28 СӔР
Йесойы ахуыргӕнинӕгтӕ ком цӕуылнӕ дарынц?
МАТФЕЙЫ 9:14–17 МАРЧЫ 2:18–22 ЛУКАЙЫ 5:33–39
ИОАННЫ АХУЫРГӔНИНӔГТӔ ЙЕСОЙЫ ФӔРСЫНЦ КОМ ДАРЫНЫ ТЫХХӔЙ
Йесо н. э. 30 азы Куадзӕны куы уыди, уымӕй цасдӕры фӕстӕ Аргъауӕг Иоанны ӕрцахстой. Иоанны фӕндыд, цӕмӕй йӕ ахуыргӕнинӕгтӕ Йесойы фӕдылдзӕуджытӕ суыдаиккой. Фӕлӕ йӕ куы ’рцахстой, уӕдӕй цалдӕр мӕйы рацыд, ӕмӕ уӕд дӕр йӕ ахуыргӕнинӕгтӕ се ’ппӕт нӕма райдыдтой Йесойы фӕдыл цӕуын.
Ныр та н. э. 31 азы Куадзӕнмӕ бирӕ нал хъуыд. Ӕмӕ Иоанны ахуыргӕнинӕгтӕй чидӕртӕ Йесомӕ ӕрбацыдысты ӕмӕ йӕ бафарстой: «Мах дӕр ӕмӕ фарисейтӕ дӕр ком куы дарӕм, уӕд дӕ ахуыргӕнинӕгтӕ цӕуылнӕ дарынц ком?» (Матфейы 9:14). Фарисейтӕ ком дардтой, уымӕн ӕмӕ сын уый дины ӕгъдау уыди. Йӕхи рӕстгӕнӕг чи хуыдта, ахӕм фарисейы тыххӕй ма фӕстӕдӕр Йесо цӕвиттон дӕр ӕрхаста. Йесо куыд радзырдта, афтӕмӕй уыцы фарисей куывта: «О Хуыцау, бузныг, ӕз иннӕты хуызӕн... кӕй нӕ дӕн... Къуыри дыууӕ хатты ком дарын» (Лукайы 18:11, 12). Уӕдӕ Иоанны ахуыргӕнинӕгтӕ дӕр, чи зоны, ком дардтой уыцы ӕгъдаумӕ гӕсгӕ йе та, Иоанны хабарыл кӕй маст кодтой, уый тыххӕй. Уымӕ гӕсгӕ уыдон дӕр дис кодтой, Йесойы ахуыргӕнинӕгтӕ ком кӕй нӕ дардтой ӕмӕ Иоанны хабарыл кӕй нӕ хъыг кодтой, ууыл.
Йесо сын сӕ фарстайӕн дзуапп радта ахӕм цӕвиттоны фӕрцы: «Сиахс цалынмӕ йе ’мбӕлттимӕ уа, уӕдмӕ цӕуыл хъуамӕ хъыг кӕной? Фӕлӕ ӕрцӕудзӕн ахӕм рӕстӕг, ӕмӕ сиахсы акӕндзысты, ӕмӕ уӕд дардзысты ком» (Матфейы 9:15).
Иоанн йӕхӕдӕг схуыдта Йесойы сиахс, кӕнӕ усгур (Иоанны 3:28, 29). Уӕдӕ цалынмӕ Йесо зӕххыл уыд, уӕдмӕ йӕ ахуыргӕнинӕгтӕ ком нӕ дардтой. Фӕстӕдӕр ӕй куы амардтой, уӕд йӕ ахуыргӕнинӕгтӕ маст кодтой ӕмӕ сӕм хӕрын дӕр нӕ цыди. Фӕлӕ куы райгас, уӕд сӕ маст цинмӕ раивта! Ӕмӕ сӕ уӕдӕй фӕстӕмӕ маст кӕнын ӕмӕ ком дарын никуыуал хъуыд.
Дарддӕр сын Йесо ӕрхаста дыууӕ цӕвиттоны: «Зӕронд дарӕсыл ног хъуымацӕй ӕмпъузӕн ничи ӕвӕры, уымӕн ӕмӕ ног хъуымац куы сбада, уӕд дарӕсӕй ратондзӕн, ӕмӕ скъуыд ноджы стырдӕр фӕуыдзӕн. Уӕдӕ ног сӕн дӕр зӕронд лалымы ничи ныккӕны. Куы йӕ ныккӕнай, уӕд та лалым атондзӕн, ӕмӕ сӕн дӕр акӕлдзӕн, ӕмӕ лалым дӕр фесӕфдзӕн. Фӕлӕ ног сӕн ныккӕнынц ног лалымы» (Матфейы 9:16, 17). Цымӕ Йесойы ацы цӕвиттонтӕй та цы зӕгъын фӕндыд?
Уыдоны фӕрцы Аргъауӕг Иоанны ахуыргӕнинӕгтӕн бамбарын кодта иу ахсджиаг хъуыддаг: йӕ фӕдылдзӕуджытӕм хъуамӕ уымӕ мачи ӕнхъӕлмӕ кӕса, ӕмӕ дзуттаг дины зӕронд ӕгъдӕуттӕ ӕххӕст кӕндзысты, зӕгъӕм, ком дардзысты. Йесо зӕхмӕ уый тыххӕй не ’рцыд, цӕмӕй, кӕрӕдзийыл чи нал хӕцыд, уыцы зӕронд дин «бампъызтаид», ӕмӕ уый фӕрцы йӕ рӕстӕг фылдӕр ахастаид. Дзуттаг дин ӕнӕхъӕнӕй дӕр уыди сафинаг. Йесойы рӕстӕджы уыцы дины ӕрымысгӕ ӕгъдӕуттӕ тынг бирӕ уыд. Ӕмӕ Йесо адӕмӕн афтӕ нӕ дзырдта, цӕмӕй уыцы ӕгъдӕуттыл фидар хӕцыдаиккой. Уый зӕронд дзаумайыл ног ӕмпъузӕн не ’вӕрдта ӕмӕ, чи ныхъхъӕбӕр, ахӕм зӕронд лалымы ног сӕн нӕ кодта.