Чи амард, уыдон та ногӕй цӕрдзысты

ИУ 25-аздзыд сылгоймаг ныффыста: «1981 азы ме схъомылгӕнӕг мад ракӕй амард. Мӕ кӕнгӕ ӕфсымӕримӕ нын уый куыд зын уыди, уымӕн зӕгъӕн дӕр нӕй. Уӕд мыл цыди 17 азы, ме ’фсымӕрыл та – 11 азы. Куыд тынг ӕй мысыдтӕн! Раздӕр-иу мын афтӕ дзырдтой, уӕлӕрвтӕм ацыд, зӕгъгӕ. Фӕлӕ-иу ууыл куы хъуыды кодтон, уӕд-иу мӕ мӕхи амарынмӕ бирӕ нал хъуыд – афтӕ тынг мӕ фӕндыд, цӕмӕй уым йемӕ уыдаин. Уымӕй хуыздӕр ӕмбал мын нӕ уыд».

Бирӕ кӕй уарзӕм, уыцы адӕмы нын мӕлӕт кӕй ахӕссы, уымӕй ӕнӕрастдӕр хъуыддаг ма цы хъуамӕ уа! Ӕмӕ ныл ахӕм бӕллӕх куы ӕрцӕуы, уӕд куы ахъуыды кӕнӕм, йемӕ кӕй никуыуал аныхас кӕндзыстӕм, кӕй никуыуал фӕхуддзыстӕм ӕмӕ кӕрӕдзийӕн кӕй никуыуал ахъӕбыс кӕндзыстӕм, уӕд ӕрмӕст уыцы хъуыдыйӕ дӕр зӕрдӕ йӕхи къултыл ныххойы. Ӕмӕ нын куы фӕзӕгъынц, зӕгъгӕ, уӕлӕрвтӕм ацыд, уӕддӕр нын уый нӕ зӕрдӕйы рыст не ’рсабыр кӕны.

Фӕлӕ, чи амард, уыдонӕн Библи ныфс бынтон ӕндӕр цӕмӕйдӕр ӕвӕры. Фыстадӕй куыд базыдтам, афтӕмӕй тагъд фембӕлдзыстӕм, чи нын амард, уыдонимӕ. Ӕмӕ кӕмдӕр уӕлӕрвты нӕ, фӕлӕ ам, зӕххыл. Стӕй зӕхх дӕр абоны хуызӕн нал уыдзӕн, фӕлӕ йыл уыдзӕн фарн ӕмӕ рӕстдзинад. Уымӕй уӕлдай адӕм рынчын нал кӕндзысты ӕмӕ, мӕлӕт цы у, уый дӕр сӕ ферох уыдзӕн. Фӕлӕ, чи зоны, исчи зӕгъа: «Уыдон иууылдӕр аргъӕуттӕ сты!»

Цӕй фӕрцы дӕ бауырндзӕн, ӕцӕгдӕр нӕм ахӕм фидӕн кӕй ӕнхъӕлмӕ кӕсы? Цӕмӕй искӕмӕн йӕ ныхасыл баууӕндӕм, уый тыххӕй хъуамӕ зонӕм, йӕ ныхас сӕххӕст кӕнын ӕй фӕндгӕ дӕр кӕй кӕны ӕмӕ йӕ бон дӕр кӕй у. Уӕдӕ мӕрдтӕ кӕй райгас уыдзысты, уымӕй нын ныфс чи ’вӕры?

Нӕ эрӕйы 31 азы уалдзӕджы Йесо Чырысти фидарӕй загъта: «Фыд мӕрдты куыд ӕгас кӕны ӕмӕ сын цард куыд дӕтты, афтӕ Фырт дӕр цард дӕтты, кӕмӕн ӕй фӕнды, уыдонӕн. Ууыл дис ма кӕнут, уымӕн ӕмӕ ӕрцӕуы уыцы рӕстӕг, ӕмӕ, ингӕнты чидӕриддӕр ис, уыдон... фехъусдзысты [Йесойы] хъӕлӕс, ӕмӕ рацӕудзысты» (Иоанны 5:21, 28, 29). О, Йесо Чырысти зӕрдӕ бавӕрдта, абон удӕгас чи нал у, уыдонӕй милуантӕ ногӕй зӕххыл Дзӕнӕты кӕй цӕрдзысты ӕмӕ ӕнустӕм фарнӕфсӕст кӕй уыдзысты (Лукайы 23:43; Иоанны 3:16; 17:3; Матфейы 5:5; абар Псалом 37:29 ӕмӕ Матфейы 5:5). Кӕд Йесо уымӕй зӕрдӕ бавӕрдта, уӕд дызӕрдыггаг нӕу, уый йӕ фӕндгӕ дӕр кӕй кӕны. Фӕлӕ цымӕ уый йӕ бон саразын дӕр у?

Йесо уыцы ныхас куы загъта, уымӕй дыууӕ азы дӕр нӕма рацыд, афтӕ иу диссаг сарӕзта, ӕмӕ нӕ уый фӕрцы фидарӕй уырны, мӕрдты райгас кӕнын ӕй ӕрмӕст фӕндгӕ кӕй нӕ кӕны, фӕлӕ уый йӕ бон дӕр кӕй у.

«Лазӕр, ӕддӕмӕ рацу!»

Уыцы хабар се ’ппӕты дӕр дисы бафтыдта. Лазӕр уыд мӕлӕтдзаг рынчын. Йӕ дыууӕ хойы, Марийӕ ӕмӕ Марфӕ, Йесомӕ Иорданы цӕугӕдоны иннӕ фарсмӕ ныхас арвыстой: «Хицау, ды кӕй уарзыс, уый рынчын у» (Иоанны 11:3). Уыдон зыдтой, Йесо Лазӕры бирӕ кӕй уарзта. Цымӕ Йесойы йӕ рынчын хӕлары фенын нӕ бафӕндыдаид? Диссаг уый у, ӕмӕ Йесо Вифанимӕ уайтагъд нӕ араст, фӕлӕ ӕрмӕст дыууӕ боны фӕстӕ (Иоанны 11:5, 6).

Лазӕр амард, йӕ рынчыны хабар Йесомӕ куы фӕхӕццӕ, уымӕй цасдӕры фӕстӕ. Йесо уый зыдта ӕмӕ фӕнд кодта цыдӕр саразын. Цалынмӕ Йесо Вифанимӕ хӕццӕ кодта, уӕдмӕ йе ’мбалы мардыл рацыд цыппар боны (Иоанны 11:17, 39). Цымӕ уал боны мард чи фӕци, ахӕм адӕймаджы йӕ бон райгас кӕнын бауыдзӕн?

Марфӕ ӕнӕуи дӕр тынг сӕрӕн сылгоймаг уыди, ӕмӕ куыддӕр фехъуыста, Йесо ӕрцӕуы, зӕгъгӕ, афтӕ йӕ размӕ азгъордта. (Абар Лукайы 10:38–42.) Йесо куы федта, Марфӕ йе ’фсымӕры мӕлӕтыл куыд хъыг кӕны, уӕд ыл йӕ зӕрдӕ фӕрыст, ӕмӕ йын фидарӕй загъта: «Де ’фсымӕр райгас уыдзӕн». Марфӕ куы бамбарын кодта, мӕрдтӕ фидӕны кӕй райгас уыдзысты, уый йӕ кӕй уырны, уӕд ын Йесо комкоммӕ загъта: «Ӕз дӕн райгасдзинад ӕмӕ цард. Мӕныл чи ’ууӕнды, уый куы амӕла, уӕддӕр райгас уыдзӕн» (Иоанны 11:20–25).

Йесо зӕппадзмӕ куы бахӕццӕ, уӕд адӕмӕн загъта, дур-ма иуварс айсут, зӕгъгӕ. Стӕй хъӕрӕй Хуыцаумӕ скуывта, ӕмӕ уый фӕстӕ зӕппадзырдӕм бадзырдта: «Лазӕр, ӕддӕмӕ рацу!» (Иоанны 11:38–43).

Адӕм сӕ цӕстытӕ зӕппадзӕй нал истой. Уалынмӕ дзы чидӕр рахызт, йӕ къӕхтӕ ӕмӕ йӕ къухтӕ хӕцъилтӕй тыхт, йӕ цӕсгом дӕр хъуымацы гӕбазӕй тыхт, афтӕмӕй. «Райхалут ын йӕ хӕцъилтӕ, цӕмӕй йӕ бон цӕуын уа»,– загъта Йесо. Фӕстаг хӕцъил зӕхмӕ ӕрхаудта. Ӕцӕгдӕр, уый уыди Лазӕр, цыппар боны мард чи уыд, уыцы нӕлгоймаг! (Иоанны 11:44).

Цымӕ уый ӕцӕг хабар уыди?

Иоанны Евангелийы Лазӕры райгасы хабар куыд фыст у, уымӕй бӕрӕг у, ӕцӕг хабар кӕй уыд. Йӕ фыссӕг дзы ахӕсгӕ хуызы исты зӕгъинаг куы уыдаид, уӕд дзы уыйбӕрц лыстӕг хабӕртты кой нӕ ракодтаид. Ӕцӕг хабар кӕй уыд, ууыл кӕд дызӕрдыг кӕнӕм, уӕд дызӕрдыггаг кӕнӕм, Библийы цы диссӕгты тыххӕй фыст ис, уыдон иууылдӕр, уыимӕ, Йесо Чырысти йӕхӕдӕг дӕр кӕй райгас, уый дӕр. Ӕмӕ кӕд, Йесо кӕй райгас, уый аргъауыл нымайӕм, уӕд афтӕ уайы, ӕмӕ чырыстон дин ӕнӕхъӕнӕй дӕр аргъау у (1 Коринфӕгтӕм 15:13–15).

Кӕд, Хуыцау кӕй ис, ууыл ӕууӕндыс, уӕд дын зын нӕ уыдзӕн, мӕрдтӕ кӕй райгас уыдзысты, ууыл дӕр баууӕндын. Зӕгъӕм, адӕймагӕн йӕ бон у, йӕ ныстуан куыд дзуры, уый видеокамерӕйӕ сисын. Ӕмӕ, куы амӕла, уӕд ӕй йӕ хиуӕттӕн ӕмӕ йе ’мбӕлттӕн сӕ бон уыдзӕн уыцы видеойы уынын дӕр ӕмӕ хъусын дӕр. Иу-100 азы размӕ уый уырнгӕ дӕр никӕй бакодтаид. Стӕй, видеокамерӕ куыд кусы, уый нӕ рӕстӕджы дӕр кӕмдӕрты адӕм не ’мбарынц, ӕмӕ сӕм диссаг кӕсы. Уӕдӕ, Сфӕлдисӕг ӕрдзы цы закъӕттӕ сфидар кодта, уыдоны фӕрцы кӕд адӕймаг ахӕм диссаг сарӕзта, ӕмӕ, чи амард, уыдоны нӕ бон у видеойы уынын ӕмӕ хъусын, уӕд цымӕ йӕхӕдӕг стырдӕр диссӕгтӕ нӕ сараздзӕн? Ау, цард иу хатт чи сфӕлдыста, уымӕн ӕй йӕ бон ногӕй сфӕлдисын нӕ бауыдзӕн?

Лазӕр кӕй райгас, уый фӕрцы адӕм ноджы тынгдӕр баууӕндыдысты Йесойыл ӕмӕ, мӕрдтӕ кӕй райгас уыдзысты, ууыл (Иоанны 11:41, 42; 12:9–11, 17–19). Ацы диссаджы хабарӕй ма бӕрӕг у, Йегъовӕйы ӕмӕ йӕ Фырты тынг кӕй фӕнды, чи амард, уыдоны ногӕй цардмӕ раздахын.

Хуыцау сӕ фенынмӕ «бӕлдзӕн»

Лазӕры хабар фехъусгӕйӕ Йесо, Хуыцауы Фырт, цы сарӕзта, уый ӕвдисы, цы диссаджы фӕлмӕн зӕрдӕйы хицау у, уый. Йӕхи зӕрдӕ дӕр кӕй фӕрыст, уымӕй бӕрӕг у, чи амард, уыдоны райгас кӕнын ӕй куыд тынг фӕнды. Библийы кӕсӕм: «Марийӕ та, Йесо кӕм уыд, уырдӕм куы бахӕццӕ ӕмӕ йӕ куы ауыдта, уӕд йӕ разы йӕ зонгуытыл ӕрхауд ӕмӕ йын афтӕ зӕгъы: „Хицау, ды ам куы уыдаис, уӕд ме ’фсымӕр нӕ амардаид“. Йесо, Марийӕйы ӕмӕ, йемӕ чи ’рбацыд, уыцы дзуттӕгты кӕугӕ куы федта, уӕд йӕхицӕн дӕр йӕ зӕрдӕ суынгӕг ӕмӕ нынкъард, ӕмӕ сӕ бафарста: „Кӕм ӕй бавӕрдтат?“ Уыдон ын загътой: „Хицау, рацу ӕмӕ йӕ фен“. Ӕмӕ Йесойӕн йӕ цӕссыгтӕ ӕркалдысты. Ӕмӕ уӕд дзуттӕгтӕ дзурын райдыдтой: „Кӕс-ма, куыд тынг ӕй уарзта!“» (Иоанны 11:32–36).

Йесо иннӕты рыст кӕй ӕмбӕрста, уый бӕрӕг у ахӕм ныхӕстӕй: «йӕ зӕрдӕ суынгӕг», «нынкъард» ӕмӕ «йӕ цӕссыгтӕ ӕркалдысты». Ацы хабар фыццаг цы ӕвзагыл фыст ӕрцыд, уым уыцы дзырдтӕ ӕвдисынц, Йесойӕн йе ’ввахс ӕмбал Лазӕры мӕлӕтыл йӕ зӕрдӕ тынг кӕй фӕрыст ӕмӕ йын йӕ хоты кӕугӕйӕ куы федта, уӕд йӕ цӕстытӕ донӕй кӕй айдзаг стыa.

Уымӕй размӕ дӕр ма Йесо райгас кодта дыууӕ адӕймаджы. Ӕмӕ йӕ Лазӕры райгас кӕнын дӕр тынг фӕндыд (Иоанны 11:11, 23, 25). Фӕлӕ уӕддӕр «йӕ цӕссыгтӕ ӕркалдысты». Уӕдӕ адӕмы цардмӕ раздахын Йесо тынг ахсджиаг хъуыддагыл нымайы. Адӕмы куыд тынг уарзта ӕмӕ сын сӕ рис йӕ зӕрдӕмӕ куыд арф иста, уымӕй бӕрӕг у, тынг ӕй кӕй фӕнды, цӕмӕй мӕлӕтӕн йӕ кой дӕр мауал уа.

Кӕд Йесо, «Хуыцау цыхуызӕн у, раст ахӕм» у, уӕд нӕ уӕларвон Фыды дӕр куыннӕ фӕнды мӕрдты райгас кӕнын (Дзуттӕгтӕм 1:3). Хуыцауыл иузӕрдион адӕймаг Иов дӕр уый тыххӕй загъта: «Адӕймаг куы амӕла, уӕд ма ногӕй цӕрдзӕн? [...] Ды мӕм фӕдзурдзынӕ, ӕмӕ дын ӕз дзуапп ратдзынӕн. Дӕ къухтӕ кӕуыл фӕфыдӕбон кодтой, уый фенынмӕ бӕлдзынӕ» (Иов 14:14, 15). Ам дзырд «фенынмӕ бӕлдзынӕ»-йӕ цы дзырд ратӕлмац кодтой, уый, Иовы чиныг цы ӕвзагыл фыст ӕрцыд, уыцы ӕвзагыл амоны Хуыцауы стыр фӕндон ӕмӕ бӕллицмӕ (Райдиан 31:30; Псалом 84:2). Дзырд дӕр ыл нӕй, Йегъовӕ тынг кӕй ӕнхъӕлмӕ кӕсы, чи амард, уыдон ногӕй цардмӕ кӕд раздӕхдзысты, уыцы рӕстӕгмӕ.

Мӕрдтӕ кӕй райгас уыдзысты, ууыл ӕцӕгдӕр фидарӕй ӕууӕндӕн ис? О, ис. Дызӕрдыггаг нӕу, Йегъовӕйы ӕмӕ йӕ Фырты фӕндгӕ дӕр кӕй кӕны ӕмӕ сӕ бон дӕр кӕй у мӕрдты райгас кӕнын. Уый дӕуӕн цӕуыл дзурӕг у? Фадат дын ис, цӕмӕй фидӕны ам, зӕххыл, чи дын амард, уыдоныл фембӕлай, ӕрмӕст бынтон ӕндӕр уавӕрты!

Райдианы адӕмы диссаджы цӕхӕрадоны чи ӕрцӕрын кодта, уыцы Хуыцау Йегъовӕ ныфс ӕвӕры, зӕххыл ногӕй Дзӕнӕт кӕй сараздзӕн, йӕ Паддзах Йесо Чырысти кӕмӕн у, уыцы уӕларвон Паддзахады фӕрцы (Райдиан 2:7–9; Матфейы 6:10; Лукайы 23:42, 43). Уыцы Дзӕнӕты адӕм ӕнустӕм амондджынӕй цӕрдзысты, ӕмӕ дзы йӕ къахы ӕнгуылдзӕй дӕр никуы ничиуал схъӕрздзӕн (Раргомад 21:1–4; абар Иов 33:25; Исай 35:5–7). Уымӕй уӕлдай, адӕм сӕ кӕрӕдзийӕ се сӕфт нал уындзысты, кӕрӕдзи расӕтыл нал дих кӕндзысты, иу адӕмыхатт иннӕйы нал ӕфхӕрдзӕн ӕмӕ мӕгуыр ничиуал цӕрдзӕн. Ахӕм сыгъдӕг зӕххыл Йегъовӕ Йесо Чырыстийы фӕрцы мӕрдты райгас кӕндзӕн.

Ацы хайы райдианы цы сылгоймаджы кой кодтам, уый дӕр фидарӕй уырны, мӕрдтӕ кӕй райгас уыдзысты, уый. Йӕ мад куы амард, уымӕй цалдӕр азы фӕстӕ Йегъовӕйы Ӕвдисӕнтимӕ Библи ахуыр кӕнын райдыдта. Мӕнӕ йӕ ныхӕстӕ: «Мӕрдтӕ кӕй райгас уыдзысты, уый куы базыдтон, уӕд фӕкуыдтон. Стыр диссаг куыннӕ у, мӕ мады та ногӕй кӕй фендзынӕн!»

Чи дын амард, уыдоны фенынмӕ кӕд ды дӕр афтӕ бӕллыс, уӕд дын Йегъовӕйы Ӕвдисӕнтӕ зӕрдиагӕй бацамондзысты, цы аразын дӕ хъӕуы, цӕмӕй дӕ бӕллиц сӕххӕст уа. Дӕ бон сӕм у Паддзахады залмӕ бацӕуын кӕнӕ ныффыссын, 32 фарсыл цы адристӕ ис, уыдонӕй искӕцыйыл.