«Сидзӕрты» рӕвдаут
1 Иегъовӕ у «сидзӕрты Фыд» (Пс. 67:6). Сӕ хорз ӕй кӕй фӕнды, уый бӕрӕг у, рагон израилӕгтӕн цы бафӕдзӕхста, уымӕй. Уый фӕдзӕхста: «Ма фӕхъыг кӕн идӕдз ус ӕмӕ фыдӕй сидзӕр лӕппуйы. Куы йӕ фӕхъыг кӕнай, ӕмӕ мӕм куы сдзыназа, уӕд ӕй фехъусдзынӕн» (Рац. 22:22, 23). Хуыцауы Закъоны ма уыд ӕндӕр амындтӕ дӕр, ӕмӕ уыдоны руаджы идӕдзтӕ ӕмӕ сидзӕртӕ хӕринагӕй цух хъуамӕ ма уыдаиккой (Дык. з. 24:19—21). Чырыстӕттӕ дӕр хъуамӕ «сидзӕртӕм ӕмӕ идӕдзтӕм [сӕ] цӕст дарой сӕ хъыгдзинӕдты» (Иак. 1:27). Иегъовӕ ауды, йӕ фыд кӕнӕ йӕ мад иунӕгӕй кӕй хъомыл кӕны ӕмӕ йӕ ныййарджытӕй ӕрмӕстдӕр иу Ӕвдисӕн кӕмӕн у, уыцы сывӕллӕттыл. Ацы хъуыддаджы махӕн та нӕ бон куыд у Иегъовӕйы фӕзмынын?
2 Уырнындзинад фидар кӕнын. Кӕд сывӕллӕтты иунӕгӕй хъомыл кӕныс кӕнӕ дӕ цардӕмбал уырнӕг нӕу, уӕд дын, чи зоны, ӕнцон нӕу дӕ сывӕллӕттимӕ Библи хӕдзары ахуыр кӕнын. Фӕлӕ цӕмӕй дӕ сывӕллон уӕздан ӕмӕ зондджын суа, уый тыххӕй дӕ йемӕ ӕнӕмӕнгдӕр хъӕуы иудадзыг Библи ахуыр кӕнын, ахуыр кӕнын та хъӕуы, бинонтӕн ахсджиагдӕр цы у, ахӕм ӕрмӕг (Ӕмб. 22:6). Ахсджиаг ма у сывӕллӕттимӕ алы бон дӕр Хуыцауы хъуыддӕгтыл дзурын (Дык. з. 6:6—9). Хатт дӕ, чи зоны, фӕндгӕ дӕр ницыуал кӕна, фӕлӕ фидар фӕлӕуу. Дӕ сывӕллӕтты куы «ахуыр кӕнай... Хицауы ахуырады ӕмӕ зондамынды», уӕд-иу Иегъовӕмӕ кув, цӕмӕй дын хъарутӕ радта ӕмӕ дын бацамона, цы кӕнын дӕ хъӕуы, уый (Еф. 6:4).
3 Хуыцауы раз дыл цы хӕстӕ ис, уыдон ӕххӕст кӕнынӕн дӕ кӕд ӕххуыс хъӕуы, уӕд уый тыххӕй зӕгъ хистӕр нӕлгоймӕгтӕн. Уыдон дын хорз уынаффӕтӕ ратдзысты кӕнӕ та дын баххуыс кӕндзысты Библи ахуыр кӕнынӕн пълан скӕнын.
4 Иннӕтӕн та сӕ бон куыд у баххуыс кӕнын. Тимофейӕн (цард фыццаг ӕнусы) кӕд йӕ бинонтӕ иууылдӕр уырнджытӕ нӕ уыдысты, уӕддӕр сси Хуыцауӕн кувӕг адӕймаг. Ахӕм адӕймаг та уымӕн сси, ӕмӕ йӕ мад ӕмӕ йӕ мадымад гыццылӕй фӕстӕмӕ йемӕ Сыгъдӕг Фыстытӕ ахуыр кодтой (Ап. к. 16:1, 2; 2 Тим. 1:5; 3:15). Тимофейыл ма хорзырдӕм фӕзынд, чырыстӕттыл йӕхи кӕй баста, уый дӕр. Уӕдӕ Павелы хӕлар кӕй уыди, уый дӕр ыл тынг фӕзынд. Ӕмӕ Павел уый тыххӕй фыста, зӕгъгӕ, уый у «мӕ уарзон ӕмӕ Хицауы иузӕрдыг фырт» (1 Кор. 4:17).
5 Куыд хорз у, абон дӕр фӕлтӕрд ӕфсымӕртӕ ӕмӕ хотӕ ӕмбырды «сидзӕрты» кӕй рӕвдауынц! Уыцы сывӕллӕттӕй алкӕй ном дӕр зоныс? Ӕмбырды кӕнӕ ӕндӕр искуы куы вӕййыс, уӕд семӕ фӕныхас кӕныс? Демӕ-иу сӕ уацамындмӕ акӕн. Уӕ бинонтӕ Библи куы фӕахуыр кӕнынц, уӕд-иу сӕ фӕхон. Фӕдзур-иу ын йӕ ныййарӕгмӕ дӕр кӕнӕ йӕ ныййарджытӕй уырнӕг чи у, уымӕ дӕр. Кӕнӕ-иу уӕхи ирхӕфсынмӕ искуыдӕм куы цӕуат, уӕд-иу сӕ уемӕ акӕнут. Ахӕм сывӕллӕттимӕ куы балынмӕн уат, уӕд уӕ тынгдӕр фӕзмдзысты ӕмӕ уын уӕ ныхасмӕ тынгдӕр хъусдзысты (Фил. 2:4).
6 Иегъовӕйы «сидзӕрты» хорз тынг фӕнды ӕмӕ сын уымӕ гӕсгӕ куы ӕххуыс кӕнӕм ӕцӕгад бауарзынӕн, уӕд нӕ уый тыххӕй схорзӕхджын кӕндзӕн. Ӕнӕ фыдӕй кӕнӕ ӕнӕ мадӕй чи схъомыл ис, афтӕ ма йӕ ныййарджытӕй иу уырнон кӕмӕн уыд, уыцы сывӕллӕттӕй бирӕтӕн баххуыс кодтой, ӕмӕ ныр иузӕрдионӕй лӕггад кӕнынц пионертӕй, кӕстӕриуӕггӕнӕг ӕфсымӕртӕй, хистӕр нӕлгоймӕгтӕй, цӕугӕ цӕстдарджытӕй, миссионертӕй, иуӕй-иутӕ та дзы кусынц Вефилы. Уӕдӕ «сидзӕртыл» мах дӕр нӕ уӕларвон Фыдау зӕрдӕбынӕй аудӕм (2 Кор. 6:11—13).