Кӕсджыты фарстытӕ

Библи туджы тыххӕй цы дзуры, уый хынцгӕйӕ Иегъовӕйы Ӕвдисӕнтӕн цавӕр ахаст ис, рынчыны дзӕбӕх кӕнынӕн ын йӕхи тугӕй куы фӕпайда кӕнынц, уымӕ?

Уыцы фарст скъуыддзаггӕнгӕйӕ, чырыстон, йӕхимӕ хуыздӕр куыд кӕсы кӕнӕ йын дохтыр цы дзуры, уымӕ гӕсгӕ хъуамӕ ма архайа, фӕлӕ хъуамӕ лӕмбынӕг ӕркӕса, уый тыххӕй Библи цы дзуры, уымӕ ӕмӕ йыл ахъуыды кӕна. Уый тынг ахсджиаг фарст у, уымӕн ӕмӕ йын ӕндавы йӕ ахастытыл Иегъовӕимӕ.

Иегъовӕ, нӕ Царддӕттӕг Хуыцау, бафӕдзӕхста, цӕмӕй адӕймаг туг йӕ буары мацы хуызы уадза (Уӕвынад 9:3, 4). Хуыцау рагон Израилӕн цы Закъон радта, уым бӕлвырдӕй бамбарын кодта, туг цард кӕй у ӕмӕ дзы уымӕ гӕсгӕ ӕрмӕстдӕр иу хъуыддаджы кӕй ис пайдагӕнӕн, уый. Хуыцау загъта: «Буары уд [кӕнӕ йӕ цард] туг у ӕмӕ йӕ Ӕз сымахӕн радтон нывондхӕссӕныл калынӕн, цӕмӕй дзы уӕ удтӕ сыгъдӕг кӕнат». Адӕймаг-иу кусарт куы кодтаид, уӕд та? Хуыцау загъта: «Хъуамӕ йын йӕ туг рауадза ӕмӕ йӕ зӕххы бын фӕкӕна»a (Левит 17:11, 13). Иегъовӕ уыцы фӕдзӕхст иу ӕмӕ дыууӕ хатты не сфӕлхат кодта (Дыккаг закъон 12:16, 24; 15:23). Дзуттаг ӕвзагыл иу бӕрӕгуаты дзырдӕуы: «Тугӕн нӕй ӕмбырдгӕнӕн ӕмӕ йӕ искуы дарӕн, уый хъӕуы калын, куыд пайда кӕнынӕн чи нӕ бӕззы, ахӕм цыдӕр» («Soncino Chumash»). Израилӕгтӕ хъуамӕ макӕцы цӕрӕгуды туг истаиккой, ма йӕ дардтаиккой сӕхимӕ ӕмӕ дзы ма пайда кодтаиккой, уымӕн ӕмӕ уыдоны цард дӕр у Хуыцауы.

Мессиа куы амард, уӕдӕй фӕстӕмӕ Моисейы Закъон нал хъӕуы ӕххӕст кӕнын. Фӕлӕ туджы тыххӕй Хуыцауы цӕстӕнгас нӕ фӕивта, раздӕрау ӕй нымайы табуйагыл. Хуыцауы сыгъдӕг уды разамындӕй апостолтӕ чырыстӕттӕн бафӕдзӕхстой, зӕгъгӕ, «уӕхи уромут... тугӕй». Ацы фӕдзӕхстмӕ уӕлӕнгай цӕстӕй кӕсӕн нӕй. Хӕтындзинад ӕмӕ мӕнг хуыцӕуттӕн кувынӕй хи хизын куыд ахсджиаг у, уый дӕр афтӕ ахсджиаг у (Куыстытӕ 15:28, 29; 21:25). XX ӕнусы ӕгас дунейы дӕр туг дӕттын ӕмӕ туг исын куы райдыдтой, уӕд Иегъовӕйы Ӕвдисӕнтӕ бамбӕрстой, Хуыцауы Ныхасмӕ гӕсгӕ афтӕ аразыны бар кӕй нӕй, уыйb.

Хаттӕй-хатт дохтыртӕ рынчынӕн фӕзӕгъынц, цӕмӕй йын операцийӕ цалдӕр къуырийы раздӕр йӕхи тугӕй рауадзой ӕмӕ бахъуаджы сахат уыцы туг фӕстӕмӕ рынчыны бауадзой. Фӕлӕ туг ӕмбырд кӕнын, искуы йӕ дарын ӕмӕ йӕ стӕй фӕстӕмӕ буары бауадзын комкоммӕ у, Левит ӕмӕ Дыккаг закъоны чингуыты цы фыст ис, уый ныхмӕ. Тугӕн искуы ӕвӕрӕн нӕй, уый калын хъӕуы зӕхмӕ; уый нысан кӕны, Чи йӕ радта, фӕстӕмӕ йӕ уымӕн, ома Хуыцауӕн, кӕй дӕттӕм. Кӕд абон Моисейы Закъон йӕ тыхы нал ис, уӕддӕр Иегъовӕйы Ӕвдисӕнтӕ аргъ кӕнынц, уыцы Закъоны бындуры цы принциптӕ ис, уыдонӕн, ӕмӕ уымӕ гӕсгӕ цыфӕндыйӕ дӕр «сӕхи уромынц... тугӕй». Уӕдӕ мах нӕ туг дӕтгӕ дӕр никӕмӕн кӕнӕм ӕмӕ йӕ искуы дӕр не ’вӕрӕм, цӕмӕй йӕ, куы бахъӕуа, уӕд фӕстӕмӕ нӕ буары бауадзӕм, уымӕн ӕмӕ уый хъуамӕ зӕхмӕ калд цӕуа. Хуыцауы закъон нӕ дӕтты уый бар, цӕмӕй туг ахӕм хуызы ӕмбырд кӕнӕм ӕмӕ йӕ стӕй фӕстӕмӕ нӕ буары уадзӕм.

Тугӕй ма пайда кӕнынц ӕндӕр хуызы хос кӕныны мадзӕлттӕ ӕмӕ анализты рӕстӕджы дӕр, цыран бӕлвырдӕй зӕгъӕн нӕй, ӕмӕ Хуыцауы принципты ныхмӕ сты. Зӕгъӕм, чырыстӕттӕй бирӕтӕ туг радтынц анализтӕн, ӕмӕ уыцы тугӕй уый фӕстӕ никуыуал спайда кӕнынц, фӕлӕ йӕ акалынц. Дохтыртӕ ма, гӕнӕн ис, дзурой ӕндӕр вазыгджындӕр уавӕрты тыххӕй дӕр, цыран спайда кӕнын хъӕуы рынчынӕн йӕхи тугӕй.

Зӕгъӕм, операцийы рӕстӕджы гемоделюци куы фӕкӕнынц, уӕд тугӕй иу цасдӕр иуырдӕм ауадзынц. Буары зилдухгӕнгӕ цы туг баззайы, уый та схӕццӕ кӕнынц. Уый фӕстӕ буары ӕддейӕ цы туг зилдух кодта, уый фӕстӕмӕ бауадзынц рынчыны, ӕмӕ уый фӕрцы йӕ туджы гемоглобин фӕстӕмӕ схизы. Афтӕ хъӕдгомӕй цы туг фӕкӕлы, уый дӕр иу ранмӕ ӕрӕмбырд кӕнынц, ссыгъдӕг ӕй кӕнынц ӕмӕ туджы сырх чырӕгтӕ (эритроциттӕ) фӕстӕмӕ рынчыны туджы бауадзынц; уый хуыйны туг бавӕрын. Йе та рынчыны туг ауадзынц, рӕстӕгмӕ буары кӕцыдӕр хайы (зӕгъӕм, зӕрдӕйы, рӕуджыты кӕнӕ уыргты) куыст чи кӕны, ахӕм аппараты. Уый фӕстӕ аппаратӕй туг фӕстӕмӕ бацӕуы рынчыны буары. Ӕндӕр уавӕры та цасдӕр туг ауадзынц сепараторы (центрифугӕйы), цӕмӕй дзы ӕвзӕрӕй ӕмӕ чъизийӕ цы ис, уый аиуварс кӕной кӕнӕ та цӕмӕй туджы хӕйттӕй кӕцыдӕр рахицӕн кӕной ӕмӕ дзы буары ӕндӕр кӕцыдӕр хайы спайда кӕной. Вӕййы ма афтӕ дӕр, ӕмӕ рынчыны тугӕй цасдӕр сисынц, цӕмӕй сбӕлвырд кӕной, истӕмӕй хъӕстӕ у, исты вирус дзы ис ӕви нӕ, уый, кӕнӕ та йӕм цӕмӕй хостӕ бафтауой ӕмӕ йӕ уый фӕстӕ ногӕй бауадзой рынчыны.

Мадзӕлттӕ, гӕнӕн ис, алыхуызон уой, стӕй рӕстӕг куыд цӕуа, афтӕ, гӕнӕн ис, ахуыргӕндтӕ мысой ног ӕмӕ ног методтӕ рынчыны низыхатт базонынӕн ӕмӕ йӕ сдзӕбӕх кӕнынӕн. Мах хӕсджын не стӕм, цӕмӕй уыцы мадзӕлттӕй алкӕцыимӕ лӕмбынӕг зонгӕ кӕнӕм ӕмӕ ӕфсымӕртӕ ӕмӕ хоты куыд кӕнын хъӕуы, уый тыххӕй сын бӕлвырд уынаффӕтӕ дӕттӕм. Алы чырыстон дӕр хъуамӕ йӕхӕдӕг аскъуыддзаг кӕна, операци кӕнӕ йын хос кӕнын куы бахъӕуа, йе та анализтӕ куы дӕтта, уӕд йӕ тугӕй куыд пайда кӕндзӕн, уый. Уый хъуамӕ дохтыртӕй кӕнӕ иннӕ медицинон кусджытӕй развӕлгъау базона, йӕ тугӕн ын, гӕнӕн ис, цы араздзысты, уый тыххӕй. Ӕмӕ уый фӕстӕ хъуамӕ уынаффӕ рахӕсса йӕ намысмӕ гӕсгӕ. (Кӕс рамкӕйы.)

Алы чырыстон дӕр хъуамӕ йӕ зӕрдыл дара, йӕ цард Хуыцауӕн кӕй снывонд кодта ӕмӕ хӕсджын кӕй у ацы фӕдзӕхст ӕххӕст кӕнын: «Уарз дӕ Хицау Хуыцауы дӕ ӕппӕт зӕрдӕйӕ, ӕмӕ дӕ ӕппӕт удӕй, ӕмӕ дӕ ӕппӕт хъаруйӕ, ӕмӕ дӕ ӕппӕт зондӕй» (Лукайы 10:27). Кӕд дунейы адӕмӕн сӕ фылдӕрмӕ Хуыцау нымады дӕр нӕу, уӕд Иегъовӕйы Ӕвдисӕнтӕн та Хуыцауимӕ ахастытӕ сты сӕ царды иууыл зынаргъдӕр. Нӕ Царддӕттӕг Хуыцау алкӕйдӕр разӕнгард кӕны, Йесойы тугныккалдӕн цы тых ис, ууыл ӕууӕндынмӕ. Мах кӕсӕм: «[Йесо Чырыстийы] мидӕг махӕн ис балхӕнындзинад Йӕ Тугӕй, тӕригъӕдтӕн хатыр Йӕ хорз лӕвары хъӕздыгадӕй» (Ефесӕгтӕм 1:7).

[Фиппаинӕгтӕ]

[Рамкӕ/Нывтӕ 31 фарсыл]

ФАРСТЫТӔ АХЪУЫДЫ КӔНЫНӔН

Мӕ туджы иу хай мын мӕ буарӕй куы рауадзой, йӕ цыд ын ма ӕрлӕууын кӕной, афтӕмӕй, йе та йӕ рӕстӕгмӕ лӕууын дӕр куы ’ркӕной, уӕд мын мӕ намыс уый бар ратдзӕн, цӕмӕй уыцы туг мӕ буары хайыл нымайон ӕмӕ хъуыды кӕнон, зӕгъгӕ йӕ «зӕхмӕ калын» нӕ хъӕуы?

Библи туджы тыххӕй цы дзуры, уый зонгӕйӕ мӕ мӕ низыхатт сбӕлвырд кӕнынӕн кӕнӕ хос кӕнынӕн туг куы сисой, йе сконд ын куы фӕивой ӕмӕ мын ӕй фӕстӕмӕ мӕ буары куы бауадзой, уӕд мӕ намыс сыгъдӕг уыдзӕн?