Ахӕстонгӕс рӕстдзинад базыдта

Филиппты уыд, йӕ мидӕг дӕлимон кӕмӕн уыди, иу ахӕм лӕггадгӕнӕг-чызг. Уыцы дӕлимон ын ахӕм тых радта, цӕмӕй дӕсны фӕрстаид, ӕмӕ чызг уымӕй йӕ хицӕуттӕн бирӕ ӕхца куыста. Павел ӕмӕ Силӕ уыцы горӕтмӕ куы ’рцыдысты, уӕд чызг бирӕ бонты дӕргъы сӕ фӕдыл цыди ӕмӕ хъӕр кодта: «Ацы адӕм сты Иунӕг Стыр Хуыцауы цагъартӕ!» Ӕппынфӕстаг Павел дӕлимонӕн загъта: «Йесо Чырыстийы номӕй дын зӕгъын: рацу дзы!» Ӕмӕ дӕлимон чызгӕй рацыд.

Чызджы хицӕуттӕ уый куы бамбӕрстой, ӕмӕ сын ныр ӕхца нал кусдзӕн, уӕд тынг смӕсты сты. Уыдон Павелы ӕмӕ Силӕйы ӕрцахстой ӕмӕ сӕ горӕты хицӕуттӕм акодтой ӕмӕ сын загътой: «Ацы нӕлгоймӕгтӕ нын нӕ закъӕттӕ халынц ӕмӕ нын нӕ горӕт змӕнтынц!» Уӕд хицӕуттӕ Павелы ӕмӕ Силӕйы фӕнӕмын кодтой ӕмӕ сӕ ахӕстоны сбадын кодтой. Ахӕстонгӕс сӕ ахӕстоны рӕбинагдӕр ӕмӕ талынгдӕр хайы баппӕрста ӕмӕ сын сӕ къӕхтӕ хъӕдын хъадаманты бакодта.

Павел ӕмӕ Силӕ Йегъовӕйӕн кады зарджытӕ зарын райдыдтой, ӕмӕ сӕ иннӕ ахст адӕм дӕр хъуыстой. Ӕмбисӕхсӕв ӕнӕнхъӕлӕджы зӕхх афтӕ тынг нынкъуысыд, ӕмӕ ахӕстон ӕнӕхъӕнӕй нызмӕлыд. Ӕвиппайды дуӕрттӕ фегом сты, ахст адӕмӕн та сӕ рӕхыстӕ ӕмӕ сӕ хъадамантӕ феуӕгъд сты. Ахӕстонгӕс уырдӕм куы балыгъд ӕмӕ дуӕрттӕ гомӕй куы федта, уӕд афтӕ фенхъӕлдта, ӕмӕ ахст адӕм иууылдӕр алыгъдысты. Уӕд йӕ хъама фелвӕста, ӕмӕ хъуамӕ йӕхи амардтаид.

Фӕлӕ Павел ныхъхъӕр кодта: «Дӕхицӕн мацы бакӕн! Мах иууылдӕр ам стӕм!» Уӕд уый дӕр мидӕмӕ балыгъд, Павел ӕмӕ Силӕйы раз йӕ зонгуытыл ӕрхауд ӕмӕ сӕ бафарста: «Цы кӕнын мӕ хъӕуы, цӕмӕй фервӕзон?» Уыдон ын загътой: «Хъуамӕ дӕхӕдӕг дӕр ӕмӕ дӕ хӕдзаронтӕ дӕр Йесойыл баууӕндат». Стӕй йын Павел ӕмӕ Силӕ йӕхицӕн дӕр ӕмӕ, йӕ хӕдзары чи уыди, уыдонӕн дӕр Йегъовӕйы тыххӕй радзырдтой, ӕмӕ иууылдӕр донаргъуыд райстой.