Уӕлӕмхасӕн

Чырыстон ныййарджытӕ!

Кӕй зӕгъын ӕй хъӕуы, алкӕй дӕр уӕ фӕнды, цӕмӕй уӕ хъӕбултӕ Йегъовӕйы бауарзой ӕмӕ йын сӕхи снывонд кӕной. Куыд сын ис баххуыс кӕнӕн, цӕмӕй сӕ бон суа донаргъуыд райсын? Кӕд уыдзӕн зӕгъӕн, ӕмӕ уыцы ахсджиаг къахдзӕф саразынмӕ цӕттӕ сты?

Йесо йӕ фӕдылдзӕуджытӕн бафӕдзӕхста: «Ацӕут ӕмӕ мын ӕппӕт адӕмтӕй дӕр цӕттӕ кӕнут ахуыргӕнинӕгтӕ. Дӕттут сын донаргъуыд» (Матф. 28:19). Ацы ныхӕстӕм гӕсгӕ, цӕмӕй адӕймаг донаргъуыд райса, уый тыххӕй сӕйраджыдӕр хъуамӕ уа ахуыргӕнинаг, ома Чырыстийы ахуырӕдтӕ ӕрмӕст ӕмбаргӕ хъуамӕ ма кӕна ӕмӕ сыл ӕрмӕст ӕууӕндгӕ хъуамӕ ма кӕна, фӕлӕ ма йӕ цард дӕр уыдонмӕ гӕсгӕ араза. Ӕмӕ уый сӕ бон у, нырма гыццыл чи у, уыдонӕн дӕр.

Уӕ сывӕллӕттӕн алцӕмӕй дӕр фӕзминаг ут ӕмӕ сын Йегъовӕйы амындтӕ сӕ зӕрдӕты арф ӕвӕрут (Дык. з. 6:6–9). «Амондджынӕй цӕр ӕнустӕм!» чи хуыйны, уыцы чиныджы фӕрцы сын Библийы сӕйраг ахуырӕдтӕ бацамонут ӕмӕ сӕ сахуыр кӕнут Библийы уагӕвӕрдтыл арф хъуыды кӕнын ӕмӕ уыдонмӕ гӕсгӕ цӕрын. Уӕ сывӕллӕттӕн ӕххуыс кӕнут, цӕмӕй, цӕуыл ӕууӕндынц, уый иннӕтӕн сӕ бон уа сӕхи ныхӕстӕй ӕмбарын кӕнын (1 Пет. 3:15). Зонындзинӕдтӕ сын куы не ’вгъау кӕнат, сӕ ныфсыл сын ныфс куы ӕфтауат ӕмӕ бинонты ахуыр куы уадзат, стӕй Библи сӕхӕдӕг дӕр куы иртасой, ӕмбырдтӕм куы цӕуой ӕмӕ сын хорз ӕмбӕлттӕ куы уа, уӕд уый фӕрцы сӕ уырнындзинад фидар кӕндзӕн. Ӕмӕ ӕрмӕст донаргъуыд райсынмӕ нӕ уыдзысты цӕттӕ, фӕлӕ ма дарддӕр дӕр размӕ цӕудзысты. Сӕ разы сын, Хуыцауӕн ӕхсызгон чи уыдзӕн, ахӕм нысӕнттӕ ӕвӕрут.

Ӕмбисӕндты 20:11 фыст ис: «Сывӕллонӕн йӕ митӕм гӕсгӕ дӕр бӕрӕг вӕййы, цы аразы, уый сыгъдӕг ӕмӕ раст у ӕви нӕ». Уӕдӕ сывӕллон – фӕнды лӕппу уӕд, фӕнды чызг – Йесо Чырыстийы ахуыргӕнинаг кӕй сси ӕмӕ донаргъуыд райсынмӕ цӕттӕ кӕй у, уый цавӕр митӕм гӕсгӕ ис базонӕн?

Ахӕм сывӕллон хъуамӕ йӕ ныййарджытӕм хъуса (Хъуыд. 5:29; Кол. 3:20). 12-аздзыд Йесойы тыххӕй Библийы фыст ис, йӕ ныййарджытӕн «уыд коммӕгӕс», зӕгъгӕ (Лук. 2:51). Сывӕллонӕй ӕххӕстдзинад домын, бӕгуыдӕр, раст нӕ уыдзӕн. Фӕлӕ донаргъуыд райсын кӕй фӕнды, ахӕм сывӕллон ӕппӕт хъарутӕй архайдзӕн, цӕмӕй Йесойы фӕзма ӕмӕ йӕ зондзысты, йӕ ныййарджыты коммӕ чи кӕсы, ахӕм сывӕллонӕй.

Стӕй хъуамӕ бӕрӕг уа, Библи ахуыр кӕнын кӕй уарзы (Лук. 2:46). Дӕ сывӕллоны фӕфӕнды ӕмбырдтӕм цӕуын ӕмӕ дзы архайын? (Пс. 122:1). Библи алы бон дӕр ӕхсызгонӕй фӕкӕсы ӕмӕ йӕ фӕиртасы? (Матф. 4:4).

Донаргъуыд райсынмӕ цӕттӕ чи вӕййы, ахӕм сывӕллон фӕархайы Хуыцауы Паддзахад фыццаг бынаты ӕвӕрыныл (Матф. 6:33). Уый ӕмбары, йӕ хӕс кӕй у йӕ уырнындзинады тыххӕй иннӕтӕн дӕр дзурын. Алы уавӕрты дӕр фӕхъусын кӕны ӕмӕ нӕ фефсӕрмы кӕны, Йегъовӕйы Ӕвдисӕн кӕй у, уый тыххӕй йӕ ахуыргӕнджытӕн ӕмӕ йе ’мкъласӕгтӕн зӕгъын. «Нӕ цард ӕмӕ нӕ лӕггад» чи хуыйны, уыцы фембӕлды йын хӕслӕвӕрд куы вӕййы, уӕд ӕй дзӕбӕх бацӕттӕ кӕны.

Уымӕй уӕлдай, ӕвзӕр ӕмбӕлттимӕ нӕ иу кӕны ӕмӕ афтӕмӕй йӕхи хизы ӕвзӕр митӕй ӕмӕ ӕнӕгъдау цӕмӕйдӕрты (Ӕмб. 13:20; 1 Кор. 15:33). Уый бӕрӕг вӕййы, цавӕр музыкӕ, кинонывтӕ, телепередачӕтӕ ӕмӕ видеохъӕзтытӕ уарзы ӕмӕ интернетӕй куыд пайда кӕны, уымӕй дӕр.

Бирӕ сывӕллӕттӕ сӕ ныййарджыты фыдӕбонӕн саргъ кодтой, рӕстдзинад бауарзтой ӕмӕ ӕрыгонӕй донаргъуыд райстой. Йегъовӕ уӕ фыдӕбонӕн дӕр раарфӕ кӕнӕд! Ӕмӕ уӕ сывӕллӕттӕ уыцы ахсджиаг къахдзӕф куыд аразынц, уый уӕхи цӕстӕй цы фенат, уыцы хорзӕх уӕ уӕд!

Ӕнӕаргъуыд хъусынгӕнӕг!

Ӕнӕаргъуыд хъусынгӕнӕг уай ӕмӕ ӕмбырдимӕ иумӕ лӕггад кӕнай, уый стыр кад у. Рӕстдзинады фӕндагыл дын цы бантыст, уый тыххӕй раппӕлинаг дӕ. Библи кӕй ахуыр кӕныс, уый фӕрцы Хуыцауы базыдтай ӕмӕ йын йӕ зӕрдӕвӕрдтыл баууӕндыдтӕ (Иоан. 17:3; Дзут. 11:6).

Йегъовӕйы Ӕвдисӕнтимӕ Библи ахуыр кӕнын куы нӕма райдыдтай, уӕд, чи зоны, ӕндӕр динмӕ цыдтӕ йе та дын динтимӕ иумӕйагӕй ӕппындӕр ницы уыди. Чи зоны, Библимӕ гӕсгӕ раст чи нӕу, ӕндӕр ахӕм хъуыддӕгты дӕр архайдтай. Фӕлӕ ныр ӕрфӕсмон кодтай, ома, кӕддӕр цы ӕвзӕр хъуыддӕгтӕ кодтай, уыдонӕй де сӕфт федтай. Стӕй дӕ цард аивтай, ома, раздӕр цы ӕвзӕр хъуыддӕгтӕ кодтай, уыдон ныууагътай ӕмӕ ӕппӕт хъарутӕй архайыс, Хуыцауы цӕсты раст цы у, уый аразыныл. Ӕмӕ уымӕй бӕрӕг у дӕ уырнындзинад (Хъуыд. 3:19).

Йе та, чи зоны, Хуыцауы Ныхас зоныс «дӕ гыццылӕй фӕстӕмӕ». Ӕмӕ уый фӕрцы дӕхи бахызтай ӕнӕгъдау митӕй ӕмӕ стыр тӕригъӕдтӕй (2 Тим. 3:15). Ды сахуыр дӕ де ’мгӕртты ныхмӕ фидар лӕууын ӕмӕ, Йегъовӕ ӕвзӕрыл ноджыдӕр цы хъуыддӕгтӕ нымайы, уыдонӕй дӕхи хизын. Дӕ уырнындзинад равдыстай, раст диныл фидар кӕй хӕцыс ӕмӕ, цӕуыл ӕууӕндыс, уый тыххӕй иннӕтӕн дӕр кӕй дзурыс, уымӕй. Стӕй хъусын кӕнын дӕр ахуыр кодтай. Ӕмӕ ныр уынаффӕ рахастай, ӕмӕ ӕнӕаргъуыд хъусынгӕнӕг сдӕ.

Йегъовӕйы стырӕй базыдтай ӕви рӕстдзинад дӕ гыццылӕй фӕстӕмӕ зоныс,– ӕвӕццӕгӕн, хъуыды кӕныс, рӕстдзинады фӕндагыл ма дӕ ноджыдӕр цы дыууӕ къахдзӕфы скӕнын хъӕуы, уыдоныл – дӕхи Хуыцауӕн снывонд кӕныныл ӕмӕ донаргъуыд райсыныл. Дӕхи Йегъовӕйӕн снывонд кӕндзынӕ, куы йӕм скувай ӕмӕ йын куы зӕгъай, ӕнустӕм ӕрмӕстдӕр дӕуыл уыдзынӕн иузӕрдион, зӕгъгӕ (Матф. 16:24). Уый фӕстӕ донаргъуыд райсдзынӕ ӕмӕ афтӕмӕй ӕргом равдисдзынӕ, дӕхи Йегъовӕйӕн кӕй снывонд кодтай (Матф. 28:19, 20). Ӕмӕ уӕд суыдзынӕ Йегъовӕ Хуыцауы лӕггадгӕнӕг. Уый цӕй стыр кад у!

Фӕлӕ Библи ахуыр кӕнгӕйӕ базыдтай, алыхуызон зындзинӕдтыл кӕй ӕмбӕлдзынӕ. Ӕвӕццӕгӕн, хъуыды кӕныс, Йесо донаргъуыд куы райста, уымӕй йыл гыццыл фӕстӕдӕр цы хабар ӕрцыд, уый. «Йесойы Хуыцауы сыгъдӕг тых акодта ӕдзӕрӕг быдырмӕ, ӕмӕ йӕ уым Хӕйрӕг фӕлвӕрдта» (Матф. 4:1). Уӕдӕ донаргъуыды фӕстӕ ды дӕр ӕнхъӕлмӕ кӕс ноджы фылдӕр фӕлварӕнтӕм (Иоан. 15:20). Фӕлварӕнтӕ алыхуызӕттӕ уыдзысты. Чи зоны, дӕ бинонтӕ цӕуой дӕ ныхмӕ (Матф. 10:36). Йе та дыл, чи зоны, кӕимӕ ахуыр кӕныс кӕнӕ кӕимӕ кусыс, уыдон, стӕй дӕ раздӕры ӕмбӕлттӕ худой. Фӕлӕ алкӕддӕр дӕ зӕрдыл дар Йесойы ныхӕстӕ. Фыст сты Марчы 10:29, 30 стихты: «Ӕцӕг уын зӕгъын: мӕн тыххӕй ӕмӕ хорз хабары тыххӕй йӕ хӕдзар, кӕнӕ йе ’фсымӕрты, кӕнӕ йӕ хоты, кӕнӕ йӕ мады, кӕнӕ йӕ фыды, кӕнӕ йӕ сывӕллӕтты, кӕнӕ йӕ зӕххытӕ чи ныууагъта, уыдонӕй иу дӕр ахӕм нӕй, ӕмӕ, кӕд ӕфхӕрд ӕййафдзӕн, уӕддӕр абон сӕдӕ хатты фылдӕр чи не ссара хӕдзӕрттӕ, ӕфсымӕртӕ, хотӕ, мадӕлтӕ, сывӕллӕттӕ ӕмӕ зӕххытӕ, ӕмӕ фидӕны та – ӕнусон цард». Уӕдӕ дарддӕр дӕр ӕппӕт хъарутӕй архай, цӕмӕй Йегъовӕимӕ ӕнгом уай ӕмӕ дӕ цард йӕ рӕстаг уагӕвӕрдтӕм гӕсгӕ аразай.

Донаргъуыд райсын куы сфӕнд кӕнай, уӕд-иу уый тыххӕй зӕгъ хистӕр нӕлгоймӕгты советы координаторӕн. Ацы Уӕлӕмхасӕны дарддӕр цы фарстатӕ ис, уыдоныл хистӕр нӕлгоймӕгтӕ демӕ аныхас кӕндзысты, цӕмӕй феной, донаргъуыд райсынмӕ цӕттӕ дӕ ӕви нӕ. Дӕ бон у, ӕмӕ уал уыцы фарстатӕм, Библи дӕхӕдӕг куы фӕахуыр кӕныс, уыцы рӕстӕг ӕркӕсай.

Дӕхи куы цӕттӕ кӕнай, уӕд-иу рӕстӕг ссар, Библийӕ дзы цы стихтӕ ис, уыдон бакӕсынӕн ӕмӕ сыл ахъуыды кӕнынӕн. Чи зоны-иу дӕ бафӕнда ацы чиныджы кӕнӕ ӕндӕр искуы дӕ хъуыдытӕ цыбыртӕй афыссын. Хистӕр нӕлгоймӕгтимӕ ныхас кӕнгӕйӕ дӕ бон уыдзӕн дӕ чиныг байгом кӕнын ӕмӕ дӕ фыстытӕм дӕр кӕсын. Кӕд дӕм фарстатӕй кӕцыдӕртӕ зынӕмбарӕн фӕкӕсой, уӕд-иу, демӕ Библи чи ахуыр кӕны, уыцы хъусынгӕнӕджы кӕнӕ хистӕр нӕлгоймӕгты бафӕрс.

Афтӕ ма хъуыды кӕн, ӕмӕ хистӕр нӕлгоймӕгтӕ демӕ ацы фарстатыл куы ныхас кӕной, уӕд хъуамӕ даргъ кӕнӕ зондджын дзуаппытӕ дӕттай. Хуыздӕр уыдзӕн, дӕхи ныхӕстӕй хуымӕтӕг, комкоммӕ дзуапп куы раттай. Бирӕ фарстатӕн дзуапп дӕтгӕйӕ та хорз уыдзӕн Библийӕ иу кӕнӕ дыууӕ стихы ӕрхӕссын ӕмӕ, дӕ дзуапп Хуыцауы Ныхасӕй ист кӕй у, уый равдисын.

Кӕд бӕрӕг уа, ӕмӕ Библийы сӕйраг ахуырӕдтӕ хорз нӕма базыдтай, уӕд хистӕр нӕлгоймӕгтӕ бацархайдзысты, цӕмӕй дын исчи баххуыс кӕна. Афтӕмӕй Хуыцауы Ныхас раст ӕмбардзынӕ ӕмӕ йӕ куыд ӕмбарыс, уый дӕ бон уыдзӕн дӕхи ныхӕстӕй дзурын. Ӕмӕ уӕд фӕстӕдӕр дӕ бон уыдзӕн донаргъуыд райсын.

[Фиппаинаг ӕмбырды хистӕр нӕлгоймӕгтӕн: донаргъуыд райсын кӕй фӕнды, уыдонимӕ фарстатыл ныхас кӕнын куыд хъӕуы, уый фӕдыл бӕлвырд амындтӕ ис 208–212 фӕрстыл.]