Йесо зӕхмӕ цӕмӕн ӕрцыд?

ЙЕСО йӕ цыппар ахуыргӕнинагимӕ Капернаумы цы бон уыд, уыцы бон ӕрцыд бирӕ хабӕрттӕ. Ӕппынфӕстаг ӕм изӕры сахары цӕрджытӕ ӕрбахастой сӕ рынчынты ӕмӕ сӕ Йесо сдзӕбӕх кодта. Йӕхи ахибар кӕныны фадат ын нӕ фӕци.

Дыккаг бон боныцъӕхӕй Йесо сыстад ӕмӕ иунӕгӕй ӕддӕмӕ рацыд. Уый ацыд хибар ранмӕ, цӕмӕй йӕ куыд ничи хъыгдара, афтӕ йӕ Фыдмӕ скува. Фӕлӕ уыцы рӕстӕг бирӕ нӕ ахаста. Петр ӕмӕ иннӕтӕ, уым кӕй нӕй, уый куы фӕхатыдысты, уӕд йӕ агурӕг рацыдысты.

Куы йӕ ссардтой, уӕд ын Петр дзуры: «Иуылдӕр агурынц Дӕу». Капернаумы цӕрджыты фӕнды, цӕмӕй Йесо нырма ма ацӕуа уырдыгӕй. Йесо сын цы сарӕзта, уый тыххӕй дзы тынг бузныг сты. Фӕлӕ цымӕ Йесо зӕхмӕ, сӕйраджыдӕр, уый тыххӕй ӕрцыд, цӕмӕй ахӕм диссӕгтӕ араза? Уый тыххӕй йӕхӕдӕг цы зӕгъы?

Библи куыд хъусын кӕны, афтӕмӕй Йесо дзуапп дӕтты йӕ ахуыргӕнинӕгтӕн: «Цомут хӕстӕг хъӕутӕм ӕмӕ сахартӕм, цӕмӕй Ӕз уым дӕр хъусын кӕнон, уымӕн ӕмӕ Ӕз уый тыххӕй ӕрцыдтӕн». Кӕд ӕм адӕм тынг зӕрдиагӕй хатынц, цӕмӕй ма ацӕуа, уӕддӕр сын дзуры: «Ӕндӕр сахартӕн дӕр хъуамӕ хъусын кӕнон Хуыцауы Паддзахад, уымӕн ӕмӕ уый тыххӕй ӕрвыст дӕн Ӕз».

Уӕдӕ Йесо зӕхмӕ, фыццаджыдӕр, уый тыххӕй ӕрцыд, цӕмӕй хъусын кӕна Хуыцауы Паддзахад, кӕцы йын срухс кӕндзӕн йӕ Фыды ном ӕмӕ ӕнустӕм кӕрон скӕндзӕн адӕймагады ӕппӕт зындзинӕдтӕн дӕр. Фӕлӕ Хуыцауӕй ӕрвыст кӕй у, уый сбӕлвырд кӕнынӕн Йесо диссаджы ӕгъдауӕй дзӕбӕх кӕны адӕмы. Сӕдӕазтӕ раздӕр Моисей дӕр, Хуыцауы лӕггадгӕнӕг кӕй уыд, уый сбӕлвырд кӕнынӕн арӕзта ахӕм диссӕгтӕ.

Иннӕ сахартӕн дӕр хъусын кӕнынмӕ Капернаумӕй Йесоимӕ араст сты йӕ цыппар ахуыргӕнинаджы дӕр. Уыдон сты Петр ӕмӕ йе ’фсымӕр Андрей, Иоанн ӕмӕ йе ’фсымӕр Иаков. Чи зоны хъуыды кӕныс, къуыри раздӕр сӕ Йесо кӕй ӕрхуыдта ӕмӕ йӕ фыццаг ӕмбӕлццӕттӕ кӕй систы.

Йесо ӕмӕ йӕ цыппар ахуыргӕнинаджы уацамындон балц Галилейы у тынг ӕнтыстджын. Йӕ диссаджы хъуыддӕгтӕ айхъуыстысты ӕгас Сирийыл. Галилейӕ, Иудейӕ ӕмӕ Иорданы иннӕ фарсӕй бирӕ адӕм цӕуынц Йесо ӕмӕ йӕ ахуыргӕнинӕгты фӕстӕ. Маркы 1:35—39; Лукайы 4:42, 43; Матфейы 4:23—25; Рацыд 4:1—9, 30, 31.

▪ Йесо ӕмӕ йӕ ахуыргӕнинӕгтӕ Капернаумы цы бон уыдысты, уый фӕстӕ райсомӕй цы хабар ӕрцыд?

▪ Цӕй тыххӕй ӕрцыд Йесо зӕхмӕ ӕмӕ цӕмӕн ӕвдисы диссӕгтӕ?

▪ Йесоимӕ йӕ уацамындон балцы Галилейы чи ис ӕмӕ йӕ хъуыддӕгтӕ адӕмыл куыд ӕндавынц?