Дӕ фыдӕбонӕй дӕ зӕрдӕ райӕд

1–3. а) Бирӕтӕ сӕ куыстмӕ цы цӕстӕй кӕсынц? б) Библимӕ гӕсгӕ куыстмӕ цы цӕстӕй хъуамӕ кӕсӕм ӕмӕ ацы сӕры цавӕр фарстатыл аныхас кӕндзыстӕм?

АБОН бирӕтӕн сӕ куыстӕй сӕ зӕрдӕ нӕ райы. Бон-изӕрмӕ фыдӕбон кӕнынц, сӕ зӕрдӕмӕ чи нӕ цӕуы, ахӕм куысты. Ӕмӕ та сӕ иннӕ бон дӕр куыстмӕ кӕй хъӕуы, ууыл куы ахъуыды кӕнынц, уӕд се уӕнгтӕ ӕрызгъӕлынц. Йӕ куыстмӕ ахӕм цӕстӕй чи кӕсы, уыдонӕн цы баххуыс кӕндзӕн, цӕмӕй сӕ зӕрдӕмӕ цӕуын райдайа ӕмӕ ма дзы суанг сӕ зӕрдӕ дӕр райа?

² Библи нын дзуры, цӕмӕй куыстмӕ раст цӕстӕй кӕсӕм. Фыст дзы ис, зӕгъгӕ, адӕймаг фыдӕбон кӕй кӕны ӕмӕ йӕ фыдӕбонӕй цы фены, уый стыр лӕвар у. Соломон фыста: «Адӕймаг хъуамӕ хӕра ӕмӕ нуаза ӕмӕ йӕ уӕззау фыдӕбонӕй хорзӕй исты уына. Уый у Хуыцауы лӕвар» (Екклесиаст 3:13). Йегъовӕ нӕ тынг уарзы ӕмӕ нын йӕ зӕрдӕ хорз йеддӕмӕ ницы зӕгъы. Ӕмӕ йӕ фӕнды, цӕмӕй нӕ куыстӕй нӕ зӕрдӕ райа ӕмӕ-иу нӕ фыдӕбонӕй нӕ удӕн хорзӕй исты фенын кӕнӕм. Уӕдӕ цӕмӕй Йегъовӕйы уарзтӕй ӕнӕхай ма фӕуӕм, уый тыххӕй хъуамӕ куыстмӕ уый цӕстӕй кӕсӕм. (Бакӕс Екклесиаст 2:24; 5:18.)

³ Ацы сӕры аныхас кӕндзыстӕм цыппар фарстайыл: нӕ фыдӕбонӕй нӕ зӕрдӕ кӕд райдзӕн? Ӕцӕг чырыстӕттӕ цавӕр куыстыл нӕ разы кӕнынц? Цы цӕстӕй хъуамӕ кӕсӕм нӕ куыстмӕ ӕмӕ нӕ лӕггадимӕ баст хъуыддӕгтӕм? Ӕппӕты ахсджиагдӕр куыст цавӕр у? Фӕлӕ уал фыццаг ӕркӕсӕм, Дун-дунейы ӕппӕты хуыздӕр кусджытӕй – Йегъовӕ Хуыцау ӕмӕ Йесо Чырыстийӕ – цӕуыл ахуыр кӕнӕм, уымӕ.

ӔМБАЛ КӔМӔН НӔЙ, АХӔМ КУСӔГ ӔМӔ ДӔСНЫ КУСӔГ

4, 5. Библи куыд ӕвдисы, Йегъовӕ бирӕ кӕй фыдӕбон кӕны, уый?

⁴ Йегъовӕ у, ӕмбал кӕмӕн нӕй, ахӕм Кусӕг. Библийы фыст ис: «Райдианы Хуыцау сфӕлдыста арв ӕмӕ зӕхх» (Райдиан 1:1). Хуыцау зӕхх ӕмӕ йыл цыдӕриддӕр ис, уыдӕттӕ конд куы фӕци, уӕд сыл йӕ цӕст ахаста ӕмӕ федта, ӕппӕт дӕр «тынг хорз» кӕй уыд (Райдиан 1:31). Ӕндӕр ныхасӕй, йӕ куыстӕй йӕ зӕрдӕ тынг барухс. Йегъовӕ, «амондджын Хуыцау», куыннӕ цин кодтаид, уыйбӕрц цыдӕртӕ кӕй сфӕлдыста, ууыл (1 Тимофеймӕ 1:11).

⁵ Нӕ куыстуарзаг Хуыцау ӕнцад никуы фӕбады. Йегъовӕ зӕххы хабӕрттӕ конд куы фӕци, уымӕй бирӕ ӕнусты фӕстӕ Йесо загъта: «Мӕ Фыд ныры онг дӕр фыдӕбон кӕны» (Иоанны 5:17). Цымӕ цы аразы? Рагӕй фӕстӕмӕ дӕр уӕлӕрвтӕй адӕмӕн разамынд дӕтты ӕмӕ сӕм йӕ хъус дары, тыхсы сыл. Хуыцау чырыстӕттӕй кӕйдӕрты йӕ сыгъдӕг тыхӕй байсӕрста, цӕмӕй Йесоимӕ уӕлӕрвты паддзӕхтӕ уой (2 Коринфӕгтӕм 5:17). Йегъовӕ алцыдӕр аразы, цӕмӕй, адӕмы тыххӕй йӕм цы фӕнд ис, уый сӕххӕст уа – ома йӕ чи уарзы, уыдон ног дунейы ӕнустӕм цӕрой (Ромӕгтӕм 6:23). Ӕмӕ йын цы бантыст, уыдӕттӕй йӕ зӕрдӕ куыннӕ рухс кӕндзӕн. Милуанты йӕхимӕ ӕрбакодта: йӕ Паддзахады тыххӕй хорз хабар сӕ зӕрдӕмӕ айстой ӕмӕ сӕ цард аивтой, цӕмӕй йӕ уарзтӕй хайджын уой (Иоанны 6:44).

6, 7. Йесо рагӕй фӕстӕмӕ дӕр куыд фыдӕбон кодта?

⁶ Йесо дӕр рагӕй фӕстӕмӕ фыдӕбон кодта. Цалынмӕ зӕхмӕ не ’рцыд, уӕдмӕ уыди «дӕсны кусӕг» ӕмӕ Хуыцауӕн ӕххуыс кодта, «уӕлӕрвты цы ис» ӕмӕ «зӕххыл цы ис», уыдӕттӕ сфӕлдисынӕн (Ӕмбисӕндтӕ 8:22–31; Колоссӕгтӕм 1:15–17). Стӕй, зӕххыл куы уыд, уӕд дӕр тынг зӕрдиагӕй куыста. Гыццылӕй фӕстӕмӕ ахуыр кодта арӕзтадон куыстытӕ кӕнын, ӕмӕ йӕ хуыдтой «хъӕддӕсны» (Марчы 6:3). Ацы куыст ӕнцон нӕу, стӕй дзы бирӕ цыдӕртӕ хъӕуы зонын. Уӕлдайдӕр уӕды заман уыди зын, уымӕн ӕмӕ нӕ уыд хъӕдфадӕнтӕ, алыхуызон кусӕнгӕрзтӕ кӕм уӕй кӕнынц, ахӕм дуканитӕ ӕмӕ электроинструменттӕ. Дӕ цӕстытыл-ма ауайын кӕн, Йесо йӕхицӕн хъӕдӕрмӕг куыд цӕттӕ кӕны, уый: бӕлӕстӕ куыд фӕлдахы ӕмӕ сӕ йӕ кусӕн бынатмӕ куыд ласы. Кӕнӕ-ма дӕ цӕстытыл ауайын кӕн, хӕдзӕрттӕ куыд аразы: цары хъайвантӕ куыд цӕттӕ кӕны ӕмӕ сӕ куыд ӕвӕры, стӕй дуӕрттӕ ӕмӕ ма суанг хӕдзары дзауматӕй дӕр цыдӕртӕ куыд аразы. Йесо йӕхицӕй зыдта, адӕймаг йӕ куыст хорз куы бакӕны, уӕд ын куыд ӕхсызгон вӕййы, уый.

⁷ Йесо уӕлдай зӕрдиагӕй фыдӕбон кодта хъусын кӕныны хъуыддаджы. Ацы ахсджиаг куыст кодта ӕртӕ азы ӕмӕ ’рдӕг. Цӕмӕй хорз хабар фылдӕр адӕмӕн фехъусын кодтаид, уый тыххӕй йӕ рӕстӕг дзӕгъӕлы нӕ сӕфта ӕмӕ-иу сӕумӕрайсомӕй суанг ӕмбисӕхсӕвмӕ лӕггад кодта (Лукайы 21:37, 38; Иоанны 3:2). Йесо «горӕттыл ӕмӕ хъӕутыл зылди ӕмӕ Хуыцауы паддзахады тыххӕй хорз хабар хъусын кодта» (Лукайы 8:1). Уый тыххӕй рыг фӕндӕгтыл сӕдӕгай километртӕ фӕцыд.

8, 9. Йесойӕн йӕ фыдӕбонӕй йӕ зӕрдӕ кӕй рухс кодта, уый цӕмӕй уыд бӕрӕг?

⁸ Цымӕ Йесойӕн хъусын кӕныны хъуыддагӕй йӕ зӕрдӕ рухс кодта? Уӕдӕ! Йесо байтыдта рӕстдзинады мыггӕгтӕ, ӕмӕ уыцы хуымтӕ фӕстӕдӕр кӕрдынмӕ сцӕттӕ сты. Хуыцауы фӕндон кӕй ӕххӕст кодта, уый йын ахӕм тыхтӕ лӕвӕрдта, ӕмӕ уыцы хъуыддаг кӕронмӕ ахӕццӕ кӕныны тыххӕй цӕттӕ уыд йӕхи хӕринагӕй фӕцух кӕнынмӕ дӕр (Иоанны 4:31–38). Куыд ӕхсызгон ын уыд, йӕ лӕггады кӕрон йӕ бон кӕй уыд йӕ Фыдӕн афтӕ зӕгъын: «Ӕз дӕ скадджын кодтон зӕххыл, цы хъуыддаг мын бахӕс кодтай, уый кӕронмӕ ахӕццӕ кодтон» (Иоанны 17:4).

⁹ Йегъовӕйӕн дӕр ӕмӕ Йесойӕн дӕр сӕ зӕрдӕ рухс кӕны сӕ фыдӕбонӕй, ӕмӕ нын уымӕй сты фӕзминаг. Йегъовӕйы кӕй уарзӕм, уымӕ гӕсгӕ нӕ фӕнды, цӕмӕй мах дӕр уый хуызӕн уӕм (Ефесӕгтӕм 5:1). Ӕмӕ Йесойы дӕр кӕй уарзӕм, уый тыххӕй нӕ фӕнды «йӕ къахвӕдтыл цӕуын» (1 Петры 2:21). Уӕдӕ аныхас кӕнӕм, цы хъӕуы, цӕмӕй махӕн дӕр нӕ фыдӕбонӕй нӕ зӕрдӕ райа.

НӔ ФЫДӔБОНӔЙ НӔ ЗӔРДӔ КӔД РАЙДЗӔН?

10, 11. Цы нын баххуыс кӕндзӕн нӕ куыстмӕ ӕндӕр цӕстӕй ракӕсынӕн?

¹⁰ Кӕй зӕгъын ӕй хъӕуы, ӕцӕг чырыстӕттӕ ӕнӕуи куысты дӕр кусынц. Ӕмӕ нӕ фӕнды, цӕмӕй нӕ куыстӕй нӕ зӕрдӕ райа. Фӕлӕ нӕ куыст нӕ зӕрдӕмӕ куы нӕ цӕуа, уӕд та цы ис саразӕн?

¹¹ Дӕ куыстмӕ ӕндӕр цӕстӕй кӕсын райдай. Арӕх нӕ бон нӕ вӕййы нӕ уавӕртӕ фӕивын, фӕлӕ нӕ бон у нӕ зондахаст аивын. Хуыцау куыстмӕ цы цӕстӕй кӕсы, ууыл куы хъуыды кӕнӕм, уӕд нын бирӕ ӕнцондӕр уыдзӕн. Зӕгъӕм, кӕд бинонты хистӕр дӕ, уӕд ахъуыды кӕн: кӕд дӕ куыст дӕ зӕрдӕмӕ ӕппындӕр нӕ цӕуы, уӕддӕр уый фӕрцы дӕ бон у дӕ бинонты дарын. Ӕмӕ уый та Хуыцауы цӕсты гыццыл хъуыддаг нӕу. Библийы фыст ис, зӕгъгӕ, йӕ бинонтыл чи нӕ тыхсы, уый у, «уырнындзинад кӕмӕ нӕй, уымӕй фыддӕр» (1 Тимофеймӕ 5:8). Дӕ зӕрдыл куы дарай, дӕ куысты руаджы дӕ бон кӕй у, Хуыцауы раз дыл цы хӕс ис, уый ӕххӕст кӕнын, уӕд дзы райгонддӕр уыдзынӕ ӕмӕ дӕм афтӕ нӕ кӕсдзӕн, ӕмӕ дӕ фыдӕбон дзӕгъӕлы у. Де ’мкусджытӕй та, ӕвӕццӕгӕн, уый зӕгъӕн нӕ уыдзӕн.

12. Ӕнӕзивӕг ӕмӕ ӕнӕзӕрдӕхудт кусӕг куы уай, уӕд дын уый цы пайда хӕсдзӕн?

¹² Ӕнӕзивӕг ӕмӕ ӕнӕзӕрдӕхудт у. Ӕнӕзивӕг куы уӕм ӕмӕ нӕ куысты дӕсныдӕр куы кӕнӕм, уӕд уыдзыстӕм ӕнтыстджын. Ӕнӕзивӕг ӕмӕ арӕхстджын кусӕгӕн йӕ хицау тынг фӕаргъ кӕны (Ӕмбисӕндтӕ 12:24; 22:29). Ӕцӕг чырыстӕттӕ кӕй стӕм, уымӕ гӕсгӕ хъуамӕ ӕнӕзӕрдӕхудт уӕм ӕмӕ ма давӕм мадӕр ӕхца, мадӕр исты ӕрмӕг, мадӕр куысты рӕстӕг (Ефесӕгтӕм 4:28). Айразмӕйы сӕрӕй куыд базыдтам, афтӕмӕй адӕймаг ӕнӕзӕрдӕхудт куы уа, уӕд ын уый стыр пайда хӕсдзӕн. Ӕнӕзӕрдӕхудт кусӕгыл вӕййы ӕууӕнк. Куыстуарзаг кӕй стӕм, уый нӕ хицау уына ӕви ма уына, уӕддӕр райгонд уыдзыстӕм, уымӕн ӕмӕ «нӕ зӕрдӕ нӕхиуыл ницӕмӕй худдзӕн», стӕй зондзыстӕм, нӕ зынаргъ Хуыцауы зӕрдӕ кӕй рухс кӕнӕм (Дзуттӕгтӕм 13:18; Колоссӕгтӕм 3:22–24).

13. Нӕ уаг ӕмӕ не ’гъдауӕй фӕзминаг куы уӕм, уӕд уый хорз цӕмӕй уыдзӕн?

¹³ Дӕ зӕрдыл дар, дӕ уаг ӕмӕ де ’гъдауӕй Хуыцауы кӕй кадджын кӕныс. Нӕ чырыстон уаг ӕмӕ ӕгъдауӕй нӕ куысты фӕзминаг куы уӕм, уӕд уый иннӕтӕ ӕнӕбафиппайгӕ нӕ фӕуыдзысты. Ӕмӕ уӕд «нӕ Ирвӕзынгӕнӕг Хуыцауы ахуырад рӕсугъд кӕндзыстӕм» (Титмӕ 2:9, 10). Не ’гъдауӕй фӕзминаг куы уӕм, уӕд, чи зоны, иннӕты нӕ дины тыххӕй фылдӕр базонын бафӕнда. Ӕхсызгон дын нӕ уаид, хӕрзӕгъдау адӕймаг кӕй дӕ, уый уынгӕйӕ де ’мкусджытӕй искӕй рӕстдзинад базонын куы бафӕндид? Ӕппӕты ахсджиагдӕр та уый у, ӕмӕ дӕ хорз ӕгъдауӕй Йегъовӕйы кадджын кӕныс ӕмӕ йын йӕ зӕрдӕ рухс кӕныс. (Бакӕс Ӕмбисӕндтӕ 27:11; 1 Петры 2:12.)

КУЫСТ АГУРГӔЙӔ ӔМБАРГӔ У

14–16. Куыст агургӕйӕ цавӕр ахсджиаг фарстатыл фӕхъӕуы ахъуыды кӕнын?

¹⁴ Чырыстӕттӕн цавӕр куысты ӕмбӕлы кӕнӕ не ’мбӕлы кусын, уый тыххӕй Библийы лыстӕггай фыст нӕй. Фӕлӕ уый ууыл дзурӕг нӕу, ӕмӕ нӕ бон у цыфӕнды куысты дӕр кусын. Библийы уынаффӕты фӕрцы нӕ бон у, Хуыцауы зӕрдӕмӕ чи фӕцӕудзӕн, ахӕм куыст ссарын, ӕмӕ, йӕ зӕрдӕмӕ чи нӕ цӕуы, ахӕм куыстмӕ никуы бацӕудзыстӕм (Ӕмбисӕндтӕ 2:6). Куыст агургӕйӕ фӕхъӕуы дыууӕ ахсджиаг фарстайыл ахъуыды кӕнын.

¹⁵ Уыцы куысты, Библи ӕвзӕр кӕй хоны, ахӕм хъуыддӕгтӕ аразын нӕ хъӕудзӕн? Хуыцауы Ныхас комкоммӕ дзуры, кӕй нӕй сайӕн, давӕн, стӕй гуымирытӕ ӕмӕ мӕнгхуыцӕутты нывтӕ аразӕн (Рацыд 20:4; Хъуыддӕгтӕ 15:29; Ефесӕгтӕм 4:28; Раргомад 21:8). Уӕдӕ, ахӕм хъуыддӕгтӕ аразын кӕм хъӕуы, ахӕм куыстмӕ ницы хуызы бацӕудзыстӕм. Йегъовӕйы кӕй уарзӕм, уымӕ гӕсгӕ никуы сразы уыдзыстӕм, йӕ фӕдзӕхстыты ныхмӕ чи у, ахӕм куыстыл. (Бакӕс 1 Иоанны 5:3.)

¹⁶ Уыцы куысты кусгӕйӕ, тӕригъӕдыл нымад чи у, ахӕм хъуыддӕгты аххосджын нӕ уыдзынӕн кӕнӕ мӕн тыххӕй иннӕтӕ афтӕ нӕ хъуыды кӕндзысты, ӕмӕ уым ӕвзӕрӕй ницы ис, ӕмӕ уыдон дӕр тӕригъӕды нӕ фӕаххосджын уыдзысты? Зӕгъӕм, адӕймаг ӕфснайӕгӕй куса, уым ӕвзӕрӕй ницы ис. Фӕлӕ, зӕгъӕм, Йегъовӕйы Ӕвдисӕнӕн загътой, аборттӕ кӕм кӕнынц, ахӕм ран ӕфснайӕг хъӕуы, зӕгъгӕ, уӕд та? Кӕй зӕгъын ӕй хъӕуы, ӕфснайӕг аборттӕ кӕнынӕн нӕ феххуыс кӕны. Фӕлӕ чырыстон ахӕм бынаты куы куса, уӕд афтӕ нӕ уайдзӕн, ӕмӕ ӕххуыс кӕны, цӕмӕй уыцы куыст дарддӕр цӕуа? Ӕмӕ йӕ мах та зонӕм, Библимӕ гӕсгӕ аборт стыр тӕригъӕд кӕй у (Рацыд 21:22–24). Йегъовӕйы кӕй уарзӕм, уымӕ гӕсгӕ нӕ нӕ фӕнды, цӕмӕй нын, Библи кӕй ныхмӕ у, ахӕм хъуыддӕгтимӕ иумӕйагӕй исты уа.

17. а) Куыст агургӕйӕ ма ноджыдӕр цӕуыл фӕхъӕуы ахъуыды кӕнын? (Кӕс рамкӕ «Ацы куыстмӕ бацӕуон?».) б) Не ’фсарм нын куыд ӕххуыс кӕндзӕн, Хуыцауы зӕрдӕ кӕмӕй рухс кӕндзыстӕм, ахӕм уынаффӕтӕ хӕссынӕн?

¹⁷ Куысты фӕдыл нӕм цы фарстатӕ вӕййы, уыдонӕн сӕ фылдӕрӕн нӕ бон дзуапп ссарын уыдзӕн, 15 ӕмӕ 16 абзацты цы дыууӕ ахсджиаг фарстайыл дзырдтам, уыдоныл лӕмбынӕг куы ахъуыды кӕнӕм, уӕд. Фӕлӕ ма уымӕй уӕлдай фӕхъӕуы ӕндӕр цӕуылдӕрты дӕр ахъуыды кӕнынa. Ӕууӕнкджын ӕмӕ зондджын цагъар нын, алы уавӕры дӕр куыд бакӕнӕм, уымӕн бӕлвырд уынаффӕтӕ нӕ дӕтдзӕн. Иуӕй-иу уавӕрты, раст цы у ӕмӕ цы нӕу, ууыл нӕхи фӕхъӕуы ахъуыды кӕнын, цӕмӕй раст уынаффӕ рахӕссӕм. 2-аг сӕрӕй куыд базыдтам, афтӕмӕй нӕ не ’фсарм хъӕуы ахуыр кӕнын. Ӕмӕ уый та нӕ къухы бафтдзӕн, Хуыцауы Ныхасы цы уынаффӕтӕ ис, уыдонӕй царды куыд пайда кӕнӕм, ууыл куы хъуыды кӕнӕм, уӕд. Зондӕй куы архайӕм ӕмӕ «нӕ зонд, раст цы у ӕмӕ цы нӕу, уый ӕмбарын» куы сахуыр кӕнӕм, уӕд нын не ’фсарм ӕххуыс кӕндзӕн, Хуыцауы зӕрдӕ кӕмӕй рухс кӕндзыстӕм, ахӕм уынаффӕтӕ хӕссынӕн, ӕмӕ йӕ уарзтӕй ӕнӕхай нӕ фӕуыдзыстӕм (Дзуттӕгтӕм 5:14).

КУЫСТМӔ РАСТ ЦӔСТӔЙ КӔС

18. Йегъовӕйы зӕрдӕ кӕмӕй рухс кӕндзӕн, ахӕм уынаффӕтӕ хӕссын алы хатт ӕнцон цӕуылнӕ вӕййы?

¹⁸ Ацы «фӕстаг бонты... тынг уӕззау рӕстӕг» кӕй скодта, уымӕ гӕсгӕ алы хатт ӕнцон нӕ вӕййы ахӕм уынаффӕтӕ хӕссын, цӕмӕй Йегъовӕйы зӕрдӕ рухс кӕнӕм (2 Тимофеймӕ 3:1). Ӕнцон нӕ вӕййы, цӕмӕй куыст ссарӕм кӕнӕ ӕнӕ куыстӕй ма баззайӕм. Ӕцӕг чырыстӕттӕ кӕй стӕм, уымӕ гӕсгӕ йӕ зонӕм, нӕ бинонты дарын нӕ хӕс кӕй у ӕмӕ нӕ уый тыххӕй фыдӕбон кӕнын кӕй хъӕуы. Фӕлӕ къӕрцхъус куы нӕ уӕм, уӕд гӕнӕн ис, ӕмӕ не ’мкусджыты зондыл ацӕуӕм кӕнӕ ныл ацы мулкуарзаг дунейы зондахаст фӕзына, ӕмӕ нӕ уый Хуыцауы хъуыддӕгты къуылымпы кӕнын райдайа (1 Тимофеймӕ 6:9, 10). Уӕдӕ цӕмӕй нӕ куыстмӕ ӕмӕ нӕ лӕггадимӕ баст хъуыддӕгтӕм раст цӕстӕй кӕсӕм, уый тыххӕй-иу хъуамӕ сбӕлвырд кӕнӕм, «ахсджиагдӕр цы у, уый». Цӕй ӕмӕ ууыл бӕстондӕр аныхас кӕнӕм (Филиппӕгтӕм 1:10).

19. а) Алы хъуыддаджы дӕр нӕ зӕрдӕ Йегъовӕйыл цӕмӕн хъуамӕ дарӕм? б) Нӕ ныфс ыл куы дарӕм, уӕд нӕхи цӕмӕй бахиздзыстӕм?

¹⁹ Алы хъуыддаджы дӕр дӕ зӕрдӕ Йегъовӕйыл дар. (Бакӕс Ӕмбисӕндтӕ 3:5, 6.) Нӕ зӕрдӕ йыл куыннӕ хъуамӕ дарӕм, кӕд ӕмӕ ныл тынг тыхсы! (1 Петры 5:7). Цы хъуаг стӕм, уый нӕхицӕй хуыздӕр зоны, ӕмӕ нын алкӕддӕр баххуыс кӕны (Псалом 37:25). Уӕдӕ хорз уыдзӕн, йӕ Ныхасы нын зӕрдӕ цӕмӕй ӕвӕры, уый куы нӕ рох кӕнӕм: «Царды мидӕг ӕхцауарзаг ма ут, цы уын ис, уый фагыл нымайут, уымӕн ӕмӕ Хуыцау йӕхӕдӕг афтӕ загъта: „Никуы дӕ ныууадздзынӕн ӕмӕ дӕ никуы ферох кӕндзынӕн“» (Дзуттӕгтӕм 13:5). Ӕххӕстрӕстӕг чи лӕггад кӕны, уыдон сӕхицӕй зонынц, ӕнӕмӕнг сӕ цы хъӕуы, уый цух сӕ кӕй никуы ныууадзы. Йегъовӕ ныл кӕй батыхсдзӕн, ууыл куы нӕ дызӕрдыг кӕнӕм, уӕд ӕгӕр нӕ мӕт кӕндзыстӕм, нӕ бинонты куыд фӕдарӕм, ууыл (Матфейы 6:25–32). Ӕмӕ уӕд афтӕ нӕ рауайдзӕн, ӕмӕ куысты тыххӕй уацамынды нал цӕуӕм ӕмӕ ӕмбырдтӕ цух кӕнӕм (Матфейы 24:14; Дзуттӕгтӕм 10:24, 25).

20. а) Цӕст иу цӕмӕдӕр арӕзт у, зӕгъгӕ, цы нысан кӕны? б) Цы нын баххуыс кӕндзӕн, цӕмӕй нӕ цӕст иу цӕмӕдӕр арӕзт уа?

²⁰ Дӕ цӕст иу цӕмӕдӕр арӕзт уӕд. (Бакӕс Матфейы 6:22, 23.) Цӕст иу цӕмӕдӕр арӕзт у, зӕгъгӕ, нысан кӕны хуымӕтӕг цард кӕнын. Чырыстонӕн йӕ цӕст арӕзт у иунӕг нысанмӕ – Хуыцауы фӕндон ӕххӕст кӕнынмӕ. Нӕ цӕст уымӕ арӕзт куы уа, уӕд ӕхцаджын куыстмӕ ӕмӕ хъӕздыг цардмӕ нӕ бӕлдзыстӕм. Стӕй нӕ архайдзыстӕм, бонӕй-бонмӕ цы ног цыдӕртӕ уадзынц, уыдӕттӕ самал кӕныныл дӕр. Рекламӕты сӕ афтӕ февдисынц, цыма ӕнӕ уыцы дзауматӕй амондджын нӕ уыдзыстӕм. Цы дын баххуыс кӕндзӕн, цӕмӕй дӕ цӕст иу цӕмӕдӕр арӕзт уа? Хӕстӕ хъӕуа-нӕ хъӕуа ма ис, стӕй, бирӕ рӕстӕг ӕмӕ бирӕ тыхтӕ кӕуыл хъӕудзӕн хардз кӕнын, ахӕм цыдӕртӕ ма ӕлхӕн. Библийы уынаффӕмӕ хъус ӕмӕ дын хӕрд, уӕлӕдарӕс ӕмӕ, кӕм цӕрай, уый куы уа, уӕд уый фагыл нымай (1 Тимофеймӕ 6:8). Архай, цӕмӕй дӕ цард фӕхуымӕтӕгдӕр кӕнай, ӕмӕ цас хуымӕтӕгдӕр уа, уыйас хуыздӕр.

21. Ахсджиагдӕр цы у, уый цӕмӕн хъӕуы сбӕлвырд кӕнын ӕмӕ нын царды фыццаг бынаты цы хъуамӕ уа?

²¹ Ахсджиагдӕр цы у, уый алкӕддӕр фыццаг бынаты ӕвӕр. Алцӕуыл аххӕссӕн кӕй нӕй, уымӕ гӕсгӕ хъуамӕ сбӕлвырд кӕнӕм, ахсджиагдӕр цы у, уый. Науӕд, афтӕ ахсджиаг чи не сты, уыцы хъуыддӕгтӕ нын нӕ зынаргъ рӕстӕг байсдзысты ӕмӕ нӕ ахсджиагдӕр хъуыддӕгтӕм нал ӕвдӕлдзӕн. Царды нын фыццаг бынаты цы хъуамӕ уа? Абон бирӕтӕ афтӕ хъуыды кӕнынц, ӕмӕ ӕнӕ уӕлдӕр ахуырадӕй хорз куыст не ссардзынӕ ӕмӕ дын царды ницы бантысдзӕн. Фӕлӕ Йесо Чырысти йӕ фӕдылдзӕуджытӕн дзырдта, «фыццаджыдӕр агурут Хуыцауы паддзахад», зӕгъгӕ (Матфейы 6:33). Ӕцӕг чырыстӕттӕ кӕй стӕм, уымӕ гӕсгӕ нӕ царды фыццаг бынаты ӕвӕрӕм Хуыцауы Паддзахад. Ӕмӕ нӕ цардӕй ӕнӕхъӕнӕй дӕр, ома цы уынаффӕтӕ рахӕссӕм, нӕ разы цы нысӕнттӕ ӕвӕрӕм, уыдонӕй, стӕй нӕ хъуыддӕгтӕй хъуамӕ бӕрӕг уа, Хуыцауы Паддзахад ӕмӕ нын йӕ фӕндон ӕххӕст кӕнын мулкӕй ӕмӕ, ацы дуне цӕмӕ тырны, уыдӕттӕй бирӕ ахсджиагдӕр кӕй сты.

ЗӔРДИАГӔЙ ХЪУСЫН КӔН

22, 23. а) Ӕцӕг чырыстӕттӕн сӕйрагдӕр цавӕр куыст у ӕмӕ цӕмӕй бӕрӕг уыдзӕн, уыцы куыст нын ӕппӕты ахсджиагдӕр кӕй у? (Кӕс рамкӕ «Цы уынаффӕ рахастон, уый фӕрцы дӕн амондджын».) б) Куысты тыххӕй цы хъуыды кӕныс?

²² Фӕстаг бонтӕн сӕ тӕккӕ кӕроны кӕй цӕрӕм, уымӕ гӕсгӕ не ’ргом здӕхт у, ӕцӕг чырыстӕттӕн сӕйрагдӕр цы куыст у, уымӕ – хъусын кӕныны ӕмӕ ахуыргӕнинӕгтӕ цӕттӕ кӕныны хъуыддагмӕ (Матфейы 24:14; 28:19, 20). Йесойау мах дӕр фӕнды, адӕмы цард чи ирвӕзын кӕны, уыцы куысты зӕрдиагӕй архайын. Цӕмӕй бӕрӕг уыдзӕн, ацы хъуыддаг ахсджиагыл кӕй нымайӕм, уый? Хуыцауы адӕмӕн сӕ фылдӕр зӕрдиагӕй лӕггад кӕнынц хъусынгӕнджытӕй. Иннӕтӕ та сӕ царды цыдӕртӕ афтӕ фӕивтой, цӕмӕй лӕггад кӕной пионертӕй кӕнӕ миссионертӕй. Ныййарджытӕй бирӕтӕ ӕмбарынц, Йегъовӕйӕн лӕггад кӕнынӕй ахсджиагдӕр кӕй ницы ис, ӕмӕ сӕ сывӕллӕтты разӕнгард кӕнынц, цӕмӕй ӕххӕстрӕстӕг лӕггад кӕной. Цымӕ зынгзӕрдӕ хъусынгӕнджытӕн сӕ фыдӕбонӕй сӕ зӕрдӕ рухс кӕны? Куыннӕ! Йегъовӕйӕн куы лӕггад кӕнӕм, ӕрмӕстдӕр уӕд уыдзыстӕм зӕрдӕрухс, нӕ цардӕй райгонд ӕмӕ бирӕ арфӕдзинӕдтӕй хайджын. (Бакӕс Ӕмбисӕндтӕ 10:22.)

²³ Бинонты фӕдарыны тыххӕй нӕ фылдӕры хъӕуы бирӕ кусын. Рох дӕ ма уӕд, Йегъовӕйы кӕй фӕнды, цӕмӕй нӕ фыдӕбонӕй хорзӕй исты уынӕм ӕмӕ дзы нӕ зӕрдӕ рухс кӕна. Йегъовӕ куыд хъуыды кӕны, афтӕ куы хъуыды кӕнӕм ӕмӕ йӕ уагӕвӕрдтӕм гӕсгӕ куы архайӕм, уӕд нӕ куыстӕй нӕ зӕрдӕ райдзӕн. Фӕлӕ хъуамӕ архайӕм, цӕмӕй нӕ нӕ куыст ӕппӕты сӕйрагдӕр хъуыддаг аразын ма хъыгдара – Хуыцауы Паддзахады тыххӕй хорз хабар хъусын кӕнын. Уӕд бӕрӕг уыдзӕн, Йегъовӕйы кӕй уарзӕм, ӕмӕ афтӕмӕй йӕ уарзтӕй хайджын уыдзыстӕм.