы бакӕсӕм, уый? Мӕнӕ цалдӕр уынаффӕйы. Библи кӕсыны размӕ-иу Йегъовӕмӕ скув. Хъӕуы нӕ йе ’ххуыс, цӕмӕй йын йӕ Ныхас ӕмбарӕм. Уымӕ гӕсгӕ-иу дзы йӕ сыгъдӕг тых ракур, цӕмӕй-иу кӕсгӕ-кӕсын дӕ хъуыдытӕ ма адзӕгъӕл уой. Кӕсгӕйӕ-иу тагъд ма кӕн. Уӕд дӕм, цы кӕсыс, уый хуыздӕр хъардзӕн. Хорз ма вӕййы хъӕрӕй кӕсын кӕнӕ кӕсгӕ-кӕсын Библийы аудиозаписьмӕ дӕр хъусын. Ныхӕстӕ уынгӕ дӕр куы кӕнай ӕмӕ сӕ хъусгӕ дӕр куы кӕнай, уӕд дӕм Хуыцауы Ныхас тынгдӕр хъардзӕн (Йес. Н. 1:8). Каст куы фӕуай, уӕд та-иу ногӕй Йегъовӕмӕ скув ӕмӕ-иу ын бузныг зӕгъ йӕ диссаджы лӕвары тыххӕй. Ӕмӕ-иу дзы ӕххуыс ракур, цӕмӕй, цы бакастӕ, уымӕ гӕсгӕ архайай.

6. Библи кӕсгӕйӕ дӕхимӕ фарстатӕ куы дӕттай ӕмӕ-иу цыдӕртӕ цыбыртӕй куы афыссай, уӕд дын уый куыд баххуыс кӕндзӕн? (Кӕс нывтӕм дӕр.)

⁶ Мӕнӕ ма ноджыдӕр дыууӕ уынаффӕйы. Цы кӕсыс, уый фӕдыл-иу дӕхимӕ фарстатӕ ратт. Зӕгъӕм, ахӕмтӕ: «Чи сты сӕйраг архайджытӕ? Чи дзуры, кӕмӕн дзуры ӕмӕ цӕмӕн? Архайд кӕд ӕмӕ кӕм цӕуы?» Ахӕм фарстатӕ дын баххуыс кӕндзысты, цӕмӕй-иу сӕйраг хъуыдытӕ фенай. Дӕхицӕн-иу цыбыртӕй афысс, цы бакастӕ, уый фӕдыл дӕм цы хъуыдытӕ фӕзынд, уыдон. Адӕймаг хъуыдытӕ фысгӕ дӕр куы фӕкӕны, уӕд, цы кӕсы, уый хуыздӕр бамбары ӕмӕ йӕм тынгдӕр бахъары. Стӕй йӕ хуыздӕр бахъуыды кӕны. Бӕлвырдӕй цы ис ныффыссӕн? Дӕхимӕ кӕй хъуамӕ раттай, уыцы фарстатӕ, сӕйраг хъуыдытӕ, фылдӕр ӕрмӕг агургӕйӕ кӕй ссардтай, уыцы хъуыдытӕ, цы базыдтай, уымӕй царды дӕ бон куыд у спайда кӕнын, уый кӕнӕ та ӕнӕуи де ’нкъарӕнтӕ, зӕгъӕм, цы бакастӕ, уый дӕ зӕрдӕмӕ цӕмӕй фӕцыд кӕнӕ уый тыххӕй Йегъовӕйӕ бузныг цӕмӕн дӕ. Дӕхицӕн-иу уыдӕттӕ куы афыссай, уӕд дын уый баххуыс кӕндзӕн, цӕмӕй Библи нымайай, Йегъовӕ дӕумӕ кӕй ныффыста, ахӕм фыстӕгыл.

7. Библи куы фӕкӕсӕм, уӕд нӕ цавӕр миниуӕг фӕхъӕуы ӕмӕ цӕмӕн? (Ӕмбисӕндтӕ 2:2–5).

⁷ Цӕмӕй, Хуыцауы Ныхасы цы кӕсӕм, уый ӕмбарӕм, уый тыххӕй нӕ хъӕуы иу ахсджиаг миниуӕг – арфуынындзинад. (Бакӕс Ӕмбисӕндтӕ 2:2–5.) Арфуынӕг адӕймагӕн йӕ бон вӕййы бамбарын, иу хъуыды иннӕимӕ куыд баст у кӕнӕ хъуыдытӕ кӕрӕдзийӕ цӕмӕй хицӕн кӕнынц. Стӕй йӕ бон вӕййы фенын, фыццаг бакастӕй цы нӕ разыны, уый. Уымӕй уӕлдай ма, Йесо куыд загъта, афтӕмӕй, арфуынындзинад хъӕуы, цӕмӕй-иу бамбарӕм, кӕцыдӕр хабӕрттӕй Библийы пехуымпарӕдтӕ куыд ӕххӕст кӕнынц (Матф. 24:15). Стӕй ма нӕ арфуынындзинад хъӕуы, цӕмӕй, Библийы цыдӕриддӕр бакӕсӕм, уый нын фылдӕр пайда хӕсса.

8. Цӕмӕй Библи кӕсгӕйӕ арфуынӕг уай, уый тыххӕй дӕ цы хъӕудзӕн аразын?

⁸ Йегъовӕ йӕ лӕггадгӕнджытӕн арфуынындзинад ратты. Уӕдӕ йӕм кув, цӕмӕй дын баххуыс кӕна, ӕмӕ арфуынӕг уай (Ӕмб. 2:6). Ӕмӕ дӕхи бон та цы у аразын? Лӕмбынӕг-иу ахъуыды кӕн, цы бакастӕ, ууыл. Ахъуыды кӕн, цы зоныс, уыимӕ куыд баст у. Пайда кӕн, Библи иртасынӕн нӕм цы кусӕнгӕрзтӕ ис, уыдонӕй, зӕгъӕм, «Йегъовӕйы Ӕвдисӕнтӕн ӕрмӕг агурынӕн ӕххуыс» чи хуыйны, уымӕй. Уыцы кусӕнгӕрзты фӕрцы-иу хуыздӕр бамбардзынӕ Библийӕ кӕцыдӕр скъуыддзӕгтӕн сӕ хъуыды ӕмӕ, цы базыдтай, уый дын царды кӕм баххуыс кӕндзӕн, уый (Дзут. 5:14). Хуыцауы Ныхас кӕсгӕйӕ арфуынӕг куы уай, уӕд ӕй хуыздӕрӕй-хуыздӕр ӕмбардзынӕ.

ХУЫЦАУЫ НЫХАСЫ-ИУ ССАР ХӔЗНАТӔ

9. Саддукейтӕ Хуыцауы Ныхасы цавӕр ахсджиаг ахуырад нӕ уыдтой?

⁹ Саддукейтӕ Дзуттаг Фыстыты фыццаг фондз чиныджы тынг хорз зыдтой. Фӕлӕ дзы цы ахсджиаг хъуыдытӕ уыд, уыдон нӕ уыдтой. Иухатт Йесойы бафарстой райгасдзинады тыххӕй. Ӕмӕ сын уый дзуапп радта: «Моисейы чиныджы, сындзы къутӕры кой кӕм кӕны, уым нӕ кастыстут, Хуыцау ын афтӕ кӕй загъта: „Ӕз дӕн Авраамы Хуыцау, Исахъы Хуыцау ӕмӕ Иаковы Хуыцау“?» (Мар. 12:18, 26). Саддукейтӕ уыцы скъуыддзаг цал ӕмӕ цал хатты бакастаиккой. Фӕлӕ Йесойы фарста раргом кодта, кӕй дзы нӕ федтой тынг ахсджиаг ахуырад – мӕрдтӕ кӕй райгас уыдзысты, уый (Мар. 12:27; Лук. 20:38)d.

10. Библи кӕсгӕйӕ-иу нӕ хъус цӕмӕ хъуамӕ ӕрдарӕм?

¹⁰ Уымӕй нӕ бон цы у нӕхицӕн зондӕн райсын? Библи куы фӕкӕсӕм, уӕд-иу хъуамӕ нӕ хъус ӕрдарӕм, кӕцыдӕр стихӕй кӕнӕ кӕцыдӕр хабарӕй нӕ бон цыдӕриддӕр у базонын ӕмӕ дзы цӕуылдӕриддӕр ахуыр кӕнӕм, уыдӕттӕм. Фаг нӕу ӕрмӕст сӕйраг ахуырӕдтӕ уынын. Хъуамӕ-иу арфдӕр ныккӕсӕм, цӕмӕй-иу фенӕм, хӕзнатау ӕмбӕхст чи у, уыцы хъуыдытӕ ӕмӕ уагӕвӕрдтӕ.

11. 2 Тимофеймӕ 3:16, 17 стихтӕм гӕсгӕ, дӕ бон куыд у Библийы хӕзнатӕ агурын?

¹¹ Нӕ бон куыд у Библийы хӕзнатӕ агурын? Ӕркӕсӕм-ма 2 Тимофеймӕ 3:16, 17 стихтӕм. (Бакӕс сӕ.) Ам фыст ис, зӕгъгӕ, «Фыстад ӕнӕхъӕнӕй дӕр... пайда у» 1) адӕймаджы ахуыр кӕнынӕн, 2) уайдзӕф кӕнынӕн, 3) хъуыддӕгтӕ раст кӕнынӕн ӕмӕ 4) раст зондыл аразынӕн. Ацы цыппар хъуыддаджы дӕ къухы бафтдзысты, Библийы чингуытӕй афтӕ арӕх кӕмӕ не ’ркӕсыс, суанг уыдон кӕсгӕйӕ дӕр. Ахъуыды кӕн, цы бакастӕ, уымӕй цӕуыл ахуыр кӕныс, ома дзы дӕ бон цы у базонын Йегъовӕйы тыххӕй, цы фӕнд ӕм ис, уый тыххӕй кӕнӕ йӕ уагӕвӕрдты тыххӕй. Уый фӕстӕ ахъуыды кӕн, уыцы скъуыддзаг дын уайдзӕф куыд кӕны, ома дын куыд ӕххуыс кӕны, цӕмӕй рӕдийыс, уый бамбарынӕн, аивынӕн ӕмӕ Йегъовӕйыл иузӕрдионӕй баззайынӕн. Стӕй та ахъуыды кӕн, уыцы скъуыддзаджы фӕрцы куыд ис цавӕрдӕр рӕдыд хъуыды сраст кӕнӕн, зӕгъӕм, уацамынды кӕй фехъуыстай, ахӕм хъуыды. Ӕмӕ бацархай, цӕмӕй-иу фенай, уыцы стихтӕ дӕ раст зондыл куыд аразынц, ома дын куыд ӕххуыс кӕнынц алцӕмӕ дӕр Йегъовӕйы цӕстӕй кӕсынӕн. Ацы цыппар хъуыддаджы дӕ зӕрдыл куы дарай, уӕд-иу ссардзынӕ хӕзнатӕ, ӕмӕ дын Библи фылдӕр пайда хӕсдзӕн.

ХУЫЦАУЫ НЫХАСӔН БАР ДӔТТ, ЦӔМӔЙ ДӔ ИВА

12. Йесо фарисейты цӕмӕн бафарста, «нӕ кастыстут», зӕгъгӕ?

¹² Йесо фарисейтӕм дӕр радта ахӕм фарста, «нӕ кастыстут», зӕгъгӕ, цӕмӕй раргом кодтаид, Фыстад раст кӕй не ’мбӕрстой, уый (Матф. 12:1–7)e. Фарисейтӕ йын йӕ ахуыргӕнинӕгтӕй хъаст кодтой, сабатбоны закъон, дам, халынц. Уӕд сын Йесо сӕ зӕрдыл ӕрлӕууын кодта Фыстадӕй дыууӕ цӕвиттоны ӕмӕ сын ӕрхаста стих Осийы чиныгӕй. Афтӕмӕй сын равдыста, сабатбоны закъонӕн йӕ мидис ӕмӕ йӕ нысан кӕй не ’мбӕрстой ӕмӕ фӕлмӕнзӕрдӕ кӕй нӕ уыдысты. Кӕд Хуыцауы Ныхас кастысты, уӕд сӕ цымӕ цӕуылнӕ ивта? Уымӕн ӕмӕ уыдысты сӕрбӕрзонд ӕмӕ йӕ кастысты, цӕмӕй-иу иннӕтӕм фаутӕ хастаиккой. Ӕмӕ уый тыххӕй, цы кастысты, уый раст не ’мбӕрстой (Матф. 23:23; Иоан. 5:39, 40).

13. Библи кӕсгӕйӕ нӕ сӕрныллӕгдзинад цӕмӕн хъӕуы?

¹³ Йесойы ныхӕстӕ нын цӕуыл дзурӕг сты? Библи кӕсгӕйӕ хъуамӕ фарисейты хуызӕн ма уӕм, фӕлӕ хъуамӕ уӕм сӕрныллӕг ӕмӕ ахуыр кӕнынмӕ цӕттӕ. Хъуамӕ Хуыцауы Ныхас «сӕрныллӕгӕй... [нӕ] зӕрдӕты тауын бауадзӕм» (Иак. 1:21). Сӕрныллӕг куы уӕм ӕмӕ нын фӕлмӕн удыхъӕд куы уа, уӕд Хуыцауы Ныхас нӕ зӕрдӕты арф уидӕгтӕ ауадздзӕн. Цӕмӕй нӕ Библи ива ӕмӕ суӕм фӕлмӕнзӕрдӕ, тӕригъӕдгӕнаг ӕмӕ иннӕты уарзӕм, уый тыххӕй хъуамӕ нӕхи хизӕм сӕрбӕрзонддзинадӕй ӕмӕ иннӕтӕм фаутӕ ма хӕссӕм.

14. Нӕ бон куыд у базонын, Библийӕн бар дӕттӕм ӕви нӕ, цӕмӕй нӕ ива? (Кӕс нывтӕм дӕр.)

¹⁴ Хуыцауы Ныхасӕн бар дӕттӕм ӕви нӕ, цӕмӕй нӕ ива, уый бӕрӕг вӕййы, иннӕтӕн куыд стӕм ӕмӕ сӕм цы зӕрдӕ дарӕм, уымӕй. Фарисейтӕ Хуыцауы Ныхасӕн бар нӕ лӕвӕрдтой, цӕмӕй сӕ зӕрдӕтӕм хъардтаид. Ӕмӕ-иу уый тыххӕй «ӕнаххос адӕмӕн» стӕрхон кодтой (Матф. 12:7). Уӕдӕ иннӕтӕм цы цӕстӕй кӕсӕм ӕмӕ сын куыд стӕм, уымӕй бӕрӕг уыдзӕн, Хуыцауы Ныхасӕн бар дӕттӕм ӕви нӕ, цӕмӕй нӕ ива. Зӕгъӕм, иннӕты кой кӕнгӕйӕ арӕхдӕр сӕ хорз миниуджыты кой фӕкӕнӕм ӕви сӕ хъӕндзинӕдты кой? Фӕлмӕнзӕрдӕ ӕмӕ хатыргӕнаг стӕм, ӕви иннӕтыл фаутӕ февӕрӕм ӕмӕ нӕ чи фӕхъыг кӕны, уыдонмӕ нӕ зӕрдӕйы маст фӕхӕссӕм? Ацы фарстатӕн цы дзуаппытӕ раттӕм, уыдонӕй бӕрӕг уыдзӕн, цы бакӕсӕм, уый нӕ хъуыдытыл, не ’нкъарӕнтыл ӕмӕ нӕ хъуыддӕгтыл фӕзыны ӕви нӕ (1 Тим. 4:12, 15; Дзут. 4:12).

ХУЫЦАУЫ НЫХАС КӔЙ КӔСӔМ, УЫЙ ФӔРЦЫ СТӔМ АМОНДДЖЫН

15. Йесо Сыгъдӕг Фыстадмӕ цы цӕстӕй каст?

¹⁵ Йесо Сыгъдӕг Фыстад тынг уарзта. Уый тыххӕй бирӕ азтӕ раздӕр фыст ӕрцыд Псаломы 40:8 стихы: «О мӕ Хуыцау, дӕ фӕндон ӕххӕст кӕнын мын у цины хос. Дӕ закъон ис мӕ зӕрдӕйы». Уый фӕрцы Йесо уыди амондджын ӕмӕ Йегъовӕйӕн ӕнтыстджынӕй лӕггад кодта. Махӕн дӕр Хуыцауы Ныхас нӕ зӕрдӕты куы уа, уӕд уыдзыстӕм амондджын ӕмӕ ӕнтыстджын (Пс. 1:1–3).

16. Цы дӕ фӕндид саразын, цӕмӕй, Библи кӕй кӕсыс, уый дын фылдӕр пайда хӕсса? (Кӕс рамкӕ «Йесойы ныхӕстӕ дын баххуыс кӕндзысты, цы кӕсыс, уый ӕмбарынӕн».)

¹⁶ Йесойы ныхӕстӕм куы хъусӕм ӕмӕ йӕ куы фӕзмӕм, уӕд нын уайдзӕн Библи афтӕ кӕсын, цӕмӕй нын пайда хӕсса. Йегъовӕмӕ-иу куы скувӕм, кӕсгӕ-кӕсын-иу тагъд куы нӕ кӕнӕм, нӕхимӕ-иу фарстатӕ куы дӕттӕм ӕмӕ-иу хъуыдытӕ цыбыртӕй куы афыссӕм, уӕд-иу, цы кӕсӕм, уый хуыздӕр бамбардзыстӕм. Бахъӕудзӕн ма нӕ арфуынындзинад дӕр, ома-иу хъӕудзӕн, цы бакастыстӕм, ууыл лӕмбынӕг ахъуыды кӕнын ӕмӕ Библи ӕмбарынгӕнӕн публикациты фылдӕр ӕрмӕг бацагурын. Хорз ма уыдзӕн, куы сахуыр уӕм Библийӕ хуыздӕр пайда кӕнын. Зӕгъӕм, бацагурӕн ис хӕзнатӕ, хорз кӕй нӕ зонӕм, уыцы чингуыты дӕр. Хуыцауы Ныхас кӕсгӕйӕ ма фӕхъӕуы сӕрныллӕгдзинад дӕр, ӕмӕ йын уӕд бар дӕтдзыстӕм, цӕмӕй нӕ ива. Библи кӕсгӕйӕ ацы уынаффӕтӕ иууылдӕр нӕ зӕрдыл куы дарӕм, уӕд нын фылдӕр пайда хӕсдзӕн ӕмӕ Йегъовӕмӕ ӕввахсӕй-ӕввахсдӕр кӕндзыстӕм (Пс. 119:17, 18; Иак. 4:8).