Матфейы ӕрхуынд

ЙЕСО Капернаумы уӕнгмард адӕймаджы куы сдзӕбӕх кодта, уый фӕстӕ ацыд Галилейы денджызы былмӕ. Ам та йӕм ногӕй адӕм къордгӕйттӕй цӕуынц ӕмӕ сӕ уый ахуыр кӕны. Гыццыл фалдӕр ацӕугӕйӕ йӕ цӕст схӕцыд хъалонӕмбырдгӕнӕны бадӕг Матфейыл; хонынц ма йӕ Левий дӕр. «Рацу Мӕ фӕстӕ»,— дзуры йын Йесо.

Ӕвӕццӕгӕн Петр, Андрей, Иаков ӕмӕ Иоаннау Матфей дӕр зонгӕ уыд Йесойы ахуырӕдтимӕ. Ӕмӕ Матфей дӕр уыдонау уайтагъд сразы Йесойы ӕрхуындыл. Уый сыстад, хъалонисӕджы куыст ныууагъта ӕмӕ Йесойы фӕдыл ацыд.

Фӕстӕдӕр, ӕвӕццӕгӕн, йӕ ӕрхуынды нысанӕн Матфей йӕ хӕдзары стыр куывд скодта. Йесо ӕмӕ йӕ ахуыргӕнинӕгтӕй дарддӕр ма уым уыдысты хъалонисджытӕй дӕр бирӕтӕ. Уыцы адӕм Ромы хицауадӕн хъалон кӕй ӕмбырд кӕнынц, уый тыххӕй се ’мзӕххонтӕн сӕ цӕсты сындз сты. Уымӕй уӕлдай, уыдон адӕмӕй арӕх сӕхи пайдайӕн уӕлдай ӕхца фӕдомынц.

Йесо ахӕм адӕмимӕ кӕй цӕл кӕны, уый уынгӕйӕ, фарисейтӕ фӕрсынц йӕ ахуыргӕнинӕгты: «Цӕй тыххӕй уӕ Ахуыргӕнӕг хӕры ӕмӕ нуазы мытӕртӕ ӕмӕ тӕригъӕдджынтимӕ?» Йесо фехъуыста уыцы фарст ӕмӕ зӕгъы фарисейтӕн: «Ӕнӕнизтӕ не сты дохтыр хъуаг, фӕлӕ рынчынтӕ; ацӕут, раздӕр сахуыр ут, цы амоны: „нывонд нӕ, фӕлӕ Мӕ хорзӕх хъӕуы“? уымӕн ӕмӕ Ӕз ӕрцыдтӕн рӕстгӕнджыты нӕ, фӕлӕ тӕригъӕдджынты фӕсмондзинадмӕ ӕрхонынмӕ».

Ӕвӕццӕгӕн Матфей мытӕрты уый тыххӕй фӕхуыдта, цӕмӕй Йесомӕ байхъусой ӕмӕ уыдон дӕр духовон ӕгъдауӕй сӕнӕниз уой. Йесо семӕ уый тыххӕй ис, цӕмӕй сын баххуыс кӕна Хуыцауимӕ хорз ахастытӕ сфидар кӕнынӕн. Йесо сӕрбӕрзонд фарисейтау нӕ ӕлгъ кӕны ахӕм адӕмыл. Фӕлӕ сын фӕлмӕнзӕрдӕйӕ духовон хосгӕнӕджы лӕггад кӕны.

Йесойӕн тӕригъӕдджынтӕм фӕлмӕнзӕрдӕ ахаст кӕй ис, уый ууыл дзурӕг нӕу, сӕ тӕригъӕдтӕ йӕм хорз кӕй кӕсынц. Нӕ, уый сӕм ӕвдисы, физикон ӕгъдауӕй рынчынтӕм цы уарзондзинад равдыста, ахӕм уарзондзинад. Цӕвиттонӕн ӕрхъуыды кӕн, Йесо хъотырджыны куы федта, уӕд ын куыд фӕтӕригъӕд кодта, куыд ӕм бавнӕлдта ӕмӕ йын куыд загъта: «Фӕнды Мӕ, ныссыгъдӕг у». Мӕгуыр адӕмӕн, уӕлдайдӕр та духовон ӕгъдауӕй рынчынтӕн ӕххуысгӕнгӕйӕ, мах дӕр афтӕ фӕлмӕнзӕрдӕ хъуамӕ уӕм. Матфейы 8:3; 9:9—13; Маркы 2:13—17; Лукайы 5:27—32.

▪ Кӕм бадт Матфей, Йесо йӕ куы федта, уӕд?

▪ Цы куыст кодта Матфей ӕмӕ ахӕм адӕм иннӕ иудейтӕн сӕ цӕсты сындз цӕмӕн уыдысты?

▪ Цӕй тыххӕй ӕфхӕрдтой Йесойы ӕмӕ сын цавӕр дзуапп ратта?

▪ Йесо тӕригъӕдджынтимӕ цӕмӕн ӕмбӕлы?