Цъайы цур

ЙЕСО Самарийы цъайы цур ӕрлӕууыд йӕ фӕллад суадзынӕн. Йӕ ахуыргӕнинӕгтӕ ацыдысты сахармӕ хӕринаг ӕлхӕнынмӕ. Йесо та ныхас кӕны, дон хӕссынмӕ цы сылгоймаг ӕрбацыд, уыимӕ. Дзуры йын: «Дон ма мын авӕр».

Сылгоймаг стыр дисы бахауд. Цӕмӕн, уый зоныс? Уымӕн ӕмӕ Йесо у иудей, уый та – самариаг. Иудейтӕн сӕ фылдӕр самариӕгты нӕ уарзынц. Семӕ дзургӕ дӕр нӕ кӕнынц! Фӕлӕ Йесо уарзы алкӕй дӕр. Ӕмӕ йын уымӕ гӕсгӕ дзуры:

– Дон дӕ чи куры, уый куы зонис, уӕд дзы дӕхӕдӕг ракурис ӕмӕ дын уый царддӕттӕг дон раттид.

– Хицау,– дисгӕнгӕ дзуры сылгоймаг,– цъай арф у, дӕумӕ та ӕвгӕнӕн дӕр нӕй. Куыд сисдзынӕ царддӕттӕг дон?

– Ацы цъайы донӕй куы бануазай, уӕддӕр та ногӕй сдойны уыдзынӕ,– ӕмбарын ын кӕны Йесо.– Ӕз цы дон дӕттын, уый та адӕймаджы кӕны ӕнусон цардмӕ.

– Хицау,– дзуры сылгоймаг,– ратт мын уыцы донӕй! Цӕмӕй макуыуал сдойны уон, ӕмӕ мӕ ардӕм донмӕ цӕуын мауал хъӕуа.

Сылгоймаг афтӕ хъуыды кӕны, ӕмӕ Йесо ӕнӕуи доны кой кӕны. Уый та йын Хуыцау ӕмӕ йӕ паддзахады тыххӕй ӕцӕгады кой кӕны. Уыцы ӕцӕгад у царддӕттӕг доны хуызӕн, уымӕн ӕмӕ адӕймагӕн дӕтты ӕнусон цард.

Ныр Йесо сылгоймагӕн дзуры:

– Ацу ӕмӕ дӕ лӕджы дӕр ӕрбакӕн ардӕм.

– Мӕнӕн лӕг нӕй,– загъта сылгоймаг.

– Раст зӕгъыс,– дзуры йын Йесо.– Фондз лӕджы дын уыди, ӕмӕ ныртӕккӕ кӕимӕ цӕрыс, уый дӕр дӕ лӕг нӕу.

Сылгоймаджы дисӕн кӕрон нал ис, уымӕн ӕмӕ ӕцӕгдӕр афтӕ у. Йесо йын йӕ хабӕрттӕ кӕцӕй зоны? Раст зӕгъыс, Йесойы Хуыцау ӕрӕрвыста ӕмӕ йын уыцы зонындзинӕдтӕ дӕр уый дӕтты. Уӕдмӕ Йесойы ахуыргӕнинӕгтӕ дӕр ӕрбаздӕхтысты ӕмӕ йӕ самариаг сылгоймагимӕ ныхасгӕнгӕ куы ӕрбаййӕфтой, уӕд сӕм тынг диссаг фӕкаст.

Цӕуыл нӕ ахуыр кӕны ацы цау? Уынӕм ӕй, Йесо алы адӕммӕ дӕр хӕларзӕрдӕ кӕй у, уый. Ахӕм зӕрдӕ хъуамӕ дарӕм мах дӕр иннӕтӕм. Адӕймаг ӕндӕр адӕмыхаттӕй кӕй у, уый ууыл дзурӕг нӕу, ӕмӕ йӕ ӕвзӕрыл нымайай. Йесойы фӕнды, цӕмӕй ӕппӕт адӕм дӕр зоной, ӕнусон цардмӕ цы ӕцӕгад кӕны, уый. Ӕмӕ мах дӕр хъуамӕ фӕнда адӕмӕн ӕцӕгад базонынӕн ӕххуыс кӕнын.