Ӕрхӕстӕг Йесойы фӕстаг Куадзӕн

ДЫЦЦӔГ. 11 нисан. Изӕрдалынгтӕ. Елеоны хохыл Йесо йӕ апостолтӕн ратта фӕстаг амындтӕ. Цӕй бирӕ хъуыддӕгтӕ сарӕзта ацы бон ӕмӕ куыд тынг бафӕллад, ӕвӕдза! Ныр Вифанимӕ ӕхсӕвуиат кӕнынмӕ здӕхгӕйӕ, йӕ апостолтӕн дзуры: «Сымах зонут, дыууӕ боны фӕстӕ кӕй уыдзӕн Куадзӕн ӕмӕ Адӕймаджы Фырт лӕвӕрд уыдзӕн байтындзынмӕ».

Иннӕ бон, 12 нисаны, ӕртыццӕджы, Йесо йӕ апостолтимӕ ис хибар ран. Бон раздӕр уый комкоммӕ бафхӕрдта дины разамонджыты ӕмӕ уымӕ гӕсгӕ ӕмбары, ныр ӕй марынмӕ кӕй хъавынц. Уӕдӕ ӕртыццӕджы йӕхи ӕргом не ’вдисы, цӕмӕй йын иннӕ бон изӕрӕй йӕ апостолтимӕ Куадзӕн арвитыны фадат уа.

Уыцы рӕстӕджы хистӕр сауджынтӕ ӕмӕ адӕмы хистӕртӕ ӕрӕмбырд сты хистӕр сауджын Кайафӕйы кӕрты. Уый размӕ бон сӕ Йесо афтӕ карзӕй кӕй бафхӕрдта, уый тыххӕй уынаффӕ рахастой, цӕмӕй йыл хинӕй рацӕуой, ӕрцахсой йӕ ӕмӕ йӕ амарой. Фӕлӕ уыимӕ дзурынц: «Ӕрмӕст бӕрӕгбоны нӕ, цӕмӕй ма сызмӕнтой адӕм». Уыдон тӕрсынц адӕмӕй, уымӕн ӕмӕ Йесо сӕ цӕсты тынг кадджын у.

Дины разамонджытӕ Йесойы амарыныл куы ныхас кодтой, уӕд сӕм фӕзынд иу уазӕг. Диссаг, уый у Йесойы апостолтӕй сӕ иу, Иудӕ Искариотаг, Сайтан йӕ Хицауы ауӕй кӕныны хъуыды кӕй зӕрдӕйы нывӕрдта, уый. Сӕ цинӕн кӕрон нӕй, Иудӕ сӕ куы бафарста: «Цы ратдзыстут сымах мӕнӕн, ӕз уын Ӕй куы ауӕй кӕнон уӕд?» Уыдон цингӕнгӕйӕ сразы сты 30 ӕвзист ӕхцайы бафидыныл, Моисейы Закъонмӕ гӕсгӕ уый у иу цагъары аргъ. Ныр Иудӕ агуры хорз фадат; цӕмӕй Йесойы, адӕм йӕ цуры куыд нӕ уой, афтӕ йе знӕгты къухтӕм ратта.

Ӕртыццӕджы хур куы аныгуылд, уӕд райдыдта 13 нисан. Майрӕмбоны Йесо ӕрбахӕццӕ Иерихонӕй, ӕмӕ ныр ӕхсӕзӕм ӕмӕ фӕстаг хатт йе ’хсӕв ӕрвиты Вифанийы. Иннӕ бон цӕттӕ кӕнын хъӕудзӕн, хурныгуылды фӕстӕ цы бӕрӕгбон райдайдзӕн, уымӕ — Куадзӕнмӕ. Хъӕудзӕн уӕрыкк аргӕвдын ӕмӕ йӕ ӕнӕхъӕнӕй сфыцын. Кӕм арвитдзысты бӕрӕгбон ӕмӕ сын фынг чи ’рцӕттӕ кӕндзӕн?

Куыд бакӕнын хъӕуы, уыдӕттӕ Йесо бӕстон нӕ бацамыдта, цӕмӕй Иудӕ хистӕр сауджынтӕн ма фехъусын кӕна ӕмӕ Йесойы Куадзӕн бӕрӕггӕнгӕйӕ ма ӕрцахсой. Фӕлӕ ныр, цыппӕрӕмы, фӕссихор Петр ӕмӕ Иоанны развӕлгъау арвыста Вифанийӕ ӕмӕ сын бафӕдзӕхста: «Ацӕут, ӕрцӕттӕ кӕнут махӕн бахӕрынмӕ куадзӕн».

«Кӕм нын цӕттӕ кӕнын кӕныс?» — фӕрсынц ӕй уыдон.

«Сахармӕ куы бацӕуат,— ӕмбарын сын кӕны Йесо,— уӕд уыл сӕмбӕлдзӕн адӕймаг, дурыны дон хӕсгӕйӕ; йӕ фӕстӕ цӕут, уый цы хӕдзармӕ бацӕуа, уырдӕм, ӕмӕ зӕгъут хӕдзары хицауӕн: „Ахуыргӕнӕг зӕгъы дӕуӕн: кӕм ис, Ӕз Мӕ ахуыргӕнинӕгтимӕ куадзӕн кӕм бахӕрон, уыцы агъуыст?“ Ӕмӕ уын уый фенын кӕндзӕн стыр ӕфснайд уат; уым ӕрцӕттӕ кӕнут».

Дызӕрдыггаг нӕу, хӕдзары хицау Йесойы ахуыргӕнинаг кӕй у ӕмӕ Йесойы ныхасмӕ кӕй ӕнхъӕлмӕ кӕсы, цӕмӕй бӕрӕгбон йӕ хӕдзары арвитой. Куыдфӕнды ма уа, уӕддӕр Петр ӕмӕ Иоанн Иерусалиммӕ куы ныццыдысты, уӕд ӕппӕтдӕр ӕрӕййӕфтой, Йесо сын куыд загъта, афтӕ. Ӕмӕ ныр Куадзӕны 13 хайадисӕгӕн, Йесо ӕмӕ йӕ 12 апостолӕн, цӕттӕ кӕнынц уӕрыкк ӕмӕ ма сӕ уый ӕддейӕ цы бахъӕудзӕн, уый дӕр. Матфейы 26:1—5, 14—19; Маркы 14:1, 2, 10—16; Лукайы 22:1—13; Рацыд 21:32.

▪ Ӕртыццӕджы Йесо цы сарӕзта ӕмӕ цӕмӕн?

▪ Иерусалимы хистӕр сауджыны хӕдзары цавӕр фембӕлд уыд ӕмӕ Иудӕ дины разамонджытӕм цӕй фӕдыл фӕзынд?

▪ Цыппӕрӕмы Йесо Иерусалиммӕ кӕй арвыста ӕмӕ цӕмӕн?

▪ Йесо цы дыууӕ апостолы арвыста, уыдон цы федтой ӕмӕ уымӕй куыд рабӕрӕг Йесойы уӕлӕрдзон хъомыс?