«Уый у, Йегъовӕйы лӕггадгӕнджытӕн бынӕн лӕвӕрд чи ’рцыд, уыцы хай» (Ис. 54:17).

ЙЕГЪОВӔЙЫ лӕггадгӕнджытӕ Гуырдзыстоны хорз хабар ӕнӕрынцойӕ хъусын кӕнынц, ӕмӕ сын Йегъовӕ сӕ фыдӕбонӕн арфӕ кӕны. Уый фӕрцы, зӕгъӕн ис, ӕмӕ хорз хабар фӕхӕццӕ бӕстӕйы алы къуымтӕм.

Фӕстаг азты зынгзӕрдӕ хъусынгӕнджытӕ ӕмӕ пионертӕ сӕ хъус фылдӕр дарын райдыдтой, арӕх кӕм нӕ хъусын кӕнынц, уыцы бынӕттӕм. Хӕхбӕстӕм ӕмӕ иуӕй-иу дард хъӕутӕм ацӕуӕн вӕййы ӕрмӕстдӕр, ӕвзӕр фӕндӕгтыл чи цӕуы, ахӕм машинӕтыл кӕнӕ фуникулёрыл.

2009 азӕй фӕстӕмӕ алы аз дӕр Гуырдзыстоны филиал ӕппӕт ӕмбырдтӕм дӕр арвиты, иу ӕмбырдмӕ дӕр чи нӕ хауы, уыцы территориты хыгъд ӕмӕ хъусынгӕнджыты фӕхонынц уыцы рӕтты хъусын кӕнынмӕ. Хотӕ ӕмӕ ’фсымӕртӕ сӕхи бирӕ цӕмӕйдӕрты фӕцух кӕнынц, цӕмӕй сӕ бон уа ахӕм рӕтты хъусын кӕнын.

Темури ӕмӕ Анӕ Блийадзе сӕ цард куы баиу кодтой, уымӕй гыццыл фӕстӕдӕр базыдтой, хӕххон Аджарийы хъусынгӕнджытӕ кӕй нӕ фаг кӕны. Уый хӕдразмӕ та зӕхх балхӕдтой, цӕмӕй дзы хӕдзар сарӕзтаиккой. Фӕлӕ сын ныр фадат фӕзынд фылдӕр хъусын кӕнынӕн.

Фыццаг уал Аджаримӕ ацыдысты иу къуыримӕ. Темури радзырдта: «Бынӕттон хотӕ ӕмӕ ’фсымӕрты гыццыл хъӕутӕм хъусын кӕнынмӕ фистӕгӕй бирӕ цӕуын хъуыди. Махӕн уыди, ӕвзӕр фӕндӕгтыл чи цӕуы, ахӕм машинӕ, ӕмӕ ахъуыды кодтон, уым нын стыр ӕххуыс кӕй фӕуыдзӕн».

Анӕ та загъта: «Не ’мбырд ӕмӕ нӕ бинонтыл тынг ахуыр уыдыстӕм ӕмӕ нын уырдӕм ацӕуын ӕнцон нӕ уыд. Фӕлӕ йӕ ӕмбӕрстам, уый Йегъовӕйы разамынд кӕй у». Ныр ӕртӕ азӕй фылдӕр Темури ӕмӕ Анӕ лӕггад кӕнынц Аджарийы, горӕт Кедӕйы цы къорд ис, уым.

Сӕрӕн пионертӕ

Рӕстӕгмӕ сӕрмагонд пионертӕй кӕй снысан кодтой, уыдон бирӕ бафыдӕбон кодтой, цӕмӕй дард рӕтты цӕрӕг адӕммӕ хорз хабар фӕхӕццӕ кодтаиккой. Сӕ цӕуыны афон куы ӕрхӕццӕ, уӕд сӕ бирӕтӕ сфӕнд кодтой уым баззайын, цӕмӕй ӕххуыс кодтаиккой, Библи ахуыр кӕнын кӕимӕ райдыдтой, уыдонӕн.

Дыууӕ пионер-хойы, сӕ дыууӕ дӕр Хатунӕтӕ, снысан кодтой иу рӕсугъд горӕтмӕ, Манглисимӕ. Уыцы горӕты Ӕвдисӕнтӕ нӕ уыд, фӕлӕ ацы хотӕн уацамынды бирӕ ӕнтыст. Фыццаг мӕй сын уыди 9 Библийы ахуыры, дыккаг мӕй – 12, ӕртыккаг – 15 ӕмӕ уый фӕстӕ та – 18! Ӕмӕ цӕмӕй сӕ ахуыргӕнинӕгтӕн дарддӕр ӕххуыс кодтаиккой, уый тыххӕй Манглисийы баззадысты.

Сӕхи фӕдарыны тыххӕй сӕ хъуыди исты ӕрхъуыды кӕнын. Манглисимӕ чи ӕрцӕуы, уыдонӕй бирӕтӕ уарзынц, ӕнӕниздзинадӕн пайда кӕй хонынц, уыцы вареннӕ нӕзыйы гыркъотӕй. Гъемӕ хотӕ дӕр нӕзыйы цъӕх гыркъотӕ ӕмбырд кодтой, вареннӕ сӕ фыхтой ӕмӕ йӕ базары уӕй кодтой. Фӕлӕ уый фӕстӕ ӕхца кусын райдыдтой ӕндӕр цӕмӕйдӕр.

Библи кӕимӕ ахуыр кодтой, уыцы сылгоймаг сын иубон цалдӕр карчы цъиуы ӕрбахаста. Загъта сын, йӕ кӕрчытӕй иу кӕмдӕр сусӕгӕй къуыртты кӕй фӕбадт ӕмӕ йӕм стӕй ӕд цъиутӕ кӕй ӕрбацыд. Уыцы сылгоймаджы фӕндыд хотӕн уыцы цъиутӕ раттын. Хотӕй иу зыдта, кӕрчытӕм куыд зилын хъӕуы, уый. Ӕмӕ уӕд сфӕнд кодтой кӕрчыты куыст кӕнын райдайын.

Хотӕй иу загъта: «Йегъовӕйы, не ’фсымӕрты ӕмӕ нӕ ахуыргӕнинӕгты ӕххуысы фӕрцы Манглисийы фӕлӕггад кодтам 5 азы». Ныр дзы ис, зынгзӕрдӕйӕ чи лӕггад кӕны, ахӕм къорд.

Пионертӕ хъусын кӕнынц ӕндӕр ӕвзӕгтыл

Фӕстаг рӕстӕг Гуырдзыстонмӕ фӕсарӕнтӕй цӕуы тынг бирӕ адӕм. Пионертӕй бирӕтӕ бамбӕрстой, хъусын кӕнынӕн сын ног фадат кӕй фӕзынд. Гъемӕ ӕндӕр ӕвзӕгтӕ ахуыр кӕнын райдыдтой, зӕгъӕм, азербайджайнаг, англисаг, араббаг, китайаг, персайнаг ӕмӕ туркаг.

Пионертӕй бирӕтӕ лӕггад кодтой, ӕндӕр ӕвзӕгтыл цы ӕмбырдтӕ ӕмӕ къордтӕ уыд, уым, иннӕтӕ та ацыдысты фӕсарӕнтӕм, хъусынгӕнджытӕ кӕм нӕ фаг кодта, уыцы рӕттӕм. Гиорги ӕмӕ Гелайыл цыд фӕйнӕ 20 азы, сыхаг бӕстӕмӕ куы ацыдысты, уӕд. Гиорги загъта: «Фӕндыд нӕ, хуыздӕрӕй нӕм цы уыд, уый Йегъовӕйӕн раттын. Ардӕм дӕр уый тыххӕй ӕрцыдыстӕм».

Уыцы рӕстӕджы тыххӕй Гела радзырдта: «Уым хистӕр нӕлгоймагӕй лӕггад кӕнгӕйӕ бирӕ цӕуылдӕрты сахуыр дӕн. Йегъовӕ мыл йӕ „гыццыл фысты“ кӕй ӕууӕнды, уый мын тынг ӕхсызгон у» (Иоан. 21:17).

Гиорги ма загъта: «Зындзинӕдтӕ нын куыннӕ уыди, фӕлӕ фылдӕр хъуыды кодтам нӕ лӕггадыл, ӕмӕ уырдӕм кӕй ацыдыстӕм, ууыл никуы фӕфӕсмон кодтам. Зыдтам ӕй, нӕ хӕс цы уыд, уый кӕй кодтам».

Ӕндӕр ӕфсымӕр та, уымӕн дӕр йӕ ном Гела, цалдӕр азы лӕггад кодта Турцийы. Уый радзырдта: «Фыццаг мын зын уыд ӕвзаг сахуыр кӕнын ӕмӕ мын мӕ лӕггад циндзинад нӕ хаста. Фӕлӕ йӕ ӕппынфӕстаг куы сахуыр кодтон, ӕмӕ мӕ бон хотӕ ӕмӕ ’фсымӕртимӕ, стӕй адӕмимӕ ныхас кӕнын куы сси, уӕд мӕ цинӕн кӕрон нал уыд».

Нино пионерӕй дӕс азӕй фылдӕр лӕггад кӕны горӕт Стамбулы, Турцийы. Нино загъта: «Уырдӕм цы бон ацыдтӕн, уыцы бонӕй фӕстӕмӕ уыдтон, Йегъовӕ мын куыд арфӕ кӕны, уый. Фӕсарӕнты пионерӕй лӕггадгӕнгӕйӕ дыл, зӕгъӕн ис, ӕмӕ алы бон дӕр ӕрцӕуы, „Ӕрвылазон чиныджы“ цы хабӕртты тыххӕй фӕкӕсӕм, ахӕм хабӕрттӕ».