Европӕ

Ӕнӕхъӕн къласӕй ацыдысты Паддзахады залмӕ

Инес цӕры Финляндийы ӕмӕ ахуыр кӕны цыппӕрӕм къласы. Уый базыдта, дины урокы Йегъовӕйы Ӕвдисӕнты тыххӕй кӕй дзурдзысты, ӕмӕ йӕ бафӕндыд йе ’мкъласӕгты се ’ппӕты дӕр Паддзахады залмӕ фӕхонын. Уый ахуыргӕнӕгӕн дӕр ӕмӕ ахуырдзаутӕн дӕр сӕ зӕрдӕмӕ фӕцыд.

Иннӕ къуыри 38 ахуырдзауы сӕ велосипедтыл Паддзахады залмӕ фӕцыдысты 5 километры бӕрц. Уырдӕм ма ӕрбацыд дыууӕ ахуыргӕнӕджы ӕмӕ скъолайы директор дӕр. Паддзахады залы сӕм ӕнхъӕлмӕ каст дыууӕ ӕфсымӕры ӕмӕ ӕртӕ хойы. Ахуырдзаутӕн цыдӕртӕ ӕрцӕттӕ кодтой, ӕмӕ цалынмӕ хордтой, уӕдмӕ залы тыххӕй, стӕй Ӕвдисӕнты тыххӕй фарстатӕ лӕвӕрдтой: «Ӕмбырдты цы фӕаразут?» «Уӕртӕ уын уым та цы ис?» – фарстой библиотекӕмӕ амонгӕйӕ. «Къулыл та уын „ӕхсӕз дӕсыл адих кӕн“ фыст цӕмӕн ис?» – дис кодтой ӕрвылазон стихмӕ кӕсгӕйӕ. Уыцы азы стих ист уыд Матфейы 6:10 стихӕй.

Сывӕллӕттӕ цы скъолайы ахуыр кодтой, уый иу программӕмӕ гӕсгӕ архайдта, цӕмӕй се скъолайы хылкъахджытӕ ма уыдаид. Ӕмӕ сын ӕфсымӕртӕ нӕ сайты равдыстой фломастерӕй ныв анимаци «Хылкъахджыты ныхмӕ фидар фӕлӕуу, хыл ма кӕн, афтӕмӕй». Уый фӕстӕ сын нӕ сайты иннӕ вкладкӕтӕ дӕр равдыстой, ӕмӕ стӕй иумӕ Паддзахады зарджытӕм байхъуыстой. Уыцы фембӕлд ахаста сахаты бӕрц.

Фембӕлд скъолайы директорӕн, ахуыргӕнджытӕн ӕмӕ сывӕллӕттӕн сӕ зӕрдӕмӕ тынг фӕцыд. Директор ахъуыды кодта, нӕ сайты ӕрмӕгӕй дины урокты хорз кӕй уаид пайда кӕнын. Ӕмӕ, иннӕ ахуырдзауты дӕр Паддзахады залмӕ кӕй фӕхуыдтой, уый куы базыдта, уӕд ын тынг ӕхсызгон уыд. Уӕд иннӕ къласы ахуыргӕнӕг дӕр Йегъовӕйы Ӕвдисӕнтӕм иннӕ бон бадзырдта, ӕмӕ сӕ бафарста, мӕнӕн дӕр мӕ къласимӕ мӕ бон залмӕ ӕрбацӕуын у, зӕгъгӕ.

Бырондоны хӕзна ссардта

Кристинӕ цӕры Румынийы. Скъолайы никуы ахуыр кодта, ӕмӕ кӕсын дӕр ӕмӕ фыссын дӕр нӕ зыдта. Тынг мӕгуыр уыди, ӕмӕ-иу горӕты бырондоны цы пластик бутылкӕтӕ ӕмӕ зестын банкӕтӕ ссардта, уыдон-иу ӕхцайыл баивта, ӕмӕ уымӕй цард. Ӕмӕ иухатт бырондоны йӕ цӕст иу цӕуылдӕр ӕрхӕцыд. Уый уыд нӕ литературӕ, ӕмӕ дзы уыди рӕсугъд нывтӕ амондджын адӕмимӕ. Кристинӕ йӕхицӕн загъта: «Ахӕм адӕм зӕххыл кӕмдӕр ӕнӕмӕнг хъуамӕ цӕрой». Нӕ публикациты цы фыст ис, уый йӕ тынг фӕндыд базонын, ӕмӕ кӕмӕндӕр загъта, цӕмӕй йын сӕ бакастаиккой. Куы йӕ базыдта, дины кой дзы кӕй цӕуы, уӕд ын хъыг уыд, Хуыцауы Ныхасы тыххӕй кӕм ис фыст, ахӕм ӕрмӕг чидӕр бырӕттӕм кӕй аппӕрста. Кристинӕ-иу бырондонмӕ цыд ӕмӕ-иу дзы брошюрӕтӕ, буклеттӕ ӕмӕ журналтӕ ӕрӕмбырд кодта. Кӕцыдӕртӕ дзы ӕнӕхъӕн уыдысты, кӕцыдӕртӕ та – скъуыдтӕ. Кристинӕ кӕсын дӕр сахуыр, цӕмӕй фылдӕр базыдтаид.

Фӕстӕдӕр Кристинӕ Йегъовӕйы Ӕвдисӕнтимӕ базонгӕ ӕмӕ Библи ахуыр кӕнын райдыдта. Куы йӕ базыдта, иннӕтӕм нымады дӕр чи нӕ уыдысты, уыцы публикациты фӕрцы йӕ Йегъовӕ йӕхимӕ кӕй ӕрбаввахс кодта, уӕд йӕ цинӕн кӕрон дӕр нал уыд. Кристинӕ алы ӕмбырдмӕ дӕр цӕуы ӕмӕ дзы цы базоны, уый йӕ зӕрдӕмӕ тынг цӕуы. Ӕппӕты тынгдӕр та цин кӕны, ныр ӕм ног журналтӕ, чингуытӕ ӕмӕ брошюрӕтӕ кӕй ис, ууыл. Ныр сӕ бырондоны агурын нал хъӕуы. Кристинӕ ӕцӕгдӕр бырондоны хӕзна ссардта!

Библи ахуыр кӕнынц хъӕды

Маргарет цӕры Германийы, ӕмӕ алы райсом дӕр йӕ куыдзимӕ хъӕды фӕтезгъо кӕны. Маргарет зӕгъы: «Ӕз фӕархайын, цӕмӕй, кӕуыл фембӕлын, уыдонимӕ-иу аныхас кӕнон. Хорз зӕрдӕйы уагыл кӕй сты, уый куы фенын, уӕд сын се ’ргом Библимӕ раздахын».

Иухатт дзы сӕмбӕлд иу 70-аздзыд сылгоймагыл, уый дӕр йӕ куыдзимӕ тезгъо кодта. Ӕмӕ Маргарет йемӕ сныхас кодта. Сылгоймагӕн йӕ зӕрдӕмӕ фӕцыд, цӕуыл ныхас кодтой, уый ӕмӕ загъта, алы бон дӕр кӕй фӕкувы ӕмӕ Библи кӕй фӕкӕсы. Уӕдӕй фӕстӕмӕ-иу алы бон дӕр фембӕлдысты ӕмӕ-иу Библийыл ныхас кодтой. Иу бон сылгоймаг Маргареты бафарста: «Библийӕ уыйбӕрц цыдӕртӕ кӕцӕй зоныс?» Уӕд ын Маргарет загъта, Йегъовӕйы Ӕвдисӕн кӕй у.

Цалдӕр хатты сылгоймагӕн загъта, цӕмӕй хӕдзары Библи ахуыр кӕнын райдыдтаиккой, фӕлӕ уый нӕ разы кодта. Фӕлӕ-иу афтӕ ӕнӕуи аныхӕстӕ кодтой. Цалдӕр мӕйы фӕстӕ та йын Маргарет Библи ахуыр кӕныны тыххӕй загъта. Ӕмӕ йын уӕд сылгоймаг загъта, нӕ, дам, уӕндын, уымӕн ӕмӕ, дам, кӕимӕ цӕрын, уыцы нӕлгоймаг Йегъовӕйы Ӕвдисӕнты нӕ уарзы.

Иннӕ хатт Маргарет хъӕдмӕ йемӕ ахаста Библи ӕмӕ чиныг «Библи бӕлвырдӕй цы дзуры?». Ӕмӕ уыцы сылгоймаджы куы ауыдта, уӕд ын ныфсджынӕй загъта: «Библи хӕдзары ахуыр кӕныны тыххӕй дын нал дзурдзынӕн. Ам, хъӕды йӕ куы райдаиккам ахуыр кӕнын, уӕд куыд уаид?» Сылгоймаг дӕр сразы, йӕ цӕстытӕ доны разылдысты, афтӕмӕй. Ӕмӕ ныр хъӕдмӕ Библи ахуыр кӕнынмӕ ӕрбацӕуы къуыри ӕхсӕз боны. Боныхъӕд ӕвзӕр куы вӕййы, уӕд Маргарет уыцы сылгоймагимӕ Библи фӕахуыр кӕны зонтикы бын, хатт та фанары рухсмӕ дӕр.

Афтӕ ахъуыды кодтой, ӕмӕ йӕ нӕ фӕнды

Болгарийӕ иу хо, Делфин, Библи ахуыр кодта иу сылгоймагимӕ, Иринӕимӕ. Иринӕйӕн йӕ зӕрдӕмӕ тынг цыди, цы-иу базыдта, уый ӕмӕ-иу алы ӕмбырдмӕ дӕр цыд. Фӕлӕ йӕ сӕрыхицауы нӕ фӕндыд, цӕмӕй Йегъовӕйы Ӕвдисӕнтимӕ ӕмбӕлдаид. Ӕмӕ уӕд йӕ бинонты Швецимӕ иу гыццыл хъӕумӕ цӕрынмӕ аласта. Иринӕ Делфины нал федта. Иухатт Иринӕйыл фембӕлдысты дыууӕ пионер-хойы, Александрӕ ӕмӕ Ребеккӕ. Фӕлӕ Иринӕ шведаг ӕвзаг кӕй нӕ зыдта, уымӕ гӕсгӕ йын хотӕ брошюрӕ «Хорз хабар ӕппӕт адӕмтӕн дӕр» равдыстой ӕмӕ йын ӕрмӕг болгайраг ӕвзагыл бакӕсын кодтой. Уый фӕстӕ йӕ уыцы брошюрӕйы фӕрцы бафарстой, зӕгъгӕ дӕ нӕ фӕндид, цӕмӕй дын болгайраг ӕвзагыл литературӕ ӕрбахӕссӕм. Иринӕ йӕ сӕр дыууӕрдӕм батылдта, ӕмӕ хотӕ афтӕ ахъуыды кодтой, ӕмӕ йӕ нӕ фӕнды.

Фӕстӕдӕр Александрӕйы зӕрдыл ӕрлӕууыд, Швецийӕ Болгаримӕ лӕггад кӕнынмӕ чи ацыд, иу ахӕм хо, Линдӕ, цалдӕр къуыримӕ кӕй хъуамӕ ӕрцӕуа. Ӕмӕ ахъуыды кодта, Иринӕимӕ болгайрагау куы аныхас кӕна, уӕд, чи зоны, хорз хабармӕ байхъуса. Линдӕ куы ’рцыд, уӕд Александрӕимӕ иумӕ Иринӕмӕ ацыдысты. Иринӕ Линдӕйӕн загъта, алы изӕр дӕр Йегъовӕмӕ кӕй куывта, цӕмӕй йын баххуыс кодтаид, ӕмӕ йӕ бон уыдаид Библи дарддӕр ахуыр кӕнын. Йемӕ ма-иу арӕх хаста чиныг «Библи бӕлвырдӕй цы дзуры?» болгайраг ӕвзагыл, зӕгъгӕ, мыййаг, Йегъовӕйы Ӕвдисӕнтыл куы сӕмбӕлон, уӕд сын ӕй равдисдзынӕн. Фӕлӕ-иу сыл нӕ сӕмбӕлд. Уӕдӕ куыд цин кодта Иринӕ, болгайраг ӕвзагыл ын фылдӕр литературӕ куы ’рбахастой, уӕд!

Линдӕ Александрӕйы бафарста, Иринӕмӕ фыццаг хатт куы ’рбацыдысты, уӕд афтӕ цӕмӕн ахъуыды кодтой, ӕмӕ йӕ нӕ фӕнды фылдӕр базонын. Ӕмӕ йын Александрӕ загъта, зӕгъгӕ, йӕ сӕр дыууӕрдӕм батылдта, ӕмӕ ахъуыды кодтам, кӕй йӕ нӕ фӕнды. Линдӕ йӕ мидбылты бахудти, ӕмӕ йын бамбарын кодта, болгайрӕгтӕм афтӕ кӕй у, ӕмӕ сӕ сӕр разыйы тылд куы бакӕнынц, уӕд уый ууыл дзурӕг вӕййы, ӕмӕ разы не сты, дыууӕрдӕм ӕй куы батилынц, уӕд та – разы кӕй сты. Ныр Иринӕ ахуыр кӕны шведаг ӕвзаг. Библи та ахуыр кӕны болгайраг ӕвзагыл. Цымӕ куыд? Делфинимӕ та фӕстӕмӕ кӕрӕдзи ссардтой, ӕмӕ ныр Библи ахуыр кӕнынц Интернеты уылты.

Йӕ фыд ын уыд фӕзминаг

Хемимӕ цӕры Испанийы. Йӕ ныййарджытӕ йын гыццылӕй рӕстдзинад амыдтой. Фӕлӕ йыл 7 азы куы цыд, уӕд йӕ цард цӕхгӕр фӕивта. Йӕ мады нал фӕндыд, цӕмӕй Йегъовӕйы Ӕвдисӕн уыдаид, стӕй йӕ лӕгӕй дӕр ахицӕн. Хемимӕйыл 13 азы куы цыд, уӕд Йегъовӕйы Ӕвдисӕнтӕй йӕхи дард ласын райдыдта. Йӕ фыд ын баххуыс кӕнынмӕ бӕргӕ хъавыд, цӕмӕй йӕ уырнындзинад фидар уыдаид, фӕлӕ чызджы нӕ фӕндыд.

Хемимӕ куы сыстыр, уӕд политикӕйы ӕмӕ ӕхсӕнадон хъуыддӕгты архайын райдыдта ӕмӕ мӕгуыр адӕмы бартыл тох кодта. Цасдӕры фӕстӕ Хемимӕ ӕнӕ куыстӕй баззад, ӕмӕ йын йӕ фыд, Доминго, загъта, цӕмӕй йемӕ малярӕй кусын райдыдтаид.

Иу бон иумӕ куы куыстой, уӕд Доминго Хемимӕйӕн загъта, цӕмӕй Библи ахуыр кӕнын райдыдтаид. Хемимӕ не сразы, ӕмӕ йын загъта, искуы мӕ куы бафӕнда, уӕд дын ӕй зӕгъдзынӕн, зӕгъгӕ. Доминго-иу кусгӕ-кусын хъуыста Библийы ӕмӕ журналты аудиозаписьтӕм, йӕ чызг та-иу наушниктӕ бакодта ӕмӕ-иу поп-музыкӕмӕ хъуыста.

Уӕдмӕ Доминго дыккаг ус ракуырдта, ӕмӕ сӕ 2012 азы ноябры фӕхуыдтой, чырыстон бинонтӕн цы скъола уыд, уырдӕм. Хемимӕмӕ тынг диссаг фӕкаст, йӕ фыд уыцы скъолайы дыууӕ мӕйы кӕй ахуыр кӕндзӕн, ӕмӕ стӕй алцыдӕр кӕй ныууадздзӕн ӕмӕ йӕ кӕдӕм ӕрвитой, уырдӕм кӕй ацӕудзӕн. Уӕд Хемимӕ фыццаг хатт бамбӕрста, рӕстдзинад йӕ фыды зӕрдӕйы арф уидӕгтӕ кӕй ауагъта, ӕмӕ йӕ бафӕндыд базонын, афтӕ цӕмӕн у, уый.

Хемимӕ поп-музыкӕйы бӕсты хъусын райдыдта, йӕ фыд кӕмӕ хъуыста, уыцы аудиозаписьтӕм. Стӕй йӕм фарстатӕ дӕттын дӕр райдыдта. Иубон Доминго асинтыл лӕугӕйӕ цыдӕртӕ куы ахуырста, уӕд ын Хемимӕ загъта: «Хъуыды ма йӕ кӕныс, афтӕ дын куы загътон, Библи ахуыр кӕнын мӕ искуы куы бафӕнда, уӕд дын ӕй зӕгъдзынӕн, зӕгъгӕ? Ныр мӕ фӕнды».

Уый Домингойӕн тынг ӕхсызгон уыд. Ӕмӕ 2013 азы январы райдыдтой Библи ахуыр кӕнын, ахуыр кодтой къуыри дыууӕ хатты. Доминго йӕ бинойнагимӕ апрелы Скъолайы ахуыр кӕнын райдыдтой, фӕлӕ-иу уӕддӕр йӕ чызгимӕ Интернеты уылты Библи ахуыр кодта. Скъола каст чи фӕци, уыдонӕн цы фембӕлд уыд, уырдӕм Хемимӕ дӕр ӕрбацыд, ӕмӕ программӕ йӕ зӕрдӕмӕ тынг фӕцыд. 2013 азы 14 декабры Хемимӕ донаргъуыд райста.

Хемимӕ загъта: «Йегъовӕ мӕм стыр фӕразондзинад равдыста, ӕмӕ йӕ зонын, йӕ къух мыл кӕй никуы систа. Йегъовӕ мын радта, ацы дунейы цы не ссардтон, уый – ӕцӕг ӕмбӕлттӕ. Ӕнӕхъӕн зӕххыл мын цы бирӕ хотӕ ӕмӕ ӕфсымӕртӕ ис, уыдон мын ӕххуыс кӕнынц, цӕмӕй Йегъовӕйы стыр уарзондзинадӕн ноджы тынгдӕр аргъ кӕнон».

Иннӕтӕн аргъ кӕнын ахсджиаг у

Уӕрӕсейы Вефилы рагӕй чи лӕггад кӕны, иу ахӕм ӕфсымӕр, Василий, 2014 азы 30 мартъийы филиалмӕ хӕстӕг стендимӕ куы хъусын кодта, уӕд сӕ разы пъӕлицӕйы машинӕ баурӕдта. Рахызт дзы пъӕлицӕйы кусӕг ӕмӕ йын уӕзданӕй загъта, цӕмӕй уырдыгӕй ацыдаид, уымӕн ӕмӕ, дам, цӕрджытӕй чидӕртӕ бахъаст кодтой. Пъӕлицӕйы кусджытӕй та сын иннӕ сӕ ныхас видеомӕ иста. Василий ахъуыды кодта, хуыздӕр кӕй уыдзӕн, куы сӕм байхъусид ӕмӕ йӕ бартыл дзурын куы нӕ райдаид. Уӕдмӕ, сӕ рӕзты чи цыд, уыдонӕй бирӕтӕ ӕрлӕууыдысты, цы хабар у, зӕгъгӕ. Василий уырдыгӕй ацыд, фӕлӕ дыууӕ боны фӕстӕ пъӕлицӕмӕ курдиат балӕвӕрдта, цӕмӕй пъӕлицӕйы хицауимӕ фембӕлдаид. Бар ын радтой, ӕмӕ пъӕлицӕйы хицауимӕ куы фембӕлд, уӕд ын бузныг загъта, адӕмы пайдайӕн ахӕм стыр куыст кӕй кӕнынц ӕмӕ дыууӕ боны размӕ пъӕлицӕйы кусджытӕ йемӕ уӕзданӕй кӕй дзырдтой, уый тыххӕй. Хицау йӕ хӕдивӕгмӕ разылд ӕмӕ йын афтӕ: «Пъӕлицӕйы 32 азы кусын, ӕмӕ нын бузныг никуыма ничи загъта, ӕрмӕстдӕр хъаст бадӕттынц. Ацы лӕг та нӕм бузныг зӕгъынмӕ ӕрбацыд!» Куы ныхас кодтой, уӕд ын Василий бамбарын кодта, бирӕ адӕм кӕм ис, уым хъусын кӕнын закъоны ныхмӕ кӕй нӕу. Пъӕлицӕйы хицау Василийы бафарста, кӕд, дам, ӕй зыдтай, ӕмӕ дын закъонмӕ гӕсгӕ уый бар ис, уӕд, дам, пъӕлицӕмӕ цӕмӕн байхъуыстай. Василий йын загъта: «Ӕз пъӕлицӕйы кусджытӕн аргъ кӕнын. Дӕхӕдӕг-ма ахъуыды кӕн, адӕмы раз йӕ ныхмӕ куы сдзырдтаин, уӕд ӕй цӕсты нӕ бафтыдтаин?» Пъӕлицӕйы хицау йӕ хӕдивӕгимӕ тынг бадис кодтой, ӕмӕ Василийӕн зӕрдӕ бавӕрдтой, амӕй фӕстӕмӕ сӕ бон сӕрибарӕй кӕй уыдзӕн стендимӕ хъусын кӕнын.