Архай, цӕмӕй дӕ зӕрдӕйы Иегъовӕйы тас уа

«Уӕд та зӕрдӕйӕ уымӕ куы тырниккой, цӕмӕй мӕнӕй тӕрсой ӕмӕ мын ӕдзухдӕр мӕ фӕдзӕхстытӕ ӕххӕст кӕной» (ДЫККАГ ЗАКЪОН 5:29).

1. Цӕмӕ гӕсгӕ ис фидарӕй ӕууӕндӕн, адӕм кӕй ницӕмӕй уал тӕрсдзысты, ууыл?

АДӔМ ӕнусты дӕргъы цӕрынц тӕрсгӕ-ризгӕйӕ. Бирӕтӕ тӕрсынц ӕххормагдзинад, низтӕ, фыдракӕндтӕ ӕмӕ ма хӕстӕй. Уӕдӕ диссаг нӕу, Адӕймаджы барты ӕппӕтиумӕйаг декларацийы разныхасы кӕй дзырдӕуы, кӕм ничи ницӕмӕй уал тӕрсдзӕн, ахӕм дуне саразынылa. Нӕ амондӕн, Хуыцау йӕхӕдӕг дзуры, ахӕм дуне кӕй уыдзӕн; ӕрмӕст ӕй адӕм нӕ сараздзысты. Йӕ пехуымпар Михейы уылты нын Иегъовӕ зӕрдӕ бавӕрдта, йӕ адӕмӕн «тас [кӕм] никӕмӕй уыдзӕн», уыцы рӕстаг ног дунейӕ (Михей 4:4).

2. а) Хуыцауӕй кӕй хъуамӕ тӕрсӕм, уымӕ нӕ Фыстад куыд разӕнгард кӕны? ӕ) Хуыцауӕй тӕрсын нӕ хӕс кӕй у, ууыл хъуыдыгӕнгӕйӕ цавӕр фарстытӕ ӕвзӕры?

² Фӕлӕ тас гӕнӕн ис, ӕмӕ адӕймагыл зына хорзырдӕм дӕр. Фыстад Хуыцауы лӕггадгӕнджыты афтӕ арӕх дӕр уымӕн разӕнгард кӕны, цӕмӕй Иегъовӕйӕ тӕрсой. Моисей израилӕгтӕн загъта: «Уӕ Хуыцау Иегъовӕйӕ тӕрсут ӕмӕ йын лӕггад кӕнут» (Дыккаг закъон 6:13). Къорд ӕнустӕ фӕстӕдӕр Соломон та фыста: «Тӕрс ӕцӕг Хуыцауӕй, ӕмӕ йын йӕ фӕдзӕхстытӕ ӕххӕст кӕн. Уымӕн ӕмӕ уый у адӕймагӕн йӕ хӕс» (Екклесиаст 12:13). Зӕдты ӕххуысӕй уацамынды архайгӕйӕ, мах дӕр ӕппӕт адӕммӕ сидӕм: «Фӕтӕрсут Хуыцауӕй ӕмӕ раттут Уымӕн кад» (Раргомад 14:6, 7). Уӕдӕ чырыстӕттӕ Иегъовӕйӕ ӕрмӕст тӕрсгӕ хъуамӕ ма кӕной, фӕлӕ ма йӕ хъуамӕ ӕппӕт зӕрдӕйӕ дӕр уарзой (Матфейы 22:37, 38). Уый гӕнӕн куыд ис, ӕмӕ Хуыцауӕй уыцы иу рӕстӕг тӕрсгӕ дӕр кӕнӕм ӕмӕ йӕ уарзгӕ дӕр кӕнӕм? Уарзагзӕрдӕ Хуыцауӕй тӕрсын цӕмӕн хъӕуы? Хуыцауы тас нӕм цӕмӕй уа, ууыл куы архайӕм, уӕд нын уый цы пайда ӕрхӕсдзӕн? Цӕмӕй ацы фарстытӕн дзуапп радтӕм, уый тыххӕй уал нӕ фыццаджыдӕр бамбарын хъӕуы, Хуыцауы тас цы у ӕмӕ ӕнӕ уымӕй Иегъовӕимӕ ӕнгом ахастытӕ скӕнӕн цӕуылнӕ ис.

Дис, аргъуыц ӕмӕ тас

3. Цы у Хуыцауы тас?

³ Хуыцауы тас у, чырыстӕттӕн се Сфӕлдисӕгмӕ цы ӕнкъарӕн хъуамӕ уа, уый. Иу бӕрӕгуат куыд ӕмбарын кӕны, афтӕмӕй уыцы тас у «Сфӕлдисӕгӕй аргъуыц кӕнын, стыр цыт ын кӕнын ӕмӕ йӕ зӕрдӕхудты бацӕуынӕй тӕрсын». Уӕдӕ Хуыцауы тас хъуамӕ зына нӕ царды дыууӕ ахсджиаг хъуыддаджы: Хуыцаумӕ нын цавӕр ахаст ис, ууыл, ӕмӕ йын ӕнӕуынон цы митӕ сты, уыдонмӕ цы цӕстӕй кӕсӕм, ууыл. Дзырд дӕр ыл нӕй, уыцы дыууӕ хъуыддаджы дӕр сты тынг ахсджиаг ӕмӕ сӕм хъӕуы нӕ хъус лӕмбынӕг ӕрдарын. Вайны дзырдуаты куыд дзырдӕуы, афтӕмӕй чырыстӕттӕн уыцы аргъуыцгӕнӕг тас у «сӕ царды сӕйрагдӕр разӕнгардгӕнӕг тых, дзырд монон хъуыддӕгтыл куы цӕуа, уӕд дӕр ӕмӕ ӕгъдауыл куы цӕуа, уӕд дӕр» («Expository Dictionary of New Testament Words»).

4. Цы нын ӕххуыс кӕны не Сфӕлдисӕгӕй аргъуыц кӕнынӕн ӕмӕ йын цыт кӕнынӕн?

⁴ Цы нын ӕххуыс кӕны не Сфӕлдисӕгӕй аргъуыц кӕнын ӕмӕ йын цыт кӕнын? Ӕрдзы алӕмӕттаг бынӕттӕ, рӕсугъд ӕхсӕрдзӕнтӕ кӕнӕ диссаджы хурныгуылдтӕ куы фенӕм, уӕд нӕ дисы бафтауынц. Нӕ дисӕн кӕрон та уӕд нал вӕййы, ӕмӕ уырнындзинады цӕстӕй куы фӕуынӕм, ӕппӕт уыцы ӕмбисонды хъуыддӕгтӕ Чи скодта, уыцы Хуыцауы. Уымӕй дарддӕр мах дӕр паддзах Давидау ӕмбарӕм, Иегъовӕ цы диссӕгтӕ скодта, уыдонимӕ абаргӕйӕ кӕй ницы стӕм. «Куы кӕсын ӕз Дӕ ӕрвтӕм,— Дӕ ӕнгуылдзты хъуыддагмӕ, мӕй ӕмӕ стъалытӕм, кӕцыты Ды сӕвӕрдтай, уӕд цы у адӕймаг, Ды йӕ кӕй мысыс [«дӕ зӕрдыл ӕй кӕй дарыс», НД]?» (Псалом 8:4, 5). Уыцы дис нӕм ӕвзӕрын кӕны стыр аргъуыцы ӕнкъарӕн, ӕмӕ нӕ уый та разӕнгард кӕны, Иегъовӕ нын цыдӕриддӕр аразы, уый тыххӕй йын арфӕ кӕнынмӕ ӕмӕ йӕ кадджын кӕнынмӕ. Давид ма ноджыдӕр фыста: «Кадджын кӕнын Дӕу, уымӕн ӕмӕ ӕз диссаджы арӕзт дӕн. Диссаг [сты] Дӕ хъуыддӕгтӕ, ӕмӕ мӕ уд уый ӕмбары ӕххӕстӕй» (Псалом 138:14).

5. Цӕмӕн нӕ хъӕуы Иегъовӕйӕ тӕрсын ӕмӕ нын уыцы хъуыддаджы хорз дӕнцӕг чи у?

⁵ Адӕймагмӕ аргъуыцы ӕнкъарӕн куы уа, уӕд ӕм фӕзыны, ӕппӕты Сфӕлдисӕг дӕр чи у ӕмӕ Дун-дунейы ӕппӕт бартӕ дӕр кӕй къухы сты, уыцы хъомысджын Хуыцауы раз ӕфсарм ӕмӕ тас. Апостол Иоанн цы цӕстылуайӕн федта, уым «сырды ӕмӕ йӕ нывы... чи басаста, уыдон», ома Чырыстийы сӕрст фӕдылдзӕуджытӕ уӕларвыл, дзурынц: «О, Хицау-Хуыцау, Ӕппӕтылхӕцӕг! Стыр ӕмӕ диссаг сты Дӕ хъуыддӕгтӕ. О, сыгъдӕджыты Паддзах! Раст ӕмӕ ӕцӕг сты Дӕ фӕндӕгтӕ. О Хицау! Чи Дӕ нӕ фӕтӕрсдзӕн, ӕмӕ Дын Дӕ ном чи нӕ сцытджын кӕндзӕн?» (Раргомад 15:2—4, НФ). Уӕларвон Паддзахады Чырыстиимӕ чи паддзахиуӕг кӕны, уыдон Хуыцауы стыр хъомысӕй кӕй аргъуыц кӕнынц, уый руаджы сӕ зӕрдӕты сӕвзӕры тас, ӕмӕ сӕ уый та разӕнгард кӕны, ӕппӕт хицаудзинад дӕр кӕй къухы ис, уыцы Хуыцауы кадджын кӕнынмӕ. Иегъовӕ нырмӕ цы сарӕзта, ӕмӕ дун-дунейы цы раст уагӕвӕрдтӕ сӕвӕрдта, ууыл хъуыдыгӕнгӕйӕ, мах дӕр не ’мбарӕм, кӕй дзы хъуамӕ тӕрсӕм, уый? (Псалом 2:11; Иереми 10:7).

6. Иегъовӕйы зӕрдӕхудтӕй нӕ цӕмӕн хъӕуы тӕрсын?

⁶ Фӕлӕ Хуыцауӕй тӕрсын ӕрмӕст уый нӕу, цӕмӕй дзы аргъуыц кӕнӕм. Хуыцауы тас ма нысан кӕны йӕ ныхасы сӕрты ахизын кӕнӕ йӕ зӕрдӕхудты бацӕуынӕй тӕрсын дӕр. Цӕмӕн? Уымӕн ӕмӕ кӕд Иегъовӕ «мӕсты кӕнынмӕ тагъд нӕ кӕны» ӕмӕ «ӕгӕрон у йӕ ӕнувыд уарзт», уӕддӕр нӕ зӕрдыл хъуамӕ дарӕм уый аххосджынты «ӕнӕфхӕрдӕй кӕй ницы хуызы ныууадздзӕн» (Рацыд 34:6, 7). Кӕд Иегъовӕ уарзагзӕрдӕ ӕмӕ тӕригъӕдгӕнаг у, уӕддӕр ӕнӕрастдзинад ӕмӕ барӕй конд ӕвзӕр хъуыддӕгтӕн нӕ быхсы (Псалом 5:5, 6; Аввакум 1:13). Иегъовӕ ӕвзӕрыл кӕй нымайы, ахӕм хъуыддӕгтӕ зонгӕ-зонын ӕнӕфсармӕй чи кӕны, ӕмӕ афтӕмӕй Хуыцауы ныхмӕ чи цӕуы, уый ӕнӕфхӕрдӕй нӕ баззайдзӕн. Дзӕгъӕлы нӕ загъта апостол Павел: «Тӕссаг у ӕгас Хуыцауы къухтӕм бахауын!» Уӕдӕ цӕмӕй Хуыцауы зӕрдӕхудты ма бацӕуӕм, уый тыххӕй ахӕм уавӕрты бахауынӕй куы тӕрсӕм, уӕд нӕ уый хъахъхъӕндзӕн ӕвзӕрдзинадӕй (Дзуттытӕм 10:31).

«Фидар ыл хӕцут»

7. Иегъовӕйӕн йӕ бон ирвӕзын кӕнын кӕй у, ууыл ӕууӕндынӕн нын цавӕр бӕлвырдгӕнӕнтӕ ис?

⁷ Хуыцауы тас нӕм куы уа ӕмӕ стыр хъомысы хицау кӕй у, уый хорз куы ӕмбарӕм, уӕд нӕ бон уыдзӕн Иегъовӕйыл нӕ зӕрдӕ дарын ӕмӕ йыл фидарӕй ӕууӕндын. Гыццыл сабийӕн йӕ фыд йӕ фарсмӕ куы вӕййы, уӕд куыд ныфсджын вӕййы, афтӕ мах дӕр Иегъовӕйы къухыл куы хӕцӕм, уӕд ницӕмӕй тӕрсдзыстӕм, фӕлӕ уыдзыстӕм ныфсджын. Ӕркӕс ма, израилӕгты Иегъовӕ Египетӕй куы ракодта, уӕд сыл уый куыд фӕзынд, уымӕ. Мах кӕсӕм: «Израилӕгтӕ ма федтой, Иегъовӕ египетӕгтӕм цы уӕззау къух систа, уый дӕр; ӕмӕ адӕм Иегъовӕйӕ тӕрсын райдыдтой ӕмӕ Иегъовӕйыл сӕвӕрдтой сӕ ныфс» (Рацыд 14:31). «Хуыцауы зӕдтӕ кӕй слӕууынц Уымӕй тӕрсджытӕн сӕ алыварс, ӕмӕ кӕй фервӕзын кӕнынц уыдон», уый дызӕрдыггаг нӕ уыд Елисейӕн дӕр (Псалом 33:8, МГТ; 4 Паддзахӕдты 6:15—17). Иегъовӕйы адӕмы нырыккон историйы дӕр ӕмӕ нӕхи царды дӕр ис бирӕ бӕлвырдгӕнӕнтӕ, Хуыцау йӕ лӕггадгӕнджытӕн кӕй ӕххуыс кӕны, уымӕн (2 Паралипоменон 16:9). Уымӕ гӕсгӕ ӕмбарӕм, «Иегъовӕйы тас стыр ныфс [кӕй] у», уый (Ӕмбисӕндтӕ 14:26).

8. а) Хуыцауы тас нӕ куыд разӕнгард кӕны йӕ фӕндӕгтыл цӕуынмӕ? ӕ) Бамбарын кӕн, Иегъовӕйыл куыд хъуамӕ «хӕцӕм фидар».

⁸ Хуыцауы тас нын ӕрмӕст уымӕн нӕу ахъаз, цӕмӕй йыл нӕ зӕрдӕ дарӕм ӕмӕ йыл ӕппындӕр ма дызӕрдыг кӕнӕм, фӕлӕ ма нӕ разӕнгард кӕны йӕ фӕндӕгтыл цӕуынмӕ дӕр. Соломон кувӕндон Иегъовӕйӕн куы снывонд кодта, уӕд ӕм куывта: «[Израил] дӕуӕй цы тӕрсой, ӕмӕ нӕ фыдӕлтӕн цы зӕхх радтай, цалынмӕ ууыл цӕрой, уӕдмӕ ӕппӕт бонты дӕр дӕ фӕндӕгтыл цы цӕуой» (2 Паралипоменон 6:31). Уымӕй бирӕ раздӕр Моисей дӕр сидт Израилы адӕммӕ: «Уӕ Хуыцау Иегъовӕйы фӕдыл цӕут ӕмӕ дзы тӕрсут, йӕ фӕдзӕхстытӕ йын ӕххӕст кӕнут ӕмӕ йын йӕ хъӕлӕсмӕ хъусут, уымӕн лӕггад кӕнут ӕмӕ йыл фидар хӕцут» (Дыккаг закъон 13:4). Ацы стихты куыд уынӕм, афтӕмӕй Иегъовӕйыл «фидар [уӕд] хӕцдзыстӕм» ӕмӕ нӕ йӕ фӕндӕгтыл цӕуын уӕд фӕнддзӕн, кӕд ӕмӕ йыл нӕ зӕрдӕ дарӕм ӕмӕ йыл ӕппындӕр нӕ дызӕрдыг кӕнӕм. О, Хуыцауы тас нӕм куы уа, уӕд ӕм хъусгӕ дӕр кӕндзыстӕм, лӕггад дӕр ын кӕндзыстӕм ӕмӕ йыл фидар дӕр хӕцдзыстӕм, гыццыл сывӕллон ныфсджын кӕмӕй у ӕмӕ фидарӕй кӕуыл ӕууӕнды, йӕ уыцы фыдыл куыд фидар фӕхӕцы, раст афтӕ (Псалом 62:9; Исай 41:13).

Хуыцауы уарзын — Хуыцауӕй тӕрсын

9. Хуыцауы уарзын ӕмӕ Хуыцауӕй тӕрсын кӕрӕдзийыл куыд баст сты?

⁹ Фыстадмӕ гӕсгӕ Хуыцауӕй кӕй хъуамӕ тӕрсӕм, уый ууыл дзурӕг нӕу, ӕмӕ йӕ нӕ бон уарзын нӕу. Израилӕгтӕ хъуамӕ «тарстаиккой Иегъовӕйӕ... цӕмӕй йӕ ӕппӕт фӕндӕгтыл цыдаиккой ӕмӕ йӕ уарзтаиккой» (Дыккаг закъон 10:12). Уӕдӕ Хуыцауӕй тӕрсын ӕмӕ Хуыцауы уарзын, ацы дыууӕ миниуӕгӕн ӕнӕ кӕрӕдзийӕ уӕвӕн нӕй. Хуыцауы тас нӕ разӕнгард кӕны йӕ фӕндӕгтыл цӕуынмӕ, ӕмӕ уый та дзурӕг у, кӕй йӕ уарзӕм, ууыл (1 Иоанны 5:3). Ӕмӕ уый ӕцӕгдӕр афтӕ у, адӕймаг кӕй уарзы, уымӕн йӕ зӕрдӕ фӕриссын кӕнынӕй фӕтӕрсы. Израилӕгтӕ ӕдзӕрӕг быдыры хивӕнд ӕмӕ хъуырхъуыргӕнаг кӕй уыдысты, уымӕй хъыг кодтой Иегъовӕйы. Кӕй зӕгъын ӕй хъӕуы, мах нӕ фӕнды, нӕ уӕларвон Фыдӕн зын цы уа, ахӕм исты аразын (Псалом 77:40, 41). Уыйхыгъд «Иегъовӕйӕ чи тӕрсы, уыдон йӕ зӕрдӕйӕн сты адджын», ӕмӕ уымӕ гӕсгӕ йӕ коммӕ кӕй кӕсӕм ӕмӕ йыл ӕнувыд кӕй стӕм, уымӕй райы йӕ зӕрдӕ (Псалом 147:11, НД [146:11]; Ӕмбисӕндтӕ 27:11). Хуыцауы кӕй уарзӕм, уый нӕ разӕнгард кӕны, йӕ зӕрдӕмӕ цы цӕуы, уый аразынмӕ, кӕй дзы тӕрсӕм, уый та нӕ хизы, хъыг ын цы у, уый кӕнынӕй. Ацы дыууӕ миниуӕджы кӕрӕдзийы ныхмӕ не сты, фӕлӕ дзы иу ӕххӕст кӕны иннӕйы.

10. Йесойӕн Иегъовӕйы тас циндзинад кӕй хаста, уый цӕмӕй бӕрӕг уыд?

¹⁰ Йесо Чырыстийы цард нын ирдӕй ӕвдисы, уый гӕнӕн куыд ис, ӕмӕ уыцы иу рӕстӕг Хуыцауы уарзгӕ дӕр кӕнӕм ӕмӕ дзы тӕрсгӕ дӕр кӕнӕм. Пехуымпар Исай Йесойы тыххӕй ныффыста: «Ӕрцӕудзӕн ыл Иегъовӕйы архайгӕ тых, зонд ӕмӕ ӕмбаргӕдзинады тых, уынаффӕ ӕмӕ стырады тых, ӕмбарындзинады ӕмӕ Иегъовӕйы тасы тых; Иегъовӕйы тас ын хӕсдзӕн циндзинад» (Исай 11:2, 3). Ацы пехуымпарады куыд кӕсӕм, афтӕмӕй Хуыцауы архайгӕ тых Йесойы разӕнгард кодта, цӕмӕй дзы тарстаид. Уымӕй уӕлдай уынӕм, уыцы тас ын йӕ къухтӕ ӕмӕ йӕ къӕхтӕ кӕй нӕ баста, фӕлӕ йын циндзинад кӕй хаста. Йесойӕн ӕхсызгон уыд цыфӕнды зын уавӕрты дӕр Хуыцауы фӕндон ӕххӕст кӕнын ӕмӕ йӕ уӕларвон Фыды зӕрдӕ рухс кӕнын. Цӕджындзыл ӕй куы хъуамӕ байтыгътаиккой, уый хӕдразмӕ Иегъовӕйӕн загъта: «Мӕн куыд фӕнды, афтӕ нӕ, фӕлӕ Дӕу куыд фӕнды» (Матфейы 26:39). Иегъовӕ фехъуыста йӕ Фырты дзыназын, бафидар ӕй кодта ӕмӕ йӕ фервӕзын кодта мӕлӕтӕй, ахӕм тас ӕм кӕй уыди, уый тыххӕй (Дзуттытӕм 5:7).

Иегъовӕйӕ тӕрсын ахуыр кӕнӕм

11, 12. а) Хуыцауӕй тӕрсын нӕ цӕмӕн хъӕуы ахуыр кӕнын? ӕ) Йесо нӕ куыд ахуыр кӕны Иегъовӕйӕ тӕрсын?

¹¹ Ӕрдзы тых ӕмӕ хъомыс нӕхиуыл куы бавзарӕм, уӕд нӕм йӕхигъӕдӕй цы тас сӕвзӕры, уымӕй хъауджыдӕр Хуыцауы тас йӕхигъӕдӕй нӕ фӕзыны. Стырдӕр Давид, Йесо Чырысти нӕм пехуымпарады хуызы уымӕн сиды: «Ӕрцӕут, сывӕллӕттӕ, байхъусут мӕнмӕ: Хицауы тасыл уӕ сахуыр кӕндзынӕн» (Псалом 33:12). Йесо нӕ куыд ахуыр кӕны Иегъовӕйӕ тӕрсын?

¹² Йесо нӕ Иегъовӕйӕ тӕрсын ахуыр кӕны, кӕй нын ӕххуыс кӕны, нӕ уӕларвон Фыд цы диссаджы удыхъӕды хицау у, уый бамбарынӕн (Иоанны 1:18). Йесо йӕ Фыды миниуджытӕ ӕххӕстӕй кӕй ӕвдисы, уымӕ гӕсгӕ нын уый ӕргом кӕны, Хуыцау куыд хъуыды кӕны ӕмӕ йын адӕммӕ цавӕр ахаст ис, уый (Иоанны 14:9, 10). Уымӕй дарддӕр, Йесойы нывонды руаджы нӕ бон у Иегъовӕмӕ кувын ӕмӕ дзы афтӕмӕй хатыр курын. Хуыцау йӕ фӕлмӕнзӕрдӕдзинад ахӕм диссаджы хуызы кӕй ӕвдисы, ӕрмӕст уый тыххӕй дӕр дзы хъуамӕ тӕрсӕм. Псаломзарӕггӕнӕг фыста: «Дӕумӕ хатырдзинад, нымд кӕнӕнт Дӕ разы» (Псалом 129:4).

13. Цӕмӕй нӕм Иегъовӕйы тас уа, уымӕн нын Ӕмбисӕндты чиныг куыд ӕххуыс кӕны?

¹³ Цӕмӕй Хуыцауӕй тӕрсӕм, уый тыххӕй нӕ цы аразын хъӕуы, уый базонӕн ис Ӕмбисӕндты чиныгӕй. «Мӕ фырт, кӕд мын мӕ ныхӕстӕ райсай ӕмӕ мын мӕ фӕдзӕхстытӕн дӕ риуы арф бынат скӕнай, кӕд дӕ хъус лӕмбынӕг дарай зондмӕ ӕмӕ де ’ргом раздахай ӕмбаргӕдзинадмӕ; кӕд ӕмбарынадмӕ сидай ӕмӕ ӕмбаргӕдзинадмӕ хъӕр кӕнай... уӕд базондзынӕ, Иегъовӕйӕ тӕрсын цы у, уый, ӕмӕ ссардзынӕ Хуыцауы тыххӕй раст зонындзинӕдтӕ» (Ӕмбисӕндтӕ 2:1—5). Уӕдӕ цӕмӕй Хуыцауӕй тӕрсӕм, уый тыххӕй нӕ хъӕуы йӕ Ныхас ахуыр кӕнын, цы зондамындтӕ нын дӕтты, уыдон бамбарыныл зӕрдиагӕй архайын ӕмӕ йын уый фӕстӕ йӕ уынаффӕтӕм лӕмбынӕг хъус дарын.

14. Израилы паддзӕхтӕн цы уынаффӕ уыд лӕвӕрд, уымӕ гӕсгӕ махӕн куыд у нӕ бон архайын?

¹⁴ Рагон Израилы-иу алы паддзах дӕр хъуамӕ Закъон йӕхицӕн рафыстаид ӕмӕ «цалынмӕ цардаид, уӕдмӕ йӕ алы бон дӕр кастаид, цӕмӕй ахуыр кодтаид йӕ Хуыцау Иегъовӕйӕ тӕрсын ӕмӕ ацы закъоны ныхӕстӕ иууылдӕр ӕххӕст кӕнын» (Дыккаг закъон 17:18, 19). Кӕд нӕ фӕнды, цӕмӕй нӕм Иегъовӕйы тас уа, уӕд мах дӕр ӕнӕмӕнг хъӕуы Библи кӕсын ӕмӕ йӕ ахуыр кӕнын. Нӕ цард Библийы уагӕвӕрдтӕм гӕсгӕ куыд аразӕм, афтӕ цадӕггай Хуыцауӕй исӕм зонд ӕмӕ зонындзинӕдтӕ. Мах «базонӕм, Иегъовӕйӕ тӕрсын цы у, уый», уымӕн ӕмӕ уынӕм, нӕ цардыл хорзырдӕм куыд зыны, ӕмӕ нын афтӕмӕй тынг зынаргъ свӕййынц Хуыцауимӕ нӕ ахастытӕ. Уымӕй дарддӕр, ӕрвылкъуыри дӕр не ’муырнджытимӕ куы ӕмбырд кӕнӕм, уӕд — стырӕй-чысылӕй — хъусдзыстӕм Хуыцауы амындтӕм, ахуыр кӕндзыстӕм Хуыцауӕй тӕрсын ӕмӕ йӕ фӕндӕгтыл цӕуын (Дыккаг закъон 31:12).

Амондджын у, Иегъовӕйӕ чи тӕрсы, уый

15. Хуыцауы тас куыд у баст нӕ лӕггаддзинадимӕ?

¹⁵ Уӕлдӕр цӕмӕ ӕркастыстӕм, уымӕй уынӕм, Хуыцауы тас кӕй у, не ’ппӕты дӕр чи хъӕуы, ахӕм ахсджиаг миниуӕг, уымӕн ӕмӕ ӕнӕ уымӕй нӕй Иегъовӕйӕн лӕггад кӕнӕн. Уый нӕм куы уа, уӕд никуы фӕдызӕрдыг уыдзыстӕм Иегъовӕйыл, цӕудзыстӕм йӕ фӕндӕгтыл ӕмӕ йыл фидар хӕцдзыстӕм. Хуыцауы тас Йесо Чырыстийы куыд разӕнгард кодта, афтӕ мах дӕр разӕнгард кӕндзӕн, цӕмӕй кӕддӕр Хуыцауӕн цы нывонддзырд радтам, уымӕн ныр дӕр ӕмӕ ӕнустӕм дӕр хицау уӕм.

16. Иегъовӕ нӕ цӕмӕн разӕнгард кӕны, цӕмӕй дзы тӕрсӕм?

¹⁶ Хуыцауӕй тӕрсын уый нӕ нысан кӕны, ӕмӕ дзы адӕймаг зыр-зыр кӕна, кӕнӕ йӕ фезмӕлын дӕр ма уадза. «Тӕхудиаг алчи Хицауӕй тӕрсӕг, Уый фӕндӕгтыл цӕуӕг!» — дзуры нын Библи (Псалом 127:1). Иегъовӕ нӕ йӕхӕдӕг разӕнгард кӕны, цӕмӕй дзы тӕрсӕм, уымӕн ӕмӕ йӕ зоны, уыцы тас нӕ ӕвзӕрдзинадӕй кӕй хиздзӕн. Зӕрдиагӕй ныл кӕй ауды, уый бӕрӕг у, Моисейӕн цы ныхӕстӕ загъта, уыдонӕй: «Уӕд та зӕрдӕйӕ уымӕ куы тырниккой [израилӕгтӕ], цӕмӕй мӕнӕй тӕрсой ӕмӕ мын ӕдзухдӕр мӕ фӕдзӕхстытӕ ӕххӕст кӕной, цӕмӕй сӕхӕдӕг дӕр ӕмӕ сӕ цот дӕр ӕнустӕм амондджын уой!» (Дыккаг закъон 5:29).

17. а) Хуыцауӕй куы тӕрсӕм, уӕд нын уый цы хъуыддӕгты ӕххуыс кӕндзӕн? ӕ) Иннӕ ахуыргӕнӕн статьяйы цӕмӕ ӕркӕсдзыстӕм?

¹⁷ Мах дӕр куы архайӕм, цӕмӕй нӕ зӕрдӕйы Хуыцауы тас уа, уӕд нӕхицӕн хуыздӕр уыдзӕн. Цы хуызы? Фыццаг уый, ӕмӕ ахӕм зӕрдӕйыуаг ӕхсызгон уыдзӕн Хуыцауӕн, ӕмӕ нӕ ӕнгомдӕр кӕндзӕн йемӕ. Давид йӕхицӕй зыдта, «Уымӕй чи тӕрсы, уыдонӕн сӕ фӕндон кӕй ӕххӕст кӕны, сӕ лӕгъстӕ кӕнынмӕ сын кӕй хъусы ӕмӕ сӕ кӕй ирвӕзын кӕны» (Псалом 144:19, МГТ). Дыккаг уый, ӕмӕ нын Хуыцауы тас ӕххуыс кӕны ӕвзӕрдзинадӕй не сӕфт уынынӕн (Ӕмбисӕндтӕ 3:7). Иннӕ ахуыргӕнӕн статьяйы ӕркӕсдзыстӕм, уыцы тас нӕ, нӕ уырнындзинадӕн тӕссаг цы хъуыддӕгтӕй у, уыдонӕй куыд хизы, уымӕ, ӕмӕ Фыстадӕй нӕ зӕрдыл ӕрлӕууын кӕндзыстӕм, Хуыцауӕй чи тарст ӕмӕ ӕвзӕрдзинадӕй йӕхи дард чи ласта, ахӕм адӕймӕгтӕй цалдӕры дӕнцӕг.

[Фиппаинаг]

Ацы фарстытӕн дӕ бон дзуапп радтын у?

• Цы у Хуыцауы тас ӕмӕ нӕ цардыл куыд зыны?

• Хуыцауы тас ӕмӕ Хуыцауимӕ цӕуын кӕрӕдзиимӕ куыд баст сты?

• Йесойы дӕнцӕг нын куыд ӕвдисы, адӕймаг Хуыцауӕй кӕй тӕрсы, уый йӕ уарзондзинадыл дзурӕг кӕй у?

• Цы нын баххуыс кӕндзӕн, цӕмӕй нӕ зӕрдӕйы Иегъовӕйы тас уа?

[Ныв 21 фарсыл]

Израилы паддзӕхтӕ-иу хъуамӕ сӕхицӕн Закъон рафыстаиккой ӕмӕ-иу ӕй алы бон дӕр кастаиккой.

[Ныв 22 фарсыл]

Нӕ зӕрдӕйы Иегъовӕйы тас куы уа, уӕд ыл ӕууӕнддзыстӕм, сывӕллон йӕ фыдыл куыд феууӕнды, афтӕ.

[Ныв барлӕвӕрдӕй 23 фарсыл]

Стъалытӕ: Photo by Malin, © IAC/​RGO 1991