Йесойы цӕстӕнгас ком дарынмӕ

ЙЕСО н. э. 30 азы Куадзӕны куы уыд, уымӕй иу азы бӕрц рацыд. Аргъауӕг Иоанн ныр цалдӕр мӕйы ис ахӕстоны. Иоанны куыд фӕнды, афтӕ йӕ ахуыргӕнинӕгтӕ иуыл нӕ цӕуынц Йесойы фӕдыл.

Ныр уыцы ахуыргӕнинӕгтӕй цалдӕр ӕрбацыд Йесомӕ ӕмӕ йӕ фӕрсынц: «Цӕмӕн мах ӕмӕ фарисейтӕ дарӕм ком бирӕ, фӕлӕ Дӕу ахуыргӕнинӕгтӕ та ком нӕ дарынц?» Къуыри дыууӕ хатты ком чи дары, уыцы фарисейтӕн ацы хъуыддаг дины ӕгъдау у. Ӕвӕццӕгӕн Иоанны ахуыргӕнинӕгтӕ дӕр уыцы ӕгъдаумӕ гӕсгӕ архайынц. Чи зоны, Иоанны кӕй ӕрцахстой, ууыл мастгӕнгӕйӕ, хӕргӕ дӕр ницы кӕнынц, ӕмӕ сӕм ныр диссаг кӕсы, Йесойы ахуыргӕнинӕгтӕ афтӕ кӕй нӕ кӕнынц.

Мӕнӕ сын Йесо цы дзуапп дӕтты: «Сӕ бон у мыййаг ӕнкъард уӕвын чындзӕхсӕвы галуаны фырттӕн, цалынмӕ усгур уыдонимӕ ис уӕдмӕ? Фӕлӕ ӕрцӕудзысты бонтӕ, кӕд усгур ист ӕрцӕудзӕн уыдонӕй, ӕмӕ уӕд ком дардзысты».

Иоанны ахуыргӕнинӕгтӕ ӕнӕмӕнг хъуамӕ ӕрхъуыды кодтаиккой, Иоанн йӕхӕдӕг Йесойы усгур кӕй хуыдта. Уӕдӕ цалынмӕ Йесо семӕ ис, уӕдмӕ Йесойы ахуыргӕнинӕгтау Иоанн дӕр нӕ дарид ком. Фӕстӕдӕр, Йесо куы амард, уӕд йӕ ахуыргӕнинӕгтӕ хъыг кодтой ӕмӕ ком дӕр дардтой. Фӕлӕ Йесо куы райгас ӕмӕ уӕларвмӕ куы ссыд, уый фӕстӕ уыдон нал хъуыд фыдохы нысанӕн ком дарын.

Уый фӕстӕ сын Йесо цӕстуынгӕ цӕвиттонӕй ӕмбарын кӕны: «Зӕронд дарӕсыл ничи ӕвӕры ӕмпъузӕн ног хъуымацӕй, уымӕн ӕмӕ ног хъуымац ратондзӕн зӕрондӕй ӕмӕ скъуыд уыдзӕн ноджы ӕвзӕрдӕр. Нӕ кӕнынц афтӕ ног сӕн дӕр зӕронд лалымты; науӕд атонынц лалымтӕ, ӕмӕ сӕн акӕлы, ӕмӕ лалымтӕ фесӕфынц; фӕлӕ ног сӕн кӕнынц ног лалымты, ӕмӕ дыууӕдӕр хъахъхъӕд ӕрцӕуынц». Куыд ӕмбарын кӕнынц ацы цӕвиттонтӕ ком дарыны фарстытӕ?

Йесо Аргъауӕг Иоанны ахуыргӕнинӕгтӕн ӕмбарын кӕны, йӕ ахуыргӕнинӕгтӕ хӕсджын кӕй не сты рагон иудаизмы ӕгъдӕуттӕ, уыимӕ ком дарыны ӕгъдау дӕр, ӕххӕст кӕнын. Йесо зӕхмӕ ‘ӕмпъузӕн сӕвӕрынмӕ’ ӕмӕ тагъд йӕ кӕрон цы кувынадӕн ӕрцӕудзӕн, уый адарддӕр кӕнынмӕ не ’рцыд. Чырыстон дин хъуамӕ ма уа адӕймаджы ӕрымысгӕ ӕгъдӕуттыл чи бындуриуӕг кодта, уыцы иудаизмы хуызӕн. Уый хъуамӕ ма уа зӕронд дарӕсыл ног ӕмпъузӕны хуызӕн кӕнӕ зӕронд лалымты конд ног сӕны хуызӕн. Матфейы 9:14—17; Маркы 2:18—22; Лукайы 5:33—39; Иоанны 3:27—29.

▪ Чи дары ком ӕмӕ цӕмӕн?

▪ Йесо цалынмӕ семӕ ис, уӕдмӕ йӕ ахуыргӕнинӕгтӕ ком цӕуылнӕ дарынц ӕмӕ сӕ тагъд бынтондӕр цӕуылнӕуал хъӕудзӕн ком дарын?

▪ Цавӕр цӕстуынгӕ цӕвиттонтӕ ӕрхаста Йесо ӕмӕ цӕмӕн?