Иегъовӕйы кувынадыл зӕрдиагдзинад

ЙЕСОЙЫ ӕфсымӕртӕ, ома Иосиф ӕмӕ Мариайы иннӕ фырттӕ хуыйнынц Иаков, Иосий, Симон ӕмӕ Иудӕ. Цалынмӕ Йесо ӕмӕ йӕ ахуыргӕнинӕгтӕ Галилейы денджызгӕрон Капернаумы сахармӕ ацыдысты, уӕдмӕ уал фӕстиат кӕнынц Йесойы хӕдзары Назареты, цӕмӕй бинонтӕ сӕхи фӕндагмӕ срӕвдз кӕной.

Фӕлӕ Йесо Канӕ, Назарет кӕнӕ Галилейы хӕхты ӕндӕр искуы лӕггад кӕныны бӕсты Капернауммӕ цӕмӕн цӕуы? Фыццаджыдӕр, Капернаум ис тынг хорз бынаты ӕмӕ у стыр сахар; дыккаг та уый, ӕмӕ Йесойы ног ахуыргӕнинӕгтӕн сӕ фылдӕр сты Капернаумӕй кӕнӕ та йӕ алыварс хъӕутӕй. Ӕмӕ сӕ бон у, сӕ хӕдзӕрттӕ нӕ ныууадзгӕйӕ, Йесойы амындтӕм хъусын.

Йесо цалдӕр мӕйы фӕстӕ, йӕхӕдӕг куыд бӕлвырд кӕны, афтӕмӕй Капернаумы аразы бирӕ диссӕгтӕ. Фӕлӕ та гыццыл фӕстӕдӕр Йесо ӕмӕ йе ’мбӕлццӕттӕ ногӕй сты фӕндагыл. У уалдзӕг. Уыдон араст сты Иерусалиммӕ, н. э. 30 азы Куадзӕн бӕрӕг кӕнынмӕ. Иерусалимы ахуыргӕнинӕгтӕ Йесойы тыххӕй базыдтой, ӕвӕццӕгӕн, уӕдмӕ цы нӕ зыдтой, ахӕм цыдӕр.

Хуыцауы Закъонмӕ гӕсгӕ израилӕгтӕ хӕсджын сты фосы нывӕндтӕ хӕссын. Ӕмӕ сын цӕмӕй ӕнцондӕр уа, уый тыххӕй сын Иерусалимы базаргӕнджытӕ уӕй кӕнынц фос ӕмӕ мӕргътӕ. Фӕлӕ уыдон базар кӕнынц кувӕндонӕн йӕхи мидӕг ӕмӕ, ӕгӕр стыр ӕргътӕ ӕвӕргӕйӕ, стигъынц адӕмы.

Йесо смӕсты, синӕгтӕй ехс сарӕзта ӕмӕ уӕйгӕнджыты иуылдӕр расырдта. Ӕхцаивджыты ӕхцатӕ ныппырх кодта ӕмӕ сын се стъолтӕ афӕлдӕхта. Бӕлӕттӕ чи уӕй кодта, уыдонӕн та дзуры: «Айсут адон ардыгӕй, ӕмӕ мӕ Фыды хӕдзарӕй ма аразут базаргӕнӕн хӕдзар».

Уый уынгӕйӕ, ахуыргӕнинӕгтӕн сӕ зӕрдыл ӕрлӕууыд Хуыцауы Фырты тыххӕй пехуымпарад: «Дӕ хӕдзарыл мӕт кӕнын мӕ удхарӕй мары». Иудейтӕ та йӕ фӕрсынц: «Цавӕр нысанӕй равдисдзынӕ Ды махмӕ, афтӕ кӕныны бар дӕм кӕй ис, уый?» Йесо сын дзуапп дӕтты: «Фехалут ацы кувӕндон ӕмӕ йӕ Ӕз ӕртӕ бонмӕ сараздзынӕн».

Иудейтӕм афтӕ кӕсы, Йесо ӕцӕг кувӕндоны тыххӕй дзуры, ӕмӕ йӕ фӕрсынц: «Ацы кувӕндон арӕзтой цыппор ӕхсӕз азы ӕмӕ йӕ Ды ӕртӕ бонмӕ сараздзынӕ?» Фӕлӕ Йесо йӕ буары кувӕндоны тыххӕй дзуры. Ӕмӕ ӕртӕ азы фӕстӕ, Йесо мӕрдтӕй куы райгас, уӕд ын йӕ ахуыргӕнинӕгтӕ йӕ ныхӕстӕ ӕрхъуыды кодтой. Иоанны 2:12—22; Матфейы 13:55; Лукайы 4:23.

▪ Канӕйы чындзӕхсӕвы фӕстӕ Йесо кӕдӕм ацыд?

▪ Цӕуыл смӕсты Йесо ӕмӕ цы сарӕзта?

▪ Йесойы хъуыддӕгтӕм кӕсгӕйӕ, йӕ ахуыргӕнинӕгтӕн цы ’рлӕууыд сӕ зӕрдыл?

▪ Цы зӕгъы Йесо «ацы кувӕндоны» тыххӕй ӕмӕ йӕ куыд ӕмбарын хъӕуы?