Районон конгрессы ног программӕ
Дзырд «тӕрсынӕн» йӕ иу нысаниуӕг у «стыр кад кӕнын, аргъуыц кӕнын, уӕлдайдӕр та Хуыцауӕн». Уый нысан кӕны, адӕймагыл хорзырдӕм чи ӕндавы, ахӕм тас, ӕмӕ Библимӕ гӕсгӕ у «зонды райдайӕн» (Пс. 110:10). Уый хыгъд нӕ алыварс Сайтаны дунейы уӕлахиз кӕны ӕндӕрхуызон тас. Куыд у нӕ бон уыцы ӕвзӕр ӕнкъарӕнӕй нӕхи хизын, Иегъовӕйӕн аргъуыц кӕныныл ахуыргӕнгӕйӕ? 2002 лӕггаддзинады азы районон конгрессы ног программӕ дзуры уыцы фарстыл. Конгресс хуыйны «Тӕрсут Хуыцауӕй ӕмӕ раттут Уымӕн кад» (Рар. 14:7). Мах бамбардзыстӕм, Иегъовӕйӕ куы тӕрсӕм, уӕд нын уый алыхуызон уавӕрты куыд баххуыс кӕндзӕн, куыд алкӕмӕн хицӕнӕй, афтӕ организацийӕн ӕмткӕй райсгӕйӕ.
Кӕд ма дзырд «тӕрсын» ноджыдӕр нысан кӕны тыхсын, ныфссаст уын ӕмӕ зындзинӕдтӕй тӕрсын, уӕддӕр Библи дзуры: «Тӕхудиаг сты Хуыцауӕй [«Иегъовӕйӕ», НД] тӕрсджытӕ се ’ппӕт» (Пс. 127:1, МГТ). Конгрессы программӕ нын равдисдзӕн, раст кувынады цы зындзинӕдтыл сӕмбӕлӕм, уыдон ӕнтыстджынӕй иуварс кӕнӕн куыд ис, уый. Фендзыстӕм, куыд ис цымыдисгӕнаг адӕмӕн баххуыс кӕнӕн, цӕмӕй сӕм Хуыцауы тас уа, уымӕн, ӕмӕ сӕ уый разӕнгард кӕндзӕн Хуыцауӕн ӕппӕт зӕрдӕйӕ, ӕппӕт удӕй, ӕппӕт зондӕй ӕмӕ ӕппӕт хъаруйӕ лӕггад кӕнынмӕ (Маркы 12:30). Фыццаг бон фӕуыдзӕн облӕстон цӕстдарӕджы раныхасӕй «Ӕдзух ӕввахсдӕр кӕнут, кӕй уарзут, уыдонмӕ». Уый нын бамбарын кӕндзӕн, нӕ бон куыд у Хӕйрӕджы митӕм нӕ хъус лӕмбынӕг дарын, цӕмӕй нӕ Иегъовӕйӕ, нӕ бинонтӕй ӕмӕ нӕ чырыстон ӕфсымӕртӕй ма фӕиппӕрд кӕна.
Дыккаг бон фехъусдзыстӕм цыппар раныхасы иу темӕйыл «Тӕрсут Иегъовӕйӕ, адӕмӕй нӕ, фӕлӕ». Уым ӕмбӕрстгонд цӕудзӕн, цӕмӕн ӕмӕ куыд хъуамӕ аиуварс кӕнӕм ахӕм тас, кӕцы нӕ хъыгдары ӕппӕт зӕрдӕйӕ лӕггад кӕнынӕн ӕмӕ ма скъолайы кӕнӕ куысты иузӕрдионӕй баззайынӕн ӕмӕ сыгъдӕг намыс бахъахъхъӕнынӕн. Раныхас «Тӕрсут Хуыцауӕй ӕмӕ йын йӕ фӕдзӕхстытӕ ӕххӕст кӕнут», зӕгъгӕ, бындуриуӕг кӕны, Раргомады 14-ӕм сӕры фыст цаутыл. Районон конгресс фӕуыдзӕн разӕнгардгӕнӕг раныхасӕй «Дарддӕр дӕр цӕут, Иегъовӕйӕ тӕрсгӕйӕ».
Теократон лӕггаддзинады скъола, дӕнцон лӕггаддзинады фембӕлд, донаргъуыды размӕ раныхас ӕмӕ «Хъахъхъӕнӕг мӕсыджы» ахуыргӕнӕн статьяйыл цыбыр афӕлгӕст дӕр сты программӕйы ахсджиаг хӕйттӕ ӕмӕ нӕ нӕ фӕнды, цӕмӕй сӕ фӕцух кӕнӕм. Библи кӕимӕ ахуыр кӕныс, уыдоны дӕр фӕхон ӕмӕ сӕ демӕ ӕрбакӕн. Аргъуыд райсын кӕй фӕнды, уыдон хъуамӕ уый тыххӕй, гӕнӕн уӕвгӕйӕ, раздӕр зӕгъой сӕрдариуӕггӕнӕг цӕстдарӕгӕн. Не ’ппӕты дӕр фӕнды, ацы диссаджы программӕйы иу хай дӕр кӕй нӕ фӕцух кӕндзыстӕм, уымӕй Иегъовӕйы скадджын кӕнын ӕмӕ йӕ фӕхъыг кӕнынӕй кӕй тӕрсӕм, уый равдисын!