Амонды суадон

ЙЕСО Галилейы цы бирӕ диссӕгтӕ равдыста, уыдон ныр ӕвдисы Иудейы дӕр. Цӕвиттонӕн, уый иу адӕймаджы ссӕрибар кодта, дзурын ӕй чи нӕ уагъта, уыцы хӕйрӕджы ахӕстӕй. Адӕм дисы бафтыдысты, фӕлӕ Галилейы куыд уыд, афтӕ ам дӕр иуӕй-иутӕ йӕ ныхмӕ цӕуынц. «Уый хӕйрӕджыты суры веельзевулы, хӕйрӕджыты ӕлдары хъаруйӕ»,— дзурынц уыдон. Иннӕты та фӕнды, Йесо чи у, уый тыххӕй фылдӕр бӕлвырдгӕнӕнтӕ райсын ӕмӕ йӕ цӕмӕй бафӕлварой, уый тыххӕй дзы курынц уӕларвӕй нысӕнттӕ.

Йесо сын зоны сӕ хъуыдытӕ, ӕмӕ уымӕ гӕсгӕ йе ’фхӕрджытӕн Галилейы цы дзуапп ратта, ныр дӕр та сын ахӕм дзуапп дӕтты. Ӕмбарын сын кӕны, зӕгъгӕ, йӕхӕдӕг йӕхимидӕг цы паддзахад адих уа, уый фехӕлдзӕн. «Кӕд хӕйрӕг дӕр йӕхи мидӕг адих ис, уӕд куыд нӕ фӕцуддзӕн йӕ паддзахад?» — фӕрсы сӕ уый. Йе ’фхӕрджытӕ цы тӕссаг уавӕры сты, уый равдисынӕн Йесо дзуры: «Кӕд Ӕз Хуыцауы ӕнгуылдзӕй [«къухӕй», НФ] сурын хӕйрӕджыты, уӕд ӕнӕмӕнг ӕрбахӕццӕ сымахмӕ Хуыцауы Паддзахад».

Сӕдӕазты размӕ Моисей цы диссӕгтӕ сарӕзта, уыдон адӕмыл куыд ӕндӕвтой ӕмӕ куыд дзырдтой: «Уый Хуыцауы ӕнгуылдз у», Йесойы диссӕгтӕ дӕр афтӕ хъуамӕ бандӕвтаиккой, чи сӕм каст, уыдоныл. «Хуыцауы ӕнгуылдз» ныффыста къӕйдуртыл дӕс фӕдзӕхсты. Ӕмӕ Йесойӕн дӕр «Хуыцауы ӕнгуылдз» — йӕ сыгъдӕг уд кӕнӕ йӕ архайгӕ тых — дӕтты хӕйрӕджыты сурыны ӕмӕ рынчынты дзӕбӕх кӕныны хъару. Уымӕ гӕсгӕ Хуыцауы Паддзахад ӕцӕгӕй ӕрбахӕццӕ уыцы ӕфхӕрджытӕм, уымӕн ӕмӕ Йесо, Паддзахады снысангонд Паддзах, ис се ’хсӕн.

Уый фӕстӕ Йесо фӕсномыг ныхасӕй бамбарын кодта, хӕйрӕджыты кӕй суры, уый ууыл дзурӕг кӕй у, ӕмӕ Сайтаныл йӕ бар кӕй цӕуы. Уый хӕйрӕджы абарста, йӕ хӕдзар гӕрзифтонгӕй чи хъахъхъӕны, ахӕм адӕймагыл йӕхицӕй тыхджындӕр куыд фӕуӕлахиз, уыимӕ. Уый ма сфӕлхат кодта, хӕйрӕджы тыххӕй Галилейы цы фӕсномыг ныхас ӕрхаста, уый дӕр. Иу хӕйрӕг адӕймагӕй рацыд, фӕлӕ уыцы адӕймаг афтид бынат хорз хъуыддӕгтӕй куы нӕ байдзаг кодта, уӕд ӕм ӕндӕр авд хӕйрӕгимӕ фӕстӕмӕ бацыд, ӕмӕ уыцы адӕймагӕн йӕ уавӕр фӕфыддӕр.

Йесойы амындтӕм хъусгӕйӕ, адӕмы ’хсӕн иу сылгоймаг хъӕрӕй зӕгъы: «Тӕхудиаг у Дӕу цы гуыбын хаста, ӕмӕ Ды кӕй дадтай, уыцы риутӕ!» Алы иудейаг сылгоймаг дӕр бӕллы, пехуымпары, сӕйраджыдӕр та Мессиайы мад уый куы уаид, уымӕ, ӕмӕ уымӕ гӕсгӕ, сылгоймаг афтӕ кӕй загъта, уый диссаг нӕу. Ӕвӕццӕгӕн уый хъуыды кӕны, Мариа Йесойы мад кӕй у, уымӕ гӕсгӕ уӕлдай амондджын кӕй у.

Фӕлӕ Йесо уайтагъд бараст кодта сылгоймаджы ӕмӕ йын ӕцӕг амонды суадонмӕ амоны: «Тӕхудиаг сты Хуыцауы дзырд хъусджытӕ ӕмӕ уый ӕххӕстгӕнджытӕ». Йесо никуы амыдта, йӕ мад Мариайӕн иннӕтӕй стырдӕр кад кӕй хъуамӕ уа. Нӕ, Йесо ӕвдисы, ӕцӕг амонд кӕй ис ссарӕн цавӕрдӕр зӕххон хӕстӕгдзинад кӕнӕ ӕнтыстдзинӕдты нӕ, фӕлӕ Хуыцауӕн иузӕрдион лӕггаддзинады.

Галилейы куыд уыд, афтӕ Иудейы дӕр Йесо адӕмӕн уайдзӕф кӕны, уӕларвӕй нысӕнттӕ кӕй курынц, уый тыххӕй. Уыдонӕн дӕр дзуры, Ионӕйы нысаны йеддӕмӕ сын ӕндӕр нысан кӕй нӕ уыдзӕн лӕвӕрд. Ионӕ ӕртӕ боны кӕсаджы хуылфы кӕй фӕци, стӕй ныфсджынӕй кӕй хъусын кодта ӕмӕ уый фӕстиуӕгӕн ниневийӕгтӕ кӕй ӕрфӕсмон кодтой, уый тыххӕй уыд нысан. «Ӕмӕ мӕнӕ,— ӕмбарын кӕны Йесо,— ам Ионӕйӕ стылдӕр». Афтӕ Хуссары ус-паддзах дӕр дис кодта Соломоны зондджындзинадыл. «Ӕмӕ мӕнӕ,— дзуры Йесо,— ам Соломонӕй стылдӕр».

Йесо ӕмбарын кӕны, адӕймаг рухсгӕнӕн куы ссудзы, уӕд ӕй кӕй нӕ бамбӕхсы кӕнӕ йӕ мигӕнӕны бын кӕй нӕ сӕвӕры, фӕлӕ цырагъдарӕныл, цӕмӕй адӕм рухс уыной. Ӕвӕццӕгӕн уымӕй ӕвдисы, йӕ ахуырад ӕмӕ йӕ диссӕгтӕ ацы хивӕнд адӕмы раз рухсгӕнӕны рухс бамбӕхсыны хуызӕн кӕй у. Ахӕм адӕмӕн сӕ цӕст сыгъдӕг кӕй нӕу, ома иу цӕмӕдӕр кӕй нӕу арӕзт, уымӕ гӕсгӕ Йесо йӕ диссӕгтӕ цӕй тыххӕй аразы, уый йӕ къухы не ’фты.

Чысыл раздӕр Йесо хӕйрӕджы асырдта ӕмӕ гобийы сдзурын кодта. Йӕ цӕст сыгъдӕг кӕмӕн у, ома иу цӕмӕдӕр кӕмӕн у арӕзт, уыдоны уый хъуамӕ сразӕнгард кодтаид уыцы диссаджы тыххӕй Хуыцауы скадджын кӕнынмӕ ӕмӕ хорз уацхъуыд хъусын кӕнынмӕ. Фӕлӕ Йесойы ныхмӕлӕуджытӕм уый хъаргӕ дӕр нӕ бакодта. Уымӕ гӕсгӕ Йесо фӕуд кӕны йӕ ныхас: «Уӕдӕ кӕс: рухс, кӕцы ис дӕ мидӕг, уый талынг мыййаг нӕу? Кӕд дӕ буар иуылдӕр рухс у ӕмӕ дзы иу уӕнг дӕр нӕу талынг, уӕд иуылдӕр афтӕ рухс уыдзӕн, цыма цырагъы ӕрттывдӕй рухс дӕ». Лукайы 11:14—36; Рацыд 8:18, 19; 31:18; Матфейы 12:22, 28.

▪ Йесо гобийы кӕй сдзӕбӕх кодта, уый адӕмыл куыд бандӕвта?

▪ Цы у «Хуыцауы ӕнгуылдз» ӕмӕ Хуыцауы Паддзахад куыд ӕрбахӕццӕ, Йесомӕ чи хъуыста, уыдонмӕ?

▪ Цы у ӕцӕг амонды суадон?

▪ Куыд ис гӕнӕн, цӕмӕй адӕймагӕн йӕ цӕст сыгъдӕг уа?