Ӕмбырды фарн ӕмӕ сыгъдӕгдзинад хъахъхъӕнӕм

АЛЫ аз дӕр мингай адӕм ӕрбацӕуы Йегъовӕйы сыгъдӕг хӕдзармӕ, ӕмӕ уымӕй ӕххӕст кӕны Библийы пехуымпарад (Мих. 4:1, 2). Куыд ӕхсызгон нын вӕййы, ног адӕм «Хуыцауы ӕмбырдмӕ» куы ӕрбаиу вӕййынц! (Хъуыд. 20:28, фип.). Йегъовӕйы сыгъдӕг ӕмӕ фарнуарзаг адӕм ныридӕгӕн дӕр цӕрынц, цыма дзӕнӕты сты, афтӕ, ӕмӕ ногӕрбацӕуӕг адӕм дӕр тынг аргъ кӕнынц, немӕ иумӕ Йегъовӕйӕн кӕй лӕггад кӕнынц, уымӕн. Хуыцауы сыгъдӕг тых ӕмӕ йӕ Ныхасы цы зондджын уынаффӕтӕ ис, уыдон дӕр нын ӕххуыс кӕнынц ӕмбырды фарн ӕмӕ сыгъдӕгдзинад хъахъхъӕнынӕн (Пс. 119:105; Зах. 4:6).

² Библийы уагӕвӕрдты фӕрцы нӕ «удыхъӕд ногмӕ ивӕм» (Кол. 3:10). Не ’хсӕн гыццыл исты куы рауайы кӕнӕ истӕуыл куы фӕбыцӕу вӕййӕм, уӕд ӕй нӕ ныддиссаг кӕнӕм. Ӕмӕ кӕд ацы дунейы адӕм дихтӕ сты, уӕддӕр мах алцӕмӕ дӕр кӕсӕм Йегъовӕйы цӕстӕй, ӕмӕ нын ӕгас дунейы дӕр цы хотӕ ӕмӕ ӕфсымӕртӕ ис, уыдонимӕ йын ӕмвӕнд-ӕмзондӕй лӕггад кӕнӕм (Хъуыд. 10:34, 35).

³ Фӕлӕ уӕддӕр рӕстӕгӕй-рӕстӕгмӕ ӕрцӕуы, ӕмбырды фарн ӕмӕ иудзинадыл чи фӕзыны, ахӕм хабӕрттӕ. Афтӕ цӕмӕн рауайы? Арӕхдӕр, Библийы цы уынаффӕтӕ ис, уыдонмӕ гӕсгӕ кӕй нӕ фӕархайӕм, уый тыххӕй. Не ’ппӕты дӕр хъӕуы не ’нӕххӕст буары фӕндтимӕ тох кӕнын. Иу дӕр нӕ ахӕм нӕу, ӕмӕ тӕригъӕд ма араза (1 Иоан. 1:10). Гӕнӕн ис, ӕмӕ исчи ахӕм рӕдыд къахдзӕф сараза, ӕмӕ ӕмбырды ӕгъдау ӕмӕ уырнындзинад фехалынӕй тӕссаг уа. Зӕгъӕм, не ’нӕрхъуыды ныхасӕй кӕнӕ хъуыддагӕй кӕйдӕр фӕхъыг кӕнӕм. Кӕнӕ хатт нӕхӕдӕг дӕр искӕй ныхӕсты кӕнӕ хъуыддӕгты тыххӕй смӕсты вӕййӕм (Ром. 3:23). Ӕмӕ уӕд нӕ бон куыд у хъуыддаг банывыл кӕнын?

⁴ Йегъовӕ ныл тыхсы ӕмӕ, ахӕм зын уавӕрты куыд хъуамӕ архайӕм, уый нын йӕ Ныхасы амоны. Стӕй нӕ уарзӕгой фыййӕуттӕ, хистӕр нӕлгоймӕгтӕ, цӕттӕ сты алкӕмӕн дӕр баххуыс кӕнынмӕ. Фыстадӕй нын цы уынаффӕтӕ раттынц, уыдонмӕ гӕсгӕ куы фӕархайӕм, уӕд нӕ бон свӕййы хъуыддаг банывыл кӕнын, ӕмӕ Йегъовӕйы хорзӕхӕй дарддӕр дӕр хайджын вӕййӕм. Кӕд исты раст нӕ сарӕзтам ӕмӕ нын уый тыххӕй бауайдзӕф кодтой кӕнӕ нын нӕ ных бакъуырдтой, уӕд ма дызӕрдыг кӕнӕм, афтӕ уымӕн кӕй у, ӕмӕ нӕ нӕ уӕларвон Фыд бирӕ уарзы (Ӕмб. 3:11, 12; Дзут. 12:6).

НЕ ’ХСӔН ГЫЦЦЫЛ ИСТЫ КУЫ РАУАЙА

⁵ Хатт ӕмбырды чидӕртӕ цӕйдӕр тыххӕй кӕрӕдзиимӕ фӕбыцӕу вӕййынц кӕнӕ цыдӕр гыццыл хъуыддӕгты кӕрӕдзи нӕ бамбарынц. Ахӕм хабӕрттӕ куы ’рцӕуы, уӕд-иу нӕ рох ма уӕд, не ’ппӕт дӕр хотӕ ӕмӕ ӕфсымӕртӕ кӕй стӕм, ӕмӕ-иу хъуыддаг уайтагъд банывыл кӕнӕм (Еф. 4:26; Фил. 2:2–4; Кол. 3:12–14). Апостол Петр ахӕм уынаффӕ радта: «Кӕрӕдзийы афтӕ уарзут, уӕ уарзт артау куыд судза, уымӕн ӕмӕ уарзондзинад бирӕ тӕригъӕдтӕ хатыр кӕны» (1 Пет. 4:8). Уӕдӕ дын ӕмбырды искӕимӕ исты куы рауайа, уӕд-иу ацы уынаффӕмӕ гӕсгӕ архай. Ныфс нӕ ис, афтӕмӕй уӕ кӕрӕдзи кӕй бамбардзыстут. Библийы фыст ис: «Не ’ппӕт дӕр арӕх рӕдийӕм» (Иак. 3:2). Йесо Матфейы 7:12 цы уынаффӕ радта, уымӕ гӕсгӕ куы архайӕм, ома нӕ куыд фӕнды, цӕмӕй нын иннӕтӕ уой, нӕхӕдӕг дӕр сын афтӕ куы уӕм, уӕд-иу сын ныххатыр кӕндзыстӕм ӕмӕ-иу хабар ферох кӕндзыстӕм (Матф. 6:14, 15).

⁶ Кӕд, мыййаг, искӕй ныхасӕй кӕнӕ хъуыддагӕй фӕхъыг кодтай, уӕд хъуамӕ уайтагъд бацархайай, цӕмӕй бафидауат. Уымӕй кӕнгӕ у, Йегъовӕ дӕ дарддӕр дӕр йӕ хӕларыл нымайдзӕн ӕви нӕ. Йесо йӕ фӕдылдзӕуджытӕн ахӕм уынаффӕ радта: «Дӕ кувинагимӕ нывондхӕссӕнмӕ куы ’рбацӕуай ӕмӕ уым дӕ зӕрдыл куы ’рлӕууа, де ’фсымӕр дӕм цӕуылдӕр хӕрам кӕй у, уый, уӕд дӕ кувинаг уым нывондхӕссӕны раз ныууадз ӕмӕ ацу, де ’фсымӕримӕ уал бафидау, стӕй уӕд ӕрбаздӕх ӕмӕ дӕ кувинаджы кой дӕр бакӕн» (Матф. 5:23, 24). Чи зоны, ӕнӕуи кӕрӕдзи раст нӕ бамбӕрстат. Кӕд афтӕ у, уӕд дӕ хъӕуы ӕргом аныхас кӕнын. Ӕмбырды се ’ппӕт дӕр кӕрӕдзиимӕ ӕргом ныхас куы кӕной, уӕд кӕрӕдзи хуыздӕр ӕмбардзысты ӕмӕ, ӕнӕххӕстдзинады тыххӕй цы зындзинӕдтӕ фӕзыны, уыдон дӕр-иу тагъддӕр аскъуыддзаг кӕндзысты.

АДӔЙМАГӔН БИБЛИЙӔ УЫНАФФӔ РАТТЫН КУЫ ХЪӔУА

⁷ Иуӕй-иу хатт цӕстдарджытӕ фенынц, адӕймагӕн кӕй хъӕуы уынаффӕ раттын, цӕмӕй йӕ зондахаст сраст кӕна. Уый алы хатт ӕнцон нӕ вӕййы. Апостол Павел Галатийы ӕмбырды чырыстӕттӕм ныффыста: «Ме ’фсымӕртӕ, гӕнӕн ис, ӕмӕ йӕ адӕймаг ӕмбаргӕ дӕр ма бакӕна, афтӕмӕй рӕдыд къахдзӕф сараза. Фӕлӕ-иу уӕддӕр сымах, фӕлтӕрд чырыстӕттӕ, бацархайут ахӕм адӕймаджы раст зондыл саразыныл, ӕмӕ уый аразут фӕлмӕнӕй» (Гал. 6:1).

⁸ Цӕстдарджытӕ дзугмӕ сӕ хъус лӕмбынӕг куы дарой, уӕд ӕмбырд бахъахъхъӕндзысты, уырнындзинадӕн тӕссаг чи у, бирӕ ахӕм хабӕрттӕй ӕмӕ стыр зындзинӕдтӕй. Хистӕр нӕлгоймӕгтӕ архайынц, цӕмӕй ӕмбырдӕн лӕггад кӕной, Йегъовӕ Исайы уылты куыд загъта, афтӕ: «Уыдонӕй алчидӕр уыдзӕн, дымгӕйӕ кӕм бамбӕхсай, тӕрккъӕвдайӕ дӕхи кӕм бааууон кӕнай, ахӕм бынаты хуызӕн, ӕнӕдон бӕстӕйы цӕугӕдӕттӕ куыд уой, хурсыгъд бӕстӕйы – стыр къӕдзӕхы аууон, уый хуызӕн» (Ис. 32:2).

АДӔЙМАГ, ЦЫ НЕ ’МБӔЛЫ, УЫДӔТТӔ КУЫ КӔНА

⁹ Ӕмбырдыл ӕвзӕрырдӕм чи ӕндавы, уыдоны тыххӕй апостол Павел ӕфсымӕрты бафӕдзӕхста: «Цы не ’мбӕлы, уыдӕттӕ чи кӕны ӕмӕ, махӕй цӕуыл сахуыр стут, уымӕ гӕсгӕ чи нӕ цӕры, ахӕм ӕфсымӕртӕм хӕстӕг ма цӕут». Ӕмӕ стӕй йӕ хъуыды фӕбӕлвырддӕр кодта: «Кӕд исчи, ацы фыстӕджы цы зӕгъӕм, уымӕ нӕ байхъуса, уӕд ахӕммӕ та уӕ хъус лӕмбынӕг дарут ӕмӕ йемӕ мауал иу кӕнут, цӕмӕй йӕхиуыл ӕрхуда. Ӕрмӕст ӕм знаджы цӕстӕй ма кӕсут, фӕлӕ йын дарддӕр дӕр, куыд уе ’фсымӕрӕн, афтӕ зонд амонут» (2 Фес. 3:6, 14, 15).

¹⁰ Иуӕй-иу хатт ӕфсымӕр кӕнӕ хо, ӕмбырдӕй йӕ ацух кӕнын кӕй тыххӕй хъӕуы, ахӕм стыр тӕригъӕд нӕ саразы, фӕлӕ бӕрӕг вӕййы, чырыстӕттӕ цы уагӕвӕрдтӕм гӕсгӕ хъуамӕ цӕрой, уыдон ӕппындӕр кӕй ницӕмӕ дары. Чи зоны, у тынг зивӕггӕнаг, ӕдзухдӕр хъаст кӕны кӕнӕ сыгъдӕгдзинадмӕ йӕ хъус ӕппындӕр нӕ дары. Йе та йӕхи «иннӕты хъуыддӕгты тъыссы» (2 Фес. 3:11). Кӕнӕ, кӕмӕй цы ратона, ууыл у, науӕд йӕхи фӕирхӕфсы, чырыстонӕн куыд не ’мбӕлы, афтӕ. Ахӕм адӕймаг аразы, цы не ’мбӕлы, уый, ӕмӕ йын йӕ хъуыддӕгтӕм уӕлӕнгай цӕстӕй кӕсӕн нӕй, уымӕн ӕмӕ тӕссаг у, ӕмбырды иннӕтӕ дӕр афтӕ кӕнын куы райдайой.

¹¹ Хистӕр нӕлгоймӕгтӕ уал хъуамӕ фыццаг бацархайой ахӕм адӕймагӕн Библийӕ уынаффӕ раттын ӕмӕ йын баххуыс кӕнын. Фӕлӕ кӕд йемӕ цалдӕр хатты аныхас кодтой ӕмӕ уӕддӕр Библийы уагӕвӕрдтӕ ницӕмӕ дары, уӕд, чи зоны, аскъуыддзаг кӕной, ӕмбырды уый фӕдыл раныхас кӕй бацӕттӕ кӕндзысты. Хистӕр нӕлгоймӕгтӕ хъуамӕ уой арфуынӕг, цӕмӕй бамбарой, уавӕр ӕцӕгдӕр афтӕ ӕвзӕр у ӕмӕ иннӕты афтӕ тыхсын кӕны, ӕмӕ ахӕм раныхас радзурын ӕцӕгдӕр хъӕуы ӕви нӕ. Раныхас цы ӕфсымӕрӕн уа, уый уыцы хъуыддаджы фӕдыл уынаффӕ ратдзӕн, фӕлӕ, цы не ’мбӕлы, уыдӕттӕ чи аразы, уымӕн йӕ ном нӕ зӕгъдзӕн. Уый фӕрцы, раныхасы цы уавӕры кой цӕуы, уыимӕ зонгӕ чи у, уыдон ахӕм адӕймагимӕ сӕ рӕстӕг нал ӕрвитдзысты, кӕд йемӕ дарддӕр дӕр уырнындзинадимӕ баст хъуыддӕгтыл ныхас кӕндзысты ӕмӕ йын афтӕмӕй, «куыд се ’фсымӕрӕн, афтӕ зонд амондзысты», уӕддӕр.

¹² Ныфс нӕ ис, ӕмбырды хотӕ ӕмӕ ӕфсымӕрты фидардзинады фӕрцы, цы не ’мбӕлы, уыдӕттӕ чи кӕны, уыцы адӕймагмӕ худинаг кӕй ӕркӕсдзӕн ӕмӕ кӕй аивдзӕн. Йӕ зондахаст кӕй аивта, уый йӕ хъуыддӕгтӕй бӕрӕг куы уа, уӕд ӕм, лӕмбынӕг хъус дарын кӕмӕ хъӕуы, ахӕм адӕймаджы цӕстӕй нал кӕсдзысты.

ИСЧИ СТЫР РӔДЫД КУЫ ’РУАДЗА

¹³ Иннӕты рӕдыдтытӕ мацӕмӕ дарӕм ӕмӕ хатыргӕнаг уӕм, уый ууыл дзурӕг нӕу, ӕмӕ, адӕймаг цы ӕвзӕрдзинад сарӕзта, уымӕ уӕлӕнгай цӕстӕй кӕсӕм кӕнӕ йын афтӕмӕй йӕ къух аразӕм. Рӕдыдтытӕ се ’ппӕт, нӕ туджы ӕнӕххӕстдзинад кӕй рахастам, уый ӕфсон фӕкӕнӕн нӕй. Стӕй, гыццыл рӕдыд схонӕн кӕй нӕй, ахӕм хабӕрттӕм куыдфӕндыйы цӕстӕй кӕсын раст нӕу (Лев. 19:17; Пс. 141:5). Моисейы закъоны загъд уыди, кӕцыдӕр тӕригъӕдтӕ иннӕ тӕригъӕдтӕй уӕззаудӕр кӕй сты. Ӕмӕ афтӕ у чырыстон ӕмбырды дӕр (1 Иоан. 5:16, 17).

¹⁴ Дыууӕ чырыстоны ’хсӕн исты куы рауайа ӕмӕ йӕ гыццыл рӕдыд схонӕн куы нӕ уа, уӕд куыд бакӕнын хъӕуы, уый Йесо бӕлвырд бамбарын кодта. Дӕ хъус-ма ӕрдар, цавӕр къахдзӕфтӕ хъӕуы саразын, уымӕ: «Де ’фсымӕр тӕригъӕд куы ракӕна, уӕд ӕм [1] бацу ӕмӕ йын йӕ рӕдыд хибарӕй зӕгъ. Кӕд дӕм байхъуса, уӕд ссардтай де ’фсымӕры. Кӕд дӕм нӕ байхъуса, уӕд [2] демӕ акӕн ноджыдӕр иу кӕнӕ дыууӕ адӕймаджы, цӕмӕй алы хъуыддаг дӕр сбӕлвырд уа дыууӕ кӕнӕ ӕртӕ ӕвдисӕны ныхасмӕ гӕсгӕ. Кӕд уыдонмӕ дӕр нӕ байхъуса, уӕд та [3] зӕгъ ӕмбырдӕн. Ӕмӕ ӕмбырдмӕ дӕр куы нӕ байхъуса, уӕд та дын иннӕ адӕмӕй ӕмӕ хъалонисджытӕй уӕлдай ма уӕд» (Матф. 18:15–17).

¹⁵ Дарддӕр та Йесо ӕрхаста цӕвиттон, фыст ис Матфейы 18:23–35. Уыцы цӕвиттонӕй куыд зыны, афтӕмӕй Матфейы 18:15–17 цы тӕригъӕдты кой кӕны, уыдонмӕ хауынц ӕхцаимӕ кӕнӕ исбонимӕ баст тӕригъӕдтӕ дӕр, зӕгъӕм, чидӕр йӕ хӕс нӕ фиды кӕнӕ цӕстфӕлдахӕн митӕ кӕны. Ахӕм тӕригъӕдтӕм ма ахӕссӕн ис, адӕймаг искӕй фыдкой куы кӕна ӕмӕ йын афтӕмӕй йӕ номыл цъыф куы кала.

¹⁶ Кӕд дын бӕлвырдгӕнӕнтӕ ис, ӕмӕ ӕмбырды чидӕр дӕ ныхмӕ ахӕм тӕригъӕд сарӕзта, уӕд-иу уайтагъд хистӕр нӕлгоймӕгтӕм ма бацу. Йесо куыд загъта, афтӕ уал фыццаг аныхас кӕн, дӕ зӕрдӕхудты чи бацыд, уыимӕ. Бацархай хабар, уӕ дыууӕ йеддӕмӕ йӕ куыд ничи зона, афтӕ аскъуыддзаг кӕныныл. Дӕ зӕрдыл дар: Йесо афтӕ нӕ загъта, зӕгъгӕ йӕм ӕрмӕстдӕр иу хатт бацу ӕмӕ йын зӕгъ, кӕм фӕрӕдыд, уый. Уӕдӕ адӕймаг йӕ рӕдыдыл куы нӕ басӕтта ӕмӕ дӕ хатыр куы нӕ ракура, уӕд, чи зоны, хорз уаид, фӕстӕдӕр та йӕм ногӕй куы бацӕуис. Кӕд хъуыддаг ууыл ахицӕн уа, уӕд дӕ уыцы адӕймаг ӕнӕмӕнг фӕбузныг уыдзӕн, хабар иннӕтӕн кӕй нӕ радзырдтай ӕмӕ йӕ ӕмбырды цӕсты кӕй нӕ бафтыдтай, уый тыххӕй. Афтӕмӕй зӕгъӕн уыдзӕн, ӕмӕ «ссардтай де ’фсымӕры».

¹⁷ Адӕймаг йӕ рӕдыдыл куы басӕтта, хатыр дӕ куы ракура ӕмӕ йӕ рӕдыд сраст кӕныныл куы бацархайа, уӕд ӕндӕр ницыуал хъӕуы аразын. Кӕд дӕ ныхмӕ тынг фӕрӕдыд, уӕддӕр, уӕлдӕр цы рӕдыдтыты кой цӕуы, ахӕм рӕдыдтытӕ уӕ дыууӕйӕн уӕ бон у банывыл кӕнын.

¹⁸ Кӕд де ’фсымӕримӕ «хибарӕй» аныхас кодтай, фӕлӕ хъуыддаг нӕ банывыл, уӕд дарддӕр дӕ бон у, Йесо куыд загъта, афтӕ бакӕнын. «Демӕ акӕн ноджыдӕр иу кӕнӕ дыууӕ адӕймаджы», ӕмӕ де ’фсымӕримӕ ногӕй аныхас кӕн. Демӕ кӕй ракӕнай, уыдонӕн дӕр хъуамӕ сӕ нысан уа се ’фсымӕры ссарын. Хуыздӕр уаид, хабар йӕхи цӕстӕй чи федта, ахӕмтӕ куы уаиккой. Фӕлӕ кӕд уыцы хабарӕн ӕвдисӕнтӕ нӕ уыд, уӕд дӕ бон у демӕ иу кӕнӕ дыууӕ адӕймаджы акӕнын, цӕмӕй ӕвдисӕн уой, уе ’хсӕн цы ныхас рауайдзӕн, уымӕн. Чи зоны сӕм ахӕм хабӕртты фӕлтӕрддзинад ис ӕмӕ сӕ бон суа, адӕймаг ӕцӕгдӕр фӕрӕдыд ӕви нӕ, уый бамбарын. Уӕ ныхасӕн ӕвдисӕнӕн хистӕр нӕлгоймӕгты куы равзарат, уӕд уыдон ӕмбырды номӕй нӕ архайдзысты, уымӕн ӕмӕ сын уыцы хъуыддаг хистӕр нӕлгоймӕгты совет нӕ бахӕс кодта.

¹⁹ Кӕд адӕймагимӕ хибарӕй цалдӕр хатты дӕр аныхас кодтай, стӕй йӕм иу кӕнӕ дыууӕ адӕймагимӕ дӕр бацыдтӕ, фӕлӕ хъуыддаг уӕддӕр нӕ банывыл ӕмӕ дӕм афтӕ кӕсы, ӕмӕ хабарӕн афтӕ ныууадзӕн нӕй, уӕд уый тыххӕй хъуамӕ зӕгъай ӕмбырды цӕстдарджытӕн. Дӕ зӕрдыл дар, сӕ нысан кӕй у ӕмбырды фарн ӕмӕ сыгъдӕгдзинад хъахъхъӕнын. Хъуыддаг хистӕр нӕлгоймӕгтӕн куы радзурай, уӕд ӕй дарддӕр уыдоны бар бакӕн ӕмӕ дӕ ныфс Йегъовӕйыл дар. Макуы бауадз, цӕмӕй дын искӕй рӕдыд хъуыддӕгтӕ цӕлхдур суой ӕмӕ дын Йегъовӕйӕн лӕггад кӕнын цы циндзинад хӕссы, уымӕй дӕ ӕнӕхай фӕкӕной (Пс. 119:165).

²⁰ Хистӕр нӕлгоймӕгтӕ хъуыддагмӕ лӕмбынӕг ӕркӕсдзысты. Куы рабӕрӕг уа, ӕмӕ уыцы адӕймаг дӕ ныхмӕ ӕцӕгдӕр стыр тӕригъӕд сарӕзта ӕмӕ нӕ фӕсмон кӕны, стӕй дын цы зиан ӕрхаста, уый бафидын дӕр ӕй нӕ фӕнды, уӕд, цалдӕр хистӕр нӕлгоймаджы кӕм уа, ахӕм комитеты, чи зоны, бахъӕуа адӕймаджы ӕмбырдӕй ацух кӕнын. Афтӕмӕй дзуг бахъахъхъӕндзысты ӕмӕ ӕмбырд сыгъдӕгӕй баззайдзӕн (Матф. 18:17).

ИСЧИ УӔЗЗАУ ТӔРИГЪӔД КУЫ САРАЗА

²¹ Фӕлӕ, зӕгъӕм, адӕймаг куы хӕта, йӕ цардӕмбалыл гадзрахатӕй куы рацӕуа, нӕлгоймаг нӕлгоймагимӕ кӕнӕ сылгоймаг сылгоймагимӕ хӕлд митӕ куы кӕна, исчи Хуыцауы куы фауа, раст дины ныхмӕ куы суа ӕмӕ йӕ куы ныууадза, мӕнгхуыцӕуттӕн куы кува ӕмӕ ӕндӕр ахӕм уӕззау тӕригъӕдтӕ куы араза, уӕд фаг нӕ уыдзӕн, тӕригъӕд кӕй ныхмӕ сарӕзта, уый йын ныххатыр кӕна (1 Кор. 6:9, 10; Гал. 5:19–21). Ахӕм тӕригъӕдтӕ ӕмбырды уырнындзинадӕн ӕмӕ сыгъдӕгдзинадӕн тӕссаг кӕй сты, уымӕ гӕсгӕ уыдоны тыххӕй хъӕуы хистӕр нӕлгоймӕгтӕн радзурын, уымӕн ӕмӕ ахӕм уӕззау тӕригъӕдтӕ уыдон февзарынц (1 Кор. 5:6; Иак. 5:14, 15). Иуӕй-иу хатт, тӕригъӕд чи сарӕзта, уыцы адӕймаг йӕхӕдӕг бацӕуы хистӕр нӕлгоймӕгтӕм ӕмӕ сын ӕй радзуры, кӕнӕ та сын уый тыххӕй радзуры, чи йӕ базыдта, уый (Лев. 5:1; Иак. 5:16). Ӕмбырды чидӕр уӕззау тӕригъӕд кӕй сарӕзта, уый тыххӕй хистӕр нӕлгоймӕгтӕн чифӕнды ма радзура, уӕддӕр уал дыууӕ хистӕр нӕлгоймаджы хабар бӕлвырдӕй базондзысты. Кӕд уый ӕцӕг хабар у ӕмӕ йын бӕлвырдгӕнӕнтӕ дӕр ис, уӕд хистӕр нӕлгоймӕгты совет снысан кӕндзӕн барадон комитет, ӕмӕ хъуыддаг уыдон равзардзысты. Уыцы комитеты хъуамӕ уа ӕппынкъаддӕр ӕртӕ хистӕр нӕлгоймаджы.

²² Хистӕр нӕлгоймӕгтӕ дзугмӕ лӕмбынӕг кӕсынц ӕмӕ йӕ хъахъхъӕнынц, йӕ уырнындзинадӕн тӕссаг цӕмӕйдӕриддӕр у, уыдӕттӕй. Стӕй ма архайынц Хуыцауы Ныхасӕй арӕхстджынӕй пайда кӕныныл, цӕмӕй, чи фӕрӕдийы, уымӕн бауайдзӕф кӕной ӕмӕ йын фӕстӕмӕ йӕ къахыл слӕууынӕн баххуыс кӕной (Иуд. 21–23). Апостол Павел дӕр Тимофейӕн раст афтӕ бафӕдзӕхста: «Хуыцауы раз ӕмӕ дын Йесо Чырыстийы раз, удӕгӕстӕн дӕр ӕмӕ мӕрдтӕн дӕр тӕрхон чи кӕндзӕн... уый раз, фӕдзӕхсын... иннӕтӕн уайдзӕф кӕн, сӕ рӕдыд-иу сын зӕгъ, фӕдзӕхс сӕ – у бирӕфӕразон ӕмӕ сӕ арӕхстджынӕй ахуыр кӕн» (2 Тим. 4:1, 2). Уыцы хъуыддӕгтыл хатт бирӕ рӕстӕг ацӕуы, фӕлӕ уый дӕр хистӕр нӕлгоймӕгтӕн сӕ хӕс у. Ӕмбырд сын сӕ фыдӕбонӕн аргъ кӕны ӕмӕ сӕ «нымайы уӕлдай кады аккагыл» (1 Тим. 5:17).

²³ Адӕймаг ӕцӕгдӕр тӕригъӕд кӕй сарӕзта, уый куы сбӕлвырд вӕййы, уӕд цӕстдарджыты сӕйраг нысан алкӕддӕр вӕййы адӕймагӕн фӕстӕмӕ йӕ къахыл слӕууынӕн баххуыс кӕнын. Кӕд зӕрдӕйӕ ӕрфӕсмон кӕна ӕмӕ йын сӕ бон баххуыс кӕнын суа, уӕд ын бауайдзӕф кӕндзысты кӕнӕ хибарӕй, кӕнӕ, кӕд йӕ ныхмӕ ӕвдисӕнтӕ дзырдта, уӕд, чи зоны, уыдоны раз. Афтӕмӕй йын уый зонды хос фӕуыдзӕн ӕмӕ иннӕтӕ дӕр Хуыцауы раз тӕригъӕд саразынӕй тӕрсдзысты (2 Сам. 12:13; 1 Тим. 5:20). Иугӕр барадон комитет, тӕригъӕд чи сарӕзта, уыцы адӕймагӕн бауайдзӕф кодта, уӕд ын ӕмбырды цавӕрдӕр хъуыддӕгтӕ аразыны бар нал уыдзӕн. Афтӕмӕй йын баххуыс кӕндзысты, цӕмӕй дарддӕр йӕхицӕн «раст фӕндӕгтӕ» араза (Дзут. 12:13). Адӕймаг уырнындзинады хъуыддаджы йӕ къахыл кӕй слӕууыд, уый бӕрӕг куы уа, уӕд та йын ӕмбырды ногӕй исты хъуыддӕгтӕ бахӕс кӕндзысты.

КӔМӔНДӔР КӔЙ БАУАЙДЗӔФ КОДТОЙ, УЫЙ ТЫХХӔЙ ХЪУСИНАГ

²⁴ Вӕййы афтӕ, ӕмӕ адӕймаг йӕ рӕдыдыл ӕрфӕсмон кӕны, фӕлӕ барадон комитет фӕуыны, хабар ӕмбырды кӕнӕ, кӕм цӕры, уым кӕй ахъӕр уыдзӕн, йе та ӕмбырд кӕй хъӕуы бафӕдзӕхсын, цӕмӕй уыцы адӕймагӕй сӕхи хизой. Ӕмӕ уӕд, «Нӕ цард ӕмӕ нӕ лӕггад» чи хуыйны, уыцы фембӕлды цыбыртӕй фехъусын кӕнынц: «Барадон комитет [мыггаг ӕмӕ ном] бауайдзӕф кодта».

ИСКӔЙ ӔМБЫРДӔЙ АЦУХ КӔНЫН КУЫ БАХЪӔУА

²⁵ Иуӕй-иу хатт адӕймагӕн тӕригъӕд аразгӕйӕ йӕ зӕрдӕ ныддур вӕййы ӕмӕ йӕ нӕ бафӕнды, цӕмӕй йын баххуыс кӕной. Барадон комитеты рӕстӕг йӕ хъуыддӕгтӕй бӕрӕг нӕ вӕййы, кӕй ӕрфӕсмон кодта, уый (Хъуыд. 26:20). Уӕд та куыд? Ахӕм уавӕрты, чи не ’рфӕсмон кодта, уыцы адӕймаджы фӕхъӕуы ӕмбырдӕй ацух кӕнын, цӕмӕй йын Йегъовӕйы сыгъдӕг адӕмимӕ иумӕйагӕй мацыуал уа. Афтӕмӕй ӕмбырды ӕфсымӕрты ӕмӕ хоты ӕвзӕр зондыл ничи араздзӕн ӕмӕ сын се ’гъдау ӕмӕ сӕ уырнындзинад дӕр ничи халдзӕн. Стӕй ӕмбырды ном дӕр нӕ фӕчъизи уыдзӕн (Дык. з. 21:20, 21; 22:23, 24). Коринфы ӕмбырдӕй иу адӕймаг цы худинаджы митӕ кодта, уый тыххӕй апостол Павел куы базыдта, уӕд хистӕр нӕлгоймӕгтӕн ныффӕдзӕхста, зӕгъгӕ, «уыцы адӕймаджы Сайтаны бар бакӕнут... цӕмӕй, ӕмбырдӕн цы хорз зондахаст ис, уый ахӕм уа Хицауы бон дӕр» (1 Кор. 5:5, 11–13). Павел ма ныффыста, ӕмбырдӕй ма ноджыдӕр кӕй ацух кодта, фыццаг ӕнусы рӕстдзинады ныхмӕ чи цыди, ахӕм адӕймӕгты дӕр (1 Тим. 1:20).

²⁶ Иугӕр барадон комитет ахӕм хъуыдымӕ ӕрцыд, ӕмӕ, тӕригъӕд чи ракодта ӕмӕ чи нӕ фӕсмон кӕны, уыцы адӕймаджы ӕмбырдӕй ацух кӕнын хъӕуы, уӕд ын сӕ уынаффӕйы тыххӕй хъуамӕ зӕгъой ӕмӕ йын Фыстадмӕ гӕсгӕ бӕлвырд бамбарын кӕной, ӕмбырдӕй йӕ цӕй тыххӕй цух кӕнынц. Уый фӕстӕ та йын барадон комитет зӕгъдзӕн, зӕгъгӕ дӕм кӕд афтӕ кӕсы, ӕмӕ хистӕр нӕлгоймӕгтӕ цыдӕр раст нӕ бакодтой ӕмӕ дӕ кӕд хъаст бахӕссын фӕнды, уӕд дӕ хъӕуы дӕ хъаст писмойы ныффыссын ӕмӕ, разы цӕуыл нӕ дӕ, уый дзы бӕлвырд бамбарын кӕнын. Барадон комитет цы уынаффӕ рахаста, уый йын цы бон фехъусын кӕной, уыцы бонӕй нымайгӕйӕ йын авд боны ратдзысты. Ӕмӕ дзы кӕд уӕдмӕ хъаст фыстӕй райсой, уӕд хистӕр нӕлгоймӕгты совет районон цӕстдарӕгӕн фӕхабар кӕндзӕн, ӕмӕ уый фӕлтӕрдджын хистӕр нӕлгоймӕгтӕй скӕндзӕн комитет, цӕмӕй йын йӕ хъуыддаг ногӕй равзарой. Уыцы ӕфсымӕртӕ ӕппӕт хъарутӕй бацархайдзысты, цӕмӕй хъуыддаг цыбыр рӕстӕгмӕ равзарой (хъаст куы балӕвӕрдта, уӕдӕй иу къуырийӕ фылдӕр хъуамӕ ма рацӕуа, афтӕ). Кӕд адӕймаг хъаст бахаста, уӕд ӕмбырды нырма нӕ фехъусын кӕндзысты, кӕй йӕ ацух кодтой, уый тыххӕй. Фӕлӕ йын уӕддӕр уыцы рӕстӕг бар нал уыдзӕн, цӕмӕй фембӕлдты комментаритӕ дӕтта ӕмӕ-иу се ’ппӕты номӕй скува, стӕй ӕндӕр кадджын хӕстӕ дӕр ӕххӕст кӕна.

²⁷ Кӕй аххосджын кӕнынц, уыцы адӕймагӕн хъаст бахӕссыны фадат кӕй ис, уый ууыл дзурӕг у, ӕмӕ йӕм хӕларзӕрдӕ сты. Уый фӕрцы ма ноджыдӕр иу хатт йӕ бон у, цы йӕ тыхсын кӕны, уый тыххӕй радзурын. Уымӕ гӕсгӕ, адӕймаг, йӕ хъаст ын куы ’взарой, уӕд куы не ’рбацӕуа, уӕд ма хистӕр нӕлгоймӕгтӕ уый фӕстӕ дӕр бацархайдзысты, цӕмӕй йемӕ фембӕлой, ӕмӕ сын кӕд ницы рауайа, уӕд фехъусын кӕндзысты, ӕмбырдӕй йӕ кӕй ацух кодтой.

²⁸ Кӕд, тӕригъӕд чи сарӕзта, уый хъаст бахӕссын нӕ фӕнды, уӕд ын барадон комитеты ӕфсымӕртӕ зӕгъдзысты, кӕй йӕ хъӕуы ӕрфӕсмон кӕнын. Стӕй йын бамбарын кӕндзысты, цы аразын ӕй хъӕудзӕн, цӕмӕй ногӕй Йегъовӕйы Ӕвдисӕн суа. Уый йын стыр ӕххуыс уыдзӕн ӕмӕ дзурӕг уыдзӕн, ӕцӕгдӕр ыл кӕй тыхсынц, ууыл. Уыдӕттӕ йын куы ’мбарын кӕной, уӕд хъуамӕ бӕрӕг уа, ныфс сӕ кӕй ис, ӕмӕ йе ’взӕр митӕ ныууадздзӕн ӕмӕ фӕстӕмӕ Йегъовӕйы организацимӕ ӕрбаздӕхдзӕн (2 Кор. 2:6, 7).

КӔЙДӔР ӔМБЫРДӔЙ КӔЙ АЦУХ КОДТОЙ, УЫЙ ТЫХХӔЙ ХЪУСИНАГ

²⁹ Тӕригъӕд чи сарӕзта ӕмӕ чи нӕ фӕсмон кӕны, ахӕм адӕймаджы ӕмбырдӕй ацух кӕнын куы хъӕуа, уӕд уый тыххӕй цыбыртӕй фехъусын кӕндзысты: «[Мыггаг ӕмӕ ном] Йегъовӕйы Ӕвдисӕн нал у». Ӕмбырды иузӕрдион хотӕ ӕмӕ ӕфсымӕртӕ уыцы дыууӕ ныхасӕй дӕр бамбардзысты, дарддӕр сын уыцы адӕймагимӕ иумӕйагӕй кӕй мацыуал хъуамӕ уа (1 Кор. 5:11).

ИСЧИ ӔМБЫРДЫЛ ЙӔ КЪУХ КУЫ СИСА

³⁰ Донаргъуыд чи райста, уыдонӕй исчи йӕхӕдӕг куы зӕгъа, кӕй нал ӕй фӕнды, цӕмӕй йӕ Йегъовӕйы Ӕвдисӕныл нымайой кӕнӕ йӕ ахӕмӕй зоной, уӕд уыцы адӕймагӕй фӕзӕгъӕм, ӕмбырдыл йӕ къух систа, зӕгъгӕ. Йе та, чырыстон ӕмбырдыл йӕ къух кӕй систа, уый, чи зоны, бӕрӕг уа йӕ хъуыддӕгтӕй. Зӕгъӕм, Библийы ахуырӕдты ныхмӕ чи архайы ӕмӕ уый тыххӕй Йегъовӕйы тӕрхон кӕй баййафдзӕн, ахӕм организацимӕ бацыд (Ис. 2:4; Рарг. 19:17–21).

³¹ Фыццаг ӕнусы чырыстон диныл йӕ къух чи систа, уыдоны тыххӕй апостол Иоанн афтӕ ныффыста: «Уыдон уыдысты не ’хсӕн, фӕлӕ махӕй ацыдысты, уымӕн ӕмӕ махӕй нӕ уыдысты. Махӕй куы уыдаиккой, уӕд немӕ баззадаиккой» (1 Иоан. 2:19).

³² Ӕмбырдыл йӕ къух чи систа, уыцы адӕймагӕн Йегъовӕйы раз йӕ уавӕр тынг хицӕн кӕны, чи ӕрлӕмӕгъ ӕмӕ уацамынды чи нал цӕуы, уыцы чырыстоны уавӕрӕй. Адӕймаг ӕрлӕмӕгъ вӕййы, Хуыцауы Ныхас ӕдзух кӕй нал фӕиртасы, уый тыххӕй. Йе та зындзинӕдтыл сӕмбӕлы кӕнӕ рӕстдзинады тыххӕй ӕфхӕрд баййафы, ӕмӕ уый аххосӕй Йегъовӕйӕн афтӕ зӕрдиагӕй нал фӕлӕггад кӕны. Ахӕм адӕймагӕн ӕмбырды хистӕр нӕлгоймӕгтӕ ӕмӕ иннӕ хотӕ ӕмӕ ӕфсымӕртӕ дарддӕр ӕххуыс кӕндзысты, цӕмӕй та йӕ уырнындзинад сфидар уа (Ром. 15:1; 1 Фес. 5:14; Дзут. 12:12).

³³ Фӕлӕ, ӕмбырдыл барвӕндӕй йӕ къух чи систа, ахӕм чырыстоны тыххӕй та ӕмбырды цыбыртӕй фехъусын кӕнынц: «[Мыггаг ӕмӕ ном] Йегъовӕйы Ӕвдисӕн нал у». Ахӕм адӕймагмӕ дӕр ӕмбырд фӕкӕсы, ӕмбырдӕй кӕй ацух кодтой, уыцы адӕймагмӕ цы цӕстӕй фӕкӕсы, ахӕм цӕстӕй.

АДӔЙМАДЖЫ КУЫ ФӔНДА, ЦӔМӔЙ НОГӔЙ ЙЕГЪОВӔЙЫ ӔВДИСӔН СУА

³⁴ Ӕмбырдӕй кӕй ацух кодтой кӕнӕ ӕмбырдыл барвӕндӕй йӕ къух чи систа, ахӕм адӕймагӕн йӕ бон у, ӕмӕ та ногӕй Йегъовӕйы Ӕвдисӕн суа. Уый тыххӕй хъуамӕ бӕрӕг уа, кӕй ӕрфӕсмон кодта ӕмӕ хъуамӕ дзӕвгар рӕстӕджы дӕргъы йӕ цардӕй ӕвдиса, тӕригъӕды фӕндаг кӕй ныууагъта. Хъуамӕ бӕрӕг уа, кӕй йӕ фӕнды, цӕмӕй Йегъовӕимӕ ӕнгом уа. Ацы хъуыддаджы хистӕр нӕлгоймӕгты тагъд кӕнын нӕ хъӕуы. Уыцы адӕймагӕн, ӕцӕгдӕр кӕй ӕрфӕсмон кодта, уый хъуыддагӕй равдисынӕн хъуамӕ фаг рӕстӕг раттой – бирӕ мӕйтӕ, афӕдз кӕнӕ уымӕй дӕр фылдӕр, уавӕртӕ куыд домой, уымӕ гӕсгӕ. Хистӕр нӕлгоймӕгты совет ахӕм адӕймагӕй курдиат фыстӕй куы райса, уӕд йемӕ аныхас кӕндзӕн, адӕймаг ногӕй Йегъовӕйы Ӕвдисӕн суа, уый фӕдыл уынаффӕ чи рахӕсдзӕн, уыцы комитет. Уыцы комитет сбӕлвырд кӕндзӕн, адӕймаг «кӕй ӕрфӕсмон кодта, уый хъуыддагӕй» ӕвдисы ӕви нӕ, ӕмӕ аскъуыддзаг кӕндзӕн, ногӕй Йегъовӕйы Ӕвдисӕн суа, уый афон ын у ӕви нырма банхъӕлмӕ кӕсын хъӕуы (Хъуыд. 26:20).

³⁵ Ногӕй Йегъовӕйы Ӕвдисӕн суа, уый тыххӕй курдиат чи балӕвӕрдта, уыцы адӕймаджы кӕд ӕндӕр ӕмбырдӕй ацух кодтой, уӕд ног ӕмбырды, уыцы хъуыддаджы фӕдыл уынаффӕ чи рахӕсдзӕн, уыцы комитет йемӕ фембӕлдзӕн ӕмӕ йӕ курдиаты фӕдыл йемӕ аныхас кӕндзӕн. Кӕд уыцы комитеты хъуыдымӕ гӕсгӕ, адӕймагӕн уый бар раттӕн ис, цӕмӕй ногӕй Йегъовӕйы Ӕвдисӕн суа, уӕд уыцы комитеты ӕфсымӕртӕ уый тыххӕй зӕгъдзысты, цы ӕмбырдӕй йӕ ацух кодтой, уыцы ӕмбырды хистӕр нӕлгоймӕгты советӕн. Ӕмӕ уыцы хъуыддаг цы дыууӕ комитеты ӕвзарой, уыдон ӕмгуыст кӕндзысты, цӕмӕй раст уынаффӕ хаст ӕрцӕуа. Фӕлӕ, адӕймаг ногӕй Йегъовӕйы Ӕвдисӕн суа, уый фӕдыл уынаффӕ хъуамӕ рахӕсса, райдианы йын йӕ хъуыддаг цы ӕмбырды ӕвзӕрстой, уым уыцы хъуыддаджы фӕдыл цы комитет скӕной, уый.

АДӔЙМАГ НОГӔЙ ЙЕГЪОВӔЙЫ ӔВДИСӔН КӔЙ ССИ, УЫЙ ТЫХХӔЙ ХЪУСИНАГ

³⁶ Адӕймаг ногӕй Йегъовӕйы Ӕвдисӕн суа, уый фӕдыл уынаффӕ чи хъуамӕ рахӕсса, уыцы комитет куы сбӕлвырд кӕна, ӕмбырдӕй кӕй ацух кодтой кӕнӕ ӕмбырдыл йӕ къух чи систа, уыцы адӕймаг ӕцӕгдӕр кӕй ӕрфӕсмон кодта ӕмӕ йын уый бар раттӕн кӕй ис, цӕмӕй та ногӕй Йегъовӕйы Ӕвдисӕн суа, уӕд уый тыххӕй фехъусын кӕндзысты, райдианы йын йӕ хъуыддаг цы ӕмбырды ӕвзӕрстой, уым. Кӕд ныр ӕндӕр ӕмбырды ис, уӕд уыцы хабар уым дӕр фехъусын кӕндзысты. Хъусинаг уыдзӕн цыбыртӕй: «[Мыггаг ӕмӕ ном] ногӕй Йегъовӕйы Ӕвдисӕн сси».

ДОНАРГЪУЫД ЧИ РАЙСТА, АХӔМ СЫВӔЛЛОН ТӔРИГЪӔД КУЫ САРАЗА

³⁷ Донаргъуыд чи у, фӕлӕ нырма йӕ ныййарджытӕ дзуапп кӕмӕн дӕттынц, ахӕм сывӕллон тӕригъӕд куы сараза, уӕд уый тыххӕй фӕхабар кӕнын хъӕуы хистӕр нӕлгоймӕгтӕн. Хистӕр нӕлгоймӕгтӕ йын йӕ хъуыддаг куы ’взарой, уӕд хуыздӕр уаид, сывӕллонӕн йӕ ныййарджытӕ дӕр уым куы уаиккой (кӕд уыдон дӕр Йегъовӕйы Ӕвдисӕнтӕ сты, уӕд). Уыдон сӕ сывӕллоны сӕрыл нӕ хӕцдзысты ӕмӕ йӕ ӕфхӕрдӕй куыд бахизой, ууыл нӕ архайдзысты, фӕлӕ барадон комитетимӕ ӕмгуыст кӕндзысты. Стыр адӕймаг куы фӕрӕдийы, уӕд куыд вӕййы, афтӕ ам дӕр барадон комитет бацархайдзӕн, цӕмӕй йын йӕ рӕдыд бамбарынӕн баххуыс кӕной ӕмӕ йӕ раст фӕндагмӕ раздахой. Фӕлӕ сывӕллон йӕ митыл куы нӕ фӕсмон кӕна, уӕд ӕй ӕмбырдӕй ацух кӕндзысты.

ӔНӔАРГЪУЫД ХЪУСЫНГӔНӔГ ТӔРИГЪӔД КУЫ САРАЗА

³⁸ Ӕнӕаргъуыд хъусынгӕнӕг куы сараза тӕригъӕд, уӕд та куыд бакӕнын хъӕуы? Уый донаргъуыд Ӕвдисӕн кӕй нӕма у, уымӕ гӕсгӕ йӕ ӕмбырдӕй ацух кӕнӕн нӕй. Фӕлӕ, чи зоны, Библийы уагӕвӕрдтӕ дзӕбӕх не ’мбары, ӕмӕ йын фӕлмӕнӕй уынаффӕ куы раттой, уӕд ын уый баххуыс кӕна, цӕмӕй дарддӕр йӕхицӕн «раст фӕндӕгтӕ» араза (Дзут. 12:13).

³⁹ Тӕригъӕд чи сарӕзта, ахӕм ӕнӕаргъуыд хъусынгӕнӕгимӕ дыууӕ хистӕр нӕлгоймаджы фембӕлдзысты ӕмӕ бацархайдзысты, цӕмӕй йын баххуыс кӕной. Ӕмӕ кӕд не ’рфӕсмон кӕна, уӕд ӕмбырды хъӕудзӕн цыбыртӕй фехъусын кӕнын: «[Мыггаг ӕмӕ ном] ӕнӕаргъуыд хъусынгӕнӕг нал у». Уӕдӕй фӕстӕмӕ йӕм ӕмбырд кӕсдзӕн, дунейы иннӕ адӕммӕ цы цӕстӕй кӕсы, ахӕм цӕстӕй. Кӕд ӕй ӕмбырдӕй нӕ ацух кодтой, уӕддӕр чырыстӕттӕ цыфӕнды хъуыддаджы дӕр йемӕ къӕрцхъус уыдзысты (1 Кор. 15:33). Стӕй дзы ӕмбырд уацамынды хыгъд дӕр нал исдзӕн.

⁴⁰ Рӕстӕг куы рацӕуа, уӕд ахӕм адӕймаджы, чи зоны, бафӕнда, цӕмӕй та ногӕй суа хъусынгӕнӕг. Уӕд дыууӕ хистӕр нӕлгоймаджы йемӕ фембӕлдзысты ӕмӕ, йӕ уырнындзинад цы уавӕры ис, уый сбӕлвырд кӕндзысты. Ӕмӕ кӕд цӕттӕ уа, уӕд ӕмбырды цыбыртӕй фехъусын кӕндзысты: «[Мыггаг ӕмӕ ном] ногӕй сси ӕнӕаргъуыд хъусынгӕнӕг».

ЙЕГЪОВӔ АРФӔ КӔНЫ СЫГЪДӔГ ӔМӔ ФАРНУАРЗАГ АДӔМӔН

⁴¹ Абон йӕхи Хуыцауы ӕмбырдыл чи бӕтты, уыдон се ’ппӕт дӕр цин кӕнынц, Йегъовӕ йӕ адӕмы цы стыр арфӕдзинӕдтӕй хайджын кӕны, уыдоныл. Зӕгъӕн ис, ӕмӕ мах хизӕм сойджын хизӕнты ӕмӕ рӕстдзинады сыгъдӕг донӕй нӕ уд ӕфсадӕм. Йегъовӕ ма нӕ хъахъхъӕны йӕ организацийы фӕрцы, йӕ сӕргъы Йесо Чырысти, афтӕмӕй (Пс. 23; Ис. 32:1, 2). Ӕмӕ кӕд ацы фӕстаг бонты нӕ алыварс дунейы ӕдас ӕмӕ сабыр никуы у, уӕддӕр зӕгъӕн ис, ӕмӕ мах абон дӕр цӕрӕм дзӕнӕты ӕмӕ ницӕмӕй тӕрсӕм.

⁴² Ӕмбырды фарн ӕмӕ сыгъдӕгдзинад куы хъахъхъӕнӕм, уӕд адӕммӕ мах уылты дарддӕр дӕр кӕлдзӕн рӕстдзинады рухс (Матф. 5:16; Иак. 3:18). Йегъовӕ нын дарддӕр дӕр арфӕ кӕндзӕн, ӕмӕ нӕхи цӕстӕй фендзыстӕм, ноджы фылдӕр адӕм ӕй куыд базондзысты ӕмӕ уыдон дӕр немӕ иумӕ йӕ фӕндон куыд ӕххӕст кӕндзысты, уый.