Йесо дзӕбӕх кӕны йӕ райгуырдӕй куырм адӕймаджы

ИУДЕЙТӔ Йесойы дуртӕй марынмӕ куы хъавыдысты, уӕд уый Иерусалимӕй нӕ ацыд. Фӕстӕдӕр, сабаты, йӕ ахуыргӕнинӕгтимӕ сахары уынгты фӕцӕйцӕугӕйӕ, уыдон сӕмбӕлдысты, йӕ райгуырдӕй куырм чи уыд, ахӕм адӕймагыл. Ахуыргӕнинӕгтӕ фӕрсынц Йесойы: «Равви! чи ракодта тӕригъӕд, йӕхӕдӕг ӕви йӕ ныййарджытӕ, куырмӕй цӕмӕн райгуырд?»

Иуӕй-иу раввинтау ахуыргӕнинӕгты дӕр, ӕвӕццӕгӕн, уырны, суанг мады гуыбыны дӕр кӕй ис тӕригъӕд саразӕн. Фӕлӕ сын Йесо дзуапп дӕтты: «Нӕ ракодта тӕригъӕд нӕдӕр уый, нӕдӕр йӕ ныййарджытӕ, фӕлӕ уый уымӕн у ӕмӕ цӕмӕй ууыл разыной Хуыцауы хъуыддӕгтӕ». Уыцы адӕймаг куырм кӕй у, уый, йӕхӕдӕг кӕнӕ йӕ ныййарджытӕ цыдӕр тӕригъӕд кӕй сарӕзтой, уый тыххӕй нӕу. Фыццаг адӕймаг Адамы тӕригъӕды аххосӕй адӕм иуылдӕр сты ӕнӕххӕст ӕмӕ ӕмхиц ахӕм сахъатдзинӕдтӕм, куыд куырмӕй райгуырын. Ацы нӕлгоймаг сахъат кӕй у, уый Йесойӕн дӕтты Хуыцауы хъуыддӕгтӕ равдисыны фадат.

Йесо ӕмбарын кӕны, ахӕм хъуыддӕгтӕ йӕ ӕнӕмӕнг кӕй хъӕуы аразын: «Мӕнӕн ӕмбӕлы кӕнын Мӕ Рарвитӕджы хъуыддӕгтӕ, цалынмӕ бон у, уӕдмӕ; ӕрцӕуы ӕхсӕв ӕмӕ уӕд никӕйы бон у кӕнын [«кӕнын ничиуал бафӕраздзӕн», НФ]; цалынмӕ Ӕз дунейы дӕн, уӕдмӕ Ӕз дунейӕн рухс». Тагъд мӕлӕт Йесойы ныппардзӕн талынг ингӕнмӕ, ӕмӕ уым йӕ бон ницыуал уыдзӕн аразын. Уӕдмӕ та уал Йесо ӕцӕгдӕр дунейыл тауы рухс.

Уыцы ныхӕсты фӕстӕ Йесо зӕхмӕ ату кодта ӕмӕ рыг сӕтимӕ сызмӕста. Уый фӕстӕ змӕст куырмы цӕстытыл сӕвӕрдта ӕмӕ загъта: «Ацу, дӕхи ныхс Силоамы найӕны». Уый, Йесо йын куыддӕриддӕр загъта, афтӕ бакодта ӕмӕ йӕ цӕстытӕй уынын райдыдта. Йӕ цинӕн ма кӕрон кӕм ис: фыццаг хатт царды рухс уыны!

Чи йӕ зыдта, уыцы сыхӕгтӕ дӕр ӕмӕ иннӕ адӕм дӕр дисы бафтыдысты. «Уый чи бадт ӕмӕ хорзӕх чи куырдта, уый нӕу?»— фӕрсынц сӕ кӕрӕдзи. «Уый у»,— дзуапп дӕттынц иутӕ. Фӕлӕ иннӕты нӕ уырны, уыдон дзурынц: «Уый хуызӕн у». Йӕхӕдӕг та зӕгъы: «Уый ӕз дӕн».

«Куыд байгом сты дӕ цӕстытӕ?»— фӕрсынц ӕй адӕм.

«Адӕймаг, Йесо чи хуыйны, скодта змӕст, мӕ цӕстытӕ байсӕрста ӕмӕ мын загъта: „ацу Силоамы найӕнмӕ ӕмӕ дӕхи цӕхс“. Ӕз ацыдтӕн, цӕхсадтон мӕхи ӕмӕ ракастӕн».

«Кӕм ис Уый?»— фӕрсынц ӕй уыдон.

«Нӕ зонын»,— дзуапп ратта уый.

Йӕ цӕстытӕй уынын чи райдыдта, уыцы адӕймаджы адӕм дины разамонджытӕм, фарисейтӕм, бакодтой. Уыдон дӕр ӕй фӕрсынц, куыд райдыдта уынын, уымӕй. «Змӕст сӕвӕрдта Уый мӕ цӕстытыл ӕмӕ ӕз мӕхи цӕхсадтон ӕмӕ уынын»,— дзуапп ратта уый.

Кӕй зӕгъын ӕй хъӕуы, фарисейтӕ, уыцы мӕгуыр адӕймаг кӕй сдзӕбӕх, ууыл йемӕ цин хъуамӕ кӕниккой. Фӕлӕ уый бӕсты Йесойы ӕфхӕрынц. «Хуыцауӕй нӕу ацы Адӕймаг»,— дзурынц уыдон. Цӕмӕн афтӕ дзурынц? «Уымӕн ӕмӕ нӕ хъахъхъӕны сабаты». Иннӕ фарисейтӕ та сӕхимидӕг хъуыды кӕнынц: «Куыд у тӕригъӕдджын адӕймагӕн кӕнын йӕ бон ахӕм диссӕгтӕ?» Афтӕмӕй кӕрӕдзийы ныхмӕ систы.

Уый фӕстӕ фӕрсынц уыцы нӕлгоймаджы: «Ды та цы зӕгъыс Уый тыххӕй, уымӕн ӕмӕ Уый дӕу ракӕсын кодта дӕ цӕстытӕй?»

«Уый пехуымпар у»,— дзуапп ратта уый.

Фарисейты нӕ фӕнды ууыл ӕууӕндын. Афтӕ сӕм кӕсы, Йесо ӕмӕ уыцы адӕймаг сусӕгӕй баныхас кодтой, цӕмӕй адӕмы сайой. Ӕмӕ хъуыддаг сбӕлвырд кӕныны тыххӕй куырмӕн йӕ ныййарджытӕм фӕдзырдтой. Иоанны 8:59; 9:1—18.

▪ Нӕлгоймаг куырм кӕй у, уымӕн йӕ аххосаг цы у ӕмӕ цы нӕу?

▪ Цы у, «кӕнын куы ничиуал фӕраздзӕн», уыцы ӕхсӕв?

▪ Куырм адӕймаг кӕй сдзӕбӕх, уый йӕ зонгӕтыл куыд бандӕвта?

▪ Нӕлгоймаг кӕй сдзӕбӕх, уый тыххӕй фарисейтӕ цы хъуыды кӕнынц?