Египеты хицауиуӕг кӕны ӕвзӕр паддзах

АЦЫ лӕгтӕ тыхӕй кусын кӕнынц адӕмы. Уыныс, иу лӕг кусджытӕй иуы ехсӕй куыд нӕмы! Кусджытӕ сты Иаковы байзӕддӕгтӕ, хонынц сӕ израилӕгтӕ. Тыхгуыст сын чи кӕнын кӕны, уыдон та сты египетӕгтӕ. Израилӕгтӕ египетӕгты цагъартӕ систы. Фӕлӕ афтӕ куыд рауад?

Бирӕ азты дӕргъы Иаковы стыр бинонтӕ сӕхицӕн сабырӕй цардысты Египеты. Цалынмӕ Иосиф – Египеты стыр бынат чи ахста, уый – ӕгас уыд, уӕдмӕ сын алцӕмӕй дӕр ӕххуыс кодта. Фӕлӕ ныр амардис. Стӕй Египеты ног паддзах цы фараон сси, уый дӕр нӕ уарзы израилӕгты.

Уымӕ гӕсгӕ уыцы ӕвзӕр фараон израилӕгтӕй йӕхицӕн скодта цагъартӕ. Цӕстдарджытӕй та сын сӕвӕрдта мӕнгард ӕмӕ дурзӕрдӕ адӕймӕгты. Уыдон израилӕгтӕн сулӕфыны бар дӕр нӕ лӕвӕрдтой, афтӕмӕй сын аразын кодтой фараонӕн сахартӕ. Фӕлӕ сын цас фылдӕр зындзинӕдтӕ ӕвзарын кодтой, уыйас израилӕгтӕ фылдӕрӕй-фылдӕр кодтой. Уӕд египетӕгтӕ фӕтарстысты, израилӕгтӕ бынтон куы сбирӕ уой ӕмӕ куы стыхджын уой, уымӕй.

Зоныс, фараон цы бакодта? Израилаг устытӕн аргӕ-арын цы сылгоймӕгтӕ ӕххуыс кодтой, уыдонмӕ фӕдзырдта ӕмӕ сын загъта: «Искӕмӕн-иу сӕ лӕппу куы райгуыра, уӕд-иу ӕй амарут». Фӕлӕ уыцы сылгоймӕгтӕ тӕригъӕдгӕнаг уыдысты ӕмӕ сӕ нӕ фӕндыд сывӕллӕтты марын.

Ӕмӕ уӕд фараон бардзырд радта ӕппӕт египетӕгтӕн: «Израилаг ноггуырд лӕппуты исут ӕмӕ сӕ марут, ӕрмӕстдӕр чызджыты уадзут удӕгасӕй». Цӕй ӕвирхъау бардзырд у! Цӕй, базонӕм, иу ноггуырд лӕппу куыд фервӕзт, уый.