Дарддӕры фӕзындтӕ

АХУЫРГӔНИНӔГТӔ ныр дӕр ма сты ӕнкъард. Нӕма ӕмбарынц афтид зӕппадзы нысаниуӕг, стӕй сылгоймӕгты ныхӕстыл дӕр не ’ууӕндынц. Уыцы бон фӕстӕдӕр Клеопа ӕмӕ ма ноджы иу ахуыргӕнинаг араст сты Иерусалимӕй Еммаусы хъӕумӕ. Уыцы хъӕу ис 11 километры дарддӕр.

Уыцы бон цы хабӕрттӕ ӕрцыд, уыдӕттыл ныхӕстӕгӕнгӕ куыд цӕуынц, афтӕ сӕм баиу иу ӕнӕзонгӕ адӕймаг. «Цӕуыл тӕрхӕттӕ кӕнут цӕугӕйӕ, уӕ кӕрӕдзиимӕ?» — фӕрсы сӕ уый.

Ахуыргӕнинӕгтӕ сӕргуыбырӕй ӕрлӕууыдысты, ӕмӕ Клеопа дзуры: «Ӕцӕг Ды иу Иерусалиммӕ ӕрцӕуджытӕй нӕ зоныс цытӕ дзы ӕрцыд ацы бонты?»

Уый сӕ фӕрсы: «Цӕй тыххӕй?»

«Цы ӕрцыд Назорейаг Йесойыл,— дзуапп ын дӕттынц уыдон,— хистӕр сауджынтӕ ӕмӕ нӕ хицӕуттӕ Йӕ куыд раттой мӕлӕты тӕрхон скӕнынмӕ ӕмӕ Йӕ байтыгътой; мах та нӕ зӕрдӕ дардтам, Уый кӕй у Израилы Чи аирвӕзын кӕндзӕн».

Клеопа ӕмӕ йын йе ’мбал дзурынц уыцы боны диссаджы хабӕрттӕ — зӕдтӕ кӕй фӕзындысты ӕмӕ зӕппадз афтидӕй кӕй баййӕфтой — фӕлӕ уый фӕстӕ басастыты, уыцы хабӕртты нысаниуӕг кӕй не ’мбарынц. Ӕнӕзонгӕ адӕймаг сын уайдзӕф кӕны: «О, ӕнӕрхъуыдытӕ ӕмӕ уӕзбынтӕ зӕрдӕйӕ ӕууӕндынмӕ ӕппӕтыл, пехуымпартӕ рагзагъд кӕй кодтой! Афтӕ не ’мбӕлд ӕви Чырыстийӕн фӕтухӕн кӕнын ӕмӕ Йӕ кадмӕ бацӕуын?» Ӕмӕ сын ӕмбарын кӕны, Сыгъдӕг Фыстады Чырыстийы тыххӕй цы фыст ис, уый.

Уӕдмӕ бахӕццӕ сты Еммаусмӕ, ӕмӕ ӕнӕзонгӕ ахӕм хуыз равдыста, цыма йӕ дарддӕр цӕуын хъӕуы. Ахуыргӕнинӕгты фылдӕр базонын кӕй фӕнды, уымӕ гӕсгӕ йӕм зӕрдиагӕй хатынц: «Баззай махимӕ, уымӕн ӕмӕ бон изӕрырдӕм фӕкъул». Уыйадыл семӕ ӕхсӕвӕр кӕнынмӕ ӕрлӕууыд. Ӕнӕзонгӕ адӕймаг Хуыцауӕн куы раарфӕ кодта, дзул куы ӕрсаста ӕмӕ сӕм ӕй куы алӕвӕрдта, уӕд базыдтой, уый сӕм Йесо адӕймаджы хуызы кӕй фӕзынд. Фӕлӕ уыцы тӕккӕ цыдӕр фӕцис.

Ныр ӕй ӕмбарынц, ӕнӕзонгӕ адӕймаг афтӕ бирӕ кӕцӕй зыдта! «Нӕ сыгъдис нӕ зӕрдӕ нӕ хуылфы,— фӕрсынц сӕ кӕрӕдзийы,— куы нын дзырдта Уый фӕндагыл, ӕмӕ махӕн Фыст куы ӕмбарын кодта, уӕд?» Уыцы сахат сыстадысты, фӕстӕмӕ Иерусалиммӕ аздӕхтысты ӕмӕ ӕвӕстиатӕй ссардтой апостолты ӕмӕ семӕ ӕрӕмбырдуӕвджыты. Клеопа ӕмӕ йе ’мбал иу ныхас дӕр нӕма загътой, афтӕ иннӕтӕ цингӕнгӕйӕ хъусын кӕнынц, «Хицау ӕцӕг кӕй райгас ӕмӕ фӕзынд Симонмӕ». Уый фӕстӕ сӕ дыууӕ дӕр радзырдтой, Йесо сӕм куыд фӕзынд, уый. Уӕдӕ иу боны мидӕг Йесо хицӕн ахуыргӕнинӕгтӕй цалдӕрмӕ фӕзынд цыппар хатты.

Ныр та Йесо фӕзынд фӕндзӕм хатт. Кӕд ахуыргӕнинӕгтӕ иудейты тасӕй дуӕрттӕ ӕхгӕнӕнӕй сӕхгӕдтой, уӕддӕр Йесо бахызт, сӕ разы ӕрлӕууыд ӕмӕ дзуры: «Фарн сымахӕн». Ахуыргӕнинӕгтӕ хорзау нал фесты, уымӕн ӕмӕ афтӕ фенхъӕлдтой, цавӕрдӕр ӕндӕрг сӕм фӕзынд. Фӕлӕ сын Йесо ӕмбарын кӕны, ӕндӕрг кӕй нӕу: «Цӕмӕй фӕкъӕмдзӕстыг стут [«цӕмӕн тӕрсут», НФ], ӕмӕ ахӕм хъуыдытӕ цӕмӕн цӕуынц уӕ зӕрдӕтӕм? Ӕркӕсут Мӕ къухтӕм ӕмӕ Мӕ къӕхтӕм; уый — Ӕз Мӕхӕдӕг Дӕн; бавналут Мӕм ӕмӕ фенут; уымӕн ӕмӕ удӕн буар [«фыд», НФ] ӕмӕ стджытӕ нӕй, Мӕнмӕ куыд уынут, афтӕ». Фӕлӕ сӕ уӕддӕр ӕххӕстӕй нӕма уырны.

Цӕмӕй ӕцӕгдӕр Йесо кӕй у, ууыл мауал дызӕрдыг кӕной, уый тыххӕй сӕ фӕрсы: «Ам уӕм исты хӕринаг ис?» Уый фӕстӕ фых кӕсаг райста, бахордта йӕ ӕмӕ дзуры: «Мӕнӕ уый, Ӕз уемӕ куы уыдтӕн [Мӕ мӕлӕты размӕ], уӕд цӕй тыххӕй дзырдтон сымахӕн, кӕй ӕмбӕлы сӕххӕст уӕвын, Мӕн тыххӕй Моисейы закъоны ӕмӕ пехуымпартӕм, ӕмӕ псаломты фыст цы ис, уыдон ӕппӕтыл».

Зӕгъӕн ис, Йесо йӕ ахуыргӕнинӕгтимӕ ахуыр кӕны Библи ӕмӕ сын дарддӕр дзуры: «Афтӕ у фыст, ӕмӕ афтӕ ӕмбӕлд Чырыстийӕн фӕтухӕнтӕ кӕнын ӕмӕ ӕртыккаг бон мӕрдтӕй райгас уӕвын, ӕмӕ хъуыстгонд уа Уый номыл фӕсмондзинад ӕмӕ тӕригъӕдты хатырдзинад ӕппӕт адӕмтӕн, Иерусалимӕй райдайгӕйӕ; сымах та ӕвдисӕнтӕ уыдонӕн».

Цӕмӕдӕр гӕсгӕ Фома хуыцаубоны изӕрӕй ацы ахсджиаг фембӕлды нӕ уыд. Уымӕ гӕсгӕ йын уый фӕстӕ цалдӕр боны дӕргъы иннӕтӕ цингӕнгӕйӕ дзурынц: «Мах федтам Хицауы».

«Куы нӕ фенон Йӕ къухтыл зӕгӕлтӕй ностӕ,— дзуры Фома,— ӕмӕ мӕ ӕнгуылдз зӕгӕлтӕй носты куы нӕ бавӕрон, ӕмӕ мӕ къух Йӕ фӕрсджыты куы нӕ бавӕрон, нӕ баууӕнддзынӕн».

Аст боны фӕстӕ та ахуыргӕнинӕгтӕ ногӕй фембӕлдысты хӕдзары. Ацы хатт Фома дӕр ис семӕ. Кӕд дуӕрттӕ ӕхгӕнӕнӕй ӕхгӕд сты, уӕддӕр Йесо ӕрлӕууыд се ’хсӕн ӕмӕ дзуры: «Фарн сымахӕн!» Уый фӕстӕ Фомайӕн дзуры: «Ӕрбадӕтт дӕ ӕнгуылдз ардӕм ӕмӕ фен Мӕ къухтӕ; ӕрбадӕтт дӕ къух ӕмӕ йӕ бавӕр Мӕ фӕрсджыты; ӕмӕ ма у ӕнӕуырнӕг».

«Мӕ Хицау ӕмӕ мӕ Хуыцау!» — хъӕрӕй загъта Фома.

«Ды баууӕндыдтӕ,— дзуры йын Йесо,— уымӕн ӕмӕ федтай Мӕн: тӕхудиаг сты нӕ фенгӕйӕ чи баууӕнддзӕн». Лукайы 24:11, 13—48; Иоанны 20:19—29.

▪ Еммаусмӕ цӕугӕйӕ ӕнӕзонгӕ адӕймаг дыууӕ ахуыргӕнинаджы цӕмӕй бафарста?

▪ Ахуыргӕнинӕгты зӕрдӕтӕ сӕ хуылфы цӕмӕй ссыгъдысты, ахӕмӕй цы загъта ӕнӕзонгӕ адӕймаг?

▪ Ӕнӕзонгӕ адӕймаг чи у, уый ахуыргӕнинӕгтӕ куыд базыдтой?

▪ Клеопа ӕмӕ йе ’мбал фӕстӕмӕ Иерусалиммӕ куы ӕрыздӕхтысты, уӕд цавӕр диссаджы хабар фехъуыстой?

▪ Йесо йӕ ахуыргӕнинӕгтӕм фӕндзӕм хатт куыд фӕзынд ӕмӕ уыцы рӕстӕджы цы ’рцыд?

▪ Йесойы фӕндзӕм фӕзындӕй аст боны куы рацыд, уӕд цы ’рцыд ӕмӕ, Йесо ӕгас кӕй у, уый Фомайы ӕппынфӕстаг куыд бауырныдта?