Бынтӕ дих кӕныны фарст

ӔВӔЦЦӔГӔН адӕм базыдтой, Йесо фарисейы хӕдзары кӕй сихор кӕны. Уымӕ гӕсгӕ мингай адӕм ӕрӕмбырд уынджы ӕмӕ ӕнхъӕлмӕ кӕсынц Йесойы рацыдмӕ. Кӕд фарисейтӕ Йесойы ныхмӕ цӕуынц ӕмӕ йӕ фӕзылын кӕныныл архайынц, уӕддӕр ӕм адӕм хъусынц тынг цымыдисӕй ӕмӕ ӕхсызгонӕй.

Райдианы уал Йесо дзуры йӕ ахуыргӕнинӕгтӕн: «Уӕхи хъахъхъӕнут фарисейты ӕнхъизӕнӕй, кӕцы у цӕстмӕхъусдзинад». Сихор хӕргӕйӕ куыд рабӕрӕг, афтӕмӕй фарисейты динон системӕ ӕгасӕй дӕр бындуриуӕг кӕны цӕстмӕхъусдзинадыл. Кӕд фарисейтӕ, дингӕнӕг хуыз ӕвдисгӕйӕ, сӕ фыдзӕрдӕдзинад ӕмбӕхсынц, уӕддӕр фӕстагмӕ сӕ хъуыддӕгтӕ раргом уыдзысты. «Нӕй ахӕм ӕмбӕхст, цы нӕ раргом уа,— дзуры Йесо,— ӕмӕ сусӕгдзинад, цы нӕ базонынц».

Уый фӕстӕ Йесо фӕлхат кӕны, йӕ 12 апостолы Галилейы уацамынды куы ’рвыста, уӕд сын цы ныфсдӕттӕг ныхӕстӕ загъта, уыдон: «Ма тӕрсут буары марджытӕй ӕмӕ уый фӕстӕ фылдӕр йӕ бон кӕмӕн ницы бакӕнын у». Хуыцау гыццыл цъиуты дӕр кӕй нӕ рох кӕны, уымӕ гӕсгӕ Йесо йӕ фӕдылдзӕуджыты фидарӕй ӕууӕндын кӕны, Хуыцау сӕ кӕй нӕ ферох кӕндзӕн. «Куы уӕ бакӕной ӕмбырдгӕнӕнтӕм, сӕргълӕуджытӕм ӕмӕ хицауадтӕм... Сыгъдӕг уд [уӕ] сахуыр кӕндзӕн уыцы сахат, цы дзурын хъӕуы, ууыл».

Адӕмы ’хсӕнӕй иу адӕймаг Йесойӕн дзуры: «Ахуыргӕнӕг! зӕгъ ме ’фсымӕрӕн, цӕмӕй уый бынтӕ мемӕ адих кӕна». Моисейы Закъоны дзырдӕуы, фыццаггуырд фыртмӕ бынтӕй дыууӕ хайы кӕй ӕмбӕлы, ӕмӕ уымӕ гӕсгӕ сӕ быцӕуӕн бынтондӕр бындур нӕй. Фӕлӕ уыцы адӕймаджы, ӕвӕццӕгӕн ӕм Закъонмӕ гӕсгӕ цы ’мбӕлы, уымӕй фылдӕр хъӕуы.

Йесо уыцы хъуыддаджы хайад кӕй нӕ исы, уымӕй раст кӕны. «Чи сӕвӕрдта Мӕн сымахӕн тӕрхонгӕнӕгӕй кӕнӕ уарӕгӕй?»— фӕрсы сӕ уый. Уый фӕстӕ адӕмӕн дӕтты ахсджиаг фӕдзӕхст: «Кӕсут, уӕхи хъахъхъӕнут хъӕздыгдзинӕдтӕ ӕмбырд кӕнынӕй, уымӕн ӕмӕ адӕймаджы цард йӕ бирӕ мулкӕй нӕу». Ӕцӕгдӕр, адӕймагмӕ цасфӕнды бирӕ хъӕздыгдзинад ма уа, уӕддӕр искуы амӕлдзӕн ӕмӕ йӕ фӕллӕйттӕ иуылдӕр ӕндӕр кӕмӕндӕр баззайдзысты. Уыцы ӕцӕгдзинад бахахх кӕнынӕн ӕмӕ, Хуыцауы раз хорз ном скӕныны фадат ауадзын ӕнӕзонд ми кӕй у, уый равдисынӕн Йесо ӕрхаста цӕстуынгӕ цӕвиттон. Уый дзуры:

«Иу хъӕздыг адӕймагӕн йӕ быдыры ӕрзад хорз тыллӕг; ӕмӕ уый хъуыды кодта йӕхи мидӕг: цы бакӕнон? кӕдӕм ӕрӕмбырд кӕнон мӕ хортӕ, уый нӕй. Ӕмӕ загъта: мӕнӕ цы бакӕндзынӕн: райхалдзынӕн мӕ хордонтӕ ӕмӕ сараздзынӕн стылдӕртӕ, ӕмӕ ӕрӕмбырд кӕндзынӕн уырдӕм мӕ хортӕ ӕмӕ мӕ исбон иуылдӕр. Ӕмӕ зӕгъдзынӕн мӕ удӕн: мӕ уд! бирӕ мулк ис дӕумӕ, бирӕ азты фаг: дӕ фӕллад уадз, хӕр, нуаз ӕмӕ хъӕлдзӕг у. Фӕлӕ Хуыцау загъта уымӕн: ӕнӕзонд! ацы ӕхсӕв дӕ уд айсдзысты дӕуӕн; кӕмӕн баззайдзысты, ды кӕй ӕрӕмбырд кодтай, уыдон?»

Уый фӕстӕ Йесо дзуры: «Афтӕ вӕййы хӕзнатӕ йӕхицӕн чи ӕмбырд кӕны, уыдонимӕ, фӕлӕ Хуыцауы мидӕг нӕ хъӕздыг кӕны». Йесойы ахуыргӕнинӕгты кӕд хъӕздыгдзинады монц нӕ сайы, уӕддӕр ӕрвылбоны царды мӕт адӕймаджы ӕнцонӕй гӕнӕн ис бакъуылымпы кӕна ӕмӕ Иегъовӕйӕн зӕрдӕбынӕй мауал лӕггад кӕна. Гъе уымӕ гӕсгӕ, фадатӕй спайдагӕнгӕйӕ, Йесо фӕлхат кӕны, афӕдз ӕмӕ ӕрдӕджы размӕ Уӕлхох уацамынды цы диссаджы уынаффӕ ратта, уый. Уый дзуры йӕ ахуыргӕнинӕгтӕн:

«Уымӕ гӕсгӕ зӕгъын сымахӕн: мӕт ма кӕнут уӕ удтыл, цы бахӕрат, нӕдӕр уӕ буарыл, цы скӕнат... Акӕсут ма халӕттӕм: уыдон нӕ тауынц, нӕ кӕрдынц; нӕй уыдонмӕ нӕдӕр ӕвӕрӕн бынӕттӕ, нӕдӕр хордӕттӕ, ӕмӕ Хуыцау ӕфсады уыдоны... Акӕсут ма лилитӕм, куыд рӕзынц уыдон: фӕллой нӕ кӕнынц, не ’лвисынц; фӕлӕ зӕгъын сымахӕн, Соломон дӕр йӕ ӕппӕт кады нӕ дардта ахӕм дарӕс, куыд алчидӕр уыдонӕй...

Уӕдӕ ма агурут цы хӕрат, кӕнӕ цы нуазат, ӕмӕ ма тыхсут, уымӕн ӕмӕ ӕппӕт уыдон агурынц ацы дунейы адӕм; уӕ Фыд та зоны, сымах уыдон хъуаг кӕй стут; тынгдӕр [«фыццаджыдӕр», НФ] агурут Хуыцауы Паддзахад, ӕмӕ уыдон ӕппӕт сымахыл бафтдзысты».

Йесойы ныхӕстӕ нын уӕлдай ахсджиаг сты, экономикон зындзинӕдтыл куы сӕмбӕлӕм, уӕд. Материалон хъуыддӕгтыл ӕгӕр чи тыхсы ӕмӕ афтӕмӕй духовон хъуыддӕгтӕ рохуаты чи уадзы, уымӕн ӕцӕгдӕр тынг лӕмӕгъ у йӕ уырнындзинад, Хуыцауӕн йӕ бон йӕ лӕггадгӕнджытыл аудын кӕй у, ууыл. Лукайы 12:1—31; Дыккаг закъон 21:17.

▪ Иу адӕймаг бынты тыххӕй цӕмӕн фарста ӕмӕ йын Йесо цы уынаффӕ ратта?

▪ Цавӕр цӕстуынгӕ цӕвиттон ӕрхаста Йесо ӕмӕ цӕмӕн?

▪ Цавӕр уынаффӕ сфӕлхат кодта Йесо ӕмӕ уый ӕмбӕлон цӕмӕн уыд?