Йесо дзӕбӕх кӕны хӕйрӕджджын лӕппуйы

ЙЕСО, Петр, Иаков ӕмӕ Иоанн ма Ермоны хохы фахсыл куы уыдысты, уӕд иннӕ ахуыргӕнинӕгтӕ тыхст уавӕры бахаудысты. Фӕстӕмӕ ӕрыздӕхгӕйӕ, Йесо уайтагъд фӕхатыд, хъуыддаг хорз кӕй нӕу. Ахуыргӕнинӕгтыл адӕм ӕрӕмбырд сты, ӕмӕ чиныджы дӕснытӕ семӕ быцӕу кодтой. Йесойы фенгӕйӕ, адӕм фефсӕрмы сты ӕмӕ йӕ размӕ рацыдысты, цӕмӕй йын «ӕгас цӕуай» зӕгъой. «Цӕуыл быцӕу кӕнут уыдонимӕ?» — фӕрсы сӕ Йесо.

Адӕмы ӕхсӕнӕй иу адӕймаг рахызт, Йесойы раз йӕ зонгуытыл ӕрхауд ӕмӕ дзуры: «Ахуыргӕнӕг! ӕз ӕрбакодтон Дӕумӕ мӕ фырты, ӕгомыг удӕй [«хӕйрӕгӕй», НФ] ахсты: кӕм ӕй ӕрцахсы, зӕхмӕ йӕ аппары ӕмӕ йӕ фынк ракӕлы, ӕмӕ дӕндӕгтӕй хъыс-хъыс кӕны, ӕмӕ нындзыг вӕййы; дзырдтон ӕз Дӕ ахуыргӕнинӕгтӕн, цӕмӕй асурой уый, ӕмӕ нӕ уыд сӕ бон».

Ахуыргӕнинӕгтӕн лӕппуйы сдзӕбӕх кӕнын сӕ бон кӕй не сси, уымӕ гӕсгӕ чиныджы дӕснытӕ, ӕвӕццӕгӕн, хъӕлӕба систой ӕмӕ ахуыргӕнинӕгтыл худын райдыдтой. Ӕмӕ раст уыцы рӕстӕджы фӕзынд Йесо. «О, ӕнӕраст фӕлтӕр! — дзуры уый,— кӕдмӕ уыдзынӕн сымахимӕ? кӕдмӕ уын фӕраздзынӕн?»

Кӕд ацы ныхӕстӕ Йесо ӕппӕт адӕмӕн дзуры, уӕддӕр бӕрӕг у, йӕ ахуыргӕнинӕгты йын чи бафхӕрдта, сӕйраджыдӕр, уыцы чиныджы дӕснытӕм кӕй хауынц. Уый фӕстӕ Йесо дзуры лӕппуйы тыххӕй: «Ӕрбакӕнут ӕй Мӕнмӕ». Фӕлӕ лӕппу Йесомӕ куы ӕрбахӕстӕг, уӕд йӕ мидӕг цы хӕйрӕг уыд, уый йӕ зӕххыл ныццавта, ӕмӕ лӕппу йӕ гӕндзӕхтӕ цӕгъдын райдыдта. Уый йӕ дзыхӕй фынк калгӕ, зӕххыл ратул-батул кӕны.

«Кӕдӕй нырмӕ афтӕ у?» — фӕрсы сӕ Йесо. «Гыццылӕй нырмӕ,— дзуапп ратта фыд. — Ӕмӕ бирӕ хӕттыты уд [«хӕйрӕг», НФ] ӕппӕрста уый артмӕ ӕмӕ донмӕ, цӕмӕй йӕ фесафа». Фӕстагмӕ фыд лӕгъстӕ кӕны: «Фӕлӕ кӕд гӕнӕн ис, фӕтӕригъӕд нын кӕн ӕмӕ баххуыс кӕн махӕн».

Фыд, ӕвӕццӕгӕн, бирӕ азты дӕргъы агуры ӕххуыс. Ӕмӕ ныр Йесойы ахуыргӕнинӕгтӕн дӕр сӕ бон куы не сси йӕ лӕппуйы фервӕзын кӕнын, уӕд йӕ ныфс бынтондӕр асаст. Йесо йын уайтагъд бамбӕрста йӕ уавӕр ӕмӕ йӕ фидар кӕны: «Кӕд иу гыццыл у дӕ бон ӕууӕндын, уӕд алцыдӕр гӕнӕн ис уырнӕгӕн».

«Уырны мӕ!» — уыцы тӕккӕ фидарӕй загъта фыд ӕмӕ куры: «Баххуыс кӕн ме ’нӕуырнындзинадӕн!»

Адӕм кӕй ӕмбырд кӕнынц, уый уынгӕйӕ, Йесо хӕйрӕгӕн дзуры: «Гоби ӕмӕ къуырма уд! Ӕз бардзырд дӕттын дӕуӕн, рацу уымӕй ӕмӕ амӕй фӕстӕмӕ мауал бацу уымӕ». Рацӕйцӕугӕйӕ, хӕйрӕг ныхъхъӕр кӕнын кодта лӕппуйы, ӕмӕ та уый йӕ гӕндзӕхтӕ сцагъта. Ӕппынфӕстаг лӕппу ӕнӕзмӕлгӕйӕ хуыссы зӕххыл ӕмӕ адӕмӕн сӕ фылдӕр дзурынц: «Уый амард». Фӕлӕ йын Йесо йӕ къухыл рахӕцыд ӕмӕ уый сыстад.

Раздӕр-иу Йесо йӕ ахуыргӕнинӕгты хъусын кӕнынмӕ куы арвыста, уӕд-иу уыдон сырдтой хӕйрӕджыты. Уымӕ гӕсгӕ хӕдзармӕ бацӕугӕйӕ, Йесойы хибарӕй фӕрсынц: «Мах бон цӕй тыххӕй нӕ уыд уый асурын?»

Йесо сын ӕмбарын кӕны, уырнындзинад сӕм фаг кӕй нӕ уыд, уый кӕй уыд йӕ аххосаг. Уый дзуры: «Ацы мыггагӕн кувын ӕмӕ комдарын йеддӕмӕ ницӕмӕй ис рацӕуӕн». Бӕрӕг у, уыцы хӕйрӕг тынг тыхджын кӕй уыд, уымӕ гӕсгӕ йӕ асурынмӕ цӕттӕ кӕнын кӕй хъуыд. Уый тыххӕй хъуыд фидар уырнындзинад ӕмӕ Хуыцауӕй тых ӕмӕ ӕххуыс курын.

Уый фӕстӕ Йесо дзуры: «Ӕцӕг зӕгъын сымахӕн: куы уӕм уа уырнындзинад хъыцъыйы нӕмыджы бӕрц ӕмӕ куы зӕгъат ацы хохӕн: „ацу ардыгӕй уырдӕм“, уый ацӕудзӕн; ӕмӕ уӕ бон цы нӕ уа бакӕнын, ахӕм нӕ уыдзӕн». Куыд бирӕ у, ӕвӕдза, йӕ бон уырнындзинадӕн саразын!

Иегъовӕйӕн лӕггадгӕнгӕйӕ цы цӕлхдуртӕ ӕмӕ зындзинӕдтыл сӕмбӕлӕм, уыдон нӕм, гӕнӕн ис, хохау стыр фӕкӕсой ӕмӕ хъуыды кӕнӕм, нӕ бон сын кӕй ницы суыдзӕн бакӕнын. Фӕлӕ нын Йесо ӕвдисы, уырнындзинад нӕ зӕрдӕйы куы уа, куы йӕ фидар кӕнӕм ӕмӕ йын арф уидӕгтӕ уадзыны фадат куы дӕттӕм, уӕд хохыйас цӕлхдуртӕ ӕмӕ зындзинӕдты сӕрты дӕр кӕй уыдзӕн нӕ бон хизын. Маркы 9:14—29; Матфейы 17:19, 20; Лукайы 9:37—43.

▪ Йесо Ермоны хохӕй куы ӕрцыд, уӕд цавӕр уавӕрыл сӕмбӕлд?

▪ Куыд бафидар кодта Йесо хӕйрӕджджын лӕппуйы фыды?

▪ Ахуыргӕнинӕгты бон цӕуылнӕ сси хӕйрӕджы асурын?

▪ Йесойы ныхӕстӕм гӕсгӕ уырнындзинадӕн йӕ бон цас у саразын?