Донаргъуыд райсын кӕй фӕнды, уыдонимӕ кӕронбӕттӕн фембӕлд

Йегъовӕйы Ӕвдисӕнтӕ донаргъуыд фӕдӕттынц конгрессты, ӕмӕ дзы уый фӕдыл вӕййы раныхас. Ӕфсымӕр уыцы раныхасы кӕрон фӕзӕгъы, цӕмӕй, донаргъуыд чи исы, уыдон сыстой ӕмӕ хъӕрӕй дзуапп раттой дыууӕ фарстайӕн:

1. Дӕ тӕригъӕдтыл ӕрфӕсмон кодтай, дӕхи Йегъовӕйӕн снывонд кодтай ӕмӕ, Хуыцау адӕмы Йесо Чырыстийы фӕрцы кӕй ирвӕзын кӕны, ууыл баууӕндыдтӕ?

2. Ӕмбарыс ӕй, донаргъуыд куы райсай, уӕд Йегъовӕйы Ӕвдисӕн кӕй суыдзынӕ ӕмӕ Йегъовӕйы организацийы кӕй лӕггад кӕндзынӕ?

Донаргъуыд чи исы, уыдон ацы фарстатӕн разыйы дзуапп куы раттынц, уӕд уымӕй ӕргом равдисынц, Чырысти йӕ цард мах тыххӕй кӕй радта, ууыл кӕй ӕууӕндынц ӕмӕ сӕ цард ӕнӕхъӕнӕй дӕр Йегъовӕйӕн кӕй снывонд кодтой (Ром. 10:9, 10). Уымӕ гӕсгӕ, донаргъуыд чи иса, уый уал хъуамӕ скува ӕмӕ ацы фарстатыл рагацау ахъуыды кӕна, цӕмӕй уый фӕстӕ фидарӕй дзуапп ратта.

Йегъовӕмӕ скуывтай ӕмӕ йын дзырд радтай, ӕрмӕстдӕр уымӕн кӕй лӕггад кӕндзынӕ ӕмӕ дын йӕ фӕндон ӕххӕст кӕнын царды ӕппӕты ахсджиагдӕр кӕй уыдзӕн, ӕмӕ йын афтӕмӕй дӕхи снывонд кодтай?

Иу хатт ма ахъуыды кӕн: ӕцӕгдӕр дӕ фӕнды, куыддӕр фадат фӕзына, афтӕ донаргъуыд райсын?

Донаргъуыд цавӕр уӕлӕдарӕсы ӕмбӕлы райсын? (1 Тим. 2:9, 10; Иоан. 15:19; Фил. 1:10).

Нӕ дарӕсӕй хъуамӕ бӕрӕг уа, «хӕдӕфсарм ӕмӕ ӕмбаргӕ» кӕй стӕм. Афтӕмӕй ӕвдисдзыстӕм, «Хуыцауыл иузӕрдион» кӕй стӕм. Уымӕ гӕсгӕ, донаргъуыд чи исдзӕн, уыдон, ӕгӕр гом чи у, ахӕм найӕн дарӕс, йе та, алыхуызон фыстытӕ кӕнӕ нывтӕ кӕуыл ис, ахӕм дарӕс не скӕндзысты. Хъуамӕ-иу скӕной аив, сыгъдӕг, зӕрдӕмӕдзӕугӕ ӕмӕ, уыцы уавӕры чи сфидаудзӕн, ахӕм дарӕс.

Донаргъуыд исгӕйӕ адӕймаг йӕхи куыд хъуамӕ дара? (Лук. 3:21, 22).

Ацы хъуыддаджы чырыстӕттӕн фӕзминаг у, Йесо донаргъуыд исгӕйӕ йӕхи куыд дардта, уый. Йесо ӕмбӕрста, донаргъуыд ахсджиаг къахдзӕф кӕй у, ӕмӕ уый бӕрӕг уыд йӕ зӕрдӕйы уагӕй дӕр ӕмӕ йӕ хъуыддӕгтӕй дӕр. Уымӕ гӕсгӕ, раст нӕ уаид, донаргъуыд кӕм дӕтдзысты, уым, чи не ’мбӕлы, ахӕм хъазӕн ныхӕстӕ кӕнын, ленчытӕ кӕнын, хъазын кӕнӕ ӕндӕр ахӕм митӕй уыцы хъуыддаджы кад дӕлӕмӕ кӕнын. Донаргъуыд чи райса, уый хъуамӕ йӕхи афтӕ дӕр ма дара, цыма ерысы рамбылдта. Донаргъуыд райсын цины хъуыддаг у, фӕлӕ цин кӕнынӕн дӕр уаг ӕмӕ ӕгъдау ис.

Ӕмбырдтӕм ӕдзух куы цӕуай ӕмӕ хотӕ ӕмӕ ӕфсымӕртыл дӕхи куы бӕттай, уӕд дын уый куыд баххуыс кӕндзӕн, Йегъовӕйӕн цы дзырд радтай, уымӕ гӕсгӕ цӕрынӕн?

Ахсджиаг цӕмӕн у донаргъуыды фӕстӕ дӕр Библи хорз пъланмӕ гӕсгӕ иртасын ӕмӕ ӕдзух уацамынды цӕуын?

АМЫНДТӔ ӔМБЫРДЫ ХИСТӔР НӔЛГОЙМӔГТӔН

Ӕнӕаргъуыд хъусынгӕнӕг хистӕр нӕлгоймӕгтӕн куы зӕгъа, донаргъуыд райсын мӕ фӕнды, зӕгъгӕ, уӕд ӕй хъуамӕ баразӕнгард кӕной, цӕмӕй лӕмбынӕг ӕркӕса ацы чиныджы 185–207 фӕрстӕм, хаймӕ «Фарстатӕ, донаргъуыд райсын кӕй фӕнды, уыдонӕн». Йӕ хъус ын ӕрдарын хъӕуы, 182 фарсыл чи райдайы, уыцы ӕрмӕгмӕ, «Ӕнӕаргъуыд хъусынгӕнӕг!», зӕгъгӕ. Уым дзырд цӕуы, йӕ бон куыд у йӕхи бацӕттӕ кӕнын, хистӕр нӕлгоймӕгтимӕ йын цы фембӕлдтӕ уыдзӕн, уыдонмӕ. Дзырд ма дзы цӕуы, уыцы фембӕлдты рӕстӕг йӕ бон кӕй уыдзӕн ацы чиныг гомӕй дарын ӕмӕ йӕ фыстытӕм кӕсын дӕр. Фӕлӕ уыцы фембӕлдты размӕ ацы фарстатӕ йемӕ исчи равзара, уый ницӕмӕнуал хъӕуы.

Донаргъуыд райсын кӕй фӕнды, уый хъуамӕ уый тыххӕй зӕгъа хистӕр нӕлгоймӕгты советы координаторӕн. Ӕфсымӕртӕ йын фаг рӕстӕг ратдзысты, цӕмӕй бакӕса «Фарстатӕ, донаргъуыд райсын кӕй фӕнды, уыдонӕн». Ӕмӕ йӕ стӕй хистӕр нӕлгоймӕгты советы координатор бафӕрсдзӕн, Йегъовӕмӕ скуывтай ӕмӕ йын дзырд радтай, йӕ фӕндон ын кӕй ӕххӕст кӕндзынӕ, ӕмӕ йын афтӕмӕй дӕхи снывонд кодтай, зӕгъгӕ. Ӕмӕ кӕд адӕймаг Йегъовӕйӕн йӕхи снывонд кодта, уӕд координатор хистӕр нӕлгоймӕгтӕй дыууӕйӕн бахӕс кӕндзӕн, цӕмӕй йемӕ аныхас кӕной, хайы «Фарстатӕ, донаргъуыд райсын кӕй фӕнды, уыдонӕн» цы фарстатӕ ис, уыдоныл. Иу хайыл йемӕ иу хистӕр нӕлгоймаг аныхас кӕндзӕн, иннӕ хайыл та – ӕндӕр хистӕр нӕлгоймаг. Уыцы фарстатыл аныхас кӕнынӕн, иннӕ хатт конгресс кӕд уыдзӕн, уый кӕд зӕгъдзысты, уымӕ ӕнхъӕлмӕ кӕсын нӕ хъӕуы.

Дыууӕ хайыл аныхас кӕнынӕн фаг вӕййы дыууӕ фембӕлды. Алы фембӕлд дӕр ауадзӕн ис иу сахатмӕ, фӕлӕ, кӕд хъӕуа, уӕд ыл фылдӕр рӕстӕг дӕр ис бахардз кӕнӕн. Алы фембӕлд дӕр хъӕуы куывдӕй райдайын ӕмӕ фӕуын. Фарстатыл ныхас кӕнгӕйӕ хистӕр нӕлгоймӕгтӕ дӕр ӕмӕ, донаргъуыд райсын кӕй фӕнды, уый дӕр хъуамӕ тагъд ма кӕной. Хистӕр нӕлгоймӕгтӕ сӕ хъуыддӕгтӕ афтӕ спълан кӕндзысты, цӕмӕй фыццаджыдӕр ацы хъуыддаг бакӕной.

Хуыздӕр уыдзӕн фарстатыл, донаргъуыд райсын кӕй фӕнды, уыдонӕй алкӕимӕ дӕр хицӕнӕй аныхас кӕнын, се ’ппӕтимӕ иумӕ нӕ, фӕлӕ. Адӕймаг алы фарстайы фӕдыл дӕр йӕ хъуыдытӕ куы зӕгъа, уӕд хистӕр нӕлгоймӕгтӕ фендзысты, рӕстдзинад куыд арф ӕмбары, уый ӕмӕ нӕ дызӕрдыг кӕндзысты, донаргъуыд райсынмӕ цӕттӕ кӕй у. Донаргъуыд райсын кӕй фӕнды, уыимӕ хицӕнӕй куы ныхас кӕной, уӕд ын йӕ хъуыдытӕ сӕрибарӕй дзурын ӕнцондӕр уыдзӕн. Лӕг ӕмӕ усимӕ ныхас кӕнӕн ис иумӕ.

Донаргъуыд райсын кӕй фӕнды, уый хо куы уа, уӕд хистӕр нӕлгоймаджы йемӕ фарстатыл аныхас кӕнын хъӕудзӕн, иннӕтӕ сӕ куыд уыной, фӕлӕ сӕ хъусгӕ куыд нӕ кӕной, афтӕ. Кӕд хъӕуа, цӕмӕй ма дзы ноджыдӕр исчи уа, уӕд уый хъуамӕ уа хистӕр нӕлгоймаг кӕнӕ кӕстӕриуӕггӕнӕг ӕфсымӕр, кӕцы хайыл ныхас кӕной, уымӕ гӕсгӕ. Ууыл дзырд цӕуы иннӕ абзацы.

Ӕмбырды хистӕр нӕлгоймӕгтӕ фаг куы нӕ уа, уӕд кӕстӕриуӕггӕнӕг ӕфсымӕртӕн (иннӕты ахуыр кӕнынмӕ хорз чи арӕхсы ӕмӕ ӕмбаргӕ чи у, ахӕмтӕн) бахӕс кӕнӕн ис, цӕмӕй, донаргъуыд райсын кӕй фӕнды, уыдонимӕ аныхас кӕной, хайы «1 хай. Библийы сӕйраг ахуырӕдтӕ» цы фарстатӕ ис, уыдоныл. Фӕлӕ, «2 хай. Чырыстон цард», зӕгъгӕ, чи хуыйны, уыцы хайыл хъуамӕ ныхас кӕной ӕрмӕстдӕр хистӕр нӕлгоймӕгтӕ. Кӕд ӕмбырды бӕрнон ӕфсымӕртӕ фаг нӕй, уӕд уый тыххӕй зӕгъӕн ис районон цӕстдарӕгӕн, цӕмӕй сын баххуыс кӕна сыхаг ӕмбырды искӕй ссарынӕн.

Сывӕллоны куы фӕнда донаргъуыд райсын ӕмӕ йемӕ уыцы хӕйттыл куы ныхас кӕной, уӕд йӕ уырнӕг ныййарӕг (кӕнӕ ныййарджытӕ) дӕр хъуамӕ уым уа. Кӕд уый гӕнӕн нӕй, уӕд дыууӕ хайыл дӕр йемӕ хъуамӕ ныхас кӕной дыууӕ хистӕр нӕлгоймаджы (кӕнӕ хистӕр нӕлгоймаг ӕмӕ кӕстӕриуӕггӕнӕг ӕфсымӕр, кӕцы хайыл ныхас кӕной, уымӕ гӕсгӕ).

Хистӕр нӕлгоймӕгтӕ сбӕрӕг кӕндзысты, донаргъуыд райсын кӕй фӕнды, уый Библийы сӕйраг ахуырӕдтӕ хорз ӕмбары ӕви нӕ. Стӕй ма сӕ хъус дардзысты, адӕймаг рӕстдзинад куыд тынг уарзы ӕмӕ Йегъовӕйы организацийӕн куыд аргъ кӕны, уымӕ дӕр. Кӕд Библийы сӕйраг ахуырӕдтӕ не ’мбары, уӕд хистӕр нӕлгоймӕгтӕ спълан кӕндзысты, цӕмӕй йын уыцы хъуыддаджы исчи баххуыс кӕна, ӕмӕ фӕстӕдӕр донаргъуыд райсынмӕ цӕттӕ уа. Кӕмӕндӕр та, чи зоны, хъӕуа рӕстӕг раттын, цӕмӕй хъусын кӕныны хъуыддаг тынгдӕр бауарза кӕнӕ йӕ хъуыддӕгтӕй бӕрӕг уа, Хуыцауы организаци цы разамынд дӕтты, уымӕ кӕй хъусы. Хистӕр нӕлгоймӕгтӕ ӕмбаргӕ ӕмӕ арфуынӕг куы уой, уӕд сӕ алы хайыл аныхас кӕнынӕн дӕр сахат кӕнӕ уымӕй гыццыл фылдӕр йеддӕмӕ нӕ бахъӕудзӕн, адӕймаг донаргъуыд райсынмӕ цӕттӕ у ӕви нӕ, уый сбӕрӕг кӕнынӕн. Кӕд иуӕй-иу фарстатыл фылдӕр фӕхъӕуы аныхас кӕнын, иннӕтыл та – къаддӕр, уӕддӕр сӕ хъуамӕ иууылдӕр равзарой.

Дыккаг фембӕлды фӕстӕ, адӕймагимӕ фарстатӕ чи ӕвзӕрста, уыцы хистӕр нӕлгоймӕгтӕ иумӕ фембӕлдзысты ӕмӕ аскъуыддзаг кӕндзысты, донаргъуыд райсынмӕ цӕттӕ у ӕви нӕ. Сӕ зӕрдыл дардзысты йӕ раздӕры цард, йӕ бон цас у, уый ӕмӕ ӕндӕр хабӕрттӕ дӕр. Мах тынг фӕнды, Йегъовӕйы ӕппӕт зӕрдӕйӕ чи бауарзта ӕмӕ Библийы сӕйраг ахуырӕдтӕ чи ӕмбары, уыдонӕн баххуыс кӕнын. Уе ’ххуысы фӕрцы, донаргъуыд райсын кӕй фӕнды, уыдон хорз цӕттӕ уыдзысты, Хуыцау нӕ алкӕмӕн дӕр цы ахсджиаг хъуыддаг бахӕс кодта, уымӕ – хорз хабар хъусын кӕнынмӕ.

Уый фӕстӕ йын, фарстатӕ йемӕ чи ӕвзӕрста, уыцы хистӕр нӕлгоймӕгтӕй сӕ иу кӕнӕ дыууӕйӕ дӕр зӕгъдзысты, донаргъуыд райсынмӕ цӕттӕ у ӕви нӕ. Кӕд цӕттӕ у, уӕд хистӕр нӕлгоймӕгтӕ хъуамӕ йемӕ равзарой, 206 ӕмӕ 207 фӕрстыл цы ӕрмӕг ис, уый, «Донаргъуыд райсын кӕй фӕнды, уыдонимӕ кӕронбӕттӕн фембӕлд», зӕгъгӕ. Кӕд чиныг «Амондджынӕй цӕр ӕнустӕм!» кӕронмӕ нӕма рацыд, уӕд ӕй хистӕр нӕлгоймӕгтӕ хъуамӕ сразӕнгард кӕной, цӕмӕй йӕ донаргъуыды фӕстӕ кӕронмӕ рацӕуа. Донаргъуыд райсын кӕй фӕнды, уыцы адӕймагӕн зӕгъут, йӕ донаргъуыды бон фыст кӕй ӕрцӕудзӕн, ӕмбырды йӕ номыл цы карточкӕ конд ис, уым, «Хъусынгӕнӕджы карточкӕ»-йы. Йӕ зӕрдыл ын ӕрлӕууын кӕнут, хистӕр нӕлгоймӕгтӕ хъусынгӕнӕджы тыххӕй информаци уый тыххӕй кӕй ныффыссынц, цӕмӕй нӕ организацийӕн йӕ бон уа, Йегъовӕйы Ӕвдисӕнтӕ ӕгас зӕххыл дӕр цы куыст кӕнынц, уымӕн разамынд дӕттын, стӕй цӕмӕй хъусынгӕнӕгӕн йӕ бон уа уыцы куысты архайын ӕмӕ йын хистӕр нӕлгоймӕгтӕ йӕ ныфсыл ныфс ӕфтауой ӕмӕ йын разамынд дӕттой. Стӕй ма хистӕр нӕлгоймӕгтӕн сӕ бон у ног хъусынгӕнджытӕн сӕ зӕрдыл ӕрлӕууын кӕнын, хъусынгӕнджыты тыххӕй сӕм цы информаци ис, уымӕй кӕй пайда кӕндзысты, сайты jw.org статьяйы «Глобальная политика защиты данных Свидетелей Иеговы» цы фыст ис, уымӕ гӕсгӕ. Ацы фембӕлд 10 минутӕй фылдӕр хъуамӕ ма уа.

Хъусынгӕнӕг донаргъуыд куы райса, уымӕй иу азы фӕстӕ дыууӕ хистӕр нӕлгоймаджы хъуамӕ йемӕ фембӕлой, цӕмӕй йӕ бафидар кӕной ӕмӕ йын, йӕ лӕггад фӕхуыздӕр кӕнӕн куыд ис, уый фӕдыл уынаффӕтӕ раттой. Хистӕр нӕлгоймӕгтӕй сӕ иу хъуамӕ уа, цы уацамындон къорды ис, уый цӕстдарӕг. Кӕд хъусынгӕнӕг сывӕллон у ӕмӕ йӕ ныййарджытӕ (кӕнӕ сӕ дыууӕйӕ исчи) Йегъовӕйы Ӕвдисӕнтӕ сты, уӕд хъуамӕ уыдон дӕр уой йемӕ. Фембӕлд хъуамӕ афтӕ ацӕуа, цӕмӕй йын ӕхсызгон уа ӕмӕ йын йӕ ныфсыл ныфс бафтауа. Хистӕр нӕлгоймӕгтӕ йемӕ аныхас кӕндзысты, рӕстдзинады йын цы бантыст, ууыл. Стӕй йын бӕлвырд уынаффӕтӕ ратдзысты, цӕмӕй йӕ мацы къуылымпы кӕна ӕдзухдӕр Библи иртасын, алы бон дӕр ӕй кӕсын, алы къуыри дӕр бинонты ахуыр уадзын, алы ӕмбырдмӕ дӕр цӕуын ӕмӕ дзы архайын ӕмӕ алы къуыри дӕр хъусын кӕнын (Еф. 5:15, 16). Кӕд чиныг «Амондджынӕй цӕр ӕнустӕм!» кӕронмӕ ахуыр нӕма фӕци, уӕд хистӕр нӕлгоймӕгтӕ хъуамӕ искӕмӕн бахӕс кӕной, цӕмӕй йемӕ ахуыр кӕна. Хистӕр нӕлгоймӕгтӕ дзы хъуамӕ фылдӕр ӕппӕлгӕ кӕной. Уынаффӕтӕ ӕмӕ йын амындтӕ та иу-дыууӕ фаг уыдзӕн.