Иерусалимы Цатырты бӕрӕгбоны

Йесо донаргъуыд куы райста, уӕдӕй нырмӕ йӕ бирӕтӕ базыдтой. Цы диссӕгтӕ арӕзта, уыдон мингай дзуттӕгтӕ сӕхи цӕстӕй федтой, ӕмӕ йӕ кой ӕгас бӕстӕйыл айхъуыст. Ӕмӕ ныр Иерусалимы Цатырты (кӕнӕ Халагъудты) бӕрӕгбоны рӕстӕг бирӕты фӕндыд йӕ фенын.

Йесо чи у, уый тыххӕй адӕм алыхуызон ныхӕстӕ кодтой. Иутӕ дзырдтой: «Хорз адӕймаг у». Иннӕтӕ та: «Нӕ, уый адӕмы сайгӕ кӕны» (Иоанны 7:12). Ӕмӕ бӕрӕгбоны фыццаг бонты иууылдӕр уый тыххӕй сусу-бусу кодтой. Фӕлӕ Йесойы тыххӕй ӕргом исты зӕгъын йӕ ныфс ничи хаста, уымӕн ӕмӕ дзуттӕгты разамонджытӕй тарстысты.

Бӕрӕгбон йе ’мбисыл куы уыди, уӕд Йесо дӕр кувӕндонмӕ бацыд. Ӕмӕ адӕмы куыд ахуыр кодта, ууыл бирӕтӕ дисӕй мардысты. Йесо раввинты скъолаты никуы ахуыр кодта, ӕмӕ уымӕ гӕсгӕ дзуттӕгты разамонджытӕ дис кодтой: «Ацы адӕймаг дины скъолаты куы нӕ ахуыр кодта, уӕд уыдӕттӕ кӕцӕй зоны?» (Иоанны 7:15).

Йесо сын дзуапп радта: «Ӕз цӕуыл ахуыр кӕнын, уый мӕхицӕй нӕу, фӕлӕ мӕ чи рарвыста, уымӕй. Уый фӕндон ӕххӕст кӕнын кӕй фӕнды, уый йӕ базондзӕн, цӕуыл ахуыр кӕнын, уый Хуыцауӕй у, ӕви мӕхи зондӕй дзурын» (Иоанны 7:16, 17). Йесо цыдӕриддӕр дзырдта, уый уыди Хуыцауы Закъонмӕ гӕсгӕ, ӕмӕ уымӕй бӕрӕг у, йӕхицӕн кад кӕй нӕ агуырдта, фӕлӕ алцыдӕр Хуыцауы кадӕн кӕй арӕзта.

Дарддӕр сын Йесо загъта: «Моисей уын Закъон нӕ радта? Фӕлӕ уӕ иу дӕр уыцы Закъонмӕ нӕ хъусы. Цӕмӕн мӕ хъавут амарынмӕ?» Адӕмӕй чидӕртӕ Иерусалиммӕ, ӕвӕццӕгӕн, ӕндӕр рӕттӕй ӕрцыдысты ӕмӕ, Йесойы амарынмӕ кӕй хъавынц, уый тыххӕй ницы зыдтой. Куыд зыны, афтӕмӕй сӕ зонд нӕ ахста, ахӕм диссаджы ахуыргӕнӕджы амарыны хъуыды кӕй сӕрмӕ хъуамӕ ӕрцыдаид, уый. Гъемӕ ахъуыды кодтой, зӕгъгӕ, кӕд Йесо афтӕтӕ дзуры, уӕд, ӕвӕццӕгӕн, йӕ хабар хорз нӕу. Ӕмӕ йын загътой: «Ды хӕйрӕджджын куы дӕ. Чи дӕ хъавы марынмӕ?» (Иоанны 7:19, 20).

Афтӕмӕй та афӕдз ӕмӕ ӕрдӕджы размӕ Йесо сабатбон иу адӕймаджы куы сдзӕбӕх кодта, уӕд ӕй дзуттӕгты разамонджытӕ ӕцӕгдӕр хъавыдысты амарынмӕ. Ӕмӕ сын ныр Йесо фидар бӕлвырдгӕнӕнтӕ ӕрхаста ӕмӕ афтӕмӕй раргом кодта, раст кӕй нӕ уыдысты, уый. Сӕ хъус сын ӕрдардта, Закъонмӕ гӕсгӕ-иу ноггуырд лӕппуйӕн ӕстӕм бон сунӕт скӕнын кӕй хъуыди, уыцы бон-иу сабатмӕ куы ’рхаудаид, уӕд дӕр. Ӕмӕ сӕ стӕй бафарста: «Кӕд адӕймаг, цӕмӕй Моисейы закъон ма фехала, уый тыххӕй сабаты сунӕт скӕны, уӕд мӕм мӕстӕй цӕмӕн тонут, сабаты адӕймаджы кӕй сдзӕбӕх кодтон, уый тыххӕй? Ӕддаг бакастмӕ гӕсгӕ мауал тӕрхон кӕнут, фӕлӕ раст тӕрхон кӕнут» (Иоанны 7:23, 24).

Иерусалимы цӕрджытӕ та, хабар цӕй мидӕг уыд, уый ӕмбӕрстой ӕмӕ дзырдтой: «Ай, [разамонджытӕ] марынмӕ кӕй хъавынц, уыцы адӕймаг нӕу? Фӕлӕ-ма акӕсут, адӕмимӕ ӕргомӕй ныхас кӕны, ӕмӕ йын ничи ницы дзуры. Ау, разамонджыты ӕцӕгдӕр бауырныдта, ӕмӕ уый Чырысти у?» Уӕдӕ уӕд адӕмы цӕуылнӕ уырныдта, Йесо кӕй уыд Чырысти, уый? Уыдон загътой: «Куы [йӕ] зонӕм, кӕцӕй у ацы адӕймаг. Чырысти куы ’рцӕуа, уӕд та ничи зондзӕн, кӕцӕй у, уый» (Иоанны 7:25–27).

Уӕд сын уым, кувӕндоны, Йесо дзуапп радта: «Чи дӕн, уый дӕр зонут, ӕмӕ, кӕцӕй ӕрцыдтӕн, уый дӕр. Ӕз мӕхи фӕндӕй не ’рцыдтӕн, фӕлӕ мӕ чи рарвыста, уый ӕцӕгдӕр ис, ӕмӕ йӕ сымах нӕ зонут. Ӕз та йӕ зонын, уымӕн ӕмӕ уый номӕй дзурын. Уый мӕ рарвыста» (Иоанны 7:28, 29). Дзуттӕгты разамонджытӕ уыцы ныхӕстӕ куы фехъуыстой, уӕд Йесойы ӕрцахсынмӕ хъавыдысты, цӕмӕй йӕ ахӕстоны бакодтаиккой кӕнӕ йӕ амардтаиккой. Фӕлӕ сӕ фӕнд сӕ къухы нӕ бафтыд, уымӕн ӕмӕ йӕ мӕлӕты рӕстӕг нӕма ӕрцыд.

Адӕмӕй та бирӕтӕ Йесойыл баууӕндыдысты. Ӕмӕ ӕндӕр куыд хъуамӕ уыдаид! Йесо цыди доныл, дымгӕ-иу ныссабыр кодта, цалдӕр дзулӕй ӕмӕ цалдӕр кӕсагӕй минты диссаджы хуызы бафсӕста, рынчынты, къуылыхты, куырмыты, хъотырджынты дзӕбӕх кодта ӕмӕ ма мӕрдты дӕр ӕгас кодта. Уымӕ гӕсгӕ адӕм дзырдтой: «Чырысти куы ’рцӕуа, уӕд ма уый, ацы адӕймаг цы диссӕгтӕ сарӕзта, уымӕй фылдӕр диссӕгтӕ сараздзӕн?» (Иоанны 7:31).

Адӕм цы дзурынц, уый фарисейтӕ куы фехъуыстой, уӕд сауджынты хистӕртимӕ хъахъхъӕнджыты арвыстой, цӕмӕй Йесойы ӕрцахстаиккой.