Ӕгъатыр хицауы къухӕй аирвӕзтысты

Иосиф Марийӕйы райхъал кодта, фӕдис, зӕгъгӕ. Уымӕй йӕм гыццыл раздӕр фыны Йегъовӕйы зӕд фӕзынд ӕмӕ йын загъта: «Сыст, ракӕн сывӕллоны йӕ мадимӕ ӕмӕ Египетмӕ алидз. Уым лӕуу, цалынмӕ дын нӕ зӕгъон, уӕдмӕ, уымӕн ӕмӕ Иродӕн йӕ зӕрды ис сывӕллоны ссарын ӕмӕ йӕ амарын» (Матфейы 2:13).

Иосиф ӕмӕ Марийӕ уайтагъд сӕ фырты арӕвдз кодтой ӕмӕ, цалынмӕ не ’рбабон, уӕдмӕ сӕхи уырдыгӕй айстой. Гыццыл дӕр куы бафӕстиат уыдаиккой, уӕд сын байрӕджы уыдаид, уымӕн ӕмӕ Ирод базыдта, астрологтӕ йӕ кӕй асайдтой. Фӕстӕмӕ-иу мӕн уылты рацӕут, зӕгъгӕ сын бӕргӕ загъта, фӕлӕ уыдон сӕхимӕ ӕндӕр фӕндагыл аздӕхтысты. Ӕмӕ Ирод мӕстӕй рафыхт. Цыфӕндыйӕ дӕр хъуамӕ Йесойы амара. Уымӕ гӕсгӕ бардзырд радта, цӕмӕй Вифлеемы ӕмӕ йӕ алыварс хъӕуты, дыууӕ азы ӕмӕ уымӕй къаддӕр кӕуыл цыд, уыцы лӕппуты иууылдӕр ныццагътаиккой. Скӕсӕнӕй чи ’рцыд, уыцы астрологтӕ йын цы загътой, уымӕ гӕсгӕ банымадта, сывӕллоныл уыйбӕрц кӕй хъуамӕ цыдаид.

Уымӕй ӕвирхъаудӕр хабар ма цы хъуамӕ уа! Уӕд цал гыццыл лӕппуйы амардтой, уый зын зӕгъӕн у. Фӕлӕ, йӕ хъӕбулӕй афтид чи аззад, уыцы мадӕлты хъарӕг ӕмӕ ӕрдиагӕй сӕххӕст, Хуыцау йӕ Ныхасы пехуымпар Йеремийӕн кӕй ныффыссын кодта, уыцы пехуымпарад (Йереми 31:15).

Иосиф ӕмӕ йӕ бинонтӕ та Египетмӕ алыгъдысты ӕмӕ иуцасдӕр уым цардысты. Фӕлӕ иу ӕхсӕв Йегъовӕйы зӕд Иосифмӕ ногӕй фыны фӕзынд ӕмӕ йын загъта: «Сыст, ракӕн сывӕллоны йӕ мадимӕ ӕмӕ ацу Израилы зӕхмӕ, уымӕн ӕмӕ, сывӕллоны марынмӕ чи хъавыд, уыдон амардысты» (Матфейы 2:20). Гъемӕ Иосиф ахъуыды кодта, ныр сӕ бон кӕй у сӕ райгуырӕн бӕстӕмӕ аздӕхын. Ӕмӕ уымӕй дӕр сӕххӕст Библийы фыст пехуымпарад – Хуыцау йӕ Фырты Египетӕй ракодта (Оси 11:1).

Иосиф йӕ бинонтимӕ цалынмӕ Египетмӕ нӕ алыгъд, уӕдмӕ цард Вифлеемы. Ӕмӕ ныр дӕр йӕ зӕрды уыд Иудейӕмӕ ӕрыздӕхын ӕмӕ, ӕвӕццӕгӕн, Вифлееммӕ хӕстӕг искуы ӕрцӕрын. Фӕлӕ йӕ базыдта, Ироды фӕстӕ Иудейӕйы паддзах кӕй сси йӕ фырт Архелай. Ӕмӕ Архелай та уыди тынг ӕгъатыр адӕймаг. Стӕй Иосифы Хуыцау дӕр фыны бафӕдзӕхста, уым цӕрын сын тӕссаг кӕй уыдзӕн. Ӕмӕ уӕд Иосиф йӕ бинонтимӕ ацыд дарддӕр цӕгатырдӕм ӕмӕ ӕрцард Галилейӕйы, горӕт Назареты. Уым Йесо дард уыд Иерусалимӕй, дзуттаг дины разамонджытӕ кӕм уыдысты, уырдыгӕй. Уӕдӕ, Йесо кӕм схъомыл, уымӕй дӕр та сӕххӕст пехуымпарад, «схондзысты йӕ назаретаг», зӕгъгӕ (Матфейы 2:23).