Ӕппӕлын хорз у?

ЗОНЫС ӕй, адӕймаг йӕхицӕй куы феппӕлы, уӕд уый куыд вӕййы? ~ Хорз дын чи нӕ уайы, ахӕм хъуыддаг искуы арӕзтай? Зӕгъӕм, фӕлвӕрдтай футболӕй хъазын кӕнӕ велосипедыл цӕуын. Мыййаг дыл исчи худти ӕмӕ дын загъта: «Ницы зоныс! Мӕнӕн хуыздӕр уайы»? ~ Адӕймаг афтӕ куы фӕдзуры, уӕд йӕхицӕй феппӕлы.

Исчи йӕхицӕй куы феппӕлы, уӕд дын ӕхсызгон вӕййы? ~ Ӕмӕ ды дӕхицӕй куы ӕппӕлай, уӕд уый иннӕтӕн ӕхсызгон уыдзӕн? ~ Искӕмӕн афтӕ куы зӕгъай, ӕз дӕуӕй хуыздӕр дӕн, зӕгъгӕ, уӕд уый хорз уыдзӕн? ~ Йегъовӕ ахӕм адӕмы уарзы? ~

Ӕппӕты хуыздӕр Ахуыргӕнӕг дӕр зыдта, йӕхи иннӕтӕй хуыздӕр чи хуыдта, ахӕм адӕмы. Уыдон уарзтой сӕхицӕй ӕппӕлын ӕмӕ иннӕты сӕхицӕй ӕвзӕрдӕртыл нымадтой. Ӕмӕ сын Йесо радзырдта иу хабар, цӕмӕй йӕ бамбӕрстаиккой, раст кӕй нӕ кӕнынц.

Уый у фарисей ӕмӕ хъалонисӕджы хабар. Фарисейтӕ иннӕтӕн амыдтой дины закъӕттӕ. Уыдон сӕхи афтӕ дардтой, цыма Хуыцауӕн уыдонӕй тынгдӕр ничи кувы. Йесо цы фарисейы кой кодта, уый ӕрбацыд Иерусалимы кувӕндонмӕ, цӕмӕй Хуыцаумӕ скуывтаид.

Уыцы кувӕндонмӕ ма ӕрбацыд хъалонисӕг дӕр, налогтӕ чи ӕмбырд кӕны, ахӕм лӕг. Бирӕтӕ хъалонисджыты нӕ уарзтой. Афтӕ хъуыды кодтой, ӕмӕ сӕ сайгӕ кӕнынц. Ӕмӕ хъалонисджытӕй бирӕтӕ ӕцӕгдӕр афтӕ кодтой.

Кувӕндоны фарисей Хуыцаумӕ куывта: «О Хуыцау, бузныг дын, ӕз иннӕты хуызӕн тӕригъӕдджын кӕй нӕ дӕн. Адӕмы нӕ сайын ӕмӕ ӕвзӕрӕй ницы аразын. Ӕз мӕнӕ ацы хъалонисӕджы хуызӕн нӕ дӕн. Ӕз дӕн раст адӕймаг. Къуыри дыууӕ хатты ницы фӕхӕрын, цӕмӕй дӕу тыххӕй фылдӕр ахъуыды кӕнон. Цыдӕриддӕр мӕм ӕрбахауы, уымӕй дӕсӕм хай кувӕндонӕн раттын». Фарисей афтӕ хъуыды кодта, ӕмӕ иннӕтӕй хуыздӕр у. Ӕмӕ Хуыцауӕн дӕр уый дзырдта.

Фӕлӕ хъалонисӕг фарисейы хуызӕн нӕ уыди. Куы куывта, уӕд хӕрдмӕ скӕсын дӕр нӕ уӕндыд. Уый дард лӕууыд, йӕ сӕр ныггуыбыр кодта, афтӕмӕй. Тынг фӕсмон кодта йӕ рӕдыдтытыл ӕмӕ йӕ риу хоста. Иу хатт дӕр Хуыцауӕн нӕ загъта, ӕз хорз адӕймаг дӕн, зӕгъгӕ, фӕлӕ ӕрмӕст дзырдта: «О Хуыцау, ныххатыр мын кӕн, ӕз тӕригъӕдджын адӕймаг дӕн».

Куыд хъуыды кӕныс, ацы дыууӕ лӕгӕй Хуыцауы зӕрдӕмӕ тынгдӕр чи фӕцыд? Йӕхицӕй диссаджы ӕппӕлдтытӕ чи фӕкодта, уыцы фарисей ӕви, йӕ рӕдыдтытыл чи фӕсмон кодта, уыцы хъалонисӕг? ~

Йесо загъта, Хуыцауы зӕрдӕмӕ кӕй фӕцыд хъалонисӕг. Фӕлӕ цӕмӕн? Йесо йӕ бамбарын кодта: «Йӕхи иннӕтӕй хуыздӕр чи хоны, уый ӕрныллӕг уыдзӕн. Фӕлӕ йӕхи чи ныллӕг кӕны, уый та сбӕрзонд уыдзӕн» (Лукайы 18:9–14).

Йесо ацы хабар цӕмӕн радзырдта? ~ Уый бамбарын кодта, нӕхи иннӕтӕй хуыздӕр куы хонӕм, уӕд уый раст кӕй нӕ уыдзӕн. Чи зоны, ӕмӕ дзургӕ никуы фӕкӕнӕм, зӕгъгӕ, ӕз иннӕтӕй хуыздӕр дӕн. Фӕлӕ цымӕ нӕ хъуыддӕгтӕй нӕ равдисӕм, ӕмӕ нӕхи иннӕтӕй хуыздӕр хонӕм? Куыд хъуыды кӕныс? ~ Ӕркӕсӕм-ма апостол Петры хабармӕ.

Йесо йӕ апостолтӕн куы загъта, зӕгъгӕ мӕ куы ’рцахсой, уӕд мӕ иууылдӕр ныууадздзыстут, уӕд Петр йӕхицӕй ӕппӕлын райдыдта: «Иууылдӕр дӕ куы ныууадзой, уӕддӕр дӕ ӕз никуы ныууадздзынӕн!» Фӕлӕ Петр тынг рӕдыди. Афтӕ хъуыды кодта, ӕмӕ ницӕмӕй фӕтӕрсдзӕн. Ӕмӕ кӕд Йесойӕн афтӕ загъта, нӕ дӕ ныууадздзынӕн, зӕгъгӕ, уӕддӕр ӕй ныууагъта. Фӕлӕ фӕстӕдӕр ӕрфӕсмон кодта, ӕмӕ уый тыххӕй базондзыстӕм ацы чиныджы 30-ӕм сӕрӕй (Матфейы 26:31–33).

Ныр та нӕхиуыл ахъуыды кӕнӕм. Зӕгъӕм, скъолайы ахуыргӕнӕг къласмӕ цавӕрдӕр фарст радта. Ды йын зоныс дзуапп, иннӕтӕ та – нӕ. Дзуапп кӕй зоныс, уый дын ӕхсызгон куыннӕ у. Фӕлӕ хорз уыдзӕн, йӕ бон уайтагъд дзуапп раттын кӕмӕн нӕу, уыимӕ дӕхи куы барай? ~ Цыдӕр кӕй нӕ зоны, уый тыххӕй дӕхи уымӕй хуыздӕр куы хонай, уӕд уый раст уыдзӕн? ~

Афтӕ кодта, Йесо кӕй тыххӕй радзырдта, уыцы фарисей. Йӕхицӕй ӕппӕлыд, зӕгъгӕ, ӕз хъалонисӕгӕй хуыздӕр дӕн. Фӕлӕ ӕппӕты хуыздӕр Ахуыргӕнӕг загъта, фарисей тынг кӕй рӕдыди. О, чидӕр цыдӕр хъуыддаг хуыздӕр фӕаразы. Фӕлӕ уый ууыл дзурӕг нӕу, ӕмӕ иннӕтӕй хуыздӕр у.

Уӕдӕ иннӕтӕй фылдӕр куы зонӕм, уӕд хъуамӕ нӕхицӕй ӕппӕлӕм? ~ Ахъуыды-ма йыл кӕнӕм. Адӕймаг йӕ сӕры магъз йӕхӕдӕг скодта? ~ Нӕ, нӕ сӕры магъз нын скодта Хуыцау. Стӕй, цы зонӕм, уыдонӕй бирӕ цыдӕртӕ иннӕтӕй базыдтам. Зӕгъӕм, чиныджы цыдӕр бакастыстӕм кӕнӕ нын чидӕр цыдӕр радзырдта. Ӕмӕ кӕд цыдӕр нӕхӕдӕг бамбӕрстам, уӕддӕр цӕй фӕрцы? ~ О, Хуыцау нын цы магъз радта, уый фӕрцы.

Исчи исты зӕрдиагӕй куы араза, уӕд хорз уаид, куы дзы раппӕлис. Зӕгъ ын, цы радзырдта кӕнӕ цы сарӕзта, уый дӕ зӕрдӕмӕ тынг кӕй фӕцыд. Дӕ бон ын у баххуыс кӕнын дӕр. Дӕхи дӕр куыннӕ фӕнды, цӕмӕй-иу дӕ раппӕлой кӕнӕ дын баххуыс кӕной, афтӕ нӕу? ~

Иуӕй-иутӕ вӕййынц иннӕтӕй тыхджындӕр. Ӕмӕ, зӕгъӕм, де ’фсымӕрӕй кӕнӕ дӕ хойӕ тыхджындӕр куы уай, уӕд хъуамӕ дӕхицӕй ӕппӕлай? ~ Нӕ, уый раст нӕу. Мах тыхджындӕр ӕмӕ фидардӕр кӕнӕм, цы хӕринаг бахӕрӕм, уый фӕрцы. Хӕринаг та нын ис, Хуыцау нын хуры хъарм ӕмӕ къӕвда кӕй дӕтты, уый фӕрцы. Афтӕ нӕу? ~ Уӕдӕ, тыхджындӕр кӕй кӕнӕм, уый тыххӕй хъуамӕ бузныг дзурӕм Хуыцауӕн (Хъуыддӕгтӕ 14:16, 17).

Исчи йӕхицӕй куы феппӕлы, уӕд уый искӕмӕн ӕхсызгон вӕййы? ~ Уӕдӕ ма рох кӕнӕм Йесойы ныхӕстӕ: «Адӕммӕ цӕмӕ ӕнхъӕлмӕ кӕсут, уый сын аразут уӕхӕдӕг дӕр». Афтӕ куы кӕнӕм, уӕд, ӕппӕты хуыздӕр Ахуыргӕнӕг цы хиппӕлой фарисейы кой кодта, уый хуызӕн никуы суыдзыстӕм (Лукайы 6:31).

Иухатт Йесойы чидӕр схуыдта хорз Ахуыргӕнӕг. Цымӕ ӕппӕты хуыздӕр Ахуыргӕнӕг йӕхицӕй загъта: «О, ӕз хорз дӕн»? ~ Нӕ, уый афтӕ загъта: «Иунӕг Хуыцауы йеддӕмӕ хорз ничи у» (Марчы 10:18). Кӕд ӕххӕст адӕймаг уыди, уӕддӕр йӕхицӕй никуы ӕппӕлыд. Уый ӕппӕлыди йӕ Фыд Йегъовӕйӕ – адӕмӕн дзырдта, куыд хорз Хуыцау у, уый тыххӕй.

Уӕдӕ куыд хъуыды кӕныс, хъуамӕ искӕмӕй ӕппӕлӕм? ~ О, хъуамӕ ӕппӕлӕм не Сфӕлдисӕг Хуыцау Йегъовӕйӕ. Хуыцау бирӕ диссӕгтӕ сфӕлдыста. Зӕгъӕм, хур куы фӕныгуылы, уӕд куыд рӕсугъд вӕййы! Ӕмӕ ахӕм цыдӕртӕ фенгӕйӕ нӕ бон у искӕмӕн зӕгъын: «Уый нӕ диссаджы Хуыцау Йегъовӕ сфӕлдыста!» Уӕдӕ алы хатт дӕр иннӕтӕн дзурӕм, Йегъовӕ цы стыр диссӕгтӕ сарӕзта ӕмӕ ма фидӕны дӕр цы сараздзӕн, уый тыххӕй.