Ӕппӕт хъарутӕй тырнут фӕлтӕрддзинадмӕ – «Йегъовӕйы стыр бон хӕстӕг у»
«Ӕппӕт хъарутӕй тырнӕм фӕлтӕрддзинадмӕ» (ДЗУТ. 6:1).
1, 2. Фыццаг ӕнусы Иерусалим ӕмӕ Иудейы цӕрӕг чырыстӕтӕттӕн куыд фӕзынд фадат «хӕхтӕм алидзынӕн»?
ЙЕСО зӕххыл куы уыд, уӕд ӕй иухатт йӕ ахуыргӕнинӕгтӕ бафарстой: «Кӕй ӕрцыдтӕ ӕмӕ ацы цардӕвӕрдӕн йӕ кӕрон кӕй ӕрхӕццӕ, уый цӕмӕй бӕрӕг уыдзӕн [«уымӕн йӕ нысан цы уыдзӕн», фип.]?» Йесойы пехуымпарад фыццаг хатт сӕххӕст нӕ эрӕйы фыццаг ӕнусы. Уый сын бамбарын кодта, кӕрон кӕй ӕрхӕстӕг, уый цавӕр стыр хабӕрттӕй уыдзӕн бӕрӕг. Уыцы хабӕрттӕ Иудейы чи уыд, уыдон куы федтаиккой, уӕд хъуамӕ хӕхтӕм алыгъдаиккой (Матф. 24:1–3, 15–22). Цымӕ Йесойы ахуыргӕнинӕгтӕ уыцы нысан бафиппайдзысты ӕмӕ сын куыд загъта, афтӕ бакӕндзысты?
2 Иу-30 азы фӕстӕдӕр, нӕ эрӕйы 61 азы, апостол Павел, Иерусалим ӕмӕ йӕ алыварс чи цард, уыцы дзуттаг чырыстӕттӕм арвыста фыстӕг ӕмӕ сӕ карзӕй бафӕдзӕхста. Павел дӕр ӕмӕ йе ’мчырыстӕттӕ дӕр нӕ зыдтой, «стыр бӕллӕхы» райдианмӕ фондз азы йеддӕмӕ кӕй нал хъуыди (Матф. 24:21). Нӕ эрӕйы 66 азы Цестий Галл Ромы ӕфсадимӕ Иерусалиммӕ бабырста ӕмӕ йӕ бирӕ нал хъуыд йӕ бацахсынмӕ. Фӕлӕ стӕй ӕнӕнхъӕлӕджы фӕстӕмӕ аздӕхт, ӕмӕ чырыстӕттӕн фӕзынд фадат уырдыгӕй ӕдас ранмӕ алидзынӕн.
3. Павел дзуттаг чырыстӕттӕн цавӕр уынаффӕ радта ӕмӕ цӕмӕн?
3 Уыцы цаутӕ цӕуыл дзурӕг сты ӕмӕ сӕ лидзын кӕй хъӕуы, уый бамбарыны тыххӕй фыццаг ӕнусы чырыстӕттӕ хъуамӕ уыдаиккой ӕмбаргӕ ӕмӕ алцӕмӕдӕр кастаиккой уырнындзинады цӕстӕй. Фӕлӕ сӕ чидӕртӕ «хъусынхъом нал уыдысты». Уыдон уырнындзинады сабитӕй уӕлдай нӕ уыдысты ӕмӕ сӕ хъуыд «ӕхсыр». (Бакӕс Дзуттӕгтӕм 5:11–13.) Рӕстдзинады фӕндагыл дӕсгай азты дӕргъы чи цыди, суанг уыдонӕй дӕр кӕмӕндӕрты сӕ хъуыддӕгтӕй бӕрӕг уыдис, удӕгас Хуыцауӕй кӕй адард сты (Дзут. 3:12). Уыцы тӕссаг «бон куыд хӕстӕгдӕр кодта», афтӕ иуӕй-иутӕ та «сахуыр сты» чырыстон фембӕлдтӕ цух кӕнын (Дзут. 10:24, 25). Павел сын афоныл радта хорз уынаффӕ: «Иугӕр Чырыстийы тыххӕй сӕйраг ахуырӕдтӕ фӕстейӕ ныууагътам, уӕд ӕппӕт хъарутӕй тырнӕм фӕлтӕрддзинадмӕ» (Дзут. 6:1).
4. Цӕмӕн хъуамӕ уӕм къӕрцхъус ӕмӕ нын уымӕн цы баххуыс кӕндзӕн?
4 Мах цӕрӕм, Йесойы пехуымпарад фӕстаг хатт куы сӕххӕст уа, уыцы рӕстӕджы. «Йегъовӕйы стыр бон хӕстӕг у» – уыцы бон Сайтаны фыддуне ӕнӕхъӕнӕй дӕр фесӕфдзӕн (Соф. 1:14). Афтӕ ахсджиаг никуыма уыди, цӕмӕй нӕ уырнындзинад фидар кӕнӕм ӕмӕ къӕрцхъус уӕм (1 Пет. 5:8). Ӕцӕгдӕр афтӕ кӕнӕм? Чырыстон фӕлтӕрддзинад нын ӕххуыс кӕндзӕн, цӕмӕй ма рох кӕнӕм, цавӕр рӕстӕджы цӕрӕм, уый.
Цы у чырыстон фӕлтӕрддзинад
5, 6. а) Чырыстон фӕлтӕрддзинадмӕ цы хауы? ӕ) Фӕлтӕрддзинадмӕ тырнгӕйӕ нӕ цавӕр дыууӕ хъуыддаджы хъӕуы архайын?
5 Павел дзуттаг чырыстӕтты фӕлтӕрддзинадмӕ ӕрмӕст разӕнгард нӕ кодта, фӕлӕ ма сын ӕмбарын дӕр кодта, уымӕ цы хауы, уый. (Бакӕс Дзуттӕгтӕм 5:14.) «Фӕлтӕрд адӕймӕгтӕ» айдагъ «ӕхсырӕй» нӕ цӕрынц, уыдон хӕрынц «хъӕбӕр хӕринаг» дӕр. Фӕлтӕрд чырыстӕттӕ хорз зонынц рӕстдзинады «абетӕ» дӕр ӕмӕ йӕ «арф хъуыддӕгтӕ» дӕр (1 Кор. 2:10). Уымӕй уӕлдай ма, цы базонынц, уымӕ гӕсгӕ кӕй фӕархайынц, уый фӕрцы сӕ зонд ахуыр кӕнынц, раст цы у ӕмӕ цы нӕу, уый ӕмбарын. Исты хъуыддаг алыг кӕнын сӕ куы фӕхъӕуы, уӕд сӕ фӕлтӕрддзинады фӕрцы бамбарынц, сӕ уавӕрмӕ Фыстадӕй цавӕр уагӕвӕрдтӕ хауынц ӕмӕ уыцы уагӕвӕрдтӕй куыд ис спайда кӕнӕн.
6 Павел фыста: «Мах хъӕуы, цы фехъуыстам, уымӕ нӕ хъус уӕлдай лӕмбынӕг дарын, цӕмӕй нӕ уырнындзинады фӕндагӕй иуварс ма ахӕсса» (Дзут. 2:1). Гӕнӕн ис, ӕмӕ йӕ ӕмбаргӕ дӕр ма бакӕнӕм, афтӕ нӕ уырнындзинады фӕндагӕй иуварс ахӕсса. Ахӕм хабар ныл не ’рцӕудзӕн, Библи ахуыргӕнгӕйӕ цы базонӕм, уымӕ нӕ хъус уӕлдай лӕмбынӕг куы дарӕм, уӕд. Уӕдӕ нӕ алчи дӕр ахъуыды кӕнӕд: «Абоны онг дӕр ма „абетӕ“ ахуыр кӕнын? Цымӕ Библи куы фӕахуыр кӕнын, уӕд уыцы хъуыддаг бӕстон фӕкӕнын ӕви уӕлӕнгӕйтты? Мыййаг, афтӕ нӕ рауайы, ӕмӕ Хуыцауы хъуыддӕгтыл хъуыды дӕр нӕ акӕнын ӕмӕ сӕ афтӕмӕй фӕкӕнын? Архайын, цӕмӕй рӕстдзинад мӕ зӕрдӕйы ӕрфидар уа? Мӕ бон цы у аразын, цӕмӕй рӕстдзинад хуыздӕр базонон ӕмӕ мӕ уырнындзинад фидар кӕна?» Цӕмӕй фӕлтӕрд чырыстӕттӕ суӕм, уый тыххӕй хъуамӕ ӕппӕт тыхтӕй архайӕм ӕппынкъаддӕр дыууӕ хъуыддаджы. Фыццаг уый, ӕмӕ хъуамӕ хорз базонӕм Хуыцауы Ныхас. Дыккаг та, хъуамӕ сахуыр уӕм коммӕ кӕсын.
Хуыцауы Ныхас хуыздӕр базон
7. Хуыцауы Ныхас хуыздӕр куы зонӕм, уӕд нын уый цы пайда ӕрхӕсдзӕн?
7 «Йӕ хӕринаг ӕхсыр кӕмӕн у, уый рӕстдзинады дзырдӕн ницы зоны, уымӕн ӕмӕ нырма гыццыл сывӕллон у»,– фыста Павел (Дзут. 5:13). Цӕмӕй фӕлтӕрд чырыстӕттӕ суӕм, уый тыххӕй хъуамӕ хорз зонӕм Хуыцауы Ныхас. Хуыцау нын цы зӕгъинаг у, уый фыст ис Библийы, ӕмӕ уымӕ гӕсгӕ хъуамӕ хорз ахуыр кӕнӕм Фыстад ӕмӕ «ӕууӕнкджын ӕмӕ зондджын цагъары» уагъд литературӕ (Матф. 24:45–47). Афтӕмӕй базонӕм, Хуыцау куыд хъуыды кӕны, уый ӕмӕ ахуыр кӕнӕм, «нӕ зонд раст цы у ӕмӕ цы нӕу, уый ӕмбарын». Ӕркӕсӕм хо Оркиды цӕвиттонмӕa. Мӕнӕ цы зӕгъы: «Мӕ цардыл мын ӕппӕты тынгдӕр бандӕвта, Библи алы бон дӕр кӕсын кӕй хъӕуы, уыцы уынаффӕ. Дыууӕ азы мӕ бахъуыди, цӕмӕй Библи ӕнӕхъӕнӕй бакастаин, ӕмӕ мӕм афтӕ фӕкаст, цыма ме Сфӕлдисӕджы тыххӕй уый размӕ никуы ницы зыдтон. Библи кӕсгӕйӕ ӕз хуыздӕр базыдтон Хуыцауы фӕндӕгтӕ, йӕ зӕрдӕмӕ цы цӕуы ӕмӕ цы нӕ цӕуы, стӕй йӕ тых ӕмӕ йӕ зонд куыд ӕгӕрон сты, уый. Библи алы бон дӕр кӕй кастӕн, уый мын стыр ӕххуыс уыди, царды-иу зын уавӕрты куы бахаудтӕн, уӕд».
8. Хуыцауы Ныхас ныл куыд ӕндавы?
8 Алы бон дӕр Хуыцауы Ныхасӕй иу цасдӕр куы кӕсӕм, уӕд дзы цы «стыр тых» ис, уымӕн бар дӕтдзыстӕм, цӕмӕй ныл ӕндава. (Бакӕс Дзуттӕгтӕм 4:12.) Библи куы кӕсӕм, уӕд нын уый ӕххуыс кӕндзӕн нӕ удыхъӕд ивынӕн ӕмӕ Йегъовӕйы зӕрдӕ тынгдӕр рухс кӕнынӕн. Цымӕ дӕ фылдӕр рӕстӕг рахицӕн кӕнын нӕ хъӕуы Библи кӕсынӕн ӕмӕ йыл хъуыды кӕнынӕн?
9, 10. Цы нысан кӕны Хуыцауы Ныхас хуыздӕр базонын? Ӕрхӕсс цӕвиттон.
9 Библи хуыздӕр базонынӕн фаг нӕу, цы фыст дзы ис, ӕрмӕст уый зонын. Павелы рӕстӕджы, чырыстӕттӕй «сабитӕ» чи уыд, уыдон Хуыцауы Ныхасӕй ӕппындӕр мацы зыдтаиккой, уымӕн гӕнӕн нӕ уыд. Фӕлӕ уыцы зонындзинӕдтӕй нӕ пайда кодтой ӕмӕ куыд ахадгӕ сты, уый сӕхицӕй нӕ базыдтой. Библийӕ цы зыдтой, ууыл лӕмбынӕг нӕ хъуыды кодтой ӕмӕ уымӕ гӕсгӕ зонд Фыстады нӕ агуырдтой, цӕмӕй раст уынаффӕтӕ хастаиккой.
10 Уӕдӕ, Хуыцауы Ныхас хорз зонын нысан кӕны, ӕрмӕст цы дзуры, уый ӕмбарын нӕ, фӕлӕ дзы цы фыст ис, уымӕй царды пайда кӕнын дӕр. Библи царды куыд ахады, уый хорз зыны хо Кайлы хабарӕй. Иухатт Кайл ӕмӕ йе ’мкусӕг цӕйдӕр тыххӕй рахъӕлӕба сты. Уыцы хо хъуыддаг куыд банывыл кодта? Уый дзуры: «Ӕвиппайды мӕ зӕрдыл ӕрлӕууыд Ромӕгтӕм 12:18. Фыст дзы ис: „Уӕ бон цы у, уый аразут, цӕмӕй алкӕимӕ дӕр хӕларӕй цӕрат“. Уымӕ гӕсгӕ ме ’мкусӕгӕн загътон, зӕгъгӕ мӕ фӕскуыст демӕ аныхас кӕнын фӕнды». Уыдон сабырӕй аныхас кодтой ӕмӕ уыцы сылгоймагмӕ тынг диссаг фӕкаст, Кайл куыд ӕмбаргӕ разынд, уый. «Ӕз иу хъуыддаг хорз бамбӕрстон: Библийы уагӕвӕрдтӕм гӕсгӕ куы архайай, уӕд никуы фӕрӕдидзынӕ»,– загъта Кайл.
Сахуыр у коммӕ кӕсын
11. Цӕмӕй бӕрӕг у, зын уавӕрты бахаугӕйӕ коммӕ кӕсын ӕнцон кӕй нӕу?
11 Фыстадӕй цы базонӕм, уымӕ гӕсгӕ архайын алы хатт ӕнцон нӕ вӕййы, уӕлдайдӕр та зын уавӕры бахаугӕйӕ. Зӕгъӕм, Йегъовӕ Израилы фыртты Египеты цагъарадӕй куы ссӕрибар кодта, уымӕй бирӕ нӕ рацыд, афтӕ уыдон «Моисеимӕ хыл кӕнын райдыдтой» ӕмӕ Йегъовӕйы фӕлвӕрдтой. Цӕмӕн? Уымӕн ӕмӕ сын нуазыны дон нӕ уыд (Рац. 17:1–4). Хуыцау израилӕгтимӕ бадзырд куы скодта ӕмӕ йын уыдон дзырд куы радтой, зӕгъгӕ, Йегъовӕ цыдӕриддӕр загъта, уый кӕндзыстӕм, уымӕй дыууӕ мӕйы дӕр нӕма рацыд, афтӕ йӕ закъоны сӕрты ахызтысты ӕмӕ мӕнгхуыцауӕн кувын райдыдтой (Рац. 24:3, 12–18; 32:1, 2, 7–9). Цымӕ афтӕ уымӕн бакодтой, ӕмӕ Моисей хохӕй ӕрӕгмӕ цыд ӕмӕ фӕтарстысты? Моисей та ссыд Хоривы хохмӕ, цӕмӕй Хуыцауӕй дӕс фӕдзӕхсты райстаид. Мыййаг афтӕ хъуыды кодтой, зӕгъгӕ та нӕм амаликӕгтӕ куы ӕрбабырсой, уӕд ӕнӕ Моисейӕ цы кӕндзыстӕм? Уымӕй размӕ израилӕгтӕ амаликӕгтыл фӕуӕлахиз сты, Моисей йӕ къухтыл хӕрдмӕ кӕй хӕцыд, уый фӕрцы (Рац. 17:8–16). Чи зоны хабар афтӕ дӕр уыд. Фӕлӕ йӕ аххосаг цыфӕнды ма уыдаид, израилӕгты «хъусын нӕ бафӕндыд» (Ап. хъ. 7:39–41). Павел чырыстӕтты фӕдзӕхста, цӕмӕй ӕппӕт хъарутӕй архайдтаиккой ӕмӕ израилӕгтау ӕгоммӕгӕс ма суыдаиккой. Уыдон та ӕгоммӕгӕс систы, Зӕрдӕвӕрд зӕхмӕ бацӕуынӕй куы тарстысты, уӕд (Дзут. 4:3, 11).
12. Йесо коммӕ кӕсын куыд сахуыр ӕмӕ афтӕмӕй йӕхи цӕмӕ бацӕттӕ кодта?
12 Фӕлтӕрддзинадмӕ тырнгӕйӕ хъуамӕ нӕ бон цы у, уый аразӕм, цӕмӕй Йегъовӕйы коммӕ кӕсӕм. Йесо Чырыстийы хабарӕй куыд зыны, афтӕмӕй адӕймаг арӕх коммӕ кӕсын сахуыр вӕййы хъизӕмӕртты фӕрцы. (Бакӕс Дзуттӕгтӕм 5:8, 9.) Йесо зӕхмӕ ’рцӕуыны размӕ дӕр йӕ Фыды коммӕ каст. Фӕлӕ цӕмӕй зӕххыл дӕр йӕ Фыды фӕндон ӕххӕст кодтаид, уый тыххӕй йӕ хъуыди бирӕ хъизӕмӕрттӕ бавзарын буарӕй дӕр ӕмӕ удӕй дӕр. Йесо ӕнахуыр зын уавӕрты дӕр коммӕгӕс кӕй уыди, уый фӕрцы «алцӕмӕй ӕххӕст сси» – йӕхи иттӕг хорз бацӕттӕ кодта, Хуыцау ын фидӕны йӕ бӕрны цы хӕстӕ хъуамӕ бакодтаид, уымӕ – Паддзахы ӕмӕ Хистӕр сауджыны хӕстӕ ӕххӕст кӕнынмӕ.
13. Цӕмӕй бӕрӕг у, коммӕ кӕсын сахуыр стӕм ӕви нӕ?
13 Махӕй та цы зӕгъӕн ис? Цымӕ уӕззау уавӕрты куы бахауӕм, уӕд Йегъовӕйы коммӕ цыфӕндыйӕ дӕр фӕкӕсӕм? (Бакӕс 1 Петры 1:6, 7.) Хуыцау нын дӕтты, нӕ цардыл хуыздӕрырдӕм чи фӕзына, ахӕм бӕлвырд уынаффӕтӕ. Зӕгъӕм, уый нын амоны, хӕрзӕгъдау куыд уӕм, нӕ намыс сыгъдӕгӕй куыд бахъхъахъӕнӕм ӕмӕ не ’взагӕй раст куыд пайда кӕнӕм. Хуыцау ма нын дзуры, кӕй хъӕуы Библи кӕсын ӕмӕ йӕ лӕмбынӕг иртасын, стӕй ма ӕмбырды фембӕлдтӕм цӕуын ӕмӕ хорз хабар хъусын кӕнын дӕр (Йес. Н. 1:8; Матф. 28:19, 20; Еф. 4:25, 28, 29; 5:3–5; Дзут. 10:24, 25). Цымӕ ацы хъуыддӕгты Йегъовӕйы коммӕ фӕкӕсӕм, суанг зындзинӕдтыл куы сӕмбӕлӕм, уӕд дӕр? Кӕд коммӕгӕс стӕм, уӕд уый ууыл дзурӕг у, ӕмӕ фӕлтӕрддзинадмӕ тырнгӕйӕ стӕм ӕнтыстджын.
Чырыстон фӕлтӕрддзинад цы пайда у?
14. Ӕрхӕсс цӕвиттон, чырыстон ӕппӕт хъарутӕй фӕлтӕрддзинадмӕ куы тырна, уӕд ӕй уый куыд бахъахъхъӕндзӕн.
14 Чырыстӕттӕ сӕ зонд, раст цы у ӕмӕ цы нӕу, уый ӕмбарын кӕй ахуыр кӕнынц, уый фӕрцы сӕхи хизынц, ацы дунейы «се ’фсарм бынтондӕр [чи] фесӕфта», уыдонӕй (Еф. 4:19). Зӕгъӕм, иу ӕфсымӕр Джеймс тынг аргъ кодта библион литературӕйӕн ӕмӕ йӕ иудадзыг каст. Афтӕ рауад, ӕмӕ кусын райдыдта, ӕрмӕстдӕр сылгоймӕгтӕ кӕм уыд, ахӕм ран. «Ме ’мкусджытӕн сӕ фылдӕр сӕ сӕрмӕ бирӕ цыдӕртӕ хастой, фӕлӕ мӕм сӕ иу ӕфсармджын каст, стӕй йӕ цыма рӕстдзинад дӕр цымыдис кодта. Фӕлӕ иу бон куысты иунӕгӕй куы аззадыстӕм, уӕд мын хъӕбыстӕ кӕнын райдыдта. Ӕз афтӕ фенхъӕлдтон, ӕмӕ хъазгӕ кӕны, фӕлӕ йӕ мӕ бон бауромын нӕ уыд. Растдӕр уӕд мӕ зӕрдыл ӕрлӕууыд иу ӕфсымӕры цӕвиттон „Хъахъхъӕнӕн мӕсыг“-ӕй. Уыцы ’фсымӕрыл дӕр йӕ куысты ахӕм хабар ӕрцыд. Статьяйы фыст уыд Иосиф ӕмӕ Потифары усы тыххӕйb. Ӕз чызджы уайтагъд мӕхицӕй асхуыстон ӕмӕ уый дӕр алыгъд» (Райд. 39:7–12). Джеймс абоны онг дӕр цин кӕны, уӕд йӕхи фыдбылызӕй кӕй бахызта ӕмӕ йӕ цӕсгом сыгъдӕгӕй кӕй баззад (1 Тим. 1:5).
15. Ӕппӕт хъарутӕй фӕлтӕрддзинадмӕ куы тырнӕм, уӕд нын уый нӕ зӕрдӕ куыд фидар кӕндзӕн?
15 Фӕлтӕрддзинад ма нын пайда у нӕ зӕрдӕ, ома нӕ мидадӕймаджы, фидар кӕнынӕн дӕр. Ӕххуыс ма нын кӕны, цӕмӕй нӕ «алыхуызон ӕмӕ ӕцӕгӕлон ахуырӕдтӕ... сӕ фӕдыл ма асайой». (Бакӕс Дзуттӕгтӕм 13:9.) Нӕ уырнындзинад куы фидар кӕнӕм, уӕд ӕппынӕдзух хъуыды кӕндзыстӕм, «ахсджиагдӕр цы у», ууыл (Фил. 1:9, 10). Афтӕмӕй тынгдӕр аргъ кӕндзыстӕм нӕ ахастытӕн Хуыцауимӕ ӕмӕ, нӕ хӕрзӕбонӕн цыдӕриддӕр аразы, уымӕн (Ром. 3:24). «Ӕмбаргӕдзинадӕй... стыр адӕймаджы хуызӕн» чи свӕййы, ахӕм чырыстон сахуыр вӕййы уыцы хъуыддӕгтӕн аргъ кӕнын ӕмӕ Йегъовӕйы хӕлар свӕййы (1 Кор. 14:20).
16. Иу хойӕн цы баххуыс кодта, цӕмӕй йӕ зӕрдӕ сфидар кодтаид?
16 Иу хо Луизӕ ӕргом загъта, зӕгъгӕ, донаргъуыд куы райстон, уӕд цасдӕр рӕстӕг мӕ хъуыдытӕ сӕйраджыдӕр уыдысты, иннӕтӕ мӕм цы цӕстӕй кӕсынц, ууыл. Уый дзуры: «Ӕвзӕрӕй ницы арӕзтон, фӕлӕ мӕ мӕ зӕрдӕ нӕ тардта Йегъовӕйӕн лӕггад кӕнынмӕ. Ӕз бамбӕрстон, цӕмӕй мӕ бон цы у, уый Йегъовӕйӕн дӕттон, уый тыххӕй мӕ мӕхи кӕй хъӕуы фӕивын. Ӕппӕты зындӕр мын уыди Йегъовӕйӕн ӕппӕт зӕрдӕйӕ лӕггад кӕнын райдайын». Луизӕ йӕхиуыл тынг кӕй бакуыста, уымӕ гӕсгӕ йӕ зӕрдӕ сфидар кодта. Афтӕ кӕй бакодта, уый йын стыр ӕххуыс фӕци, уӕззау низӕй куы фӕрынчын, уӕд (Иак. 5:8). Луизӕ загъта: «Мӕ низ мӕ тынг тыхсын кодта, фӕлӕ Хуыцауы ӕххуысы къух хатыдтӕн ӕмӕ йӕм ноджы тынгдӕр баввахс дӕн».
Зӕрдӕйӕ коммӕгӕс су
17. Фыццаг ӕнусы коммӕ кӕсын тынг ахсджиаг цӕмӕн уыди?
17 Павелы уынаффӕ, «ӕппӕт хъарутӕй фӕлтӕрддзинадмӕ тырнут», зӕгъгӕ, фыццаг ӕнусы Иерусалимы ӕмӕ Иудейы цӕрӕг чырыстӕтты фервӕзын кодта. Ацы уынаффӕ йӕ зӕрдӕмӕ чи айста, уыдон уыдысты ӕмбаргӕ ӕмӕ къӕрцхъус. Уый фӕрцы базыдтой, Йесо цы нысаны кой кодта, уый. Уыцы нысан та сын ууыл дзурӕг уыди, ӕмӕ сӕ хӕхтӕм лидзын кӕй хъуыди. «Ӕлгъаг цыдӕр сыгъдӕг бынаты лӕугӕ куы федтой», ома Ромы ’фсад Иерусалимы алыварс куы ’рлӕууыд, ӕмӕ ӕфсӕддонтӕй чидӕртӕ мидӕмӕ цӕугӕ дӕр куы бакодтой, уӕд бамбӕрстой, лидзыны афон кӕй у (Матф. 24:15, 16). Чырыстӕттӕ Йесойы пехуымпар-ныхӕстӕм байхъуыстой ӕмӕ Иерусалимӕй алыгъдысты, цалынмӕ йӕ ромӕгтӕ нӕ ныппырх кодтой, уӕдмӕ. Аргъуаны истори фыссӕг Евсевий куыд ныффыста, уымӕ гӕсгӕ уыдон ӕрцардысты горӕт Пеллӕйы Галаады хӕхбӕсты. Афтӕмӕй сӕхи бахызтой, Иерусалимыл цы бӕллӕхтӕ ’рцыд, уыдонӕй се ’ппӕты ӕвирхъаудӕрӕй.
18, 19. а) Коммӕ кӕсын абон уӕлдай ахсджиаг цӕмӕн у? ӕ) Иннӕ статьяйы дзырд цӕуыл цӕудзӕн?
18 Ӕппӕт хъарутӕй фӕлтӕрддзинадмӕ куы тырнӕм, уӕд ахуыр кӕндзыстӕм коммӕгӕсдзинадыл. Ӕмӕ ууыл баст уыдзӕн нӕ ирвӕзындзинад дӕр, Йесойы пехуымпарад фӕстаг хатт ӕгас дунейыл дӕр куы сӕххӕст уа – «дунейы фӕзындӕй нырмӕ чи никуыма уыд, ахӕм стыр бӕллӕх» куы райдайа, уӕд (Матф. 24:21). «Ӕууӕнкджын... хӕдзармӕгӕсӕг» нын фидӕны ӕвӕстиатӕй исты куы аразын кӕна, уӕд йӕ коммӕ бакӕсдзыстӕм? (Лук. 12:42). Уӕдӕ куыд ахсджиаг у, цӕмӕй «зӕрдӕйӕ коммӕгӕс суӕм»! (Ром. 6:17).
19 Цӕмӕй фӕлтӕрд чырыстӕттӕ суӕм, уый тыххӕй ма хъуамӕ нӕ зонд, раст цы у ӕмӕ цы нӕу, уый ӕмбарын дӕр сахуыр кӕнӕм. Уый нӕ къухы бафтдзӕн, Хуыцауы Ныхас хуыздӕр куы базонӕм ӕмӕ коммӕ кӕсын куы сахуыр уӕм, уӕд. Чырыстон фӕлтӕрддзинадмӕ тырнын уӕлдай зын у ӕрыгӕттӕн. Иннӕ статьяйы дзырд цӕудзӕн, уыцы зындзинӕдты сӕрты куыд ис ахизӕн, ууыл.
[Фиппаинӕгтӕ]
a Иуӕй-иу нӕмттӕ ивд сты.
b Кӕс 1999 азы 1 октябры «Хъахъхъӕнӕн мӕсыг»-ы статья «Мужество сказать „нет“ греху».
Цы базыдтай?
• Цы у чырыстон фӕлтӕрддзинад ӕмӕ цӕй фӕрцы суыдзыстӕм фӕлтӕрд?
• Ӕппӕт хъарутӕй фӕлтӕрддзинадмӕ кӕй тырнӕм, уым нын Хуыцауы Ныхас куыд ӕххуыс кӕны?
• Куыд ахуыр кӕнӕм коммӕ кӕсын?
• Чырыстон фӕлтӕрддзинад цы пайда у?
[Ныв 10 фарсыл]
Зын фарстатӕ лыггӕнгӕйӕ Библийы уагӕвӕрдтӕм гӕсгӕ куы архайӕм, уӕд ӕвдисдзыстӕм, фӕлтӕрд чырыстӕттӕ кӕй стӕм
[Ныв 12 фарсыл]
Фыццаг ӕнусы чырыстӕттӕ Йесомӕ байхъуыстой ӕмӕ удӕгасӕй баззадысты