Халагъудты бӕрӕгбоны

ЙЕСОЙЫ аргъуыдӕй ӕртӕ азы куы рацыд, уӕдмӕ уый сси тынг зындгонд адӕймаг. Мингай адӕймӕгтӕ йын федтой йӕ диссӕгтӕ, ӕмӕ йӕ хъуыддӕгтӕ айхъуыстысты ӕгас бӕстыл. Ныр иудейтӕ Иерусалиммӕ Халагъудты бӕрӕгбонмӕ куы ӕрцыдысты, уӕд ӕй агурынц. «Кӕм ис Уый?»— фӕнды сӕ базонын.

Алыхуызон дам-думтӕ цӕуы Йесойы тыххӕй. Иутӕ дзурынц, зӕгъгӕ, «уый у хӕларзӕрдӕ». «Нӕ, фӕлӕ адӕмы сайы»,—зӕгъынц иннӕтӕ. Бирӕ ахӕм мӕнг ныхӕстӕ цыд Йесойы тыххӕй бӕрӕгбоны фыццаг бонты. Фӕлӕ иудейты разамонджыты тӕсӕй адӕмӕй ӕргом ничи уӕнды Йесойы сӕрыл рахӕцын.

Бӕрӕгбоны ӕмбисмӕ Йесо дӕр фӕзынд. Уый бацыд кувӕндонмӕ адӕмы ахуыр кӕнынмӕ ӕмӕ адӕм дис кӕнынц, куыд хорз амоны, ууыл. Йесо раввинты скъолайы кӕй никуы ахуыр кодта, уымӕ гӕсгӕ иудейтӕ хъуыды кӕнынц: «Куыд зоны Уый Фыстытӕ нӕ сахуыр кӕнгӕйӕ?»

«Мӕ ахуырад — Мӕн нӕу, фӕлӕ Мӕ Рарвитӕджы,— ӕмбарын кӕны Йесо.— Кӕй фӕнды Уый фӕндон кӕнын, уый базондзӕн уыцы ахуырады тыххӕй, Хуыцауӕй у уый, ӕви Ӕз Мӕхӕдӕг Мӕхицӕй дзурын». Йесойы ахуырӕдтӕ ӕнгом баст сты Хуыцауы закъонимӕ. Уымӕ гӕсгӕ бӕрӕг у, Йесо йӕхи скадджын кӕнынмӕ кӕй нӕ тырны, фӕлӕ Хуыцауы кад кӕй агуры. «Моисей уын нӕ ратта закъон?»— фӕрсы сӕ Йесо. Ӕмӕ сын уайдзӕф кӕны: «Ӕмӕ сымахӕй ничи кӕны закъонмӕ гӕсгӕ».

Уый фӕстӕ сӕ Йесо фӕрсы: «Цӕй тыххӕй агурут Мӕн марынмӕ?»

Бӕрӕгбонмӕ ӕрцӕуӕг адӕм, ӕвӕццӕгӕн, уый тыххӕй ницы зонынц. Нӕ сӕ уырны, ахӕм диссаджы ахуыргӕнӕджы чидӕр марынмӕ кӕй хъавы. Уымӕ гӕсгӕ уыдон ӕнхъӕлынц, зӕгъгӕ, кӕд Йесо афтӕ хъуыды кӕны, уӕд йӕхиадыл нӕу. «Хӕйрӕг нӕй Дӕу мидӕг?— фӕрсынц ӕй уыдон.— Чи агуры марынмӕ Дӕу?»

Кӕд адӕм уый ӕнхъӕл не сты, уӕддӕр иудейты разамонджытӕ Йесойы хъавынц марынмӕ. Афӕдз ӕмӕ ӕрдӕджы размӕ Йесо сабатбон иу адӕймаджы куы сдзӕбӕх кодта, уӕд ӕй дины разамонджытӕ хъавыдысты марынмӕ. Ныр сын Йесо амоны уыцы хабармӕ ӕмӕ сын дзуры: «Кӕд сабаты исы сунӕт адӕймаг, цӕмӕй Моисейы закъон ма фехала,— уӕд Мӕнмӕ мӕсты кӕнут, Ӕз ӕрмӕст адӕймаджы кӕй сдзӕбӕх кодтон сабаты, уый тыххӕй? Ӕддейы бакастмӕ гӕсгӕ ма тӕрхон кӕнут, фӕлӕ тӕрхон кӕнут раст тӕрхонӕй».

Иерусалимы цӕрджытӕй хъуыддаг чи зоны, уыдон дзурынц: «Уый марынмӕ Кӕй агурынц, уый нӕу? Мӕнӕ, Уый дзуры ӕргом ӕмӕ Йын ницы зӕгъынц: сӕргълӕуджытӕ нӕма сбӕлвырд кодтой, Уый ӕцӕг Чырысти кӕй у?» Уыдон ӕмбарын кӕнынц, Йесо Чырысти кӕй у, ууыл цӕуылнӕ ӕууӕндынц: «Фӕлӕ Йӕ мах зонӕм, Уый кӕцӕй у; Чырысти та куы ӕрцӕуа, уӕд ничи зондзӕн, кӕцӕй у Уый».

Йесо сын дзуры: «Ӕмӕ зонут Мӕн, ӕмӕ зонут, кӕцӕй Дӕн Ӕз; ӕмӕ Ӕз Мӕхӕдӕг Мӕхицӕй не ’рцыдтӕн, фӕлӕ ӕцӕг у Мӕн Рарвитӕг, Кӕцыйы сымах нӕ зонут; Ӕз зонын Уый, уымӕн ӕмӕ Ӕз Уымӕй Дӕн, ӕмӕ Уый рарвыста Мӕн». Уыцы ныхӕсты фӕстӕ йӕ ӕрцахсынмӕ хъавыдысты, цӕмӕй йӕ ахӕстоны ныппарой кӕнӕ та йӕ амарой. Фӕлӕ уый сӕ къухы нӕ бафтыд, уымӕн ӕмӕ йӕ рӕстӕг нӕма ӕрцыд.

Фӕлӕ уӕддӕр адӕмӕй бирӕтӕ ӕцӕгӕй ӕууӕндынц Йесойыл. Уый цыд доныл, ныссабыр кодта абухгӕ денджыз, цалдӕр дзул ӕмӕ кӕсагӕй диссаджы хуызы бафсӕста адӕмы, сдзӕбӕх кодта рынчынтӕ ӕмӕ цӕнкуылты, куырмытӕн цӕстырухс лӕвӕрдта, хъотырджынтӕн сӕ низ фесӕфта ӕмӕ ма, ӕгӕрыстӕмӕй, мард адӕймӕгты дӕр райгас кодта. Уымӕ гӕсгӕ йӕ уыдон фӕрсынц: «Цымӕ Чырысти куы ӕрцӕуа, уӕд Уый цы нысӕнттӕ скодта, уыдонӕй фылдӕр скӕндзӕн?»

Адӕмы ’хсӕн ахӕм ныхӕстӕ кӕй цӕуы, уый фехъусгӕйӕ, фарисейтӕ ӕмӕ хистӕр сауджынтӕ сӕ кусджыты арвыстой Йесойы ӕрцахсынмӕ. Иоанны 7:11—32.

▪ Йесо бӕрӕгбонмӕ кӕд фӕзынд ӕмӕ адӕм уый тыххӕй цы дзырдтой?

▪ Иуӕй-иутӕ цӕмӕн дзурынц, Йесо хӕйрӕджджын у, зӕгъгӕ?

▪ Цы хъуыды кӕнынц Йесойы тыххӕй Иерусалимы цӕрджытӕ?

▪ Адӕмӕй бирӕтӕ Йесойыл цӕмӕн ӕууӕндынц?