Ӕнӕмойӕ сывӕрджын

МАРИА ныр ӕртыккаг мӕй у сывӕрджын. Куыд хъуыды кӕныс, афтӕмӕй Мариа куы басывӕрджын, уӕд фыццаг рӕстӕг уазӕгуаты уыд Елисаветӕмӕ, ныр та ис сӕхимӕ, Назареты. Тагъд йӕ хабар айхъуысдзӕн йӕ райгуырӕн бӕстыл. Ӕцӕгдӕр уӕззау уавӕры ис.

Йӕ уавӕр ноджы уӕззаудӕр та уымӕй у, ӕмӕ пълотник Иосифмӕ куырдуаты кӕй бады. Уый зоны, Израилӕн лӕвӕрд Хуыцауы закъонмӕ гӕсгӕ, куырдуаты бадӕг сылгоймагӕн барвӕндонӕй ӕндӕр нӕлгоймагимӕ ӕрдон бастдзинад куы уа, уӕд ӕй дуртӕй кӕй амарынц. Куыд бамбарын кӕндзӕн Иосифӕн, сывӕрджын кӕй у, уый?

Зын бамбарӕн нӕу, ӕртӕ мӕйы фӕстӕ Иосифы тынг кӕй фӕндыд ногӕй Мариайы фенын. Куы фембӕлдысты, уӕд ын, ӕвӕццӕгӕн, Мариа хъавгӕйӕ раргом кодта йӕ хабар. Ӕвӕццӕгӕн ын Мариа ӕмбарын кӕны, Хуыцауы сыгъдӕг уды фӕрцы кӕй басывӕрджын. Фӕлӕ йӕ дӕхӕдӕг ӕмбарыс, Иосифӕн зын у ууыл баууӕндын.

Ӕцӕг, Иосиф зоны, Мариайӕн адӕмы ’хсӕн хорз ном кӕй ис. Ӕмӕ йӕ, ӕвӕццӕгӕн, уарзгӕ дӕр тынг кӕны. Фӕлӕ кӕд Мариа алыхуызы бӕлвырд кӕны йӕ рӕстдзинад, уӕддӕр афтӕ зыны, цыма ӕндӕр нӕлгоймагӕй у сывӕрджын. Ӕмӕ уӕддӕр Иосифы нӕ фӕнды, цӕмӕй йӕ дуртӕй амарой кӕнӕ цӕмӕй фӕхудинаг уа. Уый фӕнд кӕны, цӕмӕй дзы ахицӕн уа ӕмӕ йӕ сусӕгӕй ауадза. Уӕды рӕстӕджы фидыд лӕппу ӕмӕ чызг бинойнӕгтыл нымад цыдысты, ӕмӕ нысаны дзырд фехалынӕн хицӕн кӕнын хъуыд.

Фӕстӕдӕр Иосиф куы схуыссыд, уӕддӕр ма хъуыды кодта уыцы хъуыддагыл. Уӕд ӕм фыны Иегъовӕйы зӕд фӕзынд ӕмӕ йын зӕгъы: «Ма тӕрс райсын Мариайы, дӕ усы; уымӕн ӕмӕ Уый мидӕг райгуырӕг у Сыгъдӕг Удӕй; аргӕ та ныккӕндзӕн Фырт ӕмӕ Йыл сӕвӕрдзынӕ ном: Йесо, уымӕн ӕмӕ Уый фервӕзын кӕндзӕн Йӕ адӕмы сӕ тӕригъӕдтӕй».

Иосиф куы райхъал, уӕд куыд тынг фӕбузныг! Зӕд ын куыддӕриддӕр загъта, афтӕ сарӕзта ӕвӕстиатӕй. Мариайы ӕрбакодта йӕ хӕдзармӕ. Уыцы хъуыддаг арӕзт ӕрцыд ӕппӕт адӕмы ’хсӕн ӕмӕ нысан кӕны ӕмкъайады бацӕуын, ома ныр Иосиф ӕмӕ Мариа официалон ӕгъдауӕй лӕг ӕмӕ ус кӕй сты. Фӕлӕ Йесо цалынмӕ нӕ райгуырд, уӕдмӕ Иосифӕн Мариаимӕ нӕ уыд ӕрдон ахастытӕ.

Акӕс-ма! Мариа ныр фарӕстӕм мӕй у сывӕрджын, фӕлӕ йӕ уӕддӕр Иосиф хӕрӕгыл бадын кӕны. Кӕдӕм срӕвдз кодтой сӕхи ӕмӕ цӕмӕн араст сты балцы, тагъд сын сывӕллон куы хъуамӕ райгуыра, уӕд? Лукайы 1:39—41, 56; Матфейы 1:18—25; Дыккаг закъон 22:23, 24.

▪ Мариа сывӕрджын кӕй у, уый базонгӕйӕ, Иосиф цы сфӕнд кодта ӕмӕ цӕмӕн?

▪ Иосиф Мариайӕ цӕмӕн хицӕн кӕны, кӕд ӕмӕ нырма ус ӕмӕ лӕг не сты?

▪ Иосиф ӕмӕ Мариа ныр лӕг ӕмӕ ус кӕй сты, уый цӕмӕй бӕрӕг у?