Алкӕддӕр тӕрсут Иегъовӕйӕ
1 «Зонды райдайӕн — Хицауӕй тасдзинад» (Пс. 110:10). Уый нӕ разӕнгард кӕны хорздзинадмӕ ӕмӕ нӕ хъахъхъӕны фыддзинадӕй (Фӕс. н. 16:6). Иегъовӕйӕ тӕрсын нысан кӕны не Сфӕлдисӕгӕй ӕфсӕрмы кӕнын, ӕмӕ нӕ уый разӕнгард кӕны, цӕмӕй йӕм хъусӕм ӕмӕ нӕхи хизӕм йӕ зӕрдӕмӕ цы нӕ цӕуы, уымӕй. Уыцы миниуӕгыл хъӕуы ӕппынӕдзух кусын ӕмӕ йӕ царды ӕвдисын (Фӕс. н. 8:13).
2 Алы бон дӕр ныл Сайтаны дуне ӕнахуыр тынг ӕндавы, ӕмӕ йӕ фӕнды, цӕмӕй йын йӕ фыдвӕндӕгтыл цӕуӕм (Еф. 6:11, 12). Нӕ ӕнӕххӕст буар тӕригъӕдджын кӕй у, уымӕ гӕсгӕ нӕ разӕнгард кӕны ӕвзӕрдзинадмӕ (Гал. 5:17). Уӕдӕ, цӕмӕй Иегъовӕйы фӕдзӕхстытӕ ӕххӕст кӕнӕм, амондджын уӕм ӕмӕ ирвӕзындзинад райсӕм, уый тыххӕй алкӕддӕр хъуамӕ Хуыцауӕй тӕрсӕм (Дык. з. 10:12, 13).
3 Дзуттытӕм 10:25, 26-ӕм стихты фыст ис, зӕгъгӕ иумӕ хъуамӕ ӕмбырд кӕнӕм, цӕмӕй кӕрӕдзийӕн ӕххуыс кӕнӕм, «уӕлдайдӕр» та уый хъуамӕ аразӕм абон. Цӕмӕй фӕстаг бонты удӕгасӕй баззайӕм, уый тыххӕй хъуамӕ иудадзыг фембӕлдтӕм цӕуӕм. Иегъовӕйы фӕхъыг кӕнынӕй куы тӕрсӕм, уӕд фембӕлдтӕм цӕудзыстӕм ӕмӕ сын тынг аргъ кӕндзыстӕм. Хуыцауӕй чи тӕрсы, уыдон чырыстон фембӕлдты хайад исын нымайынц стыр кадыл.
4 Паддзахады тыххӕй хорз уацхъуыд хъусын кӕныны фӕдзӕхст ӕххӕстгӕнгӕйӕ дӕр ӕвдисӕм, Хуыцауӕй кӕй тӕрсӕм (Матф. 28:19, 20; Ап. к. 10:42). Нӕ уацамынды сӕйраг нысан у адӕмӕн баххуыс кӕнын, цӕмӕй Иегъовӕйӕ тӕрсой ӕмӕ йын йӕ фӕндон ӕххӕст кӕной. Уый нӕ къухы бафты, адӕммӕ дыккаг хатт куы фӕцӕуӕм, семӕ Библи ахуыр кӕныныл куы фӕархайӕм ӕмӕ сӕ уый фӕстӕ Хуыцауы фӕдзӕхстытӕ ӕххӕст кӕныныл куы фӕахуыр кӕнӕм, уӕд. Ахӕм хъуыддӕгтӕй бӕрӕг у, Иегъовӕйӕ кӕй тӕрсӕм ӕмӕ адӕмы кӕй уарзӕм (Матф. 22:37—39).
5 Хуыцауӕй чи нӕ тӕрсы, уыдон духовон хъуыддӕгтӕн нӕ аргъ кӕнынц ӕмӕ бахауынц мӕлӕтхӕссӕг дунейы уӕлдӕфы, кӕнӕ зондахасты ӕндавдады бын (Еф. 2:2). Цӕй уӕдӕ фӕндфидарӕй «кусӕм Хуыцауӕн... цыт дӕтгӕйӕ ӕмӕ тӕрсгӕйӕ» (Дзут. 12:28, НФ). Ӕмӕ банкъардзыстӕм, Иегъовӕйӕ алкӕддӕр чи тӕрсы, уыдонӕн куыд арфӕ кӕны, уый.