ФАРӔСТӔМ СӔР
Иу ныййарӕг йеддӕмӕ кӕм нӕй, ахӕм бинонтӕ
1–3. Иу ныййарӕг йеддӕмӕ кӕм нӕй, ахӕм бинонтӕ цӕмӕн фылдӕр кӕнынц ӕмӕ сын цавӕр зындзинӕдтӕ вӕййы?
КУЫД зӕгъынц, афтӕмӕй Америкӕйы бонӕй-бон фылдӕр кӕнынц, иу ныййарӕг йеддӕмӕ кӕм нӕй, ахӕм бинонтӕ. Ӕмӕ иннӕ бӕстӕты дӕр уавӕр хуыздӕр нӕу. Лӕг ӕмӕ ус ахицӕн вӕййынц, дыууӕ цардӕмбалӕй иу йӕ бинонты ныууадзы, ус йӕ цӕгатмӕ ацӕуы, сылгоймаг, моймӕдзыд нӕ вӕййы, афтӕмӕй сывӕллон ныййары – ахӕм хабӕрттӕ абонӕй арӕхдӕр никуы уыдысты. Ӕмӕ уыдӕтты тыххӕй милуангай ныййарджытӕ ӕмӕ сывӕллӕттӕ бирӕ мӕстытӕ ӕмӕ зындзинӕдтӕ ӕвзарынц.
2 Иу ӕрыгон сылгоймаг фыссы: «Цӕуы мыл 28 азы, мӕ лӕг куы фӕзиан, уӕд мӕ дыууӕ сывӕллонимӕ иунӕгӕй баззадтӕн. Нӕ мӕ фӕнды, цӕмӕй мӕ сывӕллӕттӕ ӕнӕ фыдӕй хъомыл кӕной, ӕмӕ мӕ зӕрдӕ риссы. Афтӕ дӕр мӕм фӕкӕсы, цыма никӕй хъӕуын. Мӕ сывӕллӕттӕ мӕ арӕх фенынц кӕугӕйӕ, ӕмӕ сын уый зын у». О, ахӕм ныййарджыты зӕрдӕйы бирӕ алыхуызон ӕнкъарӕнтӕ фӕзыны: мӕсты дӕр фӕкӕнынц, сӕхи дӕр фӕаххосджын кӕнынц, афтӕ дӕр сӕм фӕкӕсы, ӕмӕ никӕй хъӕуынц. Сӕ фылдӕры та ма фӕхъӕуы хӕдзары хъуыддӕгтӕ кӕнын дӕр ӕмӕ искуы кусын дӕр, ӕмӕ сын уый тыххӕй дӕр зын у. Иу ахӕм ныййарӕг афтӕ загъта: «Сывӕллӕтты иунӕгӕй хъомыл кӕнын тынг зын у. Бирӕ тухиты фӕстӕ кӕддӕр-кӕддӕр адӕймаг йӕ куыстытыл ӕххӕссын райдайы. Фӕлӕ куыддӕр зӕгъай, гыццыл мын фенцондӕр, зӕгъгӕ, афтӕ та дын фӕзындзӕн ног кӕнинӕгтӕ».
3 Ӕнӕ фыд кӕнӕ ӕнӕ мадӕй чи фӕхъомыл кӕны, уыцы сывӕллӕттӕн дӕр вӕййы сӕхи зындзинӕдтӕ. Сӕ ныййарджытӕй сӕ иу куы ныууадзы кӕнӕ куы амӕлы, уӕд сын ӕнкъард хъуыдытӕ ӕнцой нал фӕдӕттынц. Бирӕтыл сӕ тынг ӕвзӕр фӕзыны, фыд кӕнӕ сын мад кӕй нӕй, уый.
4. Кӕцӕй йӕ зонӕм, ӕмӕ Йегъовӕ тыхсы, иу ныййарӕг йеддӕмӕ кӕм нӕй, ахӕм бинонтыл?
4 Фыд кӕнӕ мад кӕм нӕ уыд, ахӕм бинонтӕ уыди, Библи куы фыстой, уӕды заманты дӕр. Фыстады арӕх ӕмбӕлынц ахӕм ныхӕстӕ, «сидзӕр сывӕллон» ӕмӕ «идӕдз ус», зӕгъгӕ (Рацыд 22:22; Дыккаг закъон 24:19–21; Иов 31:16–22). Йегъовӕйы зӕрдӕ рысти сӕ зындзинадыл. Псаломзарӕггӕнӕг Хуыцауы схуыдта «сидзӕрты Фыд ӕмӕ идӕдзты тӕрхонгӕнӕг» (Псалом 67:6). Ӕмӕ Йегъовӕ абон дӕр афтӕ тыхсы, иу ныййарӕг йеддӕмӕ кӕм нӕй, ахӕм бинонтыл. Йӕ Ныхас Библийы сын амоны, амондджын цӕй фӕрцы уыдзысты, уый.
ХӔДЗАРЫ ХЪУЫДДӔГТЫЛ ӔХХӔССЫН
5. Йӕ сывӕллӕтты иунӕгӕй чи хъомыл кӕны, ахӕм ныййарджытӕн райдианты зын цӕмӕн вӕййы?
5 Аныхас кӕнӕм хӕдзары хъуыддӕгтыл. «Арӕх бахъӕуы нӕлгоймаджы ӕххуыс,– дзуры, йӕ лӕгӕй чи ахицӕн, ахӕм сылгоймаг.– Зӕгъӕм, дӕ машинӕ дзӕгъ-дзӕгъ кӕны, ӕмӕ ды та, кӕцӕй цӕуы, уымӕн дӕр ницы ӕмбарыс». Йӕ усӕй ӕрӕджы чи ахицӕн кӕнӕ идӕдзӕй чи баззад, ахӕм нӕлгоймӕгтӕ дӕр уый куы бамбарынц, ӕмӕ ныр хӕдзары куыстытӕ иууылдӕр сӕхимӕ кӕсынц, уӕд сӕ сӕрыл ныххӕцынц. Хӕдзары ӕдзух змӕст куы вӕййы, уӕд сывӕллӕттӕн ноджы зындӕр вӕййы, ноджы тынгдӕр фӕтыхсынц.
Кӕстӕртӕ, уӕ ныййарӕджы ӕмбарут ӕмӕ йын ӕххуыс кӕнут
6, 7. а) Ӕмбисӕндты чиныджы цы «сӕрӕн усы» тыххӕй ис фыст, уый фӕзминаг цӕмӕй у? ӕ) Йӕ сывӕллӕтты иунӕгӕй чи хъомыл кӕны, уыдон сӕ хӕдзары куыстытӕ ӕнӕзивӕгӕй куы кӕной, уӕд сын уый цы ’ххуыс фӕуыдзӕн?
6 Цы баххуыс кӕндзӕн иунӕг ныййарджытӕн? Ӕркӕсӕм, Ӕмбисӕндты 31:10–31 цы «сӕрӕн усы» тыххӕй ис фыст, уый дӕнцӕгмӕ. Цы куыстмӕ нӕ арӕхст, ахӕм нӕ уыди: базары хъуыддӕгтӕ кодта, хуыдта, хӕринаг арӕзта, зӕххытӕ ӕлхӕдта, стӕй зӕххы куыст дӕр кодта. Цӕй фӕрцы йын ӕнтыст ӕппӕт уыдӕттӕ? Ӕнӕзивӕг кӕй уыд, райсомӕй-изӕрмӕ куыстӕй фӕллад кӕй нӕ зыдта, уый фӕрцы. Стӕй ма йӕ хъуыддӕгтӕ дӕр хорз пълан кодта, цыдӕр куыстытӕ-иу иннӕтӕн дӕр бахӕс кодта, ӕмӕ афтӕмӕй йӕ къухты фыдӕбонӕй лӕггад кодта йӕ бинонтӕн. Уӕдӕ куыннӕ уыди раппӕлинаг!
7 Кӕд дӕ сывӕллӕтты иунӕгӕй хъомыл кӕныс, уӕд дӕ хӕдзары куыстытӕ ӕнӕзивӕгӕй кӕн. Дӕ куыстытӕ зӕрдӕрайгӕйӕ куы кӕнай, уӕд дӕ сывӕллӕттӕ хъӕлдзӕгдӕр уыдзысты. Фӕлӕ ма хъӕуы алцӕуыл дӕр рагацау хъуыды кӕнын ӕмӕ ӕппӕт дӕр пълан кӕнын. «Алцы бӕстон чи кӕны, уымӕн йӕ фӕндтӕ йӕ къухы бафтынц»,– зӕгъы Библи (Ӕмбисӕндтӕ 21:5). Йӕ сывӕллӕтты иунӕгӕй чи хъомыл кӕны, иу ахӕм фыд ӕргом загъта: «Цалынмӕ не сӕххормаг вӕййын, уӕдмӕ хӕринагыл хъуыды дӕр нӕ акӕнын». Тагъд-тагъдӕй истытӕ ацӕттӕ кӕныны бӕсты-иу хӕрдыл рагацау куы батыхсай, уӕд-иу хӕринаг бирӕ хӕрзаддӕр ӕмӕ тайӕндӕр уыдзӕн. Чи зоны дӕ цыдӕр куыстытыл ахуыр кӕнын дӕр бахъӕуа. Сывӕллӕтты иунӕгӕй чи хъомыл кӕны, ахӕм сылгоймӕгтӕй иуӕй-иутӕ сӕ хӕлӕртты фӕрцы, чингуыты руаджы ӕмӕ, уыцы хъуыддӕгты дӕсны чи у, уыдоны фӕрцы сахуыр сты ахорын, донуадзӕн кърант цалцӕг кӕнын кӕнӕ, машинӕйы гыццыл исты куы фехӕла, уӕд ӕй саразын.
8. Иу ныййарӕг йеддӕмӕ кӕмӕн нӕй, уыцы сывӕллӕттӕн сӕ бон куыд у сӕ мад кӕнӕ сӕ фыдӕн хӕдзары хъуыддӕгты ӕххуыс кӕнын?
8 Цымӕ раст уыдзӕн, ӕмӕ-иу ныййарӕг хӕдзары куыстытӕй истытӕ сывӕллӕттӕн куы бахӕс кӕна? Йӕ сывӕллӕтты иунӕгӕй чи хъомыл кӕны, иу ахӕм мад афтӕ зӕгъы: «Сывӕллӕттӕн фыд кӕй нӕй, уый тыххӕй сын адӕймаг тӕригъӕд фӕкӕны ӕмӕ сын куыд ӕнцондӕр уа, ууыл фӕархайы». Ӕмӕ уый бамбарӕн ис, фӕлӕ сывӕллӕттӕн уый пайда не ’рхӕсдзӕн. Рагзаманты дӕр Хуыцауыл ӕууӕндӕг кӕстӕртӕн хӕдзары уыд цыдӕр хӕстӕ (Райдиан 37:2; Соломоны зарӕг 1:6). Уӕдӕ хорз уыдзӕн, дӕ сывӕллӕттӕй ӕгӕр бирӕ куы нӕ домай, фӕлӕ-иу сын уӕддӕр исты куыстытӕ куы бахӕс кӕнай, зӕгъӕм, тӕбӕгътӕ ахсын кӕнӕ сӕ уат бафснайын. Хорз уаид, хӕдзары куыстытӕй-иу исты иумӕ дӕр куы бакӕниккат. Уый уын стыр циндзинад ӕрхӕсдзӕн.
ЦАРДАМӔЛТТӔ КӔНЫН ӔНЦОН НӔУ
Дӕ сывӕллӕттимӕ гӕнӕн уӕвгӕйӕ фылдӕр рӕстӕг ӕрвит
9. Йӕ сывӕллӕтты ӕнӕ фыдӕй чи хъомыл кӕны, уыцы сылгоймӕгтӕн цардамӕлттӕ кӕнын зын цӕмӕн вӕййы?
9 Йӕ сывӕллӕтты иунӕгӕй чи хъомыл кӕны, уыдонӕн фылдӕр хатт зын вӕййы цардамӕлттӕ кӕнын, уӕлдайдӕр та – моймӕдзыд чи нӕ вӕййы, афтӕмӕй сывӕллон чи ныййары, уыцы ӕрыгон чызджытӕнa. Кӕд ахӕм ныййарджытӕм хицауадӕй исты ӕмбӕлы, уӕд хорз уаид, ӕмӕ, цалынмӕ куыст не ссарой, уӕдмӕ уӕддӕр куы исиккой уыцы ӕхца. Библимӕ гӕсгӕ чырыстонӕн ис уый бар (Ромӕгтӕм 13:1, 6). Идӕдзӕй чи баззад кӕнӕ йӕ лӕгӕй чи ахицӕн, уыцы сылгоймӕгтӕн дӕр вӕййы ахӕм зындзинӕдтӕ. Бирӕтӕ сӕ кӕд уый размӕ бирӕ азты дӕргъы ӕрмӕстдӕр хӕдзары куыстытӕ кодтой, уӕд сӕ ныр бахъӕуы куыстмӕ бацӕуын. Ӕмӕ куыст дӕр фылдӕр хатт ссарынц, гыццыл ӕхца кӕм фидынц, ахӕм. Ӕцӕг сӕ иуӕй-иутӕ бацӕуынц исты курсытӕм, ӕмӕ сын уӕд куыст ссарын ӕнцондӕр вӕййы.
10. Йӕ сывӕллӕтты иунӕгӕй чи хъомыл кӕны, ахӕм мадӕн йӕ бон куыд у, ӕмӕ сын бамбарын кӕна, куыстмӕ бацӕуын ӕй цӕмӕн хъӕуы, уый?
10 Чи зоны, ӕмӕ дӕ сывӕллӕтты зӕрдӕмӕ ма цӕуа, куыст кӕй агурыс, уый. Фӕлӕ ууыл дис ма кӕн ӕмӕ дӕхи дӕр ма аххосджын кӕн. Бамбарын сын кӕн, кусын дӕ цӕмӕн хъӕуы, уый, ӕмӕ сӕ кӕй хъуамӕ дарай, уый дын Йегъовӕ кӕй фӕдзӕхсы (1 Тимофеймӕ 5:8). Сывӕллӕттӕн сӕ фылдӕр сындӕггай сахуыр вӕййынц сӕ ног уавӕртыл. Фӕлӕ дын уӕддӕр гӕнӕн цас уа, уыйас семӕ рӕстӕг ӕрвит. Куы сыл тыхсай, дӕ уарзтӕй сӕ куы рӕвдауай, уӕд, ӕхцайӕ цух кӕй ӕййафут, ууыл афтӕ тынг нӕ мӕт кӕндзысты (Ӕмбисӕндтӕ 15:16, 17).
ЧИ КӔУЫЛ ТЫХСЫ?
Ӕмбырды «идӕдзтӕ» ӕмӕ «сидзӕртӕ» ӕвӕгӕсӕг не сты
11, 12. Йӕ сывӕллӕтты иунӕгӕй чи хъомыл кӕны, уыдоны цы нӕ хъӕуы рох кӕнын ӕмӕ уымӕ гӕсгӕ куыд хъуамӕ архайой?
11 Ныййарӕг йӕ сывӕллӕтты иунӕгӕй куы фӕхъомыл кӕны, уӕд семӕ тынг ӕнгом свӕййы. Фӕлӕ, бинонты ’хсӕн Хуыцау ныййарджытӕн ӕмӕ сывӕллӕттӕн цы хӕстӕ радта, уый рох кӕнын нӕ хъӕуы. Зӕгъӕм, мад хӕдзары хицауы хӕстӕ йӕ фыртыл куы ’вӕра кӕнӕ йӕ чызгӕн йе ’ппӕт сагъӕстӕ куы дзура ӕмӕ йӕ афтӕмӕй мӕты куы ’фтауа, уӕд уый хорзмӕ не ’ркӕндзӕн. Сывӕллоныл ахӕм уаргъ сӕккой кӕнын раст нӕу – афтӕмӕй сагъӕсты бын фӕуыдзӕн кӕнӕ та йӕхимӕ дӕр ныхъхъусдзӕн.
12 Сывӕллӕттӕ йӕ хъуамӕ зоной, уыдон дӕуыл нӕ, фӕлӕ ды уыдоныл кӕй тыхсдзынӕ, уымӕн ӕмӕ ды сӕ ныййарӕг дӕ. (Абар 2 Коринфӕгтӕм 12:14.) Уынаффӕ кӕнӕ дӕ ӕххуыс куы хъӕуа, уӕд ӕй дӕ сывӕллӕттӕй ма агур, фӕлӕ ӕмбырды хистӕр нӕлгоймӕгтӕй кӕнӕ ӕмбаргӕ хотӕй (Титмӕ 2:3).
ЗОНД АМОНЫН СЫН НЫР ДӔР ХЪӔУЫ
13. Йӕ сывӕллӕтты иунӕгӕй чи хъомыл кӕны, ахӕм мадӕн зын цӕмӕн вӕййы, цӕмӕй сын, куыд ӕмбӕлы, афтӕ зонд амона?
13 Кӕстӕрты цӕсты нӕлгоймаджы ныхасӕн стыр уӕз вӕййы, фӕлӕ сылгоймагӕн арӕх ӕнцон нӕ вӕййы афтӕ бакӕнын, цӕмӕй йын йӕ ныхасмӕ байхъусой. Йӕ сывӕллӕтты иунӕгӕй чи хъомыл кӕны, иу ахӕм мад зӕгъы: «Мӕ лӕппутӕм куы бакӕсай, уӕд – лӕгау-лӕгтӕ. Ӕмӕ, сӕ цуры мӕхи уыдонӕй лӕмӕгъдӕр ма равдисон, уый мын хатт зын вӕййы». Чи зоны, нырма дӕр дӕ зӕрдӕ риссы дӕ цардӕмбалы мӕлӕтыл, йе та дӕхи хӕрыс кӕнӕ мӕсты кӕныс, кӕй ахицӕн стут, уый тыххӕй. Кӕд закъонмӕ гӕсгӕ дӕ раздӕры лӕгӕн дӕр ис уӕ сывӕллӕтты хъомыл кӕныны бар, уӕд та, чи зоны, тӕрсыс, уымӕ куы ацӕуой. Ӕмӕ дын ахӕм уавӕрты, чи зоны, тынг зын у дӕ сывӕллӕттӕн, куыд ӕмбӕлы, афтӕ зонд амонын.
14. Сывӕллӕттӕ иунӕгӕй чи хъомыл кӕны, уыцы ныййарджыты цы хъӕуы, цӕмӕй сӕ сывӕллӕттӕн зонд амонгӕйӕ ӕмбаргӕ уой?
14 «Ӕнӕркастӕй цы лӕппу баззайа, уый йӕ мады худинаг кӕндзӕн»,– зӕгъы Библи (Ӕмбисӕндтӕ 29:15). Ууыл куы архайай, цӕмӕй уӕ хӕдзары бӕлвырд уаг ӕмӕ ӕгъдау уа ӕмӕ бинонтӕй алчи дӕр уыцы уаг ӕмӕ ӕгъдауыл фидар хӕца, уӕд дын Йегъовӕ Хуыцау арфӕ кӕндзӕн. Уӕдӕ дӕхи ма хӕр ӕмӕ тӕрсгӕ дӕр мацӕмӕй кӕн (Ӕмбисӕндтӕ 1:8). Библи цы дзуры, уый сӕрты макуы ахиз (Ӕмбисӕндтӕ 13:24). Зонд амонгӕйӕ у ӕмбаргӕ, фӕлӕ фидар. Рӕстӕг рацӕуы, ӕмӕ сывӕллӕттӕн сӕ фылдӕр бамбарынц, ныййарджытӕ сӕ хорзыл кӕй тыхсынц. Фӕлӕ уӕддӕр хъуыды кӕнын хъӕуы сывӕллӕтты ӕнкъарӕнтыл дӕр. Иу фыд афтӕ зӕгъы: «Мӕ сывӕллӕттӕн зонд куы фӕамонын, уӕд мӕ зӕрдыл ӕрлӕууын кӕнын, сӕ мады мӕлӕт сфӕразын сын куыд зын уыди, уый. Фадат мын куы вӕййы, уӕд семӕ фӕныхас кӕнын. Уӕлдай адджын ныхас нын рауайы, иумӕ ӕхсӕвӕр куы фӕцӕттӕ кӕнӕм, уӕд. Ахӕм рӕстӕг ӕцӕгдӕр зӕрдӕйӕ-зӕрдӕмӕ фӕныхас кӕнӕм».
15. Йӕ лӕгӕй кӕнӕ йӕ усӕй чи ахицӕн, уый йӕ раздӕры цардӕмбалы кой кӕнгӕйӕ йӕхи цӕмӕй хъуамӕ хиза?
15 Кӕд дӕ цардӕмбалимӕ ахицӕн стут, уӕд ӕй дӕ сывӕллӕтты цӕсты ма дӕлӕмӕ кӕн – уый хорзӕй ницӕмӕ ’ркӕндзӕн. Ныййарджытӕ кӕрӕдзи куы фефхӕрынц, уӕд уый сывӕллӕттӕн зын вӕййы, ӕмӕ ӕппынфӕстаг уӕ дыууӕ дӕр сӕ цӕсты фегад уыдзыстут. Уӕдӕ дӕхи хиз ахӕм ӕфхӕрӕн ныхӕстӕй: «Раст дӕ фыды хуызӕн дӕ!» Кӕд дын дӕ раздӕры цардӕмбал дӕ зӕрдӕ тынг фӕриссын кодта, уӕддӕр дӕ сывӕллоны фыд (йе та мад) у. Ӕмӕ дӕ сывӕллоны та дыууӕ ныййарӕджы уарзт, рӕвдыд ӕмӕ зондамынд дӕр хъӕуынцb.
16. Йӕ сывӕллӕтты иунӕгӕй чи хъомыл кӕны, уыцы ныййарджыты ӕнӕмӕнгӕй цы хъӕуы аразын?
16 Амӕйразмӕйы сӕртӕй куыд базыдтам, афтӕмӕй зонд амонынмӕ ӕрмӕст уый нӕ хауы, ӕмӕ-иу сывӕллоны бафхӕрай, фӕлӕ ма йӕ ахуыр кӕнай ӕмӕ йӕ раст зондыл аразай, уый дӕр. Бирӕ зындзинӕдтӕй хызт уыдзыстут, уӕ уырнындзинад фидар кӕнынӕн уын хорз фӕтк куы уа, уӕд (Филиппӕгтӕм 3:16). Тынг ахсджиаг у алы ӕмбырдмӕ дӕр цӕуын (Дзуттӕгтӕм 10:24, 25). Стӕй ма ӕнӕмӕнгӕй хъӕуы алы къуыри дӕр иумӕ Библи ахуыр кӕнын. Раст у, уый ӕнцон нӕу. Ныййарӕджы хӕстӕ цӕсгомджынӕй чи ӕххӕст кӕны, иу ахӕм мад загъта: «Куыстӕй ахӕм фӕлладӕй ӕрбацӕуын, ӕмӕ мӕ ницыуал фӕфӕнды. Фӕлӕ мӕ хъуыдытӕ рагацау уымӕ саразын, мӕ чызгимӕ Библи куыд ахуыр кӕндзынӕн, уымӕн ӕмӕ йӕ зонын, уый мӕ хӕс у. Ӕмӕ цы тынг уарзы мӕ чызг нӕ бинонты ахуыр!»
17. Павелы ӕмбал Тимофейӕ куыд хорз чырыстон рауад, уый цӕуыл дзурӕг у?
17 Апостол Павелы ӕмбал Тимофейӕн Библийы уагӕвӕрдтӕ амыдтой йӕ мад ӕмӕ йӕ мадымад, йӕ фыд та – нӕ. Фӕлӕ цӕй хорз чырыстон сси Тимофей! (Хъуыддӕгтӕ 16:1, 2; 2 Тимофеймӕ 1:5; 3:14, 15). Кӕд уӕ сывӕллӕтты хъомыл кӕнут, «Йегъовӕ куыд амоны, афтӕ, ӕмӕ сӕ йӕ зондыл аразут», уӕд сымах дӕр уыцы ныфс уӕд, уӕ фыдӕбон дзӕгъӕлы кӕй нӕ фӕуыдзӕн (Ефесӕгтӕм 6:4).
ЦЫ ИС САРАЗӔН, ЦӔМӔЙ МА ӔНКЪАРД КӔНАЙ
18, 19. а) Адӕймаг иунӕг куы вӕййы, уӕд ыл уый куыд фӕзыны? ӕ) Буары монцтыл хӕцынӕн цавӕр уынаффӕ ӕххуыс кӕны?
18 Йӕ сывӕллӕтты иунӕгӕй чи хъомыл кӕны, иу ахӕм ныййарӕг хъаст кӕны: «Хӕдзармӕ куы ’рбацӕуын ӕмӕ цыппар къулы астӕу куы баззайын, уӕд мӕхи афтӕ иунӕг фӕхатын, ӕмӕ йын зӕгъӕн дӕр нӕй. Уӕлдайдӕр та – сывӕллӕтты куы схуыссын кӕнын, уӕд». Ӕцӕгдӕр, ахӕм ныййарджытӕн арӕх уымӕй зындӕр ницы вӕййы, ӕмӕ иунӕг кӕй сты. О, адӕймаджы фӕнды, цӕмӕй йӕ фарсмӕ исчи уа, уарза йӕ ӕмӕ йыл узӕла. Фӕлӕ йын уый куы нӕ уа, уӕд цымӕ удӕнцой цыфӕндыйӕ дӕр хъуамӕ ссара? Апостол Павелы рӕстӕджы-иу иуӕй-иу ӕрыгон идӕдзтӕн «сӕ буары монцтӕ» афтӕ «стыхджын сты», ӕмӕ-иу сын систы «Чырыстийӕ ахсджиагдӕр» (1 Тимофеймӕ 5:11, 12). Адӕймаг йӕ буары монцтыл куы суа ӕмӕ йӕ йӕ уырнындзинад фидар кӕнын куы ферох уа, уӕд ӕй уый ӕркӕндзӕн бӕллӕхмӕ (1 Тимофеймӕ 5:6).
19 Иу чырыстон афтӕ зӕгъы: «Буары монцтӕ тынг тыхджын сты, фӕлӕ сыл дӕ бон у хӕцын. Ахӕм исты хъуыды куы фӕзына дӕ сӕры, уӕд ыл рахъуыды-бахъуыды кӕнын нӕ хъӕуы, фӕлӕ йӕ хъӕуы сурын. Стыр ӕххуыс ма вӕййы, дӕ сывӕллоныл куы хъуыды кӕнай, уый дӕр». Хуыцауы Ныхас нын фӕдзӕхсы, зӕгъгӕ, амарут уӕ зӕххон буары фӕндтӕ, ӕмӕ уыцы фӕндтӕм хауы «монцӕй судзын» дӕр (Колоссӕгтӕм 3:5). Зӕгъӕм, фӕнды дӕ хӕрдӕй дӕхиуыл фӕхӕцын, уӕд цымӕ, адджын хӕринӕгты къамтӕ кӕм ис, ахӕм журналтӕ кӕсдзынӕ кӕнӕ, ӕдзух хӕрды кой чи кӕны, ахӕм адӕмимӕ баддзынӕ? Ӕвӕццӕгӕн, нӕ. Уӕдӕ афтӕ у хабар буары монцтимӕ дӕр.
20. а) Ӕнӕуырнӕгимӕ чи ӕмбӕлы, уыдонӕн тӕссаг цӕмӕй у? ӕ) Фыццаг ӕнусы дӕр ӕмӕ нӕ рӕстӕджы дӕр, цардӕмбал кӕмӕн нӕй, уыдонӕн цы ӕххуыс кодта, цӕмӕй ма ӕнкъард кодтаиккой?
20 Иуӕй-иу чырыстӕттӕ ӕнӕуырнӕг адӕймагимӕ ӕмбӕлын райдайынц (1 Коринфӕгтӕм 7:39). Цымӕ сын уый баххуыс кӕндзӕн? Нӕ. Йӕ лӕгӕй хицӕн чи у, иу ахӕм чырыстон хо зӕгъы: «Фӕлтау иунӕг у, цӕйнӕфӕлтау ахӕм адӕймагӕй смой кӕнай, ӕмӕ фӕсмойнаг фӕуай!» Фыццаг ӕнусы чырыстон ӕмбырды цы идӕдз сылгоймӕгтӕ уыд, уыдонӕн дӕр иунӕгӕй зын куыннӕ уыдаид, фӕлӕ сӕ ӕмбаргӕ чи уыди, уыдон «уыдысты уазӕгуарзон, сыгъдӕджытӕн сӕ къӕхтӕ ӕхсадтой, тыхст уавӕры чи уыд, уыдонӕн ӕххуыс кодтой» (1 Тимофеймӕ 5:10). Нӕ рӕстӕджы дӕр, бирӕ азты дӕргъы йӕхицӕн цардӕмбал Хуыцауы ӕмбырды чи агуры, уыцы иузӕрдион чырыстӕттӕ ӕдзух сты хорз хъуыддӕгтыл хӕст. 68 азы кӕуыл цӕуы, ахӕм идӕдз хо, иунӕгӕй куы стыхсы, уӕд иннӕ идӕдзты бабӕрӕг кӕны. Ӕмӕ мӕнӕ цы зӕгъы: «Иннӕты кӕй бабӕрӕг кӕнын, хӕдзары куыстытӕ кӕй фӕкӕнын ӕмӕ ӕдзух мӕ уырнындзинад кӕй фидар кӕнын, уый фӕрцы мын, иунӕг кӕй дӕн, ууыл хъуыды кӕнынӕн рӕстӕг дӕр нал вӕййы». Арфӕйаг хъуыддаг ма у иннӕтӕн Хуыцауы Паддзахады тыххӕй дзурын ӕмӕ сӕ ахуыр кӕнын дӕр (Матфейы 28:19, 20).
21. Иунӕгӕй зын кӕмӕн у, уымӕн Хуыцаумӕ кувын ӕмӕ хорз хӕлӕрттимӕ ныхас кӕнын куыд баххуыс кӕндзӕн?
21 Раст у, адӕймаг иунӕджы уавӕрӕй диссаджы хуызы нӕ фервӕздзӕн. Фӕлӕ Йегъовӕйы хъаруйы фӕрцы ис фӕразӕн. Уыцы хъару чырыстон ссары, Хуыцаумӕ «ӕхсӕвӕй-бонӕй [куы] фӕкувы ӕмӕ йын [куы] фӕлӕгъстӕ кӕны», уӕд (1 Тимофеймӕ 5:5). Лӕгъстӕ кӕнын у зӕрдиагӕй ӕххуыс курын, иуӕй-иу хатт – дзыназгӕйӕ ӕмӕ цӕссыгкалгӕйӕ дӕр. (Абар Дзуттӕгтӕм 5:7.) «Ӕхсӕвӕй-бонӕй» дӕ зӕрдӕйы сагъӕстӕ Йегъовӕйӕн куы ӕргом кӕнай, уӕд дын ӕцӕгдӕр ӕнцондӕр уыдзӕн. Стыр ӕххуыс ма дын фӕуыдзӕн, дӕ хорз хӕлӕртты ’хсӕн фылдӕр рӕстӕг куы уай, уый дӕр. Семӕ ныхасгӕнгӕйӕ чи зоны, ӕмӕ фехъусай, Ӕмбисӕндты 12:25 кӕй кой ис, ахӕм «хорз ныхас», ныфсы ныхас.
22. Адӕймаг йӕ иунӕджы уавӕрӕй куы стыхса, уӕд ын хорз цӕуыл уыдзӕн ахъуыды кӕнын?
22 Чи зоны, хатт дӕ иунӕджы уавӕрӕй стыхсыс, фӕлӕ дӕ рох ма уӕд – ӕнӕмӕт цард никӕмӕн ис. Алыхуызон «хъизӕмӕрттӕ... ӕвзарынц [де] ’фсымӕртӕ ӕгас дунейы дӕр» (1 Петры 5:9). Раздӕр цы уыд, ууыл мауал хъуыды кӕн (Екклесиаст 7:10). Абон цы хорздзинӕдтӕй дӕ хайджын, уыдонӕн аргъ кӕн. Сӕйраджыдӕр та дӕ хъарутӕ уымӕ ратт, цӕмӕй дарддӕр дӕр Йегъовӕйыл иузӕрдион уай ӕмӕ йын йӕ зӕрдӕ рухс кӕнай (Ӕмбисӕндтӕ 27:11).
ИННӔТЫ ӔХХУЫС
23. Йӕ сывӕллӕтты иунӕгӕй чи хъомыл кӕны, ахӕм ныййарджыты раз ӕмбырды иннӕ чырыстӕттыл цавӕр хӕс ис?
23 Чырыстӕтты сӕ кӕрӕдзийы ӕххуыс тынг хъӕуы. «Нӕ Хуыцау ӕмӕ нӕ Фыды цӕсты сыгъдӕг, ӕнӕфау дин у ахӕм: сидзӕртӕ ӕмӕ идӕдзтӕн сӕ тыхсты сӕ фарсмӕ балӕуу»,– фыст ис Иаковы 1:27. О, чырыстӕттӕ хъуамӕ ӕххуыс кӕной, иу ныййарӕг йеддӕмӕ кӕм нӕй, ахӕм бинонтӕн. Цӕмӕй сын у сӕ бон баххуыс кӕнын?
24. Иу ныййарӕг йеддӕмӕ кӕм нӕй, ахӕм бинонтӕн цӕмӕй ис баххуыс кӕнӕн?
24 Баххуыс кӕнӕн сын ис ӕхцайӕ, йе та ӕндӕр истӕмӕй. Библи афтӕ зӕгъы: «Ацы дунейы дзӕбӕх чи цӕры, уый йе ’фсымӕры мӕгуырдзинад куы уына ӕмӕ йын куы нӕ фӕтӕригъӕд кӕна, уӕд уымӕй куыд ис зӕгъӕн, ӕмӕ Хуыцауы уарзы?» (1 Иоанны 3:17). Ацы ран «уынын»-ӕй цы грекъаг дзырд у тӕлмац, уый ӕрмӕст иу бакаст нӕ нысан кӕны, фӕлӕ лӕмбынӕг ныккӕсын. Уый та ууыл дзурӕг у, ӕмӕ уал ӕрхъуыдыджын чырыстон фыццаг базондзӕн, бинонтӕ цы цух ӕййафынц, уый. Чи зоны сӕм ӕхцайӕ фӕкӕсын хъӕуы. Йе та сӕм, чи зоны, хӕдзары исты аразинаг ис. Кӕнӕ сӕ уӕхимӕ сихормӕ йе та исты бадтмӕ куы фӕхонат, уӕд сын уый дӕр тынг ӕхсызгон уыдзӕн.
25. Йӕ сывӕллӕтты иунӕгӕй чи хъомыл кӕны, уыцы ныййарджытӕн иннӕ чырыстӕттӕ сӕ зын кӕй ӕмбарынц, уый цӕмӕй бӕрӕг уыдзӕн?
25 Стӕй ма 1 Петры 3:8 фыст ис: «Иууылдӕр иу зондыл хӕст ут, иннӕты рыст уӕм хъарӕд, ӕфсымӕрты уарзут, кӕрӕдзийы зын ӕмбарут». Ӕхсӕз сывӕллоны иунӕгӕй чи хъомыл кӕны, иу ахӕм сылгоймаг зӕгъы: «Зындзинӕдтӕ мын бирӕ ис, ӕмӕ хатт мӕ ныфс асӕтты. Фӕлӕ мын ӕфсымӕртӕ ӕмӕ хотӕй куы чи фӕзӕгъы, куы та – чи, зӕгъгӕ, Джоан, ӕцӕгдӕр раппӕлинаг дӕ, зон ӕй, дӕ фыдӕбон дзӕгъӕлы нӕу. Иннӕтӕ мыл кӕй хъуыды кӕнынц ӕмӕ мыл кӕй тыхсынц, ӕрмӕст уый зонын дӕр цӕй стыр ӕххуыс у!» Йӕ сывӕллӕтты иунӕгӕй чи хъомыл кӕны, уыцы ӕрыгон хотӕ сӕ зындзинӕдты тыххӕй нӕлгоймагимӕ аныхас кӕнын хатт ӕфсӕрмы фӕкӕнынц, ӕмӕ сын хистӕр кары хотӕ стыр ӕххуыс бакӕндзысты, сӕ фарсмӕ куы балӕууой ӕмӕ сӕм куы байхъусой, уӕд.
26. Фӕлтӕрд ӕфсымӕртӕн сӕ бон куыд у сидзӕртӕн ӕххуыс кӕнын?
26 Ӕмбырды ӕфсымӕртӕн дӕр сӕ бон у ахӕм бинонтӕн баххуыс кӕнын. Рӕстаг лӕг Иов йӕхицӕй афтӕ загъта: «Ӕз ӕххуыс кодтон... сидзӕрӕн ӕмӕ, фӕхӕцӕг кӕуыл нӕ уыди, уыдонӕн» (Иов 29:12). Абон чырыстон ӕмбырды цы нӕлгоймӕгтӕ ис, уыдонӕн дӕр сӕ бон у, ӕмӕ сидзӕртыл тыхсой, сӕхицӕн сӕ мацы агурой, фӕлӕ сӕ рӕвдауой, «сыгъдӕг зӕрдӕйӕ... чи цӕуы, ахӕм уарзондзинадӕй» (1 Тимофеймӕ 1:5). Сӕ бон у, ӕмӕ семӕ хъусын кӕнынмӕ цӕуой (ӕрмӕст сын сӕхи бинонтӕ рохуаты куыд нӕ баззайой, афтӕ), стӕй ма хорз уаид, сӕ бинонты ахуырмӕ дӕр-иу сӕ куы ӕрбахониккой, йе та-иу сӕ рӕстӕг иумӕ куы арвитиккой. Афтӕ хӕларзӕрдӕ сӕм куы уой, уӕд уыцы сывӕллӕттӕ ӕвзӕр фӕндагмӕ нӕ адзӕгъӕл уыдзысты.
27. Йӕ сывӕллӕтты иунӕгӕй чи хъомыл кӕны, уыцы ныййарджытӕн кӕуыл у сӕ бон сӕ ныфс дарын?
27 Кӕй зӕгъын ӕй хъӕуы, йӕ сывӕллӕтты иунӕгӕй чи хъомыл кӕны, уыцы чырыстӕттӕй «алчидӕр йӕхи уаргъ ахӕсдзӕн» (Галатӕгтӕм 6:5, фип.). Фӕлӕ сын уӕддӕр стыр ныфс у, сӕ чырыстон ӕфсымӕртӕ ӕмӕ хотӕ сӕ кӕй уарзынц, ӕмӕ сӕ Йегъовӕ Хуыцау дӕр кӕй уарзы, уый. Йегъовӕ «ӕххуыс кӕны сидзӕр ӕмӕ сидзӕргӕсӕн», зӕгъы Библи (Псалом 145:9). Уӕдӕ Йегъовӕйы ӕххуысӕй, иу ныййарӕг йеддӕмӕ кӕм нӕй, ахӕм бинонтӕ дӕр уыдзысты амондджын!
a Ӕрыгон чырыстон хойыл рӕдыд куы ’рцӕуа ӕмӕ афтӕмӕй куы басывӕрджын уа, уӕд ӕй, кӕй зӕгъын ӕй хъӕуы, ӕмбырд нӕ рӕстытӕ кӕндзӕн. Фӕлӕ кӕд фӕсмон кӕны, уӕд ын, чи зоны, ӕмбырды хистӕр нӕлгоймӕгты ӕмӕ иннӕты дӕр бафӕнда истӕмӕй баххуыс кӕнын.
b Сывӕллоны ӕгъатыр ныййарӕгӕй бахъахъхъӕнын куы фӕхъӕуы, уӕд уый ӕндӕр хъуыддаг у. Стӕй ма дӕ кӕд дӕ раздӕры цардӕмбал сывӕллӕтты цӕсты ’фтауы (чи зоны, цӕмӕй дӕу ныууадзой ӕмӕ уымӕ рацӕуой), уӕд хорз уаид, уырнындзинады ӕмӕ царды фӕлтӕрд чи у, ахӕм хӕлӕрттимӕ аныхас кӕнын, зӕгъӕм, чырыстон ӕмбырды хистӕр нӕлгоймӕгтимӕ, ӕмӕ сӕ бафӕрсын, дӕ уавӕры куыд хуыздӕр уаид бакӕнын, уымӕй.