Йӕ цыппар ахуыргӕнинаджы уыдзысты адӕмахсджытӕ

Йесойы Назареты цӕрджытӕ марынмӕ куы хъавыдысты, уӕд ацыд, Галилейӕйы денджызмӕ хӕстӕг чи уыд, уыцы горӕт Капернауммӕ. Галилейӕйы денджыз ма хуыдтой «Геннисареты цад» дӕр (Лукайы 5:1). Уымӕй сӕххӕст, Исайы чиныджы цы пехуымпарад фыст уыд, уый, зӕгъгӕ, Галилейӕйы адӕм, денджызы былгӕрӕтты чи цӕры, уыдон, фендзысты диссаджы рухс (Исай 9:1, 2).

Ам Галилейӕйы Йесо дарддӕр хъусын кодта, «уӕларвон паддзахад ӕрхӕстӕг», зӕгъгӕ (Матфейы 4:17). Ӕмӕ уыцы рӕстӕг йӕ ахуыргӕнинӕгтӕй цыппары ссардта. Уыдон уый размӕ дӕр йемӕ уыдысты, фӕлӕ Иудейӕйӕ куы ’рыздӕхтысты, уӕд ӕй ныууагътой ӕмӕ та дарддӕр сӕ куыст кодтой – кӕсаг ахстой (Иоанны 1:35–42). Фӕлӕ ныр хъуамӕ ӕдзухдӕр Йесоимӕ уыдаиккой, цӕмӕй сӕ сахуыр кодтаид ӕмӕ, фӕстӕмӕ уӕларвмӕ куы аздӕхтаид, уӕд хъусын кӕныны хъуыддаг дарддӕр кодтаиккой.

Йесо денджызы былты куы фӕцӕйцыд, уӕд федта Симон Петры йе ’фсымӕр Андреимӕ. Уыдон, кӕимӕ куыстой, уыцы кӕсагахсджытӕй цалдӕримӕ сӕ хызтӕ цӕттӕ кодтой. Йесо сӕ цурмӕ бацыд, Петры бӕлӕгъмӕ бахызт ӕмӕ йын загъта, былӕй-ма гыццыл фалдӕр баленк кӕн, зӕгъгӕ. Ӕмӕ иудзӕвгар куы баленк кодтой, уӕд Йесо ӕрбадт ӕмӕ уырдыгӕй ахуыр кӕнын райдыдта, былыл цы адӕм ӕрӕмбырд, уыдоны. Дзырдта сын Хуыцауы Паддзахады тыххӕй.

Уый фӕстӕ Йесо Петрӕн загъта: «Арф кӕм у, уырдӕм баленк кӕн, ӕмӕ уӕ хызтӕ уым баппарут». Петр ын дзуапп радта: «Ахуыргӕнӕг, мах ӕнӕхъӕн ӕхсӕв фӕфыдӕбон кодтам ӕмӕ ницы ӕрцахстам. Фӕлӕ кӕд афтӕ зӕгъыс, уӕд хызтӕ баппардзынӕн» (Лукайы 5:4, 5).

Ӕмӕ сӕ хызтӕ куы баппӕрстой, уӕд уыйбӕрц кӕсаг ӕрцахстой, ӕмӕ хызтӕ скъуыйын райдыдтой! Уӕд иннӕ бӕлӕгъмӕ се ’мбӕлттӕм ацамыдтой, рацӕут ӕмӕ нӕм фӕкӕсут, зӕгъгӕ. Гыццыл фӕстӕдӕр дыууӕ бӕлӕгъы дӕр кӕсагӕй байдзаг сты ӕмӕ ныгъуылын райдыдтой. Петр уый куы федта, уӕд Йесойы раз йӕ зонгуытыл ӕрхауд ӕмӕ йын загъта: «Хицау, ныууадз мӕ, ӕз тӕригъӕдджын адӕймаг дӕн». Фӕлӕ йын Йесо загъта: «Ма тӕрс. Нырӕй фӕстӕмӕ ахсдзынӕ удӕгас адӕймӕгты» (Лукайы 5:8, 10).

Йесо Петр ӕмӕ Андрейӕн загъта: «Рацӕут мӕ фӕдыл, ӕмӕ уӕ ӕз скӕндзынӕн адӕмахсджытӕ» (Матфейы 4:19). Йесо ма ӕрхуыдта ноджыдӕр дыууӕ кӕсагахсӕджы, Зеведейы фыртты – Иаков ӕмӕ Иоанны. Ӕмӕ уыдон дӕр уайтагъд йӕ фӕдыл ацыдысты. Афтӕмӕй ацы цыппар кӕсагахсӕджы сӕ куыст ныууагътой ӕмӕ систы, Йесойы ахуыргӕнинӕгтӕй ӕххӕстрӕстӕг лӕггад кӕнын чи райдыдта, уыдонӕй фыццӕгтӕ.