Хуыцау идӕдз сылгоймагӕн йӕ фырты райгас кодта

Хус рӕстӕг куы уыд, уӕд Йегъовӕ Илийайӕн загъта: «Ацу Сарептӕмӕ. Уым дын иу идӕдз сылгоймаг бахӕрын кӕндзӕн». Илийа уырдӕм куы ’рцыд, уӕд горӕты кулдуары раз иу мӕгуыр идӕдз сылгоймаджы сугтӕ ӕмбырд кӕнгӕ федта. Илийа йын загъта, дон-ма мын рахӕсс, зӕгъгӕ. Сылгоймаг донмӕ куы фӕцӕйцыд, уӕд ма йын Илийа загъта: «Дӕ хорзӕхӕй, дзулы къӕбӕр дӕр-ма мын рахӕсс». Фӕлӕ йын сылгоймаг загъта: «Нӕй мӕм дзул. Ӕрмӕстдӕр ма мӕм иу гыццыл ссад ӕмӕ сой ис. Ӕмӕ дзы мӕхи ӕмӕ мӕ лӕппуйы фаг йеддӕмӕ хӕринаг нӕ рауайдзӕн». Илийа йын загъта: «Дзул мын куы скӕнай, уӕд де ссад нӕ фӕуыдзӕн ӕмӕ дӕ сой нӕ фӕкъаддӕр уыдзӕн, цалынмӕ зӕххыл къӕвда нӕ рауара, уӕдмӕ. Афтӕ Йегъовӕ загъта».

Гъемӕ идӕдз сылгоймаг дӕр сӕхимӕ ацыд ӕмӕ Йегъовӕйы пехуымпарӕн дзул скодта. Ӕмӕ Йегъовӕ куыддӕриддӕр загъта, афтӕ сылгоймагӕн ӕмӕ йӕ фыртӕн алкӕддӕр уыд, цы бахордтаиккой, уый. Цалынмӕ хус рӕстӕг уыд, уӕдмӕ йе ссад ӕмӕ йӕ сой нӕ фӕуд кодтой.

Фӕстӕдӕр ӕрцыд ӕвзӕр хабар. Сылгоймагӕн йӕ гыццыл лӕппу тынг фӕрынчын ӕмӕ амард. Ӕмӕ уӕд Илийайӕн лӕгъстӕ кӕнын райдыдта, цӕмӕй йын баххуыс кодтаид. Илийа лӕппуйы йӕ мады хъӕбысӕй райста, уӕллаг уатмӕ йӕ схаста ӕмӕ йӕ уым хуыссӕныл ӕрӕвӕрдта. Стӕй Хуыцаумӕ скуывта: «О Йегъовӕ, курын дӕ, ацы сывӕллоны фӕстӕмӕ цардмӕ раздах!» Цымӕ Йегъовӕ куыд бакӕндзӕн? Куы йӕ райгас кӕна, уӕд уый уыдзӕн стыр диссаг! Цӕмӕн? Куыд ӕй зонӕм, афтӕмӕй уый размӕ никуы ничи райгас. Стӕй уыцы сылгоймаг ӕмӕ йӕ лӕппу израилӕгтӕ дӕр нӕ уыдысты.

Фӕлӕ уӕддӕр Йегъовӕ лӕппуйы фӕстӕмӕ цардмӕ раздӕхта, райгас ӕй кодта! Илийа сылгоймагӕн загъта: «Уыныс, дӕ лӕппу ӕгас у!» Сылгоймагӕн йӕ цинӕн кӕрон дӕр нал уыд, ӕмӕ Илийайӕн загъта: «Ныр ӕй зонын, ды ӕцӕгдӕр Хуыцауы адӕймаг дӕ! Ды дзурыс, Йегъовӕ дын цы фӕзӕгъы, уый, ӕмӕ йӕ ныхас алкӕддӕр сӕххӕст вӕййы».