Ногӕй хӕдзары Капернаумы

УӔДМӔ Йесойы ном дардыл айхъуыст ӕмӕ, цы хибар бынӕтты ӕрлӕууы, уырдӕм дӕр ӕм цӕуынц адӕм. Фӕлӕ цалдӕр боны фӕстӕ уый фӕстӕмӕ Галилейы денджызгӕрон Капернауммӕ аздӕхт. Йе ’рцыды хабар уайтагъд айхъуыст ӕгас сахарыл ӕмӕ, цы хӕдзары ис, уый алыварс бирӕ адӕм ӕрӕмбырд. Фарисейтӕ ӕмӕ йӕм чиныджы дӕснытӕ цӕуынц суанг дард Иерусалимӕй дӕр.

Адӕм афтӕ бирӕ сты, ӕмӕ хӕдзармӕ бахизӕн нал ис. Бӕрӕг у, цыдӕр диссаг кӕй ӕрцӕудзӕн. Ныртӕккӕ цы ’рцӕудзӕн, уый ӕцӕгдӕр ахсджиаг хабар у, уымӕн ӕмӕ нын ӕххуыс кӕны, Йесойы бон адӕмы фыдӕбӕтты, аххосаг аиуварс кӕнын кӕй у ӕмӕ йӕ адӕмы сдзӕбӕх кӕнын кӕй фӕнды, уый бамбарынӕн.

Йесо адӕмы куыд ахуыр кӕны, афтӕ цыппар нӕлгоймаджы хӕдзары цурмӕ сынтыл ӕрбахастой уӕнгмард адӕймаджы. Уыдон фӕнды, цӕмӕй сын Йесо се ’мбалӕн баххуыс кӕна, фӕлӕ адӕмӕй сӕ бон хӕдзармӕ бацӕуын нӕу. Тынг хъыгаг хабар! Фӕлӕ уӕддӕр сӕ ныфс нӕ сӕтты. Уыдон хӕдзары тъӕпӕн сӕрмӕ сбырыдысты, фӕйнӕджытӕ айстой ӕмӕ уӕнгмарды сынтыл комкоммӕ Йесомӕ ӕруагътой.

Цымӕ сӕм Йесо мӕсты кӕны, кӕй йӕ бахъыгдардтой, уый тыххӕй? Бынтондӕр нӕ! Ахӕм диссаджы уырнындзинад сӕм кӕй ис, уый тынг бандӕвта Йесойыл. Уӕнгмардӕн дзуры: «Хатыргонд сты дӕуӕн дӕ тӕригъӕдтӕ». Фӕлӕ ӕцӕгӕй у Йесойы бон тӕригъӕдтӕ хатыр кӕнын? Чиныджы дӕснытӕ ӕмӕ фарисейтӕ афтӕ нӕ хъуыды кӕнынц. Уыдон сӕхимидӕг дзурынц: «Цӕмӕн афтӕ ӕфхӕры Уый Хуыцауы? кӕй бон у тӕригъӕдтӕ хатыр кӕнын, ӕрмӕст иунӕг Хуыцауы йеддӕмӕ?»

Йесо сын зоны сӕ хъуыдытӕ ӕмӕ сӕ фӕрсы: «Цӕй тыххӕй афтӕ хъуыды кӕнут уӕ зӕрдӕты мидӕг? Цы у ӕнцондӕр? зӕгъын уӕнгмардӕн: „хатыргонд сты дӕуӕн дӕ тӕригъӕдтӕ“? ӕви зӕгъын: „сыст, сис дӕ хуыссӕн ӕмӕ цу“?»

Уый фӕстӕ Йесо адӕмӕн ӕмӕ ӕфхӕрджытӕн дӕр диссаджы хуызы ӕвдисы, зӕххыл ын тӕригъӕдтӕ хатыр кӕныны бар кӕй ис ӕмӕ ӕппӕты номдзыддӕр адӕймаг кӕй у. Уӕнгмардмӕ йе ’ргом аздахгӕйӕ, уый дзуры: «Сыст, сис дӕ хуыссӕн ӕмӕ дӕ хӕдзармӕ цу». Ӕмӕ уыцы тӕккӕ сыстад, сынт йӕ къухы райста ӕмӕ адӕмы рӕзты рацыд. Дисы бафтгӕйӕ, адӕм кадджын кӕнынц Хуыцауы ӕмӕ дзурынц: «Ахӕмӕй мах никуы ницы федтам».

Йесойы ныхӕстӕм гӕсгӕ, тӕригъӕдджын кӕй стӕм, рынчын дӕр уый тыххӕй кӕнӕм, ӕмӕ нӕ физикон ӕнӕниздзинад тӕригъӕдтӕ ныххатыр кӕныныл у баст. Библи нын ӕвдисы, нӕ фыдӕл Адам тӕригъд кӕй ракодта ӕмӕ мах иуылдӕр уымӕй нӕ туджы кӕй рахастам тӕригъӕд, сӕрмагондӕй та низтӕ ӕмӕ мӕлӕт. Фӕлӕ Хуыцауы Паддзахады къухдариуӕгадӕй, Хуыцауы чи уарзы ӕмӕ йын чи лӕггад кӕны, уыдонӕн Йесо ныххатыр кӕндзӕн сӕ тӕригъӕдтӕ, ӕмӕ уӕд низ бынтондӕр никуыуал уыдзӕн. Цӕй диссаг у, ӕвӕдза! Маркы 2:1—12; Лукайы 5:17—26; Матфейы 9:1—8; Ромӕгтӕм 5:12, 17—19.

▪ Кӕм ӕрцыд диссаджы хабар?

▪ Уӕнгмард адӕймаг Йесомӕ куыд бафтыд?

▪ Мах иуылдӕр тӕригъӕдджынтӕ цӕмӕн стӕм, фӕлӕ нӕ тӕригъӕдты хатырдзинад ӕмӕ ӕххӕст ӕнӕниздзинадӕн гӕнӕн кӕй ис, уый нын Йесо куыд равдыста?