Йесо ахуыр кӕны Никодимы

НӔ ЭРӔЙЫ 30 азы Куадзӕны Йесо ӕвдисы ӕнахуыр нысӕнттӕ ӕмӕ диссӕгтӕ. Уый фӕстиуӕгӕн ыл бирӕтӕ ӕууӕндын райдыдтой. Уый тынг бандӕвта Иудейы синедрионы уӕнг Никодимыл ӕмӕ йӕ фӕнды фылдӕр базонын. Йесомӕ ӕрбацыд ӕхсӕвыгон, ӕвӕццӕгӕн, тӕрсы, исчи йӕ куы фена ӕмӕ йын иннӕ иудейаг дины разамонджытӕ куы нал кад кӕной.

«Равви,— дзуры уый,— мах зонӕм, Ды — кӕй Дӕ Ахуыргӕнӕг, Хуыцауӕй ӕрцӕуӕг; уымӕн ӕмӕ Ды цы диссӕгтӕ кӕныс, уыдон никӕйы бон у кӕнын, йемӕ Хуыцау куы нӕ уа, уӕд». Йесо дзуапп дӕтты Никодимӕн, зӕгъгӕ, цӕмӕй адӕймаг Хуыцауы Паддзахадмӕ бацӕуа, уый тыххӕй хъуамӕ ‘райгуыра уӕлдӕрӕй’.

Фӕлӕ куыд у адӕймаджы бон уӕлдӕрӕй райгуырын? «Ӕцӕг у йӕ бон дыккаг хатт йӕ мады гуыбыны бацӕуын ӕмӕ райгуырын»? — фӕрсы йӕ Никодим.

Нӕ, уый афтӕ ӕмбарын нӕ хъӕуы. Йесо ӕмбарын кӕны: «Чи нӕ райгуыра дон ӕмӕ Удӕй, уый нӕ бафӕраздзӕн бацӕуын Хуыцауы Паддзахадмӕ». Йесо аргъуыд куы райста ӕмӕ йыл сыгъдӕг уд куы ’рцыд, уӕд уый райгуырд «дон ӕмӕ Удӕй». Уый фӕстӕ уӕларвӕй фехъуыст хъӕлӕс: «Уый у Мӕ Уарзон Фырт, Кӕцымӕ ис Мӕ хорз фӕндон», ӕмӕ уымӕй Хуыцау фехъусын кодта, уӕларвон Паддзахадмӕ бацӕуыны фадат кӕмӕн ис, ахӕм духовон фырт ын кӕй райгуырд. Фӕстӕдӕр, н. э. 33 азы, иннӕ аргъуыд адӕм дӕр райстой сыгъдӕг уд ӕмӕ афтӕмӕй райгуырдысты уӕлдӕрӕй, Хуыцауы духовон фырттӕй.

Фӕлӕ Хуыцауы адӕймагон Фыртӕн ис сӕрмагонд ахадындзинад. «Ӕмӕ Моисей куыд систа калмы уӕлӕмӕ ӕдзӕрӕгран,— зӕгъы Йесо Никодимӕн,— афтӕ ӕмбӕлы сисын уӕлӕмӕ Адӕймаджы Фырты дӕр, цӕмӕй алкӕцы, Ууыл ӕууӕндӕг, ма фесӕфа, фӕлӕ йын уа мыггагмӕйы цард». Моисейы рӕстӕджы-иу маргджын кӕлмытӕ кӕуыл фӕхӕцыдысты, уыцы израилӕгтӕ цӕмӕй ӕгас баззадаиккой, уый тыххӕй сӕ ӕрхуыйӕ арӕзт калммӕ куыд хъуыд кӕсын, афтӕ адӕм дӕр цӕмӕй мӕлӕтон уавӕрӕй фервӕзой, уый тыххӕй сӕ хъӕуы Хуыцауы Фыртыл ӕууӕндын.

Никодимимӕ дарддӕр ныхасгӕнгӕйӕ, Йесо дзуры Иегъовӕйы стыр уарзондзинадыл: «Афтӕ бауарзта Хуыцау дуне, ӕмӕ ратта Йӕ иунӕггуырд Фырты, цӕмӕй алкӕцы, Ууыл ӕууӕндӕг, ма фесӕфа, фӕлӕ йын уа мыггагмӕйы цард». Уӕдӕ йӕ лӕггаддзинады райдианӕй 6 мӕйы йеддӕмӕ нӕма рацыд, афтӕ Йесо ам, Иерусалимы, бӕлвырдӕй ӕвдисы, Иегъовӕ Хуыцау уый уылты кӕй фервӕзын кӕндзӕн адӕймагады.

Дарддӕр Йесо ӕмбарын кӕны Никодимӕн: «Уымӕн ӕмӕ Хуыцау нӕ рарвыста Йӕ Фырты дунемӕ, цӕмӕй тӕрхон кӕна дунейӕн», ома йӕ уый тыххӕй нӕ рарвыста, цӕмӕй йыл фыдтӕрхон скӕна кӕнӕ йӕ бафхӕра, ӕмӕ адӕймагады скуынӕг кӕна. Нӕ, Йесо уый тыххӕй у ӕрвыст, «цӕмӕй дуне ирвӕзт ӕрцӕуа, уый сӕрты [«фӕрцы», НФ]».

Никодим, исчи йӕ куы фена, уый тӕсӕй Йесомӕ бацыд ӕхсӕвыгон. Ӕмӕ уымӕ гӕсгӕ цымыдисаг у, Йесо кӕронбӕттӕны ахӕм ныхӕстӕ кӕй дзуры: «Тӕрхон та уый мидӕг ис, ӕмӕ рухс [кӕцы Йесо равдыста йӕ цард ӕмӕ йӕ ахуырӕдтӕй] ӕрцыд дунемӕ; фӕлӕ адӕм талынджы фылдӕр бауарзтой рухсӕй уымӕн ӕмӕ сӕ хъуыддӕгтӕ уыдысты фыддзинад. Уымӕн ӕмӕ алкӕцы ӕвзӕргӕнӕг нӕ уарзы рухс ӕмӕ нӕ цӕуы рухсмӕ, цӕмӕй ма раргом уой йӕ хъуыддӕгтӕ, уымӕн ӕмӕ уыдон сты фыддзинад; фӕлӕ рӕстдзинад чи уарзы, уый цӕуы рухсмӕ, цӕмӕй ӕргом уой йӕ хъуыддӕгтӕ, уымӕн ӕмӕ уыдон Хуыцауы мидӕг конд сты». Иоанны 2:23—3:21; Матфейы 3:16, 17; Куыстытӕ 2:1—4; Нымӕцтӕ 21:9.

▪ Цы сразӕнгард кодта Никодимы Йесомӕ бацӕуынмӕ ӕмӕ йӕм ӕхсӕвыгон цӕмӕн бацыд?

▪ Цы нысан кӕны «уӕлдӕрӕй райгуырын»?

▪ Йесойӕн нӕ ирвӕзындзинады цы ахадындзинад ис, уый куыд равдыста?

▪ Цы нысан кӕны, зӕгъгӕ, Йесо дунейӕн тӕрхон кӕнынмӕ не ’рцыд?