Фыдзонд фарисейтӕ

ФАРИСЕЙТӔ, куырм чи уыд, уыцы мӕгуыргуры ныййарджытӕм куы фӕдзырдтой, уӕд сӕ тас бацыд. Уыдон зонынц, Йесойыл чи баууӕнда, уый ӕмбырдгӕнӕнӕнӕй цухгонд кӕй ӕрцӕудзӕн. Адӕм дыл хъоды бакӕной, уый стыр зындзинӕдтӕ хӕссы йемӕ, уӕлдайдӕр та мӕгуыр бинонтӕн. Уымӕ гӕсгӕ ныййарджытӕ тынг арӕхсгӕйӕ ныхас кӕнынц.

«Уый уӕ фырт у, сымах афтӕ кӕмӕй зӕгъут, куырмӕй райгуырд? — фӕрсынц сӕ фарисейтӕ. — Уӕдӕ ныр куыд уыны?»

«Мах зонӕм, уый мах фырт кӕй у ӕмӕ кӕй райгуырд куырмӕй,— ӕмбарын кӕнынц лӕппуйы ныййарджытӕ. — Фӕлӕ ныр куыд уыны, нӕ зонӕм, кӕнӕ йын чи байгом кодта йӕ цӕстытӕ мах нӕ зонӕм». Сӕ фырт сын ӕнӕмӕнг радзырдта, цы йыл ӕрцыд, фӕлӕ уӕддӕр уыдон арӕхсгӕйӕ дзурынц: «Йӕхӕдӕг ӕххӕст азты ис, йӕхи йын бафӕрсут, уадз йӕхӕдӕг йӕхи тыххӕй зӕгъӕд».

Уымӕ гӕсгӕ йын фарисейтӕ фӕстӕмӕ йӕхимӕ фӕдзырдтой. Ныр архайынц, цӕмӕй йӕ фӕтӕрсын кӕной ӕмӕ йын дзурынц, зӕгъгӕ, Йесойы ныхмӕ бӕлвырдгӕнӕнтӕ ссардтой. «Кад ратт Хуыцауӕн,— домынц дзы уыдон,— мах зонӕм, уыцы Адӕймаг тӕригъӕдджын кӕй у».

Нӕлгоймаг уыцы ныхӕстыл нӕдӕр «о» зӕгъы, нӕдӕр «нӕ», фӕлӕ ӕцӕгӕй цы ’рцыд, уый ӕмбарын кӕны: «Тӕригъӕдджын у Уый, нӕ зонын; иу зонын, ӕз кӕй уыдтӕн куырм, ныр та уынын».

Фарисейты тынг фӕнды, йӕ ныхӕсты йын исты хъӕндзинад куы ссариккой ӕмӕ та йӕ фӕрсынц: «Цы бакодта Уый дӕуӕн? куыд дын байгом кодта дӕ цӕстытӕ?»

«Ӕз уын загътон,— мӕстыйӕ дзуры нӕлгоймаг,— ӕмӕ сымах нӕ хъуыстат; цы фехъусын ма уӕ фӕнды?» Ӕмӕ сӕ уый фӕстӕ ӕлхыскъ фарст кӕны: «Ӕви сымах дӕр фӕнды Йӕ ахуыргӕнинӕгтӕ суӕвын?»

Фарисейтӕ ахӕм дзуапп куы фехъуыстой, уӕд сӕ маст рафыхт. «Ды дӕ Йӕ ахуыргӕнинаг,— зылын ӕй кӕнынц уыдон,— мах та стӕм Моисейы ахуыргӕнинӕгтӕ; мах зонӕм Моисейимӕ Хуыцау ныхас кодта, Ай та нӕ зонӕм, кӕцӕй у Уый».

Сӕрныллӕг мӕгуыргур сын дисгӕнгӕйӕ дзуапп дӕтты: «Уый у диссаг ӕмӕ сымах кӕй нӕ зонут, кӕцӕй у Уый, фӕлӕ Уый мӕ цӕстытӕ байгом кодта». Уый цы нысан кӕны? Мӕгуыргур амоны ӕнӕдызӕрдыггаг принципмӕ: «Мах зонӕм, тӕригъӕдджынтӕм Хуыцау кӕй нӕ хъусы, фӕлӕ Хуыцауӕн кад чи кӕны ӕмӕ Уый фӕндон чи ӕххӕст кӕны, уымӕ хъусы; ӕнусӕй нырмӕ никуы райхъуыст, исчи куырмӕй чи райгуырд, ахӕмы цӕстытӕ райгом кодта, уый». Уӕдӕ бӕрӕг у: «Уый Хуыцауӕй куы нӕ уаид, уӕд ницы уаид кӕнын Йӕ бон».

Фарисейтӕн ницы у сӕ бон зӕгъын ахӕм бӕлвырд ӕмӕ раст дзуаппы ныхмӕ. Фӕлӕ ӕцӕгад сӕ цӕсты сындз кӕй у, уымӕ гӕсгӕ ӕфхӕрын райдыдтой нӕлгоймаджы: «Ды ӕгасӕй дӕр тӕригъӕдты куы райгуырдтӕ, ӕмӕ ды мах ахуыр кӕныс?» Ӕмӕ йӕ уый фӕстӕ расырдтой, ома йӕ, ӕвӕццӕгӕн, ӕмбырдгӕнӕнӕй ацух кодтой.

Йесо ацы хабар куы фехъуыста, уӕд уыцы адӕймаджы ссардта ӕмӕ йын дзуры: «Ды ӕууӕндыс Хуыцауы Фыртыл?»

Дзуаппӕн ӕм, куырм чи уыд, уыцы адӕймаг фарст дӕтты: «Уый та чи у, Хицау, цӕмӕй ӕз ӕууӕндон Ууыл?»

«Уый демӕ ныхас... кӕны»,— дзуапп ратта Йесо.

Уый фехъусгӕйӕ, нӕлгоймаг Йесойӕн бакуывта ӕмӕ йын дзуры: «Ӕууӕндын, Хицау!»

Ныр та Йесо ӕмбарын кӕны: «Тӕрхоны тыххӕй ӕрцыдтӕн Ӕз ацы дунемӕ, цӕмӕй чи нӕ уыны, уыдон феной, чи уыны, уыдон та бакуырм уой».

Фарисейтӕ ацы ныхӕстӕ куы фехъуыстой, уӕд ӕй фӕрсынц: «Ӕцӕг мах дӕр куырмытӕ стӕм?» Духовон ӕгъдауӕй куырм кӕй сты, уый куы бамбӕрстаиккой, уӕд сын, Йесойы ныхмӕ кӕй цӕуынц, уый хатыргонд ӕрцыдаид. Фӕлӕ сын Йесо дзуры: «Сымах куырмытӕ куы уаиккат, уӕд уыл тӕригъӕд нӕ уаид». Фӕлӕ уӕддӕр сӕ фыдзондӕй фидарӕй дзурынц, куырм кӕй не сты ӕмӕ сӕ духовон рухс кӕй нӕ хъӕуы. Уымӕ гӕсгӕ Йесо скодта хатдзӕг: «Фӕлӕ мах уынӕм, кӕй зӕгъут, уый тыххӕй тӕригъӕд сымахыл ис». Иоанны 9:19—41.

▪ Куырм чи уыд, уыцы адӕймаджы ныййарджытӕм фарисейтӕ куы фӕдзырдтой, уӕд цӕмӕн тарстысты ӕмӕ цавӕр дзуапп раттой?

▪ Куыд архайынц фарисейтӕ, куырм чи уыд, уыцы адӕймаджы фӕтӕрсын кӕныныл?

▪ Нӕлгоймаджы цавӕр раст бӕлвырдгӕнӕнтӕм смӕсты сты фарисейтӕ?

▪ Фарисейтӕ Йесойы ныхмӕ кӕй цӕуынц, уымӕн ныххатыргӕнӕн цӕуылнӕ ис?