Йесо амоны самариаг сылгоймагӕн

ЙЕСО ӕмӕ йӕ ахуыргӕнинӕгтӕн Иудейы бӕстӕй Галилеймӕ сӕ фӕндаг у Самарийыл. Сихорафон сӕ фӕллад суадзынмӕ ӕрлӕууыдысты Сихармӕ хӕстӕг цъайы цур. Ацы цъай бирӕ сӕдӕазты размӕ скъахта Иаков ӕмӕ ма абон дӕр ис сахар Наблусы цур.

Йесо цалынмӕ йӕ фӕллад уагъта, уӕдмӕ йӕ ахуыргӕнинӕгтӕ ацыдысты сахармӕ хӕринаг ӕлхӕнынмӕ. Самариаг сылгоймаг дон хӕссынмӕ куы ӕрбацыд, уӕд ӕм Йесо дзуры: «Ратт Мын дон нуазынмӕ».

Иудейтӕн самариӕгтимӕ стыр фыдӕхдзинад кӕй уыд, уымӕ гӕсгӕ се ’хсӕн ницы иудзинад ис. Уымӕ гӕсгӕ сылгоймаг, дисгӕнгӕйӕ, фӕрсы: «Ды, Иудейаг уӕвгӕйӕ, куыд курыс дон мӕнӕй, Самарийагӕй?»

«Ды куы зонис,— дзуапп дӕтты Йесо,— чи зӕгъы дӕуӕн: „ратт Мын дон нуазынмӕ“, уӕд ды дӕхӕдӕг курис Уымӕй, ӕмӕ Уый раттид дӕуӕн ӕгас дон».

«Хицау! (НФ) — зӕгъы уый,— Дӕумӕ дон цӕмӕй сисай уый дӕр нӕй, цъай та арф у: кӕцӕй Дӕм ис ӕгас дон? Ӕцӕг Ды стылдӕр Дӕ нӕ фыд Иаковӕй, ацы цъай махӕн чи ратта, ӕмӕ йӕхӕдӕг уымӕй нуӕзта, ӕмӕ йӕ цот, ӕмӕ йӕ фос дӕр?»

«Алкӕцы, ацы дон нуазӕг, фӕстӕмӕ сдойны уыдзӕн,— дзуапп дӕтты Йесо,— фӕлӕ Ӕз цы дон раттон, уый чи нуаза, уый мыггагмӕ дӕр нӕ кӕндзӕн дойны; фӕлӕ Ӕз цы дон раттон уымӕн, уый йӕ мидӕг суыдзӕн мыггагмӕйы цардмӕ кӕлӕг суадон».

«Хицау! (НФ) — дзуры сылгоймаг,— ратт мын уыцы донӕй, цӕмӕй ӕз дойны ма кӕнон ӕмӕ ардӕм ма цӕуон дон хӕссынмӕ».

Уӕд ын Йесо дзуры: «Ацу, дӕ лӕгмӕ бадзур ӕмӕ рацу ардӕм».

«Мӕнӕн нӕй лӕг»,— дзуапп дӕтты сылгоймаг.

Йесо йын бӕлвырд кӕны йӕ ныхӕстӕ: «Раст загътай ды, лӕг дын кӕй нӕй, уымӕй; уымӕн ӕмӕ дӕуӕн уыд фондз лӕджы, ӕмӕ дын ныр чи ис, уый дӕр дӕ лӕг нӕу».

«Хицау! уынын, Ды кӕй Дӕ пехуымпар»,— дисгӕнгӕйӕ загъта сылгоймаг. Духовон хъуыддӕгтӕм цымыдисдзинад ӕвдисгӕйӕ, сылгоймаг дзуры, самариӕгтӕ кӕй «куывтой ацы хохыл [уырдӕм хӕстӕг Гаризимы хохыл]; сымах [иудейтӕ] та зӕгъут, кувын цы бынаты ӕмбӕлы, уый ис Иерусалимы».

Фӕлӕ Йесо бамбарын кодта, Хуыцауӕн лӕггад кӕныны бынатӕн кӕй ницы нысаниуӕг ис. «Ӕрцӕудзӕн рӕстӕг,— дзуры уый,— кӕд ӕцӕг кувджытӕ кувдзысты Фыдӕн удӕй ӕмӕ ӕцӕгадӕй, уымӕн ӕмӕ ахӕм кувджыты агуры Фыд Йӕхицӕн: Хуыцау у уд, ӕмӕ Уымӕн кувджытӕн ӕмбӕлы кувын удӕй ӕмӕ ӕцӕгадӕй».

Сылгоймагыл тынг бандӕвтой ацы ныхӕстӕ. «Зонын, кӕй ӕрцӕудзӕн Мессийа, ома Чырысти,— дзуры уый,— Уый куы ӕрцӕуа, уӕд махӕн ӕппӕт дӕр фехъусын кӕндзӕн».

«Уый Ӕз Дӕн, Кӕцы дзуры демӕ»,— йӕхи йын ӕргом кӕны Йесо. Диссаг! Йӕ ӕнӕгъдау царды тыххӕй сахары сылгоймӕгтӕ ӕлгъ кӕуыл кӕнынц ӕмӕ дон хӕссынмӕ сихорафон чи цӕуы, цӕмӕй сыл ма фембӕла, уымӕн Йесо стыр кад кӕны. Нырмӕ иу адӕймагӕн дӕр ӕргом цы нӕ загъта, уый уымӕн комкоммӕ дзуры. Цы уыд йӕ фӕстиуӕг?

Бирӕ самариӕгтӕ ӕууӕндын райдыдтой Йесойыл

Сихары сахарӕй хӕринагимӕ ӕрбаздӕхгӕйӕ, ахуыргӕнинӕгтӕ Йесойы кӕм ныууагътой, уым ӕй цъайы цур ӕрбаййӕфтой самариаг сылгоймагимӕ зӕрдӕбынӕй ныхасгӕнгӕ. Цъаймӕ куы ӕрбахӕстӕг сты, уӕд сылгоймаг йӕ донхӕссӕн уым фӕуагъта ӕмӕ сахармӕ атындзыдта.

Йесойы ныхӕстыл цымыдисгӕнгӕйӕ, уый адӕмӕн дзуры: «Ацӕут, фенут Адӕймаджы, Кӕцы загъта мӕнӕн ӕппӕт, ӕз цы бакодтон». Ӕмӕ цӕмӕй адӕммӕ цымыдисдзинад фӕзына, уый тыххӕй сӕ фӕрсы: «Цымӕ Уый нӕу Чырысти?» Уыцы фарст сӕ тынг бацымыдис кодта ӕмӕ бирӕты бафӕндыд уыцы адӕймаджы сӕхи цӕстӕй фенын.

Уыцы рӕстӕджы ахуыргӕнинӕгтӕ Йесомӕ хатынц, цӕмӕй, сахарӕй цы хӕринаг ӕрбахастой, уымӕй бахӕра. Фӕлӕ сын уый зӕгъы: «Мӕнмӕ ис хӕринаг, кӕцы сымах нӕ зонут».

«Мыййаг исчи ӕрбахаста Уымӕн хӕринаг?»,— фӕрсынц кӕрӕдзийы ахуыргӕнинӕгтӕ. Йесо сын дзуапп дӕтты: «Мӕ хӕринаг у Мӕн Рарвитӕджы фӕндон ӕмӕ Уый хъуыддаг сӕххӕст кӕнын. Нӕ зӕгъут сымах, ноджыдӕр ма цыппар мӕйы ӕмӕ райдайдзӕн хуымгӕрдӕн?» Фӕлӕ сын Йесо, духовон хуымгӕрдӕнмӕ амонгӕйӕ, дзуры: «Уӕ цӕстытӕ байгом кӕнут ӕмӕ акӕсут хуымтӕм, уыдон куыд фӕурс сты ӕмӕ сцӕттӕ сты кӕрдынмӕ. Хуымгӕрдӕг исы лӕвар ӕмӕ дыргъ ӕмбырд кӕны мыггагмӕйы цардмӕ, афтӕ — ӕмӕ тауӕг ӕмӕ хуымгӕрдӕг иумӕ цин кӕндзысты».

Ӕвӕццӕгӕн, Йесо развӕлгъау уыны самариаг сылгоймагимӕ фембӕлды диссаджы фӕстиуӕг — йӕ ӕвдисӕндзинады фӕрцы йыл бирӕтӕ кӕй баууӕнддзысты. Сылгоймаг сахары цӕрджытӕн хъусын кӕны, «Уый йын кӕй загъта, цы бакодта, уыдон иуылдӕр». Афтӕмӕй адӕм Сихарӕй цъайы цурмӕ куы ӕрбацыдысты, уӕд Йесомӕ хатынц, цӕмӕй уым баззайа ӕмӕ сын фылдӕр радзура. Йесо сразы ӕмӕ ма дыууӕ бон баззад семӕ.

Йесомӕ чи хъуыста, уыцы самариӕгтӕй бирӕтӕ систы уырнджытӕ. Ӕмӕ фӕстӕдӕр уыдон загътой сылгоймагӕн: «Ныр дӕ ныхӕстӕм гӕсгӕ не ’ууӕндӕм, уымӕн ӕмӕ нӕхӕдӕг фехъуыстам ӕмӕ базыдтам, Уый ӕцӕгдӕр кӕй у дунейы Ирвӕзынгӕнӕг». Самариаг сылгоймаг нын диссаджы цӕвиттон ныууагъта, цӕмӕй мах дӕр, Чырыстийы тыххӕй ӕвдисӕн кӕнгӕйӕ, адӕмы разӕнгард кӕнӕм фылдӕр базонынмӕ.

Дӕ зӕрдыл дар, цыппар мӕйы ма кӕй хъӕуы хуымгӕрдӕнмӕ — ӕвӕццӕгӕн, хъӕбӕрхор ӕфснайынмӕ, кӕцы Палестинӕйы вӕййы уалдзӕджы. Уӕдӕ ныр у ноябрь кӕнӕ декабрь. Уый та ууыл дзурӕг у, ӕмӕ н. э. 30 азы Куадзӕнӕй фӕстӕмӕ Йесо ӕмӕ йӕ ахуыргӕнинӕгтӕ аст мӕйы дӕргъы хъусын кодтой ӕмӕ адӕмӕн аргъуыд лӕвӕрдтой Иудейы. Ныр та уыдон цӕуынц сӕ райгуырӕн бӕстӕ Галилеймӕ. Цы сӕм ӕнхъӕлмӕ кӕсы уым? Иоанны 4:3—43.

▪ Самариаг сылгоймагмӕ диссаг цӕмӕн фӕкаст, Йесо йемӕ ныхас кӕнын кӕй райдыдта, уый?

▪ Цы загъта Йесо ӕгас дон ӕмӕ кувын кӕм хъӕуы, уый тыххӕй?

▪ Йесо куыд раргом кодта сылгоймагӕн чи у, уый ӕмӕ уый диссаг цӕмӕн у?

▪ Цы фехъусын кодта самариаг сылгоймаг ӕмӕ цы уыд йӕ фӕстиуӕг?

▪ Цавӕр бастдзинад ис Йесойы хӕринаг ӕмӕ хуымгӕрдӕны ’хсӕн?

▪ Н. э. 30 азы Куадзӕнӕй фӕстӕмӕ Йесо Иудейы цас рӕстӕг лӕггад кодта, уый куыд у нӕ бон базонын?