Паддзахады уацхъуыд № 36

Ног миназ. Цы нӕм ӕнхъӕлмӕ кӕсы фидӕны?

Ног миназ. Ног дуджы райдиан у?

МИН фарастсӕдӕ нӕуӕдз фарӕстӕм азы 31 декабры ӕмбисӕхсӕв фӕцис XX ӕнусa. Уыцы ӕнусы адӕм федтой бирӕ бӕллӕхтӕ. Фӕлӕ ма уымӕй уӕлдай федтой, ног техникӕ ӕмӕ тынг бирӕ алыхуызон информаци куыд фӕзынд, уый; медицинӕйы диссаджы ӕнтыстытӕ ӕмӕ ӕгас дунейы экономикӕйы рӕзт. Растдӕр уыдӕтты тыххӕй бирӕтӕн ног миназ сси ныфс ӕмӕ ивындзинӕдты нысан. Цымӕ ацы миназы адӕм фендзысты, хӕстытӕн, мӕгуырдзинадӕн, уӕлдӕф ӕмӕ ӕрдз чъизи кӕнынӕн ӕмӕ низтӕн кӕрон куыд ӕрцӕудзӕн, уый?

Бирӕтӕ ууыл сӕ ныфс дарынц. Фӕлӕ цымӕ ӕцӕгӕйдӕр ног миназы хъуыддӕгтӕ афтӕ фӕивдзысты, цӕмӕй ды ӕмӕ дӕ бинонтӕ ӕдасӕй цӕрат? Ӕркӕсӕм, абон цы уӕззау уавӕртӕ ис, уыдонӕй ӕрмӕст иуӕй-иутӕм.

Уӕлдӕф ӕмӕ ӕрдз чъизи кӕнынц

Промышленность цы бӕстӕты у размӕцыд, уыдон «ӕгас дунейы ӕрдз ӕмӕ уӕлдӕфӕн хӕссынц стыр зиан, алы ран чъизи кӕнынц уӕлдӕф ӕмӕ ӕрдз». Дарддӕр дӕр афтӕ куы ахӕсса, уӕд «ӕрдз ноджы тынгдӕр фесӕфдзӕн» («Global Environment Outlook—2000», ИНО-йы Программӕ ӕрдз ӕмӕ уӕлдӕфы тыххӕй).

Низтӕ

«Бӕрӕггӕнӕнтӕм гӕсгӕ 2020 азмӕ мӕгуыр бӕстӕты алы 10 адӕймагӕй 7 мӕлдзӕн ӕнӕхӕцгӕ низтӕй, кӕд ӕмӕ абон 5 адӕймагӕй къаддӕр сты, уӕд» («The Global Burden of Disease», Гарварды университеты рауагъдад, 1996).

Иуӕй-иу иртасджытӕ дзурынц, зӕгъгӕ, «2010 азмӕ [СПИД] — ацы ӕгъатыр рын — цы 23 бӕстӕйы ис, уым цӕрджыты нымӕц 66 милуан адӕймаджы бӕрц фӕкъаддӕр уыдзӕн» («Confronting AIDS: Evidence From the Developing World», ЕЦ-йы Къамисы ӕмӕ Ӕппӕтдунеон банчы доклад).

Мӕгуырдзинад

«Иу-1,3 миллиард адӕймагӕн цӕрынӕн бон 1 доллӕр дӕр нӕй, 1 миллиарды бӕрц адӕймагӕн та сӕ бон нӕу, ӕнӕмӕнг сӕ цы хъӕуы, уый балхӕнын дӕр» («Human Development Report 1999», ИНО-йы рӕзты программӕ).

Хӕстытӕ

«Тыхми [алы бӕстӕты], гӕнӕн ис, сарӕх уа, нырмӕ куыд никуы уыд, афтӕ. Нациты, знӕмты ӕмӕ динты ’хсӕн [хицӕндзинӕдтӕ кӕй ис], уый тыххӕй цы тыхми ӕвзӕры... уый иннӕ ӕнусы цыппӕрӕм хайы алыхуызон быцӕуты ’хсӕн ӕмбӕлдзӕн ӕппӕты арӕхдӕр... ӕмӕ уый аххосӕй алы аз дӕр адӕмӕй мӕлдзӕн сӕдӕгай минтӕ» («New World Coming: American Security in the 21st Century», АИШ-ы Национ ӕдасдзинады къамис/XXI ӕнус).

Адӕм ног миназы кой афтӕ бирӕ кӕй кӕнынц ӕмӕ йыл ахӕм бирӕ ныфсытӕ кӕй ӕвӕрынц, уымӕ гӕсгӕ не ’мбарынц, уӕлдӕф ӕмӕ ӕрдз кӕй счъизи сты, низтӕ, мӕгуырдзинад ӕмӕ хӕстытӕ абоны хуызӕн арӕх кӕй никуы уыдысты, уый. Ацы уавӕрты аххосаг сты кӕрӕфдзинад, ӕнӕууӕнкдзинад ӕмӕ хиуарзондзинад, иудзырдӕй, ахуыргӕндты иртӕстыты, техникӕ ӕмӕ политикӕйы ӕххуысӕй цы миниуджытӕ нӕй аиуварсгӕнӕн, уыдон.

Ӕппӕт адӕмӕн арфӕдзинӕдтӕ цы миназ ӕрхӕсдзӕн, уый

Рагзаманы иу фыссӕг скодта ахӕм хатдзӕг: «Адӕймаджы фӕндонмӕ гӕсгӕ... нӕу йӕ фӕндаг. Цӕуӕджы бар нӕу йӕ къахдзӕфтӕн разамынд дӕттын» (Иереми 10:23). Адӕймагӕн зӕххыл хицауиуӕг кӕнын йӕ бон кӕй нӕу, уый иу хъуыддаг у, фӕлӕ ма йын уый кӕнынӕн бар дӕр нӕй. Ӕрмӕстдӕр не Сфӕлдисӕг Иегъовӕ Хуыцауӕн ис уыцы бар ӕмӕ йӕ ӕрмӕстдӕр уый зоны, адӕмы зындзинӕдтӕ куыд ис аиуварс кӕнӕн, уый (Ромӕгтӕм 11:33—36; Раргомад 4:11).

Фӕлӕ кӕд ӕмӕ куыд? «Фӕстаг бонтӕ» сӕ кӕронмӕ кӕй ӕрхӕццӕ сты, уый бӕрӕг у. Дӕ хорзӕхӕй, байгом ма кӕн Библи ӕмӕ бакӕс 2 Тимофеймӕ 3:1—5-ӕм стихтӕ. Уым хорз ӕвдыст цӕуы, ацы «уӕззау рӕстӕджыты» адӕм цыхуызӕн уыдзысты, уый. Матфейы 24:3—14-ӕм стихты ӕмӕ Лукайы 21:10, 11-ӕм стихты дӕр дзырд цӕуы «фӕстаг бонтыл». Ацы стихты хъусдард здӕхт цӕуы, 1914 азӕй цы цаутӕ цӕуы, уыдонмӕ: ӕппӕтдунеон хӕстытӕ, рын низтӕ ӕмӕ ӕххормагдзинад.

Тагъд «фӕстаг бонтӕ» фӕуыдзысты. Данелы 2:44-ӕм стихы дзырдӕуы: «Уӕларвон Хуыцау сараздзӕн, ӕнусмӕ чи нӕ фехӕла, ахӕм паддзахад... уый ныппырх кӕндзӕн ӕмӕ бынысӕфт фӕкӕндзӕн [зӕххон] паддзахӕдтӕ иууылдӕр, йӕхӕдӕг та ныллӕудзӕн ӕнусмӕ». Афтӕмӕй рагзагъд уыд, Хуыцау кӕй сфидар кӕндзӕн Паддзахад, ома хицауад, цӕмӕй уый хицауиуӕг кӕна зӕххыл. Раргомады 20:4-ӕм стихмӕ гӕсгӕ, уыцы хицауад хицауиуӕг кӕндзӕн миназы дӕргъы! Ӕркӕсӕм, уыцы диссаджы Миназон Паддзахиуӕгады рӕстӕджы ӕппӕт адӕмы цард цӕй фӕрцы фӕхуыздӕр уыдзӕн, уымӕ:

Экономикӕ. «Уыдон араздзысты хӕдзӕрттӕ ӕмӕ сӕ цӕрдзысты; садздзысты сӕнӕфсирдӕттӕ ӕмӕ сын сӕ дыргъ хӕрдзысты. Уыдон нӕ араздзысты, цӕмӕй сӕ ӕндӕр исчи цӕра, ӕмӕ нӕ садздзысты, цӕмӕй сӕ ӕндӕр исчи хӕра» (Исай 65:21, 22).

Ӕнӕниздзинад. «Уыцы рӕстӕджы куырмытӕ цӕстӕй уынын райдайдзысты, ӕмӕ къуырматӕ хъусӕй хъусдзысты. Уыцы рӕстӕджы къуылых фӕгӕпп кӕндзӕн саджы хуызӕн, ӕмӕ ӕгомыг фырцинӕй схъӕр кӕндзӕн». «Ӕмӕ цӕрджытӕй иу дӕр нал зӕгъдзӕн: „Ӕз рынчын дӕн“» (Исай 33:24; 35:5, 6).

Уавӕр нӕ алыварс. Хуыцау «фесафдзӕн зӕхх сафджыты» (Раргомад 11:18).

Адӕмы ’хсӕн ахастытӕ. «Мӕ сыгъдӕг хохыл фыддзинад ӕмӕ зиан нӕ кӕндзысты, уымӕн ӕмӕ дӕттӕ денджыз куыд дзаг кӕнынц, афтӕ зӕхх байдзаг уыдзӕн Иегъовӕйы тыххӕй базонынадӕй» (Исай 11:9).

Милуангай адӕймӕгтӕ ӕууӕндынц Библийы ацы зӕрдӕвӕрдтыл ӕмӕ сын уымӕ гӕсгӕ ис, фидӕны хорз цард кӕй уыдзӕн, уый ныфс. Уый тыххӕй уыдонӕн ӕнцондӕр у царды уӕззау уавӕртӕ ӕмӕ зындзинӕдтӕ фӕразын. Цы ис бакӕнӕн, цӕмӕй дын Библи дӕ цардӕн разамынд дӕтта?

Цардмӕ кӕнӕг базонынад!

Иуӕй-иу хатт нӕ зонад ӕмӕ технологийы ӕнтыстытӕ дисы бафтауынц. Фӕлӕ уӕддӕр адӕмӕй сӕ фылдӕрӕн зонындзинӕдты руаджы сӕ цард ӕдасдӕр ӕмӕ амондджындӕр нӕ фӕци. Ӕрмӕстдӕр иу базонынады фӕрцы ис уымӕн гӕнӕн, ӕмӕ уый тыххӕй дзырд цӕуы Библийы Иоанны 17:3-ӕм стихы: «Уый та у мыггагмӕйы цард, цӕмӕй зоной Дӕу, иунӕг ӕцӕг Хуыцауы, ӕмӕ Дӕуӕй ӕрвыст Йесо Чырыстийы».

Ахӕм зонындзинӕдтӕ ис ссарӕн Библийы. Кӕд бирӕтӕн уыцы сыгъдӕг чиныгмӕ ис бӕлвырд цӕстӕнгас, уӕддӕр ӕй сӕрмагондӕй ӕрмӕстдӕр стӕмтӕ раиртӕстой. Цы зӕгъӕн ис дӕуӕй та? Кӕй зӕгъын ӕй хъӕуы, Библи кӕсын ӕнцон нӕу. Фӕлӕ дӕ фыдӕбон дзӕгъӕлы нӕ уыдзӕн. Ӕппӕт чингуытӕй ӕрмӕстдӕр Библи у «Хуыцауы Удӕй ӕмӕ пайда у сахуыр кӕнынӕн, уайдзӕф кӕнынӕн, сраст уӕвынӕн, амонынӕн рӕстдзинады» (2 Тимофеймӕ 3:16).

Уӕдӕ цы ис бакӕнӕн, цӕмӕй Библиимӕ базонгӕ уай? Фӕнды дӕ, цӕмӕй дын Иегъовӕйы Ӕвдисӕнтӕ баххуыс кӕной? Уыдон милуангай адӕммӕ цӕуынц сӕ хӕдзӕрттӕм ӕмӕ семӕ Библи лӕвар ахуыр кӕнынц. Уый тыххӕй пайда кӕнынц Библийыл бындуриуӕггӕнӕг публикацитӕй, зӕгъӕм, брошюрӕйӕ «Хуыцау махӕй цы домы?». Библийӕ дӕм исты фарстытӕ куы уа, уӕд сын уым ссардзынӕ цыбыр ӕмӕ бӕлвырд дзуаппытӕ. Зӕгъӕм, ис дзы дзуаппытӕ ахӕм фарстытӕн: Чи у Хуыцау? Цы сфӕнд кодта Хуыцау зӕххӕн? Цы у Хуыцауы Паддзахад? Библи дын куыд баххуыс кӕндзӕн дӕ бинонты цард фӕхуыздӕр кӕнынӕн?

Кӕд дӕ фӕнды, цӕмӕй дӕм Иегъовӕйы Ӕвдисӕнтӕй исчи бацӕуа, уӕд байдзаг кӕн, дӕлдӕр цы купон ис, уый. Уыдон дын тынг ӕхсызгонӕй баххуыс кӕндзысты Хуыцауы Паддзахады диссаджы Миназон хицауиуӕгады тыххӕй фылдӕр базонынӕн!

□ Мӕн фӕнды райсын брошюрӕ «Хуыцау махӕй цы домы?». Ныффысс, цавӕр ӕвзагыл дӕ хъӕуы, уый

□ Мӕн фӕнды хӕдзары Библи лӕвар ахуыр кӕнын.

[Фиппаинаг]