Чырыстийы паддзахадон кады развӕлгъау равдыст

ЙЕСО ӕрцыд Филиппы Кесаримӕ ӕмӕ уым ахуыр кӕны адӕмы, афтӕ ма апостолты дӕр. Уый дзуры диссаджы ныхӕстӕ: «Ӕцӕг зӕгъын сымахӕн: ис иутӕ ам чи лӕууы, уыдонӕй, кӕцытӕ нӕма бавзардзысты мӕлӕт, афтӕмӕй фендзысты Адӕймаджы Фырты, Йӕ Паддзахады ӕрцӕугӕ».

„Цымӕ цы зӕгъын фӕнды Йесойы ацы ныхӕстӕй?“ — ӕвӕццӕгӕн хъуыды кӕнынц ахуыргӕнинӕгтӕ. Уымӕй къуыри фӕстӕдӕр Йесо Петр, Иаков ӕмӕ Иоанны йемӕ акодта ӕмӕ бӕрзонд хохмӕ ссыдысты. Ӕвӕццӕгӕн ӕхсӕв у, уымӕн ӕмӕ ахуыргӕнинӕгтӕ фӕллад сты. Кувгӕ-кувын Йесо сӕ разы йӕ хуыз фӕивта. Йӕ цӕсгом хурау ӕрттывта ӕмӕ йӕ дарӕстӕ дӕр тӕмӕнтӕ калдтой.

Уыцы рӕстӕджы фӕзындысты дыууӕйӕ, «Моисей ӕмӕ Илиа», ӕмӕ Йесоимӕ ныхас кӕнын райдыдтой «Йӕ кӕроны тыххӕй, кӕцы Ууыл ӕмбӕлд сӕххӕст уӕвын Иерусалимы». Ӕвӕццӕгӕн, дзырд цӕуы Йесойӕн йӕ мӕлӕт ӕмӕ йӕ райгасыл. Уӕдӕ уыцы ныхасӕй рабӕрӕг, кӕд Петры ныфс уыд, уӕддӕр Йесойӕн худинаджы мӕлӕтӕй фервӕзӕн кӕй нӕй.

Ахуыргӕнинӕгтӕ фынӕй не сты, ӕмӕ уымӕ гӕсгӕ, цы федтой ӕмӕ цы фехъуыстой, уый сӕ дисы бафтыдта. Кӕд уый цӕстылуайӕн у, уӕддӕр афтӕ ӕцӕг зыны, ӕмӕ Петр ӕрбаиу сӕ ныхасмӕ ӕмӕ дзуры: «Хицау! хорз у махӕн ам уӕвын; кӕд Дӕ фӕнды, саразӕм ам ӕртӕ халагъуды: иу Дӕуӕн, ӕмӕ иу Моисейӕн, ӕмӕ иу Илиайӕн».

Петр йӕ ныхас нӕма фӕци, афтӕ сӕ цӕхӕркалгӕ ӕврагъ ӕраууон кодта ӕмӕ дзы райхъуыст хъӕлӕс: «Уый у Мӕ Уарзон Фырт, Кӕцымӕ ис Мӕ хорз фӕндон; Уымӕ хъусут». Уый фехъусгӕйӕ, ахуыргӕнинӕгтӕ дӕлгоммӕ ӕрхаудысты. Фӕлӕ сын Йесо дзуры: «Сыстут ӕмӕ ма тӕрсут». Куы сыстадысты, уӕд уынынц, ӕрмӕстдӕр ма дзы Йесо кӕй баззад.

Дыккаг бон хохӕй куы ӕрцӕйцыдысты, уӕд сӕ Йесо бафӕдзӕхста: «Макӕмӕн дзурут цы федтат, уый тыххӕй, цалынмӕ Адӕймаджы Фырт мӕрдтӕй райгас уа, уӕдмӕ». Цӕстылуайӕны Илиа дӕр кӕй фӕзынд, уымӕ гӕсгӕ ахуыргӕнинӕгтӕм сӕвзӕрд фарст: «Куыд зӕгъынц фарисейтӕ, раздӕр Илиайӕн ӕмбӕлы ӕрцӕуын, зӕгъгӕ?»

«Илиа... ӕрцыд,— ӕмбарын кӕны Йесо,— ӕмӕ йӕ нӕ базыдтой». Йесо Аргъауӕг Иоанны кой кӕны, уымӕн ӕмӕ Иоаннӕн дӕр йӕ хӕслӕвӕрд уыд Илиайы хӕслӕвӕрды хуызӕн. Илиа Елисейӕн куыд ӕрцӕттӕ кодта фӕндаг, афтӕ Иоанн та Йесойӕн ӕрцӕттӕ кодта фӕндаг.

Куыд тынг бафидар кодтаид ацы цӕстылуайӕн Йесойы дӕр ӕмӕ йӕ ахуыргӕнинӕгты дӕр! Зӕгъӕн ис, уымӕй развӕлгъау ӕвдыст ӕрцыд Чырыстийы кад йӕ паддзахады. Ӕцӕгдӕр, Йесо къуыри раздӕр куыд загъта, афтӕ ахуыргӕнинӕгтӕ федтой «Адӕймаджы Фырты, Йӕ Паддзахады ӕрцӕугӕ». Йесойы мӕлӕты фӕстӕ Петр фыста, зӕгъгӕ, уыдон ‘сыгъдӕг хохыл Йемӕ куы уыдысты, уӕд ын сӕхи цӕстытӕй федтой Йе стырад’.

Фарисейтӕ Йесойӕ домдтой, цӕмӕй сын исты нысанӕй сбӕлвырд кӕна, Фыстады рагзагъд Хуыцауӕй ӕвзӕрст Паддзах уый кӕй у. Фӕлӕ сын ницы нысан равдыста. Йесойы ӕввахсдӕр ахуыргӕнинӕгтӕ та федтой, Паддзахады пехуымпарӕдты ӕцӕгдзинад сбӕлвырд кӕныны нысанӕн йӕ хуыз куыд фӕивта. Уый тыххӕй фӕстӕдӕр Петр ахӕм ныхӕстӕ ныффыста: «Уыимӕ махмӕ ис пехуымпарадон ӕцӕгдӕр дзырд [«ӕцӕг пехуымпарады дзырд», НФ]». Матфейы 16:13, Мф 16:28—17:13; Маркы 9:1—13; Лукайы 9:27—37; 2 Петры 1:16—19 (НФ).

▪ Иуӕй-иутӕ мӕлӕт нӕ бавзаргӕйӕ, куыд федтой Чырыстийы «Йӕ Паддзахады ӕрцӕугӕ»?

▪ Цӕстылуайӕны Моисей ӕмӕ Илиа Йесоимӕ цӕуыл ныхас кодтой?

▪ Уыцы цӕстылуайӕн ахуыргӕнинӕгты афтӕ тынг цӕмӕн бафидар кодта?