Сӕдӕйы хицауы фидар уырнындзинад

ЙЕСО йӕ Уӕлхох уацамынд дзырдта, йӕ лӕггаддзинад йе ’мбисыл куы уыд, уӕд. Уый та ууыл дзурӕг у, ӕмӕ зӕххыл цы хъуыддаг райдыдта аразын, уый кӕронмӕ ахӕццӕ кӕнынӕн ма йын баззад афӕдз ӕмӕ фараст мӕйы бӕрц.

Ныр Йесо бацыд йӕ архайды сӕйраг бынат Капернауммӕ. Иудейаг хистӕртӕй йӕм цалдӕр ӕрбацыд ӕххуыс курӕг. Уыдон рарвыста Ромы ӕфсады сӕдӕйы хицау, кӕцы иудейаг нӕу.

Сӕдӕйы хицауӕн йӕ уарзон ӕххуырст мӕлӕтдзаг рынчын у, ӕмӕ йӕ фӕнды, цӕмӕй йӕ Йесо сдзӕбӕх кӕна. Иудейтӕ тынг зӕрдиагӕй хатынц Йесомӕ сӕдӕйы хицауы тыххӕй: «Уый аккаг у, цӕмӕй Ды уымӕн бакӕнай уый, уымӕн ӕмӕ уый уарзы нӕ адӕмы ӕмӕ нын сарӕзта ӕмбырдгӕнӕн».

Уыцы тӕккӕ Йесо араст семӕ. Фӕлӕ бынатмӕ куыд фӕцӕйхӕццӕ кодтой, афтӕ сӕм сӕдӕйы хицау рарвыста йӕ хӕлӕртты, цӕмӕй Йесойӕн зӕгъой: «Ма фыдӕбон кӕн, Хицау! уымӕн ӕмӕ ӕз уый аккаг нӕ дӕн, цӕмӕй Ды бацӕуай мӕ хӕдзармӕ; уымӕ гӕсгӕ мӕхӕдӕг мӕхи нӕ банымадтон аккагыл Дӕумӕ бацӕуынмӕ».

Цӕй диссаджы сӕрныллӕгдзинад равдыста, иннӕтыл хицауиуӕг кӕнын чи сахуыр, уыцы сӕдӕйы хицау! Фӕлӕ ма уый, ӕвӕццӕгӕн, Йесойыл дӕр хъуыды кӕны, уымӕн ӕмӕ зоны, иудейтӕн иннӕ адӕмтимӕ иу кӕныны бар кӕй нӕй. Иу хатт Петр афтӕ загъта: «Сымах зонут, Иудейагӕн бар кӕй нӕй иудзинад кӕнӕ хӕстӕг цӕуын ӕндӕр адӕмимӕ».

Ӕвӕццӕгӕн, сӕдӕйы хицауы нӕ фӕнды, цӕмӕй Йесойы уыцы фӕтк фехалын бахъӕуа, ӕмӕ йӕм уый тыххӕй арвыста йӕ хӕлӕртты: «Зӕгъ ныхас, ӕмӕ сдзӕбӕх уыдзӕн мӕ ӕххуырст; уымӕн ӕмӕ ӕз дӕлбар адӕймаг, фӕлӕ мӕ дӕлбариуӕг ӕфсӕддонтӕ уӕвгӕйӕ, зӕгъын иуӕн: „ацу“, ӕмӕ цӕуы; ӕмӕ иннӕмӕн: „ӕрцу“, ӕмӕ ӕрцӕуы; ӕмӕ мӕ ӕххуырстӕн: „бакӕн уый“, ӕмӕ кӕны».

Уый фехъусгӕйӕ, Йесо дисы бафтыд. «Ӕцӕг зӕгъын сымахӕн,— дзуры Йесо,— Израилы дӕр не ссардтон Ӕз ахӕм уырнындзинад». Йесо сӕдӕйы хицауы ӕххуырсты сдзӕбӕх кодта, ӕмӕ уавӕрӕй спайдагӕнгӕйӕ, хъусын кӕны, ӕнӕуырнӕг иудейтӕ сӕхи цы арфӕдзинӕдтыл атигъ кодтой, уыдон ӕндӕр адӕмтӕй уырнджытӕ кӕй райсдзысты.

Йесо дзуры, «бирӕтӕ кӕй ӕрцӕудзысты скӕсӕнӕй ӕмӕ ныгуылӕнӕй, ӕмӕ ӕрбаддзысты Авраамимӕ, Исахъимӕ ӕмӕ Иаковимӕ Уӕларвон Паддзахады; Паддзахады фырттӕ та ӕппӕрст уыдзысты ӕддаг талынгмӕ: уым уыдзӕн кӕуын ӕмӕ дӕндӕгты хъыс-хъыс».

Ӕддаг талынгмӕ ‘ӕппӕрст чи уыдзӕн’, уыцы «Паддзахады фырттӕ» сты, фыццаг иудейтӕн лӕвӕрд фадатӕй чи не спайда кодта ӕмӕ Йесоимӕ паддзахиуӕг кӕныныл чи не сразы, уыцы иудейтӕ. Авраам, Исахъ ӕмӕ Иаков ӕвдисынц Хуыцауы Паддзахады арӕзтад. Афтӕмӕй Йесо ӕмбарын кӕны, муртаттӕ хуынд кӕй ӕрцӕудзысты «Уӕларвон Паддзахады» ӕрбадынмӕ. Лукайы 7:1—10; Матфейы 8:5—13; Куыстытӕ 10:28.

▪ Иудейтӕ Йесомӕ муртаттаг сӕдӕйы хицауы тыххӕй цӕмӕн бахатыдысты?

▪ Сӕдӕйы хицау Йесойы йӕ хӕдзармӕ цӕуылнӕ бахуыдта?

▪ Йесойы йӕ фӕстаг ныхӕстӕй цы зӕгъын фӕндыд?